Geeshsha Maxaafay Asay Laamettanaadan Oottees

Naatetta wodiyaa iita tuggan aattida yelagiya ba deꞌuwan waana ufayttana danddayadee? Iita makkaliyaanne polotikaa dosiya asi wonggeliyaa yootiya saro asa gidanaadan oottiday aybee? Ha oyshatu zaaruwaa demmanawu kaallidi deꞌiya taarikiyaa nabbaba.

“Siiqettanawunne Dosettanawu Keehi Amottaas.”—EENA LEHNINO

YELETTIDO LAYTTAA: 1981

YELETTIDO BIITTAA: RUSIYAA

KASE TAARIKIYAA: NAATETTAN TUGGATIDAARO

KASE DEꞌUWAA: Ta aawaynne aayyiyaa tulle gidishin, taanikka tulle gidada yelettaas. Koyro usuppun layttata ufayttada deꞌaas. Hegaappe simmin, ta aawaynne aayyiyaa paraman shaahettidosona. Taani guutta naꞌa gidikkokka, paraman shaahettiyoogee aybakko eraas; qassi hegan keehi qohettaas. Eti shaahetti simmin, ta aawaynne ta bayra ishay Tiroyitsiken deꞌidosona; shin ta aayyiyaa tana ekkada CHeliyabinske baasu. Guyyeppe, A hara azinaa gelaasu. I ushanchcha asa, yaanidaagee onne tana darotoo wadhdhees.

Ta bayra ishay 1993n haattan muukettidi hayqqiis. Hegaappe denddidaagan nu soo asay keehi kayyottiis. Ta aayyiyaa hegaa gishshawu ushshaa uyiyoogaa meezetada, akka ba azinaadan tana qohiyoogaa doommaasu. Loꞌꞌo deꞌuwaa waana deꞌanaakko qoppiyoogaa doommaas. Siiqettanawunne dosettanawu keehi amottaas. Minttettuwaa demmanawu cora woosa keettata biyoogaa doommaas; shin ayba minttettonne demmabeykke.

TAANI LAAMETTANAADAN GEESHSHA MAXAAFAY MAADDIIS: Tawu layttay 13 gidiyo wode, tanaara tamaariya Yihoowa Markka gidida naꞌiyaa Geeshsha Maxaafaappe tawu issi issi taarikiyaa yootaasu. Iita hanotay deꞌishinkka Xoossawu oottida, Nohanne Iyyooba mala asatuban ufayttaas. Sohuwaara Yihoowa Markkatuura Geeshsha Maxaafaa xannaꞌiyoogaa, qassi eta shiiquwaa biyoogaa doommaas.

Geeshsha Maxaafaa xannaꞌiyoogee wozanaa ufayssiya daro tumaa taani akeekanaadan oottiis. Xoossaayyo sunttay deꞌiyoogaa erada keehi ufayttaas. (Mazamure 83:18, NW) ‘Wurssetta gallassan’ hananabaa Geeshsha Maxaafay yootiyoobaa erada maalaalettaas (2 Ximootiyoosa 3:1-5) Hayqqida asay denddanaagaakka erada ufayttaas. Taani ta ishaara gayttana deꞌiyoogaa qoppite!—Yohaannisa 5:28, 29.

SHin tana ufayssidaban ufayttiday ubba asa gidenna. Ta aayyiyaanne I azinay Yihoowa Markkata keehi ixxoosona. Taani Geeshsha Maxaafaa xannaꞌiyoogaa agganaadan eti baaxetidosona. SHin taani tamaariyoobaa keehi dosido gishshawu, agganawu mule koyabeykke.

Nu soo asay tana eqettidi oottiyoobaa genccana danddayabeykke. Tanaara Yihoowa Markkatu shiiquwaa biya ta kaalo ishaykka haattan muukettidi hayqqin, daganttiya harabay merettiis. Gidikkokka, Yihoowa Markkati tana keehi minttettidosona. Taani ta deꞌo laytta ubban amottaydda takkido siiquwaa eta matan demmaas. Hagee tumu haymaanoote gidanaagaa he wode eraas. Yaatada, 1996n xammaqettada Yihoowa Markka gidaas.

TAANI GOꞌETTIDO HANOTAA: Aadhdhida usuppun layttaa, Dimitiri giyo loꞌꞌo asa gelada deꞌays. Aara issippe Sent Pitisbergen deꞌiya, Yihoowa Markkatu macara biiruwan oottoos. Takkidi, nu soo asay ta ammanuwaabaa xeelliyo hanotay kaseppe guuttaa laamettiis.

Yihoowa erido gishshawu keehi ufayttays! Awu haggaaziyoogee ta deꞌoy kumetta gidanaadan oottiis.

“Daro Oyshatun Unꞌꞌettaas.”—RAWUDEL ROZEREGEZ ROZEREGEZA

YELETTIDO LAYTTAA: 1959

YELETTIDO BIITTAA: KUUBA

KASE TAARIKIYAA: MAKKALIYAANNE POLOTIKAA DOSIYA ASA

KASE DEꞌUWAA: Taani Kuuban, Havaanan yelettaas; taani diccido heeray hiyyeesati deꞌiyoosa gidishin, yan asay warettiyoogee meeze gididaba. Taani dicciyo wode, judo giyoonne baaxe milatiya hara ispportteta dosiyoogaa doommaas.

