Xammaqettiyoogee Kiristtaanetuppe Koyettiyaaba

1, 2. (a) Kiristtaane aawatinne aayoti bantta naꞌay xammaqettanawu oychchiyo wode woygiyoonaa? (b) Xammaqettanaageeti banttana Yihoowawu geppidaakkonne haasayiyaagee oychchiyoy aybissee? (Doomettan deꞌiya misiliyaa xeella.)

MARIYO giyo naꞌiyaa bana yelidaageeti xeellishin, xammaqettanawu yiida haratuura eqqa denddaasu. Haasayiya ishay oychchido naaꞌꞌu oyshata A qoncce cenggurssan xoqqu oottada zaaraasu. Hegaappe guuttaa takkada xammaqettaasu.

² Mariyi aawaynne aayyiyaa bantta naꞌiyaa Yihoowawu muleera aqanawu geppidoogan keehi ufayttidosona. SHin kase I aayyiyaa issi issibaa ba wozanan hagaadan gaada oychchaasu: ‘Mariya xammaqettanawu gakkadeeshsha? A oottanawu koyidobay gitaba gidiyoogaa akeekadee? A takkada xammaqettanaadan oottiyaakko kehennee?’ Bantta naꞌa siiqiya daro aawatinne aayoti I woy A xammaqettanawu koyiyo wode banttana hegaadan oychchoosona. (Era. 5:5) Issi Kiristtaanee ba huuphiyaa geppiyoogeenne xammaqettiyoogee A deꞌuwan keehi koshshiyaaba.—“Ne Huuphiyaa Yihoowawu Geppadii?” giya saaxiniyaa xeella.

3, 4. (a) Kiitettida PHeexiroosi xammaqettiyoogee keehi koshshiyoogaa aybin leemisidee? (b) Xammaqettiyoogaa Nohe wode markkabiyaa keexxiyoogan leemisana danddayiyoy aybissee?

³ Kiitettida PHeexiroosi xinqqatiyaabaa odiiddi Nohee markkabiyaa keexxidoogaa denttidi, ‘awu leemiso gidida xinqqatee haꞌꞌi nuna ashshiyoogaa’ yootiis. (1 PHeexiroosa 3:20, 21 nabbaba.) Markkabee Nohee muleera Xoossaa sheniyaa oottiyoogaa bessiyaaba. Nohee Yihooway awu immido oosuwaa ammanettidi oottiis. Ammanuwaa bessiyaabaa oottidoogee Nohanne A soo asaa Bashshaa Haattaappe ashshiis. PHeexiroosi yootidobaappe nuuni ay tamaariyoo?

⁴ Markkabee Nohe ammanuwaa bessiyoogaadan, asaa sinttan xammaqettiyoogee beettiya naqaasha. Hegee ay bessii? Xannaꞌiya Kiristtaanee hayquwaappe denddida Kiristtoosa ammanidi ba huuphiyaa Yihoowawu geppidoogaa bessiyaaba. Noheegaadan, banttana Yihoowawu geppidaageeti Xoossawu azazettidi I etawu immido oosuwaa oottoosona. Nohee Bashshaa Haattaappe attidoogaadan, Xoossawu ammanettida, xammaqettida Kiristtaaneti ha iita alamee xayiyo wode attana. (Mar. 13:10; Ajj. 7:9, 10) Hegee nu huuphiyaa Yihoowawu geppiyoogeenne xammaqettiyoogee keehippe koshshiyoogaa bessees. Xammaqettanawu coo haganaa sugiya uri merinaa deꞌuwaa demmennan attana danddayees.

5. Ha huuphe yohuwan ay xannaꞌanee?

⁵ Xammaqettiyoogee keehi koshshiyo gishshawu, heezzu oyshata loytti qoppana bessees. Xammaqettiyoogaa xeelliyaagan Geeshsha Maxaafay woygii? Issi uri xammaqettanaappe kase ay oottana bessii? Issi Kiristtaanee ba naꞌaa woy hara uraa Geeshsha Maxaafaa xannaꞌissiyo wode, xinqqatee keehi koshshiyoogaa hassayana bessiyoy aybissee?

XAMMAQETTIYOOGAA XEELLIYAAGAN GEESHSHA MAXAAFAY YOOTIYOOBAA

6, 7. (a) Yohaannisi xammaqido gaasuwaa qonccissa. (b) Ubbaappe dummatiya xinqqatee oogee, qassi aybissi?

