Epantte 9
Etiini Yekeekhai Enoowerya Woophwanyihani Mireerelo Soohimala!
1. Enrowa wiiraneya exeeni vakhala wi hiyo ‘nnomwattamela Muluku’?
YEHOVA onaaphenta ale ammurumeela. Mwamukokhorela Yehova, owo onrowa woreelihani ninano-va ni muhoolo. Biibiliya onihimya wira: “Mmwattameleke Muluku: Muluku onowattamelani.”—Yakobo 4:8.
2. Ninrowa omwaattamela sai Muluku, ni moota xeeni enrowa aya ohapuwela eyo mmavekelo ahu?
2 Wira mmwaattamele Muluku, nyuwo muntthuneya osoma ni ovarihela muteko Nuulumo nawe. Vaavo munivekela anyu moovarihana ni yotthuna ya Yehova, owo onniwiriyana mavekelo anyu ni onnaakhula. Murummwa muKristau Yohani aalempe so: “Hiyo nosuwela wira Muluku onninìwa nanvekelaka etthu, nanvekelakaru sintthara otthuna wawe. Vano, nisuwelaka wira Muluku onninìwa nanvekelaka etthu, nosuwela-tho wira nokhalana itthu sininvekelahu. Tivó vanimuroromelahu Yowo.”—1 Yohani 5:14, 15.
3-7. Ninrowa ophwanya sai miruku somuluku, nto sinrowa onikhaliherya sai?
3 Ohiya vo, mwamwaattamelaka Muluku, owo onimoovahani miruku wira muthokorerye miyaha sa khuta nihiku. Biibiliya onihimya wira: “Yakhalá mwa nyuwo akina ahirina ankhili, envekele Muluku.”—Yakobo 1:5.
4 Sinrowa wookhaliheryani sai miruku somuluku? Nipuro noopacerya, sinoowerya wookhaliheryani osuwela itthu seiye sihimmuhakalaliha Yehova. Nyuwo munoowerya-tho osuwela nthowa xeeni itthu iyo siry’aya sootthekeya ni ele entthuneya wira musyake opaka itthu iyo. Osuwela nno onoowerya owaakihani mmixankiho sinaaphwanya atthu otheene. Mwa ntakiheryo, wiiwelela malakiheryo a Muluku voohimya sa okhalana makhalelo ooloka a wiixumaaliha onnaakhaliherya arumeyi a Muluku osyaka erukulu yoohiphavela, iretta sinraviwa moorupihanani, ni othela woohihakalaliha aahiiso omwalana.
5 Moota xeeni-tho miruku somuluku sinkela aya wookhaliheryani? Sinoowerya wookhaliheryani ottottela mureerelo munceene wa okumi. Sinoowerya wookhaliheryani opaka soothanla sa miruku mmiyaha sinivareleya muteko, ntoko moota woovarihela muteko saana musurukhu anyu. Munoowerya ophwanya soolukama sootthuneyexa ni okhoottela iye sihirina esisapo ya okathi munceene.
6 Miruku somuluku sinoowerya wookhaliheryani wataana wanyu ni akina. Nyuwo munoowerya okhalana okumi wa etthoko woohakalalexa. Munoowerya opaka ompatthani wa mukhalo, ni wekeekhai ni akina, nave-tho munoowerya okhalana nttittimiho, hataa n’ale ahikhanle arumeyi a Muluku.
7 Ovikana vo, miruku somuluku sinoolokiherya mupuwelo anyu voohimya sa okumi. Iya sinimookhaliheryani oxintta mixankiho ni sookhulumula sa okumi. Nave-tho, munokhalana mupuwelo woowereryaneya, ni wooloka voohimya sa muhoolo. Mupuwelo owo wooloka, mweekwaha aya, onookhaliherya okumi anyu wa mupuwelelo ni werutthuni.—Miruku 14:30; Yesaya 48:17.
8. Mwamurumeela Muluku, exeeni ehinrowa anyu woovaka?
8 Mwamurumeela Muluku a ekeekhai, munootaphuwa woova onaaxankiha atthu anceene ahimmurumeela owo. Okhala wira nyuwo moosuwela wi alipa-ookhwa kakhanle akumi omahiye, khimunrowa owoovaka ale akhwiiye. Mwaha wookhalana nroromelo wa natiri a Muluku a ohihimuxiwa wa alipa-ookhwa, khimunrowa woovaka okhwa. Nto mwaha woosuwela wira Muluku ta owerya wotheene, khimunrowa woovaka oloiwa aahiiso waawiwa.—Yohani 8:32.
