Ireferensia sa Okumi ni Orummwa Ahu Ekaderno Enirumeeliwa Omuthukumanoni
© 2025 Watch Tower Bible and Tract Society of Pennsylvania
7-13 YA JULHO
MIHAKHU SINIKHUMA MBIIBILIYANI
Malakiheryo Anikhaliherya Ekasamento Okhala Yoohakalala
Owehaweha 15/10/2003 epaax. 4 etti. 5
Moota Woopaka Soothanla Mwa Miruku
Opaka soothanla mwaakhuveyasaka, pooti wooniherya wiira khamurina miruku. Eliivuru ya Miruku 21:5 enihimya so: “Apalano a mutthu orina ankhili anneetta saana, Masi atthu ootheene ookhummwa murima, anoohaawa”. Mwa ntakiheryo, amiravo asivelanne ahaana oviriha okathi wiira awehe akhala wiira anoothelana aahiiso nnaari. Yaahiire siiso, pooti okhumelela ele aahimmye awe mwinkeleexi mmosa oniitthaniwa William Congreve, yoowo aapaka iteatro a eseekulo 18. Owo aahimmye so: “Ole onaakuvela othela, onimwiikhupanyerya mwa okathi munceene”.
Despertai! 07/2008 epax. 7 etti. 2
Moota wookhalana etthoko yoohakalaliha
Mukhaleke Oowiiyeviha. ‘Muhiireke itthu mphavelaka oxinttana wala wiittottopa, nto mwiiyeviheke, khula mutthu awooneleke vatthu akhwaawe ovikana mmensawe’. (aFil 2:3) Ohiiwanana onikhumelela ikasamento sinceene, oniireya mwaha woowi atthu awo ta oruttu. Okhala wiira khula mutthu khoniphavela weemererya wiira oovonya, nave khoniiyeviha para okhweiherya itthu. Okathi owo vannireerela okhala oowiiyeviha maana onimookhaliheryani ohiphavelaka okathi wootheene okhalana erasawu.
Owehaweha 15/9/2006 epaax. 28 etti. 13
“Mutteeliweke Murima ni Muthiyana Muthelanne Anyu Okhuma Emiravo Anyu”
13 Etthu xeeni anamathelana ekhanle aya oopaka akhala wiira khanithokoreryana saana mukina ni mukhwawe? Wiira aphuke muxankiho aya onipirisari wiimananiha. Mwa ntakiheryo, akhala wiira anamathelana khanilavulihana saana, eyo pooti ohononaka ekasamento aya. (Mir 12:18) Miruku sa mbiibiliyani sinihimya so: “Fataari okhala moothakoni, Ohiya okhala ni muthiyana oonyakulihana ni oonyoonyiha”. (Mir 21:19) Akhala wiira mwa muthiyana ootheliwa mwiikoheke so: ‘Kiireke mukhalelo aka onnimwiiriha iyaka ohiphavela oviriha okathi munceene ori ene ni miyo?’ Aahimmyaka alopwana oothela Biibiliya onihimya so: “Muhihiye waaphenta amwaarinyu ni muhaaviruweleke”. (aKol 3:19) Akhala wiira mwa mulopwana oothela, mwiikoheke so: ‘Kiireke mwaaraka onniphavela nikhaliheryo na atthu akina mwaha woowi ka mutthu oowaakuva oveeheya?’
Itthu sa Efaita sa Mbiibiliyani
Owehaweha 15/1/2005 epaax. 17 etti. 9
Soowoonihiwa sa Omwene wa Muluku sinnikhala seekeekhai
9 Olelo-va, Yesu kahiyo pinaatamu onwenle mwaaxaana a puuru, masi Mwene oowerya. Owo onnihimmwa owenle ene ekhavalo, yeeyo mbiibiliyani enithoonyerya ekhotto. (Mir 21:31) Wiisuupulula 6:2 onihimya so:“Vano, kaahiweha ekhavalo yootteela. Ole aakilanthi vakhavaloni-vo, aahikuxa muura, nave aahivahiwa ekhara. Owo aahivenya wira axintteke ni amalelihe oxintta wawe”. Nave nasaalimo Davidi omuhimyaka Yesu olempe so: “Yehova onimuncererya owerya wanyu okhuma oSiyoni mpakha mapuro makina. Owo onimooleelani wiira: ‘Mulamuleleke eriyari ya awanani inyu’”. — Esa 110:2.
14-20 YA JULHO
MIHAKHU SINIKHUMA MBIIBILIYANI
Malakiheryo Ooloka Anikhaliherya Waahuwa Anamwane
Owehaweha 10/2020 epaax. 27 etti. 7
Niireke Mwaninyu Annuwa Vale Onoomurumeela Muluku?