Taani gooba tamaare gidiyo gishshawu, yuniversttiyaa gelanaadan nu soo asay tana minttettiis. Yan deꞌaydda, nu biittaa polotikaa hanotay laamettana bessees gaada qoppiyoogaa doommaas. Yaatiyo gishshawu, makkalanawu qofaa qachchaas. Tanaara tamaariya issi naꞌaara gididi, issi polisiyaappe zayyiya wotti ekkanawu A shoccida. He warettan polisiyaa huuphee daro qooꞌettiis. Taaninne ta laggee qashettida; qassi tokkosin hayqqanaadan pirddettida. Tawu biron layttay 20 gidikkokka, hayqqana hanays!

Qasho keettan tarkka deꞌiyo wode, tana tokkosi worana haniyo wode hananabaa meezetays. Yayyida asa milatanawu mule koyikke. Qassi he wode daro oyshati ta guuggiyan simerettoosona. Taani, ‘Alamiyan pirdda pacay daridoy aybissee? Deꞌo giyoogee hagaa xallee?’ yaagada qoppaas.

TAANI LAAMETTANAADAN GEESHSHA MAXAAFAY MAADDIIS: Nu hayquwaa pirdday guyyeppe 30 laytta qashuwawu laamettiis. Taani bantta ammanuwaa gaasuwan qashettida amarida Yihoowa Markkatuura gayttidoy he wode. Yihoowa Markkati xala gidikkokka, eti saro asa gidiyoogaa beꞌada maalaalettaas. Eti aynne moorennan qashettikkokka, hanqqettokkonanne yiillotokkona.

Xoossay asaa halchchuwan medhdhidoogaa Yihoowa Markkatuppe tamaaraas. Xoossay saꞌaa danoynne pirdda paci baynna gannate oottanawu deꞌiyoogaa eti Geeshsha Maxaafaappe tana bessidosona. Biittay polo hanotan merinawu deꞌanawu deꞌiya, loꞌꞌo asan kumanaagaa eti tana tamaarissidosona.—Mazamure 37:29.

Yihoowa Markkati tana tamaarissidobaa keehi dosaas; shin ta eeshshay etaagaappe keehi dummatees. Polotikaaban oossinne exatennan deꞌiyoogee woy qinxxalliya baqqiya urawu hara baggaa zaariyoogee danddayettenna gaada qoppaas. Hegaa gishshawu, Geeshsha Maxaafaa tawu buzo nabbabanawu qofaa qachchaas. Nabbabada wurssido wode, beni Kiristtaanetudan haniyaageeti Yihoowa Markkatu xalla gidiyoogaa akeekaas.

Geeshsha Maxaafaa xannaꞌiyoogan taani ta deꞌuwan keehi laamettana bessiyoogaa eraas. Leemisuwawu, taani darotoo cayiyo gishshawu, ta haasayaa geeshshana koshshees. Sijaara uyiyoogaakka aggana koshshees. Qassi polotikaaban exatiyoogaakka aggana bessees. Hageeta agganaagee metiyaaba gidikkokka, Yihooway maaddin loddan loddan aggaas.

SHin hanqquwaa agganaagee metidabatuppe issuwaa. Hegaara gayttidaagan ta huuphiyaa naaganawu haꞌꞌikka woossays. Leemiso 16:32 mala xiqiseti tana keehi maaddidosona; xiqisee, “Wolqqaama asa gidiyoogaappe, hanqqettanau eesotenna asa gidiyoogee lo77o; daro katamata olidi oiqqiyoogaappe, asi ba huuphiyaa haariyoogee aadhdhees” yaagees.

Taani 1991n xammaqettada Yihoowa Markka gidaas. Qasho keettan barmmeeliyan deꞌiya haattan xammaqettaas. Kaalliya laytti, qashuwan deꞌiya asatuppe amaridaageeti birshshettidi, nu dabbotukko Isppeene yedettida. Isppeene gakkada, sohuwaara Yihoowa Markkatu shiiqota biyoogaa doommaas. Yan deꞌiya Yihoowa Markkati daro layttawu etaara deꞌida asadan tana mokkidosona; qassi deꞌuwaa wotta yeggada deꞌiyoogaa doommanaadan maaddidosona.

TAANI GOꞌETTIDO HANOTAA: Taani haꞌꞌi ufayttiya asa; ta machcheeranne ta naaꞌꞌu macca naatuura Xoossawu haggaazays. Ta wodiyaappe daruwan Geeshsha Maxaafaa tamaaranaadan harata maaddiyoogan ufayttays. Issi issitoo hayqoy pirddettido he yelagaabaa qoppays; shin hegaappe haa simmin taani demmido darobaa nashshays. Taani haꞌꞌi paxa deꞌiyoogaa xalla gidennan, hidootay deꞌiyoogaa. Taani suure pirdday kumidonne ‘hayqoy deꞌenna,’ yaana Gannatiyaa hidootan naagays.—Ajjuutaa 21:3, 4.

[Qonccissuwaa]

“Xoossaayyo sunttay deꞌiyoogaa erida keehi ufayttaas”

[Misiliyaa]

Taaninne ta azinay tuletuyyo giigida xuufiya etawu immiyoogan ufayttoos