Anaxariya Animwaakhela Elapo
9-11. Tanii anrowa okhalaka mParayiisu, nto tanii ahinrowa okhalaka?
9 Nyuwo mamwaattamela Muluku, khimunrowa woovaka muhoolo. Ntoko noonalya ahu, Biibiliya aahihimya vahinatthi mixankiho sinceene sinoona ahu olelo valaponi. Yehova onninleela wira itthu iyo sinoovira; moohipisa Omwene wa Muluku onrowa otatuxa elapo ela wira ekhalee eparayiisu.—Luka 21:10, 11, 31; 23:43.
10 Paahi ale animwaattamela Yehova ni omurumeela anrowa okhalaka mParayiisu. Biibiliya onihimya so: “Atakhali anorimela nananoru: nyuwo munimwaphavela, muhaphwanyé. Vano atthu òmàla anoreriwa vathí-va: anokhala-mu ni murettele womalela.”—Esalimo 37:10, 11.
11 Ale moothipelela anrowa okhootta wiiwelela malamulo axariya a Muluku anrowa oyeleela okumi moomalela. (2 aTesalonika 1:8, 9) Khanrowa okhala-tho. Awo anrowa otakaahana ni Satana ni axetwani awe mu okhwa woohimala. (Wisupulula 20:10, 14) Masi ale amphiyerya omusuwela Yehova ni omurumeela anrowa okhalana ohakalala wulupale mParayiisu valaponi.
Muhoolo Moohakalaliha!
12. Exeeni Biibiliya enilavula awe voohimya sa muhoolo?
12 Yehova onnaasukerya itthu soohakalaliha ale animphenta! Nwehe paahi yeele enilavula aya Nuulumo nawe voohimya sa okumi mParayiisu valaponi:
● Soolya sinceene: ‘Mmatta mothene munrowa oruwerya solya sinjene: mattumuxa anrowa osareya iphyó.’—Esalimo 72:16.
● Ipa sooloka: “Atthu awo anrowa oteka ipa saya, ekhaleke memmo.”—Yesaya 65:21.
● Muteko woohakalaliha: “Atthu aka animolya mihokorokho sihawenlyaya. Awo khanrowa-tho ovara muteko mahala.”—Yesaya 65:22, 23.
● Iretta khisinrowa okhala: “Mw’atthu ankhala mmuttettheni khavo-tho onkela ohimya wira: ‘Miyo ki muretta.’”—Yesaya 33:24.
● Orakala khonrowa okhala: “Mahiku awo anotthukuwa maitho a alipa-òhona, anotthukuwa màru a alipa-òhiwa; alipa-òtuthunya anotupha ntoko nahe: alipa-òhilavula anokhuwela n’utteliwa murima.”—Yesaya 35:5, 6.
● Khonrowa okhala ohaawa, nnakhala oriipiwa murima, nnakhala okhwa: “[Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira.”—Wisupulula 21:4.
● Ekhotto khenrowa okhala: ‘[Muluku] òmaliha ekhotto.’—Esalimo 46:10.
● Okumi woohimala: “Anaxariya animwakhela elapo yohiyeriw’aya: anrowa okhalaka-mo mahiku othene.”—Esalimo 37:29.
13. Tanii paahi oniwerya otatuxa elapo ela okhala eparayiisu, nthowa xeeni-nto?
13 Apinaatamu khiyaakela owerya wiira itthu iyo, masi Yehova ookhalana owerya wa wiira itthu sotheene sinihimya awe wira onoopaka. Khiivo enkela omukhoottiherya opaka eniphavela awe wiira. Biibiliya onihimya so: “Vekekhai, khivo etthu Muluku enojelawe.”—Luka 1:37.
14. Munkela ophwanya sai nyuwo ephiro ya okumi woohimala?
14 Orweela mwa Anamoona awe, Yehova onnaavaha okathi atthu a elapo yotheene wira ‘avireke mukhora wophunyeya’ ni weetta ephiro eniroiha wookumini woohimala. Mukhalee eriyari ya atthu oohakalala aneemererya olattuliwa nno. Mweetteleke etiini yekeekhai ni mukhalane nreeliho na Yehova mwa mahiku otheene!—Mateyo 7:13, 14.
[Elatarato yuulupale epaaxina 31]