7 Akhala wira moothela wala mootheliwa ni muniphavela waayara anamwane, mwiikoheke so: ‘Niireke naatthu oowiiyeviha ni ninnimphenta Yehova ni Nuulumo nawe? Niireke Yehova aamunithanla wira nimukhapelele mwaana?’ (Esa 127:3, 4) Akhala wira mwa namuyari mwiikoheke so: ‘Kiireke kinniwiixuttiha anaaka osuwela ovara muteko?’ (Mu 3:12, 13) ‘Kiireke kinniimananiha waakhapelela anaaka wira sihaakhumelele ihasara soowoopiha ni sootakhala sinikumiheriwa ni olumwenku ola wa Satana?’ (Mir 22:3) Ekeekhai wiira khamunrowa owerya waakhapelela aniinyu mixankiho sootheene sinrowa waakhumelela. Maana khivaniweryaneya opaka eyo. Masi nyuwo pooti waakhaliherya aniinyu ovilela mixankiho sa mookumini, nwiixuttihaka moophenta ororomela miruku sa Nuulumo na Muluku, Biibiliya. (Musome Miruku 2:1-6.) Mwa ntakiheryo, akhala wira ookhala mmusi anyu ohiyale omurumeela Yehova, nwiixuttiheke aniinyu efaita erina aya ororomeleya wa Yehova murumeelaka matakiheryo a mBiibiliyani. (Esa 31:24) Nave akhala wira ohookhwa mutthu mwamphenta anyu, nwooniherye aniinyu iveersu sa mBiibiliyani sinrowa waakhaliherya oxintta oriipiwa murima ni ophwanya murettele. — 2 aKo 1:3, 4; 2 Ti 3:16.
Owehaweha 12/2019 epaax. 26 itti. 17-19
Anamuyari nwiixuttiheke aniinyu okhuma enamwane aya
17 Nwiixuttiheke aniinyu nlelo ayenve ene. Owiixuttiha anamwane nlelo ari ene acikhaani etthu yooloka. (Mir. 22:6) Nkahaya mmuupuwele Timootheyo, yoowo nuumala wunnuwa aapanke mikwaha sa omisionaario ni murummwa Paulo. Maama awe Timootheyo Eunisi ni piipi awe iihaniwa Loide yaahimwiixuttiha “okhuma enamwane” awe. — 2 Tim. 1:5; 3:15.
18 Anamathelana akina a oCosta do Marfim, Jean-Claude ni Peace aawerya waahuwa anamwane 6 wira amphenteke ni omurumeela Yehova. Exeeni yaakhalihenrye okhumela saana? Awo yaahitthara ntakiheryo na Eunisi ni Loide. Awo anihimya so: “Hiyo naanaalakiherya aniihu Nuulumo na Muluku okhuma enamwane aya. Naapacenrye eyo ayariwakaru”. — Otum. 6:6, 7.
19 Ontaphulela exeeni ‘walakiherya’ anamwane Nuulumo na Yehova? ‘Olakiherya’ ontaphulela ‘otthikela (olavula etthu emosaru) ikwaha sinceene’. Wira apake eyo anamuyari ahaana oviriha okathi ari ene ni anaaya. Okathi mukina pooti oxankiha omakela otthikela waalakiherya anaaya itthu simosaru. Masi, anamuyari ahaana wiimananiha woona eyo ntoko eparakha wira yaakhaliherye anaaya wiiwexexa ni ovarihela muteko Nuulumo na Muluku.
Owehaweha 1/4/2006 epaax. 9 etti. 4
Anamuyari — Mukhaleke Ntakiheryo Nooloka Para Aniinyu
Okhala wene, anamwane anipaka itthu voonamwane-vo, nave ikwaha sikina, awo anneererya okhala oothipelela ni oohitthuna oleeliwa. (Map 8:21) Etthu xeeni anamuyari akhanle aya oopaka? Biibiliya onihimya so: “Okhala wene, anamwane aniphavela opaka itthu ahooniheryaka ankhili, Masi ekopo ya ottaruxa enimwaakhaliherya opaka itthu ni ankhili”. (Mir 22:15) Atthu akina anuupuwela wiira eyo etthu yootakhala aahiiso khenipirisari. Masi Biibiliya khoneemererya otakhala ni khula etthu enivarihana ni waahasula atthu akina. “Ekopo”, nnaamwi ikwaha sikina etaphulelaka omana, ennooniherya okhulupale orina awe namuyari wa omuttharuxa mwanawe mwa enamuna yoophenta. Eyo enooniherya wiira anamuyari awo annimphenta mwanaya ni aniphavela omukhaliherya osuwela wiira etthu onipaka awe khelonke. — aHe 12:7-11.
Itthu sa Efaita sa Mbiibiliyani
Owehaweha 08/2021 epaax. 22 etti. 11
Muhakalaleke ni Eparakha Murina Anyu
11 Akhala wira nnimwiimananiha ovara oratteene khula muteko ninvahiwa ahu mmutthenkesoni mwa Yehova, nnoohakalalaka vanceene. ‘Mukhaleleke nthiti’ muteko woolaleerya ni mwiimananiheke ovara miteko sikina sa mmulokoni. (Mit 18:5; aHe 10:24, 25) Muroweke omuthukumanoni mwiilokihenrye ene oratteene wira nvaheke ikomentaario soolipiha. Nave mpakeke oratteene mipantta munithanleliwa anyu mithukumano sa eriyari ya esumana. Akhala wira axitokweene annoovekelani ovara muteko mmulokoni, mpeheryeke ni muroromeleyeke. Muhuupuweleke wira khivanireerela oviriha okathi nvaraka muteko nvekeliwe anyu. Okathi wootheene mwiimananiheke olokiherya itthu munisuwela anyu. (Mir 22:29) Vaavo munrowa anyu wiimananihaka ovara muteko, munookhalana waataana wooloka ni Yehova ni munoohakalalaka vanceene. (aGa 6:4) Nave eyo enimookhaliheryani ohakalala vaavo atthu akina anivahiwa aya eparakha yeeyo nyuwo mwaaphavela anyu vanceene. — aRo 12:15; aGa 5:26.
