Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2025 Watch Tower Bible and Tract Society of Pennsylvania
ISIINE 7-13
XOOSSAA QAALAN DEꞌIYA ALꞌꞌOBAA LEEMISO 21
Ufayssiya Aqo Deꞌuwawu Maaddiya Maarata
Aqo Oyqqanawu Qoppada Issippe Aattiyo Wode Yihoowa Bonchchissa
13 Hegawu aattiyo wodee ay keena gidana koshshii? Eesuwan kuuyiyobay iitabaa kaalettana danddayees. (Lee. 21:5) Yaaniyo gishshawu intte issoy issuwa loytti eranawu adussa wodiya issippe aattana koshshees. Shin intte bessiyagaappe aaro wodiya takkana koshshenna. Geeshsha Maxaafay hagaadan gees: “Koyiyoobai polettennan gam77iyoogee azzanissees.” (Lee. 13:12) Hegaa bollikka, intte issippe daro wodiya aattikko hegee intte pokkobaa oottanaadan paacettiyo wode eqettanawu keehi metootanaadan oottana danddayees. (1 Qor. 7:9) Intte aqo oyqqanawu qoppidi aattiyo wodee ay keena gidana koshshiyakko loytti qoppiyogaappe inttena hagaadan oychchana danddayeta, ‘Nuuni issibaa kuuyanawu issoy issuwabaa erana koshshiya harabay deꞌii?’
Bessiyaagaappe Aattada Nebaa Qoppoppa
3 Yihooway azinaynne machchiyaa issoy issuwaara ufayttidi deꞌanaadan koyees. SHin eti nagaranchcha gidiyo gishshawu, issi issiban maayettennan aggana danddayoosona. Hegaa gishshawu, PHawuloosi aqo deꞌuwaa oyqqiyaageeta issi issi metoy gakkana danddayiyoogaa yootiis. (1 Qor. 7:28) Issi issi aqo laggeti ubbatoo issoy issuwaara walaqettiyo gishshawu, nuuni aqo lagge gidana bessenna giidi qoppana danddayoosona. Eti alamiyaa asaagaadan qoppikko, nuuni paraman shaahettana bessees giidi qoppana. Eti banttabaa xalla qoppananne ufayssaa demmiyoy paraman shaahettikko xallaana giidi qoppana danddayoosona.
4 Nu aqo deꞌoy giigana danddayenna giidi qoppana bessenna. Issi uri paraman shaahettana danddayiyoy pokkobaa oottiyo wode xallaana gidiyoogaa Geeshsha Maxaafay yootiyoogaa nuuni eroos. (Maa. 5:32) Hegaa gishshawu, nu aqo deꞌuwan metoy merettiyo wode, otoroy hagaadan qoppanaadan oottana danddayees: ‘Ta aqo laggee tawu koshshiyaabaa kunttenna. Tawu koshshiyaagaa keena siiquwaa demmabeykke. Hara uraara deꞌiyaakko taani hagaappe aaruwan ufayttana danddayays.’ Nuuni hegaadan qoppikko, nu aqo laggiyaabaa gidennan, nubaa xalla qoppoos. Ha alamiyaa aadhdhida eratettay neeni ne aqo deꞌuwaa laaliyaaba gidikkokka, nena ufayssiya aybanne oottanaadan minttettees. SHin Xoossaa aadhdhida eratettay “issoi issuwaa go77iyaabaa koyanaappe attin, [nu] huuphe xalaalaa go77iyaabaa” koyennaadan minttettees. (Pili. 2:4) Neeni ne aqo laggiyaara paraman shaahettanaadan gidennan, issippe deꞌanaadan Yihooway koyees. (Maa. 19:6) Yihooway neeni nebaa gidennan, A qofaa kaseyanaadan koyees.
5 Azinaynne machchiyaa issoy issuwaa siiquwaaninne bonchchuwan oyqqana bessees. (Efisoona 5:33 nabbaba.) Ekkiyaagaappe immiyaageeta gidanaadan Geeshsha Maxaafay nuna tamaarissees. (Oos. 20:35) Azinaynne machchiyaa issoy issuwaa siiqanaadaaninne bonchchanaadan maaddiya eeshshay awugee? Ba huuphiyaa ziqqi oottiyoogaa. Bantta huuphiyaa ziqqi oottiya azinaynne machchiyaa banttana goꞌꞌiyaabaappe “hara asa go77iyaabaa” koyoosona.—1 Qor. 10:24.
w06 9/15 28 ¶13
‘Ne Yelagatettaa Machcheera Ufaytta’
13 Aqo laggeti issoy issuwawu bessiyo eeshshaappe denddidaagan aqo deꞌoy unꞌꞌissiyagaa gidikko waatana koshshii? Hegaa giigissanawu baaxetana koshshees. Leemisuwawu, eti issoy issuwa doonan bochchiyogaa meeze oottidaba gidana danddayoosona. (Leemiso 12:18) Hegaa mala meezee aqo deꞌuwa qohana danddayees. Leemiso maxaafay hagaadan gees: “Ooyettiyanne yiillotiya machcheera de7anaappe bazzon de7iyoogee keha.” (Leemiso 21:19) Ne aqo deꞌoy hegaa mala gidikko, nena hagaadan oychcha, ‘Ta azinay tanaara deꞌiyogaa uufanaadan oottiya eeshshay tawu deꞌii?’ Geeshsha Maxaafay azinata hagaadan gees: “Intte machchiyo machchiyo awudekka siiqite, qassi I bolli keehi hanqqettoppite.” (Qolasiyasa 3:19) Neeni azina gidikko, nena hagaadan oychcha, ‘Taani ta machchiyo siiqiyogaa bessenna gishshawu, A harata amottanawu paacettaydda deꞌay?’ Pokkiya tuna nagaraa oottanawu ayba gaasoykka baynnaagee qoncce. Gidikkonne, hegaa mala azzanttiyabay merettana danddayiyo gishshawu, hegaabaa qoncciyan haasayana koshshees.