⁶ Geeshsha Maxaafay yootiyo harata xammaqida koyro asi Xammaqiya Yohaannisa. (Maa. 3:1-6) Yohaannisi xammaqido asati Muuse Higgiyaa kanttido nagaraappe simmidoogaa bessanawu xammaqettidosona. SHin, Yohaannisi xammaqido ubbaappe aadhdhiya xinqqatee nagaraappe simmiyoogaara gayttidaba gidenna. Yohaannisi nagari baynna asa gidida Xoossaa Naꞌaa xammaqiyo dumma maataa demmiis. (Maa. 3:13-17) Yesuusi nagara oottibeenna gishshawu, nagarappe simmana koshshenna. (1 PHe. 2:22) Yesuusa xinqqatee I Xoossaa sheniyaa oottanawu yiidoogaa bessees.—Ibr. 10:7.

⁷ Yesuusi saꞌan haggaaziyo wode, I erissiyo ashkkaratikka asaa xammaqidosona. (Yoh. 3:22; 4:1-3) Yohaannisi xammaqido asatuugaadan, he asatikka xammaqettidoy Muuse Higgiyaa kanttido nagaraappe simmidoogaa bessanaassa. SHin Yesuusi hayquwaappe denddi simmin, A kaalliyaageeti hegaappe keehi dummatiya gaasuwan xammaqettoosona.

8. (a) Yesuusi hayquwaappe denddi simmidi, bana kaalliyaageeta woygidi azazidee? (b) Kiristtaaneti xammaqettiyoogee aybissi koshshiyaakko qonccissa.

⁸ Hayquwaappe denddida Yesuusi 33 M.Ln, 500⁠ppe dariya attuma asati, macca asatinne geella guutta naatikka issippe shiiqidaageetuyyo qoncciis. I hagaa yootidoy he wodiyaana gidennan aggenna: “Hegaa gishshau, intte biidi, asa ubbaa tana kaalliyaageeta oottite; Aawaa sunttan, Na7aa sunttaaninne Geeshsha Ayyaanaa sunttan eta xammaqite. Taani inttena azazidobaa ubbaa eti naagana mala, eta tamaarissite.” (Maa. 28:19, 20; 1 Qor. 15:6) Erissiyo ashkkara oottanaadan Yesuusi azaziyo wode, A kaalliya xeetan qoodettiya asati siyennan aggokkona. Xammaqettiyoogee Kiristtaane gidiyo qambbaraa tookkiyaageetuppe koyettiyaaba gidiyoogaa Yesuusi hegaadan qonccissiis. (Maa. 11:29, 30) Xoossaa ufayssiya ogiyan ayyo oottanawu koyiya ooninne Yihoowa halchchuwaa polanawu Yesuusawu imettida maataa erananne A maataa bonchchana bessees. Izaawu yaati simmidi xammaqettana danddayees. Xoossaa ufayssiya xinqqatee hegaa xalla. Koyro xeetu layttan, Kiristtoosa kaalliyoogaa doommidaageeti xammaqettiyoogee keehi koshshiyoogaa akeekidoogaa bessiya darobaa Geeshsha Maxaafay yootees. Qassi eti xammaqettanawu coo haganaa sugibookkona.—Oos. 2:41; 9:18; 16:14, 15, 32, 33.

HAGANAA SUGOPPA

9, 10. Ayhuda haymaanootiyaa kaalliya Toophphiyaa bitaniyaabaappenne kiitettida PHawuloosabaappe xinqqatiyaabaa ay tamaarana danddayiyoo?

⁹ Oosuwaa 8:35, 36 nabbaba. Goynuwawu Yerusalaame bosaappe soo simmiya, Ayhuda haymaanootiyawu laamettida Toophphiyaa bitaniyaabaa qoppa. Piliphphoosi Yihoowa kiitanchchay kaalettin, Toophphiyaa bitaniyaakko biidi, ‘Yesuusabaa mishiraachchuwaa ayyo yootiis.’ Toophphiyaa bitanee waatidee? He bitanee hegaappe simmin oottidobay I tamaarido tumaa keehi nashshidoogaa bessees. I Yihoowa maaraa kaallanawu keehi koyido gishshawu, sohuwaara xammaqettiis.