21-27 YA JULHO
MIHAKHU SINIKHUMA MBIIBILIYANI
Malakiheryo Ooloka a Moota Woowurya Eviinyu
Owehaweha 1/12/2004 epaax. 19 itti. 5-6
Mukhalaneke moonelo wooloka voohimya sa eviinyu
5 Ankhi vakhala wiira mutthu onniwerya owurya eviinyu yinceene masi ohinahapaliwa? Atthu akina khanooniherya wiira aahapaliwa hata awunryeene vanceene. Masi akhala wiira mutthu owo onuupuwela wiira kahiyo vootthekeya opaka eyo, oniiwoka mmansawe. (Yer 17:9) Woonasa wene, pooti ohiweryaka oviriha okathi munceene muhiwunrye eviinyu aahiiso opakeya ‘epottha ya eviinyu’. (Tit 2:3) Olavulaka sa mutthu onipacerya vakhaani-vakhaani opakeya epottha ya eviinyu, namalepa mmosa oniitthaniwa Caroline Knapp ohimmye so: “Eyo eniiraneya vakhaani-vakhaani nave mutthu pooti ohiwerya wiikhapelela”. Mweekeekhai owurya vanceene eviinyu murakho muulupale okhanle ookumiherya mixankiho!
Perspicaz vol. 1 epaax. 304
Owurya Vanceene ni Ohapaliwa
Biibiliya onnikhoottiha. Owurya mootepana mpakha ohapaliwa, onnikhoottihiwa mbiibiliyani. Musuweli olempe eliivuru ya Miruku, onnilavula sa itthu siniiraneya akhala wiira enniwuriwa evinyu mootepana. Owo onihimya so: “Ti pani onihaawa? Ti pani onixanka? Ti pani oninyakulihana? Ti pani oniikhupanyerya? Ti pani orina makhwatta vahikhanle mulattu? Ti pani orina maitho ooxeerya? Taale aniviriha okathi munceene awuryaka eviinyu, Taale aniphavelasa eviinyu yoowaawa. Muhiwehe oxeerya wa eviinyu, Okathi enooniwa aya oreera ni okathi enooniwa aya osiva yaawuriwaka, Okhala wiira wookiseryani waya, eyo enniluma ntoko enowa, Nave eveneno aya enlikana ni eveneno ya evili. Maitho anyu anrowa owehaka itthu soohiirya, Nave murima anyu onrowa ohimyaka itthu sootakhala”. — Mir 23:29-33; Ho 4:11; Mat 15:18, 19.
Itthu sa Efaita sa Mbiibiliyani
Owehaweha 11/2018 epaax. 4 itti. 4, 5
Muthume Ekeekhai ni Muhitumihe
4 Musome Miruku 23:23. Nihaana wiimananiha wira niixutte ekeekhai ya mBiibiliyani. Nto eyo enivekela oleva itthu sikina. Nuumala othuma “ekekhai”, eyo piiyo, wiixutta ekeekhai, nihaana ovaha ephoole wira nihikhala-khale nitumihaka, niire so, ohiya. Ninrowa othuma sai ekeekhai ya mBiibiliyani? Ekeekhai eniliviwa musurukhu mikavi? Waakhuliwa wa makoho ala, onoonikhaliherya otepa ovaha efaita ekeekhai ni oniiriha olakela ohihiya ekeekhai. Nave onoonikhaliherya woona nthowa naya ekeekhai ya Yehova eri aya yootepa otthuneya ovikana itthu sotheene.
5 Hata etthu eyo eri ene ya mahala, khentaphulela wira munoophwanya muhipanke etthu. Nuulumo na eHeeberi nri Miruku 23:23, nitaphuleliwe ni aBiibiliya akina noowi othuma, pooti-tho otaphulela “ophwanya”. Moolumo ala, antaphulela wira mutthu ohaana wiimananiha aahiiso oleva etthu, wira ophwanye ele onoona awe okhala yootthuneya. Wira niiwexexe moota woothuma ekeekhai, nrowe nuupuwele ela: Nkahaya muupuwele wira omerkaatu enikaiwa enika. Niireke enika eyo enimoorwa mekhaya-ru vate vahu? Nnaari. Maana nihaana orowa omerkaatu wira navahiwe enika eyo. Tivonto, nnaamwi enika ele evahiwaka mahala, hiyo nihaana wiimananiha wira nrowele. Vamosaru, hata nihilivaka etthu wira niixutte ekeekhai, nihaana wiimananiha ni oleva itthu sikina.