Ayyaanaaban Alꞌꞌobaa
Danddayanchcha Gidiyoogaa Aggoppa
9 Danddayay nuuni loꞌꞌobaa kuuyanaadankka maaddana danddayees. Dirbbiyoogaappe woy eesotiyoogaappe nuuni doorana danddayiyoobaa wodiyaa bazzi pilggidi, kehiyaagaa doorana koshshees. (Leemiso 21:5 nabbaba.) Leemisuwawu, nuuni ooso koyiiddi deꞌiyaaba gidikko kaseti demmido oosuwaa oottanawu koyana danddayoos; shin hegee nuuni amarida shiiqota attanaadan woy darin haggaazennaadan oottana danddayees. Gidoppe attin, nuuni danddayanchcha gidikko ooso sohoy awan deꞌiyaakko, ay keena saatiyaa oottana koshshiyaakko, qassi ha oosoy nu soo asaanne nuuni Yihoowaara dabbotido dabbotaa waati qohiyaakko qoppoos. Nuuni danddayanchcha gidiyoogan iitabaa kuuyiyoogaappe naagettana danddayoos.
Ootti-besuwa. lff timirtte 42 qofaa 5—Cuccumaa: Yihoowa Markkati Bantta Mala Kiristtaanetu Xallaa Ekkana Woy Gelana Koshshiyoy Aybissee?
5 Ne aqo laggiyaa akeekan doora. Neeni awudenne kuuyiyo gitabatuppe issoy aqo laggiyaa dooriyoogaa. Maatiyoosa 19:4-6, 9 nabbabite; yaatidi ha oyshaa tobbite: Issi Kiristtaanee loytti qoppennan aqo oyqqana koshshennay aybissee? Geeshsha Maxaafay loꞌꞌo aqo laggiyaappe koyettiya eeshshati awugeetakko eranaadan nena maaddana danddayees. Aybippenne aaruwan, Yihoowa siiqiya aqo lagge koya. Koyro Qoronttoosa 7:39nne 2 Qoronttoosa 6:14 nabbabite. Yaatidi, ha oyshata tobbite: Nu mala Kiristtaane xallaa ekkana woy gelana koshshiyoy aybissee? Yihooway nuuni A siiqenna ura ekkanawu woy gelanawu kuuyiyaakko waati xeellanee?
ISIINE 14-20
XOOSSAA QAALAN DEꞌIYA ALꞌꞌOBAA LEEMISO 22
Naata Dichchanawu Maaddiya Maarata
Intte Naati Gitaa Gidiyo Wode Xoossawu Haggaazanee?
7 Intte aqo oyqqidaageetanne naata yelanawu koyiyaageeta gidikko, inttena hagaadan oychchite: Nuuni Yihoowanne A Qaalaa siiqiyaa bana ziqqi oottiya asatu malee? Imota gidida gacino naꞌa dichchanaadan Yihooway nuna dooranee? (Maz. 127:3, 4) Neeni yelidaagaa gidikko, nena hagaadan oychcha: ‘Minni oottiyoogee loꞌꞌo gidiyoogaa ta naata tamaarissiyaanaa?’ (Era. 3:12, 13) ‘Seexaanaa alamee gattiyo qohuwaappe ta naata naaganawu tawu danddayettida ubbabaa oottiyaanaa?’ (Lee. 22:3) Intte naata gakkana danddayiya meto ubbaappe eta naagana danddayekketa. Yaatiyoogee danddayettennaba. SHin Geeshsha Maxaafay yootiyo zoriyan waati ammanettanaakko siiquwan eta ubbatoo tamaarissiyoogan banttana gakkiya metuwawu eti giigettanaadan maaddana danddayeeta. (Leemiso 2:1-6 nabbaba.) Leemisuwawu, intte dabbotuppe issoy Yihoowawu goynniyoogaa aggikko, Yihoowawu ammanettidi deꞌiyoogee keehi koshshiyaaba gidiyoy aybissakko intte naati Xoossaa Qaalaappe akeekanaadan maaddite. (Maz. 31:23) Woy intte siiqiyo uri hayqqikko, intte naati kayyottiyoogaa genccanawunne sarotettaa demmanawu Xoossaa Qaalaa waati goꞌettanaakko bessite.—2 Qor. 1:3, 4; 2 Xim. 3:16, 17.
Yelidaageetoo—Intte Naati Yihoowa Siiqanaadan Tamaarissite
17 Guutta naatettaappe doommidi naata loohissite. Qommoora etabay odettido yelidaageeti bantta naata keehi loꞌꞌobaa loohissidosona. (Lee. 22:6) Guyyeppe misoonaawe gididi Kiitettida PHawuloosaara oottida Ximootiyoosabaa qoppite. Ximootiyoosa aayyiyaa, Euniiqanne A aayee aayyiyaa Loyda A ‘guutta naatettaasappe doommidi’ loohissidosona.—2 Xim. 1:5; 3:15.
18 Kot divuwaren deꞌiya ZHankilodanne Peeso giyo azinaynne machchiyaa bantta naati usuppunatikka Yihoowa siiqanaadaaninne awu haggaazanaadan oottidi dichchidosona. Etawu injjetanaadan maaddidabay aybee? Eti Euniiqinne Loydi leemisuwaa kaallidosona. Eti hagaadan giidosona: ‘Nu naata guutta naatettaappe doommidi Xoossaa Qaalaa loytti tamaarissiyoogaa doommida.’—Zaa. 6:6, 7.
