IXUWAA WAATA XOONANA DANDDAYAY?

3 | Ixuwaa Ne Wozanaappe Xayssa

Geeshsha Maxaafay Tamaarissiyoobaa:

“Xoossai intte qofaa muumeera dummayidi, inttena [laammo]; . . . he wode intte Xoossai koyiyoobi, lo77obi, a ufaissiyaabinne qassi kumettabi aibakko erana.”—ROOME 12:2.

Hegee Woygiyoogee?

Nu qoppiyoobaa Xoossay akeekees. (Ermmaasa 17:10) Yaatiyo gishshawu, ixxiyoogaa bessiyaabaa haasayiyoogaappe woy oottiyoogaappe nuuni naagettana koshshees; shin hegaappe aarobaa oottana koshshees. Ixoy nu qoppiyooban doommees. Hegaa gishshawu, ixuwaa nuuni nu wozanappe muleera xayssana koshshees. Nuuni ixuwaa aggananne ‘laamettana’ danddayiyoy hegaadan oottiyoogaa xallaana.

Ay Oottana Danddayay?

Harata, ubba qassi, zariyan woy biittan neeppe dummatiyaageeta waata xeelliyaakko yuushsha qoppa. Nena hagaadan oychcha: Taani eta waata xeelliyaanaa? Taani eta hegaadan xeelliyoy eta loytta eriyo gishshataasseeyye woy eta coo ixxiyo gishshataassee? Ixuwaanne makkalaa denttettiyaabaa interneettiyan beꞌiyoogaappe woy nabbabiyoogaappe naagetta.

Nu wozanappe ixuwaa xayssanaadan Xoossaa Qaalay maaddees

Nu qofaanne nuuyyo siyettiyaabaa yiggiyoogee metennaba gidenna. SHin Xoossaa Qaalay nuuni nu “wozanan de7iya koshshaanne qofaa” shaakkanaadan maaddees. (Ibraawe 4:12) Yaatiyo gishshawu, Geeshsha Maxaafaa pilgga. I tamaarissiyoobaa ne qofaara geeddarssa; yaatada Xoossaa ufayssiya ogiyan qoppanawu, neeyyo danddayettida keenaa baaxeta. Xoossaa qaalay, wolqqaama ‘qato’ mala gidida ixuwaa nu wozanaappe xayssanaadan maaddana danddayees.—2 Qoronttoosa 10:4, 5.

Deꞌuwan Hanidabaa—ISTEVENA

Ba Qoppiyo Ogiyaa Laammiis

Istevenanne A so asaa boottati ixxido gishshawu, I asaa maatawu olettiya polotikaa citaa yame gidiis. Yaatiyo gishshawu, I danobaa oottiyoogaa doommiis. Isteveni hagaadan giis: “Issi wode ta laggetuura Afirkkaa aylleti Amarkkan naaqettidoogaa bessiya pilmiyaa beꞌida. He naaquwan yiillotidi, paranjja gidida yelagata he pilime keettan shocida. Yaatidi, haratakka shocanawu paranjjati deꞌiyo moottaa biida.”

Isteveni Yihoowa Markkatuura Geeshsha Maxaafaa xannaꞌiyoogaa doommi simmin, A qofay laamettiis. I hagaadan giis: “Issi zaree haraa ixxiyoogaa taani darotoo beꞌido gishshawu, Yihoowa Markkatu hanotan garamettaas. Leemisuwawu, paranjja gidida Yihoowa Markkay hara biitti biyo wode, ba naata paranjja gidenna urawu hadaraa immidi biis. Qassi keetti baynna karetta yelagaa paranjja gididaageeti bantta son deꞌanaadan efiidosona.” Yesuusi tumu Kiristtaanetubaa yootidoogaadan, Yihoowa Markkati issoy issuwaa keehi siiqiyoogaa Isteveni akeekiis.—Yohaannisa 13:35.

Isteveni makkalaanne harata ixxiyoogaa agganaadan aybi maaddidee? Roome 12:2y A maaddiis. I hagaadan giis: “Taani ta qofaa laammana koshshiyoogaa akeekaas. Taani saro deꞌanaassa xalla gidennan, hegee aybippenne aadhiya deꞌo oge gidiyoogaa erido gishshawu, ta qofaa muumeera dummayanawu baaxetaas.” Isteveni 40ppe dariya layttawu, ixxiyoogaa aggidi haꞌꞌi ufayssiya deꞌo deꞌees.