28 A JULHO–3 A AGOSTO
MIHAKHU SINIKHUMA MBIIBILIYANI
Mwiilipiheke Sihinatthi Woophwanyani Mixankiho
Perspicaz vol. 2 epaax. 643 etti. 16
Olupatthiwa
Makristau annuupuwelela etthuvo asukeriwa aya ale anivilela okathi anilupatthiwa aya. Olavulaka sa etthuvo eyo, Yesu aahimmye so: “Oohakalala taale anlupatthiwa mwaha wa exariya, okhala wira Omwene wa wiirimu ti wawaya.” (Mat 5:10) Osuwela nlipelelo na ohihimuxiwa vamosa ni ole onileiherya, onnilipiha. Onninivaha ikuru wiira nikhale oororomeleya wa Muluku hata niphavelaka wiiviwa ni atthu ootakhala. Mwaha wa waamini waya mukuttho wa Yesu, awo anootthuveliwa mwaha wa ohaawa waaphwanye. (aHe 2:14, 15) Ti vooloka mukristau okhala oororomeleya okathi woolupatthiwa. “Muhihiye okhalana muupuwelo ni moonelo ola, yoowo aarina awe Kristu Yesu . . . aahiiwelela mpakha okhwa, mpakha okhwa vamwirini wa nihaaxeryo”. (aFi 2:5-8) “Mwaha wa etthu yootteeliha murima aalipelela awe waakhela, aahivilela okhwa vamwirini wa nihaaxeryo, nnakhala khuuliwe muru”. — aHe 12:2; nave-tho munwehe 2 aKo 12:10; 2 aTe 1:4; 1 Pe 2:21-23.
Owehaweha 15/12/2009 epaax. 18 itti. 12-13
Muhihiye okhala mutthu oohakalala hata soophwanyakani mixankiho
12 Eliivuru ya Miruku 24:10 enihimmya so: “Mwakhulumuwa okathi wa mixankiho, Ikuru sanyu sinoovukuwa”. Miruku sikina sinihimya so: “Oxankiheya onnimwiiriha mutthu oriipiwa murima.” (Mir 15:13) Makristau makina annikhulumuwa nnakhala ahinawerya opaka yoosoma aya ya Biibiliya. Awo khaninvekela Yehova ni anniivalaanya ni anna ni arokora. Moohaanyiherya, okhulumuwa mmukhalelo wa omunepani pooti okhala etthu yoowoopiha. — Mir 18:1, 14.
13 Okhalana moonelo wooloka onninikhaliherya owehexexa itthu sa mookumini mwahu seiyo sinniriha ohakalala ni oxukhurela ele nrina ahu. Davidi aalempe so: “Muluku aka, okisivela vanceene opaka etthu muniphavela anyu”. (Esa. 40:8) Okathi itthu sihineetta aya saana mookumini mwahu, nihikhalakhale nihiyaka omukokhorela Yehova. Mweekeekhai, murette para omaliha oriipiwa murima, ori oviriha okathi nivaraka miteko sinikumiherya ohakalala. Yehova onninleela wiira naaphavelaka okhala oohakalala, nihaana omusoma Biibiliya ni otokosa ele enisoma ahu. (Esa 1:1, 2; Yak 1:25) Mbiibiliyani ni omithukumanoni ninniiwa “Moolumo ooreera”, yaawo akhanle oonimaaliha ni ootteeliha murima ahu. — Mir 12:25; 16:24.
Owehaweha 12/2020 epaax. 15
Makoho Anikohiwa ni Ale Anisoma Irevista Sahu
Miruku 24:16 onihimya so: “Naxariya, amorá imara thanu na pili, onnivenya”. Niireke eversiikulu ela enimuhimya mutthu onipaka etampi ikwaha sinceene onaleveleliwa ni Muluku?
Ohimya ekeekhai eversiikulu ela khenihimya yeeyo. Ohiya-vo, eversiikulu ela nuulumo noowi ‘omora’ onihimmwa okhalana mixankiho ni ‘ovinya’ onihimmwa ohikhulumuwa.
Tivonto Miruku 24:16 khoniphavela ohimya ‘omora’ mwaha wa opaka etampi. Masi onihimya oviriha mixankiho ikwaha sinceene. Olumwenku ola wootakhala, anaxariya annikhalana mixankiho sinceene ohela muhina owereyasiwa wala okhalana mixankiho sikina. Nave owo pooti olupatthiwa vanceene ni ikuvernu. Hata vari siiso, owo onnikupali ni murima wotheene wira Muluku onoomukhaliherya ni okhumela saana vaavo onivilela awe mixankiho soovirikana. Nto mwiikoheke so: ‘Ikwaha ikavi kiniwehaka itthu siweettelaka saana arumeyi a Yehova?’ Mwaha wa xeeni eyo eniiraneya aya? Mwaha woowi, hiyo ninnikupali ni murima wotheene wira Yehova ‘onnavarela ale anikwattuliwa: Onnavenxa ale ammora’. — Esa 41:2-4; 145:14-19.
Itthu sa Efaita sa Mbiibiliyani
Owehaweha 15/10/2009 epaax. 12
Makoho Anikohiwa ni Ale Anisoma Irevista Sahu
Okathi wa Biibiliya, akhala wiira mulopwana aaphavela othela, aahaana wiikoha so: ‘Nuumala othela niireke kinoowerya omukhapelela mwaaraka vamosa ni anaaka?’ Ohinatti okhalana emusi, owo aahaana ovara muteko munceene ntoko olima. Abiibiliya anceene olelo-va, anitaphulela eversiikulu ela mwa enamuna yookhweya wiiwexexa: “Mpaceryeke olokiherya miteko sa vate ni itthu sootheene mmatta, Nuumala-vo, mutekeke empa anyu.” Niireke malakiheryo ala olelo-va annivareleya muteko?