19 Intte naata Yihoowa Qaalaa “tamaarissiyoogaa” giyoogee woygiyoogee? Zaarettido Wogaa 6:6, 7n “tamaarissa” geetettida Ibraawetto qaalay “darotoo zaarettiyoogan hassayissiyoogaa” giyoogaa. Yaatanawu, yelidaageeti bantta naatuura ubbatoo wodiyaa aattana koshshees. Yelidaageeti bantta naata zaari zaaridi tamaarissiyo gishshawu, issi issitoo hidootaa qanxxana danddayoosona. SHin, yelidaageeti he injjiyan bantta naati Xoossaa Qaalaa akeekanaadaaninne hegaa oosuwan peeshshanaadan maaddanawu baaxetana danddayoosona.
Intte Yiira Naꞌay Yihoowawu Haggaazanaadan Loohissite
6 Intte naata seeriyoogan intte eta siiqiyoogaa bessite. Issi issitoo issibay likke gidiyoy woy likke gidennay aybissakko yootiyoogaa xallay gidana danddayees. Hara wodiyan qassi issi naꞌay intte yootidobaa oosuwan peeshshennan aggana danddayees. (Lee. 22:15) Hegaa malabay merettiyo wode, Yesuusa leemisuwaa kaallite. Injjetiya wodiyaaninne sohuwan, danddayan kaalettiyoogan, loohissiyoogaaninne zoriyoogan intte naꞌaa siiquwaaninne ashkketettan seerite. Tohossa Afirkkan deꞌiya Eleno giyo michiyaa hagaadan gaasu: “Ta aawaynne aayyiyaa seeriyo seeraa awudekka laammokkona. Eti iita eeshshay kaalettiyoobaa taassi yootikko, taani hegaadan oottiyoogaa ubbatoo kaalloosona. Eti tana hanqquwan woy ayssi seeriyaakko yootennan mule seeri erokkona. Hegaa gishshawu, taani hirggikke. Taani oottana bessennabaa erays; qassi taappe aybi koyettiyaakko akeekays.”
Ayyaanaaban Alꞌꞌobaa
Neeni Yihoowawu Oottana Danddayiyooban Ufaytta
11 Hegaadan, nuuni Yihoowayyo haggaaziyo wode nuuyyo imettida ay oosonne nuussi danddayettidaagaa keenaa minnidi oottikko keehi ufayttana danddayoos. Loytta sabbaka, qassi gubaaꞌiyankka minna ootta. (Oos. 18:5; Ibr. 10:24, 25) Minttettiya qofaa shiiquwan yootanawu loytta giigetta. Saaminttawu gidduwan shiiqiyo shiiquwan neeyyo imettiya tamaaretu kifileta xoqqu ootta xeella. Gubaaꞌiyan issi oosuwaa maaddana mala nena oychchikko, bessiya wodiyan oottiyoogan ammanettiyaagaa gida. He oosuwaa keehi koshshennabadan xeellada, hegaa oottiyoogan daro wodiyaa wurssana koshshenna gaada qoppoppa. Ne oosuwan keehi gooba gidanawu baaxeta. (Lee. 22:29) Neeni Yihoowayyo minna oottikko, kaseegaappe aaruwan aara dabbotananne keehi ufayttana. (Gal. 6:4) Qassi neeni demmanawu yeemottiyo aawatettaa harati demmiyo wode, etaara ufayttanawu metootakka.—Roo. 12:15; Gal. 5:26.
Haasayaa
ijwyp huuphe yohuwa 100—Cuccumaa: Taani Yelidaageetu Azazuwa Kanttikko Waatana Koshshii?
YELAGATI OYCHCHIYO OYSHAA
Taani Yelidaageetu Azazuwa Kanttikko Waatana Koshshii?
Naati woysu saatiyan soo gelana koshshiyakko, zammaana miishshaa ay keena wodiyawu goꞌettanaakko, qassi kandduwara gayttidaagan daro keettaa asay azazuwa kessees.
Yelidaageetu azazuwa kanttikko waatana danddayay? Hanidabaa laammana danddayakka; shin hanotay yaa iitennaadan oottana danddayaasa. Neeni hegaa waata oottanaakko ha huuphe yohoy qonccissana.
Oottana koshshennabaa
Oottana koshshiyabaa
Ne laggeti giyobaa
Oottana koshshennabaa
● Neeni issi azazuwa kanttidoogaa nena yelidaageeti erana xayikko, he balaa genttanawu paacettana danddayaasa.
● Neeni issi azazuwa kanttidoogaa eti erikko, gaasuwa shiishshanawu woy hara uran gaasoyanawu paacettana danddayaasa.
He naaꞌꞌaykka loꞌꞌo gidokkona. Aybissi? Mooridobaa genttiyogee woy hanenna gaasuwa shiishshiyogee neeni wozannaamabeennaagaa bessees. Hegee neeni kaymabeennaagaa nena yelidaageeti eranaadan oottees.
“Worddotiyogee metuwa awudenne giigissenna. Tumay qoncciya kiyanaagee attenna; qassi neeni koyro tumaa yootidaakko eti nena qaxxayanaagaappe aaruwa qaxxayana.”—Diyano.
Oottana koshshiyabaa
● Ne balaa ammana. Geeshsha Maxaafay “Ba nagaraa genttiya uri aacenna” gees. (Leemiso 28:13) Ne balana danddayiyogaa nena yelidaageeti eroosona. Shin eti neeni tumaa yootanaadan koyoosona
“Neeni worddotana xayikko nena yelidaageeti nena maarana. Neeni tumaa yootikko, nena yelidaageeti kaseegaappe aaruwan nenan ammanettana.”—Oliviya.
● Maarotaa oychcha. Geeshsha Maxaafay hagaadan gees: “Intte huuphiyaa kaushshiyoogaa afaladan maayite.” (1 Pheexiroosa 5:5) Gaasuwa shiishshiyogaa aggada “Tawu atto ga,” gaanawu neeni ashkke gidana koshshees.
“Darotoo gaasuwa shiishshiyageetu kahay donjjillana danddayees. Wurssettan, eti baliyo wode eta kahay qumꞌꞌiyogaa aggiigees.”—Heezera.