¹⁰ Hara leemisoy kase Kiristtaaneta yedettiya Ayhuda bitaniyaabaa. I Xoossawu aqida deretettan yelettiis. SHin Ayhudati Yihoowaara dumma dabbotettan deꞌiyoogaa aggidosona. He bitanee Ayhuda wogaa mintti kaallikkonne, hegaappe kehiya ogiyaabaa tamaariis. Hayquwaappe denddidanne bonchchettida Yesuus Kiristtoosi ayyo markkattiis. He bitanee waatidee? I Kiristtaane gidida Hanaaniyaa maaduwaa eeno giidi ekkiis. Geeshsha Maxaafay I ‘denddidi xammaqettidoogaa’ yootees. (Oos. 9:17, 18; Gal. 1:14) Guyyeppe PHawuloosa geetettida he Ayhuda bitaniyaa neeni eriyoogee qoncce. SHin, Xoossaa sheniyaa poliyoogan Yesuusawu deꞌiya maataabaa tumaa akeekidi, PHawuloosi baappe koyettiyaabaa oottidoogaa akeeka. I sohuwaara xammaqettiis.—Oosuwaa 22:12-16 nabbaba.

11. (a) Ha wodiyan Geeshsha Maxaafaa xannaꞌiyaageeti xammaqettanaadan denttettiyay aybee? (b) Banttana Yihoowawu geppidaageeti xammaqettiyoogaa beꞌiyo wode nuuyyo aybi siyettii?

¹¹ Ha wodiyan Geeshsha Maxaafaa tamaariya yelaga woy gastta asatu hanotaykka hegaa mala. Geeshsha Maxaafaa tumaa ammaniyaageetinne wozanappe nashshiyaageeti banttana Yihoowawu geppidi xammaqettanawu keehi koyoosona. Gita shiiqotu ubban hegaa mala asatussi giigiya haasayay he shiiqotun ayfettiyaabatuppe issuwaa. Geeshsha Maxaafaa tamaariya uri tumaa ammani diccidi xammaqettiyo wode, Yihoowa Markkati keehi ufayttoosona. Kiristtaane aawatinne aayeti bantta naati haratuura xammaqettiyoogaa beꞌiyo wode keehi ufayttiyoogee erettidaagaa. Bantta deꞌuwaa Yihoowawu geppidoogaa bessanawu 2017 haggaazo layttan 284,000⁠ppe dariya asati xammaqettidosona. Xammaqettiyoogee Kiristtaanetuppe koyettiyaaba gidiyoogaa he asati akeekidoogee qoncce. Eti xammaqettanaappe kasetidi ay ay oottidonaa?

12. Geeshsha Maxaafaa xannaꞌiya uri xammaqettanaappe kase ay oottana bessii?

¹² Xannaꞌiya uri xammaqettanaappe kase, Xoossaabaa, A halchchuwaabaanne I atotettawu giigissidobaa suure eraa demmidi ammanana bessees. (1 Xim. 2:3-6) Hegaa mala ammanoy he tamaaree Xoossaa ufayssenna eeshshaa aggidi, A maaraara maayiyaabaa oottanaadan denttettees. (Oos. 3:20) Issi uri Xoossaa Kawotettaa laatissennabaa oottiiddi Xoossaayyo bana geppana danddayennaagee qoncce. (1 Qor. 6:9, 10) SHin Yihooway kandduwaaban kessido xoqqa maaraa kaalliyoogaa xallay gidenna. Xillotettaa kaalliya uri gubaaꞌe shiiquwaa shiiqana, minnidi sabbakananne asaa erissiyo ashkkara oottanakka koshshees. Yesuusi bana tumuppe kaalliyaageeti he oosuwaa oottanaagaa yootiis. (Oos. 1:8) Mati erissiyo ashkkara gidida uri hegeeta ootti simmidi woosan bana Yihoowawu geppananne asaa sinttan xammaqettiyoogan geppidoogaa bessana danddayees.

GEESHSHA MAXAAFAA XANNAꞌIYAAGEETI HALCHCHANAADAN MAADDA

13. Geeshsha Maxaafaa xannaꞌissiyaageeti xammaqettiyoogee Kiristtaanetuppe koyettiyaaba gidiyoogaa hassayana koshshiyoy aybissee?

¹³ Nu naatinne Geeshsha Maxaafaa xannaꞌiya harati koyettiyaabaa oottanaadan nuuni maaddiyo wode, tumuppe erissiyo ashkkara gidanawu xammaqettana bessiyoogaa nuuni hassayana koshshees. Nuuni hegaa nu wozanan wottikko, nu xannaꞌissiyoogeetuyyo loytti qonccissana. Xoossawu aqanawu bana geppiyoogeenne xammaqettiyoogee keehi koshshiyoogaa yootana bessiyo wodiyan yootanawu nuuni mammottokko. Nuuni nu naatinne Geeshsha Maxaafaa xannaꞌiya harati diccidi xammaqettanaadan koyiyoogee erettidaagaa!