Aayo. Mulopwana oniphavela othela ohaana wiilokiherya toko saana. Vaaweryaneyaka ohaana ovara muteko. Ekeekhai wiira mulopwana oothela ohaana okhapelela emusi awe, masi ohiya mukhalelo wa weerutthuni paahi. Biibiliya onihimmya wiira mulopwana ohinikhapelela emusi awe, ohinivaha itthu sa weerutthuni, ohinikhaliherya emusi awe mukhalelo wa omunepani, mutthu owo t’òtakhala murima onvikana mutthu ohinaamini. (1 Ti 5:8) Nto okathi mmiravo oniilokiherya awe wiira othele wala okhalane etthoko, owo ohaana wiikoha so: ‘Niireke kinoowerya olyiha emusi aka? Niireke kinoowerya okhaliherya emusi aka mwa enamuna ya omunepani? Kinoowerya ohoolela yoosoma ya Biibiliya khula esumana ni emusi aka, ohela muhina waasomiha anaaka?’ Nuulumo na Muluku ninnittittimiherya efaita erina aya miritti iya sootepexa okhalana efaita. — Otu 6:6-8; aEef 6:4.
Mmiravo oniphavela othela ohaana wuupuwelela oratteene malakiheryo ari Miruku 24:27. Mwa enamuna emosa-ru, mwali onimwiira saana akhala wiira onimwiikoha akhala wiira ori oolikana ene okhala muthiyana ootheliwa ni maama. Anamathelana amiravo, pooti wiikoha makoho ala akhala wiira annuupuwelela okhalana anamwane. (Luk 14:28) Otthara malakiheryo ala, annaakhaliherya arumeyi a Yehova osyaka otepexa oxankiheya ni waakhaliherya okhalana etthoko yoohakalaliha.
4-10 YA AGOSTO
MIHAKHU SINIKHUMA MBIIBILIYANI
Malakiheryo a Mbiibiliyani Annikhaliherya Olavula Mwa Enamuna Yooloka
Owehaweha 15/12/2015 epaax. 19 itti. 6-7
Murumeeleke Saana Moolumo Anyu
6 Moolumo ari Miruku 25:11, annooniherya otthuneya waya othanla okathi onireerela olavula. Yoolepa eyo enitthokiherya wira moolumo ooreera anilavuliwa okathi wooreera anlikana ni maçã a weero aheliwe mparathoni mwa eparatha. Maçã a weero yaamureeraka oweha. Yaamutepa oreera akhala wira aheliwe mparathoni mwa eparatha. Vamosaru, othanla oratteene okathi onireerela olavula, onimwiiriha moolumo ahu okhala oovara murima. Moota xeeni?
7 Akhala wira ninlavula okathi woohireerela, atthu pooti ohiiwa wala oheemererya ele enilavula ahu. (Musome Miruku 15:23.) Mwa ntakiheryo, Mweeri wa Marso, 2011, yaahikhumelela etetere ni tsunami muulupale aahononne mittetthe sinceene oJapão. Yaahikhwa atthu oovikana 15.000. Nnaamwi Anamoona a Yehova a mittetthe iye yaaphwanyiwe-tho ni ehasara eyo, awo yaahittottela mureerelo okathi owo wira yaalipihe atthu ale ni muhupi wa Biibiliya. Atthu anceene a muttetthe ole annivarexexa soolema sa eBudista ni khanimusuwela saana Biibiliya wala animusuwela vakhaani. Nto annihu yaahoona wira ole khahiyo waari okathi wooreerela waaleela atthu ale yaakhweliwe, nlipelelo na ohihimuxiwa alipa-ookhwa. Masi yaahirumeela okathi ole wira yaalipihe mwa enamuna ekina ni waatthokiherya nthowa naya itthu sootakhala sinaakhumelela aya atthu ooloka.
Owehaweha 15/12/2015 epaax. 21 itti. 15-16
Murumeeleke Saana Moolumo Anyu
15 Vannitthuneya othanlela enamuna yooreerela olavula. Okathi Yesu aalavunle awe muSinagoga ya oNazarethi, atthu ‘yanithamala mwaha wa masu èparakha yakhuma mwano mwawe’. (Luk 4:22) Moolumo ooreera annivara murima wa mutthu onilavulana ahu. Moolumo siiso, pooti owiiriha atthu weemererya ele enihimya ahu. (Mir 25:15) Nnoowerya omutakiha Yesu naalavulihaka atthu mooreerela murima ni othokorerya muupuwelo aya. Okathi omosa, Yesu aahaamorela ikharari atthu yaarwaale onwiriyana, nto “ahipajerya owixuttiha itthu sinjene”. (Mar 6:34) Hata okathi aaruwaniwa awe, Yesu khaaruwanne atthu awo. — 1 Ped 2:23.