● Seeraa ekka. Geeshsha Maxaafay “seeraa” siyanaadan yootees. (Leemiso 15:5) Zuuzummiyogaa aggada nena yelidaageeti immiyo ayba qixaatenne ekka.
“Qixaatee neeyyo imettiyo wode ne zuuzummikko, hanotay yaa iitana. Qixaatiya ammanada ekka, qassi neeppe halidaban xeelaa wottoppa.”—Jesena.
● Yelidaageeti nena ammanettanaadan baaxeta. Geeshsha Maxaafay hagaadan gees: ‘Intte intte galꞌꞌa eeshshaa, hegeekka, kase eeshshaa qaarana bessees.’ (Efisoona 4:22) Yelidaageeti nena ammanettanaadan, ubbatoo loꞌꞌobaa ootta.
“Neeni ubbatoo loꞌꞌobaa kuuyikko, qassi zaarettada he balaa oottennaagaa nena yelidaageetuyyo bessikko, eti nenan zaarettidi ammanettana.”—Kareno.
MAADDIYA QOFAA: Eti nenan ammanettanaadan, eti neeppe koyiyobaappe aarobaa ootta. Leemisuwawu, haroode neeni issisaa biikko, qamissabeennaba gidikkonne neeni simmaydda deꞌiyogaa nena yelidaageetuyyo dawalada yoota. Hegee neeni etawu ammanettanawu koyiyogaa eti akeekanaadan maaddees.
Ne laggeti giyobaa
“Ne oottidobaa nena yelidaageetuppe genttiyo wode worddotaasa. Tumay qoncciya kiyanaagee attenna; qassi neeni koyro tumaa yootidaakko eti nena qaxxayanaagaappe aaruwa qaxxayana.”—Dariyusa.
“Nu balaa hara asa bolli gaasoyiyogee, nu oottido balawu aawatettaa ekkanawu kayma gidennaagaa bessees. Nuuni oottido balawu aawatettaa ekkidi maarotaa oychchennaba gidikko, nuna yelidaageeti nunan ammenettennan aggana danddayoosona.”—Siyeero.
Zaaretuwa: Taani yelidaageetu azazuwa kanttikko waatana koshshii?
● Ne balaa ammana. Ne balana danddayiyogaa nena yelidaageeti eroosona. Shin eti neeni tumaa yootanaadan koyoosona
● Maarotaa oychcha. Gaasuwa shiishshiyogaa aggada, “Tawu atto ga” gaada wozanappe oychcha.
● Seeraa ekka. Nena yelidaageeti immiyo ayba qixaatenne ekka.
● Yelidaageeti nena ammanettanaadan baaxeta. Yelidaageeti nena ammanettanaadan, ubbatoo loꞌꞌobaa ootta.
ISIINE 21-27
XOOSSAA QAALAN DEꞌIYA ALꞌꞌOBAA LEEMISO 23
Ushshaa Uyiyogaa Xeelliyagan Maaddiya Maarata
Kiristtaaneti Ushshaa Waati Xeellana Koshshii?
2 Geeshsha Maxaafay ushshaa uyiyaageeta zoriyoobay aybee? Yihooway nuuni likkiyaappe aatti uyennaadaaninne mattottennaadan azaziis. (Galaatiyaa 5:21) A Qaalay, ‘Daro woine eessaa uyiyaageetuura zuppetoppa’ yaagees. (Leemiso 23:20) Nuuni ushshaa uyikko, nu qoppiyoobaa, haasayiyoobaanne oottiyoobaa moorana woy nu payyatettaa qohana danddayiyaagaa keenaa likkiyaappe aattidi uyana koshshenna. Nuuni likkiyaappe aattennan agganawu metootikko, mule uyennan aggana koshshees.
Ushshaa Xeelliyagan Xoossaa Qofaa Kaalla
4 Kiristtaaneti banttana Medhdhidaagaappe loꞌꞌo kaaletuwa demmoosona. Leemisuwawu, likkiyappe aattidi uyiyogee iitabaa kaalettiyogaa I nuussi yootiis. Mattottiya uraabaanne mattottiyogee kaalettiyo metuwabaa loytti qonccissiya Leemiso 23:29-35n deꞌiya qofaa nabbabana danddayoos. Awurooppan deꞌiya Daaneela giyo cimay Yihoowabaa tamaaranaappenne A zoriya oosuwan peeshshanaappe kase ba deꞌoy ay malakkonne hassayees. I hagaadan giis: “Ta darotoo likkiyappe aattada uyiyogee taani iitabaa kuuyanaadan oottiis. Hegaappe denddidaagan iitabay ta bolli gakkiis, qassi taani hegaabaa qoppiyo wode haꞌꞌikka yiillotays.”
Ayyaanaaban Alꞌꞌobaa
Aadhdhida Eratettiyaa Xeesawusu
16 Neessi deꞌiyaaban ufayttada deꞌa. Geeshsha Maxaafay hagaadan zorees: “Duretanau daafuroppa. . . . Hegaa mala duretettai neeni xeellishin xayana; qefiyaa kessidi argganttaagaadan, saluwaa paallana.” (Lee. 23:4, 5) Miishshaynne aqoy qoppennan xayana danddayees. Gidikkonne, ha wodiyan duretikka hiyyeesatikka miishshaa demmanawu bichchaaroosona. Eti ubbatoo bantta sunttaanne bantta dabbotaa mooriyaabaa, ubba qassi bantta payyatettaa qohiyaabaa oottiyoy hegaassa. (Lee. 28:20; 1 Xim. 6:9, 10) Hara baggaara qassi, aadhdhida eratettay nuuni miishshaa xeelliyaagan keehi hirggennaadan maaddees. Qassi hegee, yaaretennan nuussi deꞌiyaabay gidana giidi ufayttidi deꞌanaadan maaddana.—Era. 7:12.