14. Xammaqettanaadan nuuni oonanne iisettennay aybissee?

¹⁴ Issi uri xammaqettanaadan aaway, aayyiyaa, Geeshsha Maxaafaa xannaꞌissiya uri woy gubaaꞌiyan deꞌiya ooninne iisettana koshshenna. Hegee Yihooway koyiyooba gidenna. (1 Yoh. 4:8) SHin nuuni hegeeta xannaꞌissiyo wode Yihoowaara dabbotaa medhdhiyoogee keehi koshshiyoogaa mintti yootana bessees. Xannaꞌiya uri xammaqettanaadan denttettiyaabay tumaa wozanappe nashshiyoogaanne Kiristtaane erissiyo ashkkara gididi qambbaraa tookkanawu koyiyoogaa.—2 Qor. 5:14, 15.

15, 16. (a) Issi uri xammaqettanawu gakkiis giyo laytti deꞌii? Qonccissa. (b) Geeshsha Maxaafaa xannaꞌiya uri kase hara haymaanootiyan xammaqettikkonne, Yihoowa Markka gididi xammaqettana koshshiyoy aybissee?

¹⁵ Issi uri xammaqettanawu gakkiyo layttay hagaa giyo wodee baawa. Xannaꞌiya ubbay ba hanotaadan dicceesinne wozannaamees. Daroti naatettan xammaqettoosona; qassi eti Yihoowawu ammanettidi deꞌoosona. Harati cimidi, amaridaageeti ubba layttay 100⁠ppe aadhin Geeshsha Maxaafaa tumaa tamaaridi xammaqettana koshshiyoogaa akeekoosona!

¹⁶ Geeshsha Maxaafaa xannaꞌiya issi cimiyaa, ‘Taani xammaqettana koshshiishsha?’ gaada bana xannaꞌissiyaaro oychchaasu; A kase daro layttaa giddon dumma dumma haymaanootetun xammaqettaasu. Eti naaꞌꞌay hegaara gayttida xiqiseta Geeshsha Maxaafaappe zaarettidi xeellidosona. Xannaꞌiyaara koyettiyaabaa Geeshsha Maxaafaappe akeekada hegaappe simmin takkennan xammaqettaasu. I layttay 80 kumana hanikkonne, xammaqettiyoogee tawu koshshennaba gaada qoppabeykku. Ee tuma, issi uri Yihoowa sheniyaa suure eriyo wode, koyettiyaagaadan xammaqettees. Yaatiyo gishshawu, mati erissiyo ashkkara gididaageeti kase hara haymaanootiyan xammaqettikkokka, xammaqettana bessees.—Oosuwaa 19:3-5 nabbaba.

17. Issi uri xammaqettiyo gallassi ay qoppana bessii?

¹⁷ Issi uri xammaqettiyo gallassay tumuppe ufayttiyo wode. Qassikka, he gallassay akeekan qoppiyo wode. Issi uri bana geppidoogaadan deꞌanawu minnidi baaxetana koshshees. Issi Kiristtaanee erissiyo ashkkara gidiyoogaa Yesuusi qambbaraara geeddarssidoy hegaassa. Yesuusa kaalliyaageeti “bantta gishshau haiqqidaagaayyoonne qassi haiquwaappe denddidaagaayyo de7anaappe attin, sinttappe bantta huupheyyo” deꞌana bessenna.—2 Qor. 5:15; Maa. 16:24.

18. Kaalliya huuphe yohuwan nuuni xannaꞌana oyshati awugeetee?

¹⁸ Mariyi aayyiyaa doomettan denttido oyshata oychchiyo wode ba wozanan hegeeta qoppaasu. Neeni aawa woy aayo gidikko, hagaadan nena oychchennan aggakka: ‘Ta naꞌay xammaqettanawu tumu giigettidee? I bana geppanawu bessiyaagaa keenaa eridee? Timirttiyaaranne oosuwaara gayttidaagan asatettaaban I halchchiyoobay shin? Ta naꞌay xammaqetti simmidi gita nagaraa oottikko shin?’ Kaalliya huuphe yohuwan, ha oyshata beꞌana; qassi Kiristtaane aawatinne aayoti xinqqatiyaa bessiyaagaadan waati xeellana danddayiyaakkokka xannaꞌana.