16 Ikwaha sikina vannivila waalavuliha mooreerela murima atthu naalimalenle ahu, vanceenexa amusi wala apatthani mmulokoni. Pooti wuupuwelaka wira khivanitthuneya okhalana ephoole moota onilavulana ahu atthu awo. Niireke Yesu aanuupuwela wira, atthuna vale, pooti waalavuliha awiixutti awe moohireerela? Nnaari! Okathi yoole arummwa awe yaanyakulihana aya aphavelaka okhulupale, Yesu aahaattaruxa mooreerela murima ni aahirumeela nlikanyiho na mwaana. (Mar 9:33-37) Axitokweene ahaana omutakiha Yesu, nto avaheke miruku ‘mopixa murima’. — aGa 6:1.
Owehaweha 01/04/1995 epaax. 17 etti. 8
Ninrowa Otumereryana Sai Wooniherya Ophenta ni Miteko Sooreera?
8 Vaavo nimmurumeela ahu Muluku, ootheene ahu pooti otumereryana mukina ni mukhwaawe ni ntakiheryo nahu. Mweekeekhai, Yesu aahaatumererya ale yanwiriyana. Owo aaniphenta muteko woowiixuttiha atthu ihapari sooreera. Aahihimya wiira yoolya awe opaka yootthuna ya tiithi awe. (Yoh 4:34; aRo 11:13) Tthiri mukhalelo owo ti wooreera. Niireke munoowerya opaka eyo okathi woolaleerya? Muhaana osyaka mukhalelo wa ophavela osuwela itthu mmansinyu, nto muhaana waaxuttiha atthu akina mmulokoni itthu munisuwela anyu. Vaavo munaalattula anyu atthu akina wiira nvareke muteko hoothe, mmananiheke waakhaliherya wiira asiveliweke ovaanela ni atthu akina voohimya sa Mpattuxa ahu Muulupale Yehova. — Miruku 25:25.
Itthu sa Efaita sa Mbiibiliyani
Perspicaz vol. 1 epaax. 379
Omaala
Mutthu oomaala, onnooniherya wiira ookhalana waamini ni mukhalelo owo ti wa atthu oohilosowa. Mutthu owo khonaakuva opaceya aahiiso opaka itthu ohuupuwenle saana. Mutthu ohirina mukhalelo ola toohiroromela, tootakhala, khorina waamini nnakhala nlipelelo ni toowaakuwa onyoonyiheya. Elavulaka sa mutthu oohimaala, eliivuru ya Miruku enihimya so: “Ntoko siisaale epooma yoopwexiwa ehirina ixiri, Ti siiso siri awe mulopwana ohiniwerya wiikasoopa.” (Mir 25:28) Mutthu oohimaala, onnikuxeya ni khula etthu, ni vannikhweya opaka itthu soohiloka.
11-17 YA AGOSTO
MIHAKHU SINIKHUMA MBIIBILIYANI
Muhaataaneke ni “Mulolo”
Perspicaz vol. 1 epaax. 485 etti. 9
Epula
Okathi. Elapo yooleiheriwa okathi wooviha ni wooriirya, waanithokoreriwa ntoko okathi wa elimwe ni okathi wa epula. (Nwehe Esa 32:4; Nsi 2:11) Okhuma mweeri wa Abril mpakha Outubro, enirupa epula vakhaani. Okathi woohepha, vannixankiha orupa epula. Eliivuru ya Miruku 26:1 ennooniherya wiira, okathi woohepa epula khenirupa vanceene. (Munwehe 1 Samuel 12:17-19.) Hata ori ene okathii wa epula, mahiku makina khenirupa epula maana ninnoopa nsuwa. Okhala wiira okathi owo enirupa aya epula ti wooriirya, eyo ennimwiiriha mutthu otepa woona oriirya. (Eez 10:9, 13) Okathi owo, opuro wooviha, onnitepa oreera. — Yes 4:6; 25:4; 32:2; Yoob 24:8.
Owehaweha 01/10/1987 epaax. 19 etti. 12
Ottharuxiwa onnikumiherya mireerelo
12 Atthu akina pooti opirisariki ottharuxiwa mwa enamuna yoowereya ntoko onihimya awe Miruku 26:3: “Murepettho onrumeeliwa para ekhavalo, mukhoyi onrumeeliwa para mwaapuuru, Nave ekopo enrumeeliwa para omaniwa ettuli ya alolo.” Ikwaha sikina, Yehova aanaahiya aIsarayeli ahaawaka mwaha wa mixankiho yaikumiherya aya: “Awo khiyiiwelenle nuulumo na Muluku; Ni khiyaattittiminhe miruku sa Muluku Muulupalexa. Tivonto, aahihiya wiira saakhumelele mixankiho wiira yiiyevihe; Awo yaahikwattuliwa, nto khuuvo aawenrye waakhaliherya. Okathi yaaxankale aya, yaahinvekela Yehova wiira aakhaliherye; Owo aahiwoopola mmixankihoni mwaya.” (Esa 107:11-13) Alolo akina annithipelela opaka itthu soohiloka hata attharuxiwaka ikwaha sinceene: “Mutthu onthipelela opaka itthu soohiloka nuumala ottaruxiwa ikwaha sinceene, Onoopwetexiwa mootutuxerya ni khivankhala murette”. — Miruku 29:1.