ISIINE 28–NAASE 3
XOOSSAA QAALAN DEꞌIYA ALꞌꞌOBAA LEEMISO 24
Meto Wodiyawu Giigettite
“Qaaxxennan Minnidi Eqqite”
15 Xoossaa Qaalaa xannaꞌanne hegaa wotta dentta qoppa. Mittay xaphuwaa loytti yeddikko minni eqqana danddayiyoogaadan, nuuni Yihoowa mintti ammanikko qaaxxennan minni eqqana danddayoos. Issi mittay dicciyo wode xaphuwaa duge loytti yeddeesinne daro sohuwaa yeddees. Nuuni xannaꞌiyo wodenne wotti dentti qoppiyo wode, nu ammanoy minneesinne Xoossaa ogee ubbaappe aadhdhiyoogaa mintti ammanoos. (Qol. 2:6, 7) Yihooway immido kaaletoy, zoreenne I naagidoogee beni wode deꞌida A ashkkarata waati maaddidaakko wotta dentta qoppa. Leemisuwawu, issi kiitanchchay beetamaqidasiyaa likkiyo wode Hizqqeeli ajjuutan loytti beꞌiis. He ajjuutan Hizqqeeli minettiis, qassi hegee Yihooway geeshsha goynuwawu kessido maarata nuuni waati azazettana danddayiyaakko eranaadan maaddiyaabaa yootees. (Hiz. 40:1-4; 43:10-12) Nuunikka Xoossaa Qaalan deꞌiya alꞌꞌobata wodiyaa bazzidi xannaꞌiyoonne wotti dentti qoppiyo wode goꞌettoos.
w09 12/15 18 ¶12-13
Meto Wode Ufayttada Deꞌa
12 Leemiso 24:10y: “Neeni metuwaa gallassi laafikko, ne wolqqai guutta giyoogaa” yaagees. Qassi hara leemisoy: “Wozani azzanikko, he aawu siiddees” yaagees. (Leemiso 15:13) Issi issi Kiristtaaneti keehippe azzanidi, Geeshsha Maxaafaa buzo nabbabiyoogaanne Xoossaa Qaalan wotti denttidi qoppiyoogaa aggidosona. Eta woosay wozanappe gidenna; qassi hara Kiristtaanetuppe haakkana danddayoosona. Adussa wodiyau azzaniyoogee qohiyoogee qoncce.—Leemiso 18:1, 14.
13 Hara baggaara, loꞌꞌobaa qoppiyoogee nu deꞌuwan ufayssaa demmana danddayiyooban xeelaa wottanaadan maaddees. Daawiti: “Abeet ta Xoossau, taani neeni koyiyoogaa oottanau dosais” yaagidi xaafiis. (Mazamure 40:8) Nu deꞌuwan metoy gakkiyo wode, goynuwaara gayttidaagan ubbatoo oottiyoobaa aggana koshshenna. Azzanttiyaabaa xooni kiyanau maaddiya loꞌꞌobay, ufayssiya oosuwaa oottiyoogaa. Nuuni a Qaalaa nabbabiyoogaaninne ubbatoo xeelliyoogan ufayssaa demmana danddayiyoogaa Yihooway yootees. (Mazamure 1:1, 2; Yaaqooba 1:25) Geeshsha Maxaafaappenne Kiristtaane shiiquwaappe nuna minttettiyaanne nu wozanaa ufayssiya, ‘shonggaara deꞌiya haasayaa’ siyana danddayoos.—Leemiso 12:25; 16:24.
Nabbabiyaageetu Oyshaa
Leemiso 24:16y hagaadan gees: “Xillo asi laapputoo kunddikkokka denddees.” Ha xiqisee zaari zaaridi nagaraa oottin Xoossay atto giyo uraabaa yootii?
Ha xiqisee yootiyoobay hegaa gidenna. Ha xiqisee daro metoy gakkikkokka gencciya uraabaa yootees.
Yaatiyo gishshawu, Leemiso 24:16y nagaraa oottiyoogaa gidennan, metoy woy waayee darotoo gakkiyoogaa qonccissiyoogaa ha ubbabaappe akeekoos. Ha iita alamiyan xillo uraa harggee woy hara metoy gakkana danddayees. Kawotettaappekka yedetay A gakkana danddayees. SHin I genccanaadaaninne xoonanaadan Xoossay A maaddanaagaa ammanettana danddayees. Neeni Xoossaa asawu hanotay injjetiyoogaa aapputoo beꞌidaakko ane qoppa. Aybissi? Nuuni ‘Goday hokkidaageeta ubbaa zemppissiyoogaa qassi kunddidaageeta ubbaa denttiyoogaa’ ammanettiyo gishshataassa.—Maz. 41:1-3; 145:14-19.
Ayyaanaaban Alꞌꞌobaa
Xoossaa Siiqoy Merinawu Deꞌees
13 Neeni aqo oyqqanawu qoppikko, giigettana bessees. Neeni giigettaas gaada qoppana danddayaasa; shin aqo oyqqanawu giigettiyoogaa giyoogee tumuppe aybakko ane pilggoos. Zaaroy nena garamissana danddayees.
14 Azinatussinne machchotussi son aawatettay dumma dumma gidiyoogaa Geeshsha Maxaafay yootees. Yaatiyo gishshawu, aqo oyqqanawu giigettiyoogee attuma asawu woy macca asawu eta hanotaadan dumma dumma gidiyoogee bessiyaaba. Issi attumaagee aqo oyqqanawu qoppikko, so asawu huuphe gidanawu I giigettidaakkonne bana oychchana koshshees. Issi azinay ba machcheessinne ba naatussi asatettaaninne haraban koshshiyaabaa kunttanaadan Yihooway koyees. Ubbaappe aaruwan, azinay goynuwaara gayttidaagan ba soo asaa kaalettana bessees. Ba soo asawu koshshiyaabaa kunttenna asi ‘ammanenna asappe aadhdhidi iita’ gidiyoogaa Geeshsha Maxaafay yootees. (1 Ximootiyoosa 5:8) Hegaa gishshawu, neeni ekkanawu qoppiya ura gidikko, kaallidi deꞌiya Geeshsha Maxaafay yootiyo maaraa neeni waatada oosuwan peeshshana danddayiyaakko qoppa: “Kasetada ne gadiyaa ootta; kattaakka zera; hegaappe guyyiyan, ne keettaa keexxa.” Hegaa giyoogee neeni aqo oyqqanaappe kase, Yihooway koyiyoogaa mala azina gidana danddayiyaakkonne akeekana bessees giyoogaa.—Leemiso 24:27.
15 Neeni gelanawu qoppiya ura gidikko, machcho, qassi geella aayo gidiyo aawatettawu giigettidaakkonne nena oychchana koshshees. Loꞌꞌo machchiyaa ba azinaassinne ba naatussi koshshiyaabaa kunttiyo daro ogetuppe amaridaagaa Geeshsha Maxaafay yootees. (Leemiso 31:10-31) Ha wodiyan, daro attumaageetinne maccaageeti aqo laggee banttassi oottanaba xallaa qoppoosona. SHin, nuuni nu aqo laggiyaassi oottana danddayiyoobaa qoppanaadan Yihooway koyees.
NAASE 4-10
XOOSSAA QAALAN DEꞌIYA ALꞌꞌOBAA LEEMISO 25
Haasayawu Maaddiya Maarata
Ne Inxxarssaa Loꞌꞌobawu Goꞌetta
6 Leemiso 25:11, “Koshshiyo wodiyan haasayettida likke qaalai biraa bolli tigido worqqaa alleequwaa mala” yaagiyoogee, nuuni haasayanawu injjetiya wodiyaa doorana koshshiyoogaa bessees. Worqqaa alleeqoy ba huuphen keehi loꞌꞌees. Biraa bolli a tigiyo wode yaa loꞌꞌees. Hegaadan, haasayana bessiya wodiyaa dooriyoogee nu haasayaa ufayssiyaabaanne maaddiyaabaa oottana danddayees. Waatidi?
7 Nuuni yootiyoobay siyiya urawu keehi koshshikkokka, haasayana bessiya wodiyaa akeekana xayikko, maaddennan aggana danddayees. (Leemiso 15:23 nabbaba.) Leemisuwawu, wolqqaama biittaa qaattaynne sunaami giyo beetay Laappune 2011n arshsho bagga Jaappaanen katamata ubbaanne daro heeraa bashshiis. He wode 15,000ppe dariya asay hayqqiis. He heeran deꞌiya Yihoowa Markkatikka bantta shoorotuugaadan qohettikkokka, azzanidaageetuyyo banttawu danddayettida ubban Geeshsha Maxaafaappe minttettiyaabaa yootidosona. SHin heeran deꞌiya daro asay Budistte haymaanootiyaa kaallees; qassi Geeshsha Maxaafay tamaarissiyoobaa eti eriyoobay guutta woy mule erokkona. Nu ishantti he wodee injjetennaagaa akeekido gishshawu, sunaamee aadhosaara dendduwaa hidootaabaa yootibookkona. SHin, eti minttettiyaabaanne asaa bolli hegaa mala iitabay gakkiyo gaasuwaa Geeshsha Maxaafaappe yootanawu haasayiyo imotaa goꞌettidosona.
Ne Inxxarssaa Loꞌꞌobawu Goꞌetta
15 Nuuni issibaa yootiyo ogee yootiyoobaa keenaa keehi koshshiyaabaa gidana danddayees. Yesuusi ba diccido Naazireete kataman Ayhuda woosa keettan tamaarissido wode, asay “a doonaappe kiyiya aaro kehatettaa qaalaa” siyidi garamettiis. (Luq. 4:22) Siyanawu kehiya haasayay wozanaa ufayssees, qassi asay nuuni yootiyoobaa ekkana danddayees. Liiqo qaalaa haasayikko, nu haasayay ammanttiyaabaa gidees. (Lee. 25:15) Nuuni keha, pashkkanne haratussi siyettiyaabaa qoppiyaageeta gidiyoogan, Yesuusaagaadan liiqo qaalaa haasayana danddayoos. Yesuusi cora asay i yootiyoobaa siyanawu baaxetidoogaa beꞌidi, etawu qarettidi “darobaa tamaarissuwaa doommiis.” (Mar. 6:34) Yesuusi asay bana cayiyo wodekka hanqquwan haasayibeenna.—1 PHe. 2:23.
16 Nuuni loytti eriyo urawu haasayiyo wode, ashkketettaaninne hiillan haasayanawu metootana danddayoos. Awu yootiyoobawu naagettana koshshennabadan qoppana danddayoos. Nuuni so asaara haasayiyo wode gidin, woy gubaaꞌiyan deꞌiya nu mata laggiyaara haasayiyo wode hegaadan qoppana danddayoos. SHin Yesuusi ba laggeta haasayissiyo wode hanqqettibeenna. Yesuusi ba mata laggeti bantta giddon ubbaappe aadhiyaagee oonakko palamettido wode, i guutta naꞌaa leemisuwaa yootidi, eta kehatettan seeriis. (Mar. 9:33-37) Cimati “ashkketetta ayyaanan” harata zoriyoogan Yesuusa milatana danddayoosona.—Gal. 6:1.