Perspicaz vol. 1 epaax. 580 etti. 10
Otuthunya aahiiso Orakala
Etthokiheriwaka eliivuru ya Miruku. Mwene Salomooni aahimmye so: “Ntoko siisaale mutthu oniikittha inawu sawe onaikumiherya mixankiho, Ti siiso siri awe mutthu onimuroromela mulolo wiira omuhiyerye itthu sawe”. Ole onimuroromela mulolo wiira okhapeleleke itthu sawe, oniikhumiherya mixankiho mekhawe. Mweekeekhai, akhala wiira nimmuhiyerya mulolo miteko sanyu, itthu kasinrowa weetta saana — Mir 26:6.
Itthu sa Efaita sa Mbiibiliyani
Perspicaz vol. 2 epaax. 1140 etti. 6
Mulolo
Omwaakhula mulolo ‘moovarihana ni ololo awe’, eyo piiyo, otakiha enamuna onipaka awe itthu ni onuupuwela awe, onnimwiiriha mutthu owo onimutakiha okhala mulolo. Wiira nihikhale alolo, eliivuru ya Miruku ennilopola so: “Muhimwaakhule mulolo ni elolo awe”. Nave Miruku 26:4,5 onnooniherya wiira pooti okhala va miruku ‘omwaakhula mulolo ni ololo awe’, mwa enamuna ya omooniherya wiira itthu onipaka awe ni soothanla sawe ti sa elolo.
18-24 YA AGOSTO
MIHAKHU SINIKHUMA MBIIBILIYANI
Moota Apatthani Eekeekhai Annikhaliherya Aya
Owehaweha 09/2019 epaax. 5 etti. 12
Yehova Onnaavaha Efaita Arumeyi Awe Oowiiyeviha
12 Mutthu oowiiyeviha onnixukhurela vaavo onvahiwa awe miruku. Nkahaya muupuwele ela: Muupuwele wira muri Empa ya Omwene. Nuumala olavula ni anna anceene, munna mmosa onnoovekelani orowa ovaanela okhwipi vakhaani, olavulaka moohiiwanyeya onnihimya so: ‘Noohala ntikwa vakhaani mmainoni mwanyu’. Moohaanyiherya, nyuwo mwaamuuliwa muru. Masi niireke khimwaarowa omuxukhurela munna owo mwaha wowooleelani? Tthiri waamoosivelani vaakhanle wira mooleeliwa eyo khalai ene! Moolikanasa, akhala wira munna onniimananiha onivaha miruku, nihaana wiiyeviha ni omuxukhurela vanceene. Nave nihaana omuthokorerya munna owo ntoko mpatthani ihu ohiya ntoko nwanani ihu. — Musome Miruku 27:5, 6; aGa 4:16.
Perspicaz vol. 2 epaax. 1215 etti. 3
Namwaattamanani anyu aahiiso Mukhwiinyu
Eliivuru ya Miruku ennitumererya omwaamini ni omuroromela mukhwiihu, ni ti va miruku omwaattamela okathi nimphavela ahu okhaliheriwa: “Muhimunyanyale mpatthani anyu nnakhala mpatthani a paapa anyu, Nave muhirowe etthoko ya munninyu sookhumelelani mixankiho. Fataari namwaattamanani anyu onikhala vakhiviru, ohiya munninyu onikhala ottaiwene”. (Mir 27:10) Mulipa oolepa masu ala, onikhala wiira onihimya so: Nihaana waataana vanceene ni mpatthani a ekeekhai ovikana mmusi ahu. Okhala wiira okathi mukina, munnihu pooti ohikhala vakhiviru wiira onikhaliherye, masi mpatthani ahu okhala vakhiviru ni hiyo.
Owehaweha 09/2023 epaax. 10 etti. 7
Amiravo — Mumphavela Wiira Okumi Anyu Okhale Sai?
7 Etthu nniixutta ahu ni soothanla soohiloka sa Yowasi, ti yoowi nihaana waathanla apatthani anrowa onikhaliherya omphenta Yehova ni omuhakalaliha. Nave apatthani ahu pooti okhala a iyaakha soovirikana. Muhiliyale wiira Yowasi aari mmiravo namulikanyiha ni mpatthani awe, Yehoyada. Nwuupuwelaka axipatthani murina anyu, mwiikoheke so: ‘Kiireke apatthani aka annikikhaliherya olipiha omwaamini waka Yehova? Annikitumererya wiiwelela malamulo a Muluku? Niireke annaaleela atthu akina voohimya sa Yehova ni ikeekhai sa mbiibiliyani? Kiireke annittittimiha malamulo a Muluku? Kiireke anlavula etthu aphavelaka okihakalaliha paahi, aahiiso annikivaha miruku kinreerela aka ovahiwa okathi owo?’ (Mir 27:5, 6, 17) Ekeekhai ti yoowi vakhala wiira apatthani anyu khanimphenta Yehova, awo khanireerela okhala apatthani anyu. Masi vakhala wiira mookhalana apatthani animphenta Yehova, muhaahiyererye, yaawo tanrowa wookhaliheryani. — Mir 13:20.
Itthu sa Efaita sa Mbiibiliyani
Owehaweha 15/09/2006 epaax. 19 etti. 12
Otthokiheriwa wa eliivuru ya Miruku
27:21. Vannikhweya oweha omutthu ahu okathi ninttottopeliwa ahu. Ti vookhweya wooniherya wiiyeviha, okathi nnuupuwelela ahu wiira ovuwa wootheene oniphwanela Yehova, nto eyo enniniiriha ohihiya omurumeela. Mutthu oohiiyeviha, onnooneya okathi yoole onittottopeliwa awe, maana onniixoona okhalana efaita waavikana atthu akina.