Awudeegaappenne Aaruwan Issoy Issuwaa Minttettite
10 Harata minttettiyoogee cimatu xallawu imettida aawatetta gidenna. PHawuloosi ubba Kiristtaaneti haratuyyo haasayiyo ‘haasayay siyiyaageeta goꞌꞌana mala koshshiyoogaadan minttettiya loꞌꞌo qaalaa’ haasayanaadan minttettiis. (Efi. 4:29) Nuuni ubbay haratuyyo ‘koshshiyaabaa’ eranawu akeekanchcha gidana bessees. PHawuloosi Ibraawe Kiristtaaneta hagaadan zoriis: “Intte arggaacida kushiyaanne intte daafurida gulbbataa minttettite. Wobbiya tohoi paxanaappe attin, burqqenna mala, sitta ogiyan hemettite.” Nuuni haratu kushiyaanne gulbbataa minttettana danddayoos. (Ibr. 12:12, 13) Yelagata gujjin, nuuni ubbay haasayiyooban issoy issuwaa minttettana danddayoos.
Ayyaanaaban Alꞌꞌobaa
Qofaa Payyatettaa
3 NEENI AY OOTTANA DANDDAYAY? Neeni ne huuphiyaa naagennaagaa bessiyaabaa oottanaappe kasetada ne hanqquwaa teqqiyoogaa tamaara. Issi issi asay hanqqettiya asay mino giidi qoppees; shin tumuppe eti laafa. Geeshsha Maxaafay, “Ba huuphiyaa naagenna asi dirssai meqqido katamaa mala” yaagees. (Leemiso 25:28) Issibaa haasayanaappe woy oottanaappe kasetidi tumu hanidabay aybakko shaakki eriyoogee hanqquwaa teqqanawu maaddiya issi oge. “Aawussi de7iya aadhdhida eratettai hanqquwaa mitissees.” (Leemiso 19:11) Nu qofaa naaganawu maaddiya aadhdhida eratettaa demmana mala, nuuni issibaa naaꞌꞌu uraappe loytti siyana koshshees.
Haasayaa
w24.11 4-5 ¶ 9-12—Cuccumaa: Naaqoy Gakkiyo Wode Yesuusi Oottidoogaadan Ootta.
Naaquwa Genccanawu Waatana Danddayay?
9 Naaquwa gencciyogan Yesuusi nuuyyo wottiyobi baynna leemiso. A dabbotuppenne hara daro asaappe naaqoy A gakkiis. A dabboti I wozanaa boshettees giidosona; haymaanootiya kaalettiyageeti I daydanttatu wolqqan oottees giidosona; qassi Rooma wotaaddarati A bolli qilliiccidosona, A barchcheyidosonanne woridosona. (Mar. 3:21, 22; 14: 55; 15:16-20, 35-37) Yesuusa ha ubba naaqoy gakkidaba gidikkokka, nagaraa I mule oottibeenna. Nuuni hagaappe ay tamaarana danddayiyoo?
10 Koyro PHeexiroosa 2:21-23 nabbaba. Nuna naaqoy gakkiyo wode wottiyobi baynna Yesuusa leemisuwa kaallana danddayoos. I awude coꞌꞌu gaanaakko, qassi awude haasayanaakko erees. (Mat. 26:62-64) Harati A wordduwan mootiyo wode issi issitoo aybanne haasayennan agganawu kuuyiis. (Mat. 11:19) I haasayido wodetunkka, ba bolli yedetaa gattiyageeta cayibeenna woy manddibeenna. Yesuusi, “xillo pirddiya Xoossaayyo bana aattidi [immido]” gishshawu haasayiyoban ubbatoo naagettiis. Yesuusi hanotaa Yihoowagaadan xeelliyogee keehi koshshiyaba gidiyogaa eriis. I bana gakkida hanotaa Yihooway likke wodiyan giigissanaagaa ammanettiis.
11 Nuna naaqoy gakkiyo wode nuuni haasayiyoban naagettiyogan Yesuusa leemisuwa kaallana danddayoos. Issi issitoo nu bolli gakkiya naaqoy wolqqaama gidenna gishshawu coꞌꞌu giidi xeellana danddayoos. Woy hanotay yaa iitanaadan oottiya aybanne haasayennan aggana danddayoos. (Era. 3:7; Yaaq. 1:19, 20) Qassi hara wodetun, harata qohoy gakkin beꞌiyo wode woy nu ammanuwawu exatana koshshiyo wode nuuni haasayiyogee koshshana danddayees. (Oos. 6:1, 2) Haasayiyaba gidikko, woppu giidi bonchchuwan haasayissanawu nuussi danddayettida ubbabaa oottana koshshees.—1 PHe. 3:15.
12 Yesuusaagaadan nuunikka, ‘xillo pirddiyagan’ ammanettana danddayoos. Harati nu bolli pirddiyo wode woy nuna naaqqiyo wode hanotaa Yihooway eriyogaa ammanettoos. Yihooway wurssettan ha hanota ubbaa giigissanaagaa eriyogee naaquwa genccanaadan maaddees. Nuuni Yihoowan ammanettiyabanne metuwa I giigissanaashin naagiyaba gidikko, hanqqettiyogaa woy harata ixxiyogaa aggana. Nuuni haratu bolli hanqqettiyogaa aggennaba gidikko, hegee nuuni iitabaa oottanaadan, ufayttiyogaa agganaadaaninne qohettanaadan oottana danddayees.—Maz. 37:8.