25-31 YA AGOSTO
MIHAKHU SINIKHUMA MBIIBILIYANI
Ovirikana Okhanle Mutthu Ootakhala ni Naxariya
Owehaweha 15/5/1993 epaax. 26 etti. 2
Mmutthareke Yehova Moororomeleya
“ANAXARIYA toolipa murima ntoko kharamu”. (Mir 28:1) Annaamini ni ororomela Nuulumo na Muluku ni annirowa vahoolo mmutekoni wa Muluku, hata okathi mukina yoovaka wiirihiwa etthu yoowoopiha.
Perspicaz vol. 1 epaax. 814 etti. 9
Osuwela
Ale anihiya weetta ephiro ya xariya. Mutthu onitthikela opaka etampi, onnipacerya ohimwiiwelela Muluku ni soothanla ni ipalano onipaka awe khonuupuwela malakiheryo awe. (Yoob 34:27) Mutthu siisa, onneemererya wiira murima awe omoototheke ni konikhalana osuwela. (Esa 36:1-4) Hata ohimmyaka wiira onimikokhorela Muluku, owo onnihela soophavela sawe nipuro noopacerya ohiya iye Muluku oniphavela awe. (Yes 29:13, 14) Itthu onuupuwela awe ni onipaka awe onoona wiira khaiyo sootepexa otakhala onakhala ntoko ‘onoothweela’ paahi. (Mir 10:23) Nto onnikhala mulolo, ootakhala, ohiniwerya wuupuwelela saana itthu onivara awe mpakha woonaka wiira Muluku khoniwerya oweha itthu sootakhala onipaka awe. (Esa 94:4-10; Yes 29:15, 16; Yer 10:21) Okhala wene, miteko sawe ni moolumo awe, annihimya wiira “Yehova Khokhanle” (Esa 14:1-3) ni ‘soothanla onipaka awe konimuupuwela Yehova’. Mwaha wa ohitthara malakiheryo a Muluku, owo khoniwerya opaka itthu mwa xariya, khonivarerya itthu sootheene ni khoniwerya opaka soothanla sinrowa okumiherya mireerelo. — Esa 28:5.
Perspicaz vol. 1 epaax. 1236 etti. 9
Ororomeleya
Wiira mutthu okhale oororomeleya, khonilipa ni ikuru sa mutthu owo, masi mwaha wa okhalana waamini woolipa ni omuroromela Yehova ni ororomela ikuru sawe. (Esa 25:21) Muluku onnileiherya wiira onrowa okhala “nikula na wiisaakiha” ni “opuro woolipihiwa” wa atthu ale aneetta moororomeleya. (Mir 2:6-8; 10:29; Esa 41:12) Yoolakela aya ya omurumeela Yehova, ennaakhaliherya okhalana okumi wooloka ni ohihiya otthara ephiro ya xariya. (Esa 26:1-3; Mir 11:5; 28:18) Sintoko Yoobi, hata naxariya ohaawaka vanceene mwaha wa ororomeleya wawe, Yehova onileiherya wiira ononvaha mutthu owo okumi wooloka ni wa murettele ni onoophwanya itthu sinceene sooloka. (Yoob 9:20-22; Esa 37:18, 19, 37; 84:11; Mir 28:10) Ntoko Yoobi, wiira mutthu othokoreriwe okhala a faita para Yehova ni oophwanelela ottittimihiwa, owo ohaana okhala oororomeleya ohiya okhalana mihakhu. (Mir 19:1; 28:6) Anamwane arina eparakha ya okhalana anamuyari siisa, ahaana owehiwaka ntoko oohakalala. (Mir 20:7) Okhala wiira awo anniweha ntakiheryo na anamuyari aya, annikhalana nsina nooloka ni annittittimihiwa mwaha wa mweettelo wa anamuyari aya.
Itthu sa Efaita sa Mbiibiliyani
Owehaweha 01/12/2001 epaax. 11 etti. 3
Muhihiye waamini wanyu ovukuwaka
Wiiroromela Mootepana. Atthu anceene onaawereya murima, yaaniiroromela vanceene mukhalelo aya wa weerutthuni ohinatthi wapwhanya oretta owo. Ikhwaha sinceene, atthu awo yaanikhootta opaka exame sa ospitaali yuupuwelaka wiira kisaapirisari. Mwa enamuna emosa-ru, atthu akina pooti wuupuwelaka wiira, okhala wiira apacenrye khalai omurumeela Yehova, khiivo etthu ekhanle oovukula waamini waya. Woonasa wene, anapacerya ohilipiha waamini waya mpakha opaka etampi. Ti vooloka wuupuwelela miruku sooloka sinilavula sa otepa wiiroromela murumwa Paulo aavanhe awe, seiyo sini: “Ole onuupuwela wira orimweemela, aipasoopeke wira ohimore.” Ti va miruku wuupuwela wiira na atthu oottheka, ni wiira ikwaha sikina nihaana ovarerya mikhalelo sinilipiha waamini wahu. — 1 aKorinto 10:12; Miruku 28:14.