NAASE 11-17
XOOSSAA QAALAN DEꞌIYA ALꞌꞌOBAA LEEMISO 26
‘Eeyya Urappe’ Haakka
it-2 729 ¶6
Iraa
Wodeta. Hidootaa Biittan naaꞌꞌu waannatiya wodeti deꞌoosona; hegeetikka booqalssa gidida boniyanne iray bukkiyo balgguwa. (Maz 32:4; Sii 2:11ra gatta xeella) Hosppune aginawu baggaappe doommidi Xiqimitaa aginawu baggaa gakkanawu guutta iray bukkees. Kattaa shiishshiyo ha wodetun iray darotoo bukkenna. Kattaa shiishshiyo wodiyan iray koshshennaagaa Leemiso 26:1y yootees. (1Sam 12:17-19ra gatta xeella) Balggo wodiyan iray ubba galla bukkenna; issi issitoo booqalliyo gallassati deꞌoosona. Hegee keehi meego wode gidiyo gishshawu, iran warettikko keehi kinchchees. (Izi 10:9, 13) Yaaniyo gishshawu, hegaappe ashshiya injjettiya keettay keehi koshshees.—Isi 4:6; 25:4; 32:2; Iyy 24:8.
w87 10/1 19 ¶12
Seeray Sarotettaa Ayfiya Demissees
12 Leemiso 26:3y yootiyogaadan “Parau lissuwaa, hariyau poxooruwaa koshshiyoogaadan, azallaa zokkuwau waraa” koshshana danddayees. Israaꞌeelati issi issitoo bantta kushiyan ehiido metuwa gaasuwan tuggatiyo wode Yihooway coꞌꞌu gi xeellees: “Aissi giikko, eti Xoossaa qaalaayyo makkalidosonanne Ubbaappe Xoqqiya Xoossaa zoriyaa karidosona. Eti tugga oosuwan daafuridosona; eti kunddidosona; shin eta maaddiyaabai xayiis. Eti metootido wode, GODAAYYO waassidosona; waassin I eta eta waayiyaappe ashshiis.” (Mazamure 107:11-13) Shin issi issi eeyya asati, banttawu imettida seeraappe goꞌettiyogaa aggidi banttana zozza oottoosona: “Daroton seerin ixxidi, morgge zozzida urai hassayennan meqqana; he urau paxoikka baawa.”—Leemiso 29:1.
it-2 191 ¶4
Wobbe, Wobbetettaa
Leemisuwan goꞌettidoogaa. ‘Eeyya asa bolli kiitaa kiittiyogee ba tohuwa qanxxiyogaa woy [wobbe gidiyogaanne] woriyabaa uyiyoogaa mala’ gidiyogaa Kawuwa Solomoni yootiis. Eeyya ura ayba oosonne ootissiya asi ba kushiyan metuwa ba bolli ehees. Hegaadan oottiya ura oosoy laalettananne daafay A gakkana.—Lee 26:6.
Ayyaanaaban Alꞌꞌobaa
Ashkke Gidiyoogan Minotettaa Bessa
18 Nuuni issibaa qonccenne ammanttiya ogiyan yootiyo wodekka ubba asay hegaa ammanennan aggana danddayees. SHin nuuni hiillaaninne ashkketettan yootiyoogee maaddana danddayees. (Qolasiyaasa 4:6 nabbaba.) Nuuni ammaniyoobaa issi urawu yootiyoogaa kuwaasiyaa awu oliyoogan leemisana danddayoos. Nuuni kuwaasiyaa leddan woy wolqqan olana danddayoos. Nuuni leddan olikko nunaara kaaꞌiyaagee kuwaasiyaa oyqqidi loytti kaaꞌana danddayees. Hegaadankka, nuuni hiillaaninne ashkketettan yootiyaaba gidikko, asay nu yootiyoobaa siyanawunne aggennan haasayanawu eeno gaana danddayees. Issi uri nunaara palamettanawu woy nuna boranawu koyikko, nuuni aara haasayiyoogaa aggana koshshees. (Lee. 26:4) SHin daro asay hegaa mala gidennan aggana danddayees. Daroti nu yootiyoobaa siyana danddayoosona.
NAASE 18-24
XOOSSAA QAALAN DEꞌIYA ALꞌꞌOBAA LEEMISO 27
Tumu Laggeti Nuna Waati Maaddiyonaa?
Yihooway Banttana Ziqqi Oottiya Ba Ashkkarata Nashshees
12 Bana ziqqi oottiya uri zoriyaa gishshawu galatees. Leemisuwawu, neeni shiiquwan deꞌiyaabadan qoppa. Neeni amarida asatuura haasaya simmin, etappe issoy nena xeegidi asaappe gaxi kessidi ne achchan qumay deꞌiyoogaa yootees. Neeni yeellatanaagee qoncce. SHin I woy A hegaa neeyyo yootidoogawu galatikkii? Issi uri tawu sohuwaara yootidaba gidernneeshsha gaana danddayaasa! Hegaadankka, nuuyyo zoree koshshiyo wode issi ishay woy michchiyaa nuussi zoriyaa immikko, nuna ziqqi oottananne galatana koshshees. He uraa nuuni nu laggedan xeelloosippe attin, morkkedan xeellokko.—Leemiso 27:5, 6 nabbaba; Gal. 4:16.
it-2 491 ¶3
Shooruwa
Maadoy koshshiyo wodiyan ammanettiya laggiya xeesana bessiyogaa xeelliyagan Leemiso maxaafay hagaadan zorees: “Ne siiqo laggiyaanne ne aawaa siiqo laggiyaa aggoppa; nena metido wode ne ishaa soo booppa. Haahuwan de7iya ishaappe matan de7iya shooroi keha.” (Lee 27:10) Hegaa xaafidagee so asaayyo mata lagge gidida ura, matan deꞌenna, hanotay injjetenna, woy ubba maaddana koyenna gishshawu, eesuwan gakkidi maaddana danddayenna haahuwan deꞌiya ishaa mala mata dabbuwappekka aattidi xeellana koshshiyogaa yootiyaba milatees.
Yelagatoo—Ay Mala Deꞌuwaa Deꞌanawu Koyeetii?
7 Yoꞌaashi kuuyido iitabaappe nuuni tamaarana danddayiyo issibay Yihoowa siiqiyaanne A ufayssanawu koyiya asaara laggetana koshshiyoogaa. Eti nuuni loꞌꞌobaa oottanaadan maaddoosona. Nuuni nuuppe bayratiyaageetuura woy kaalotiyaageetuura laggetana danddayoos. Yoꞌaashi ba laggiyaa Yoodaaheppe keehi kaalotiyoogaa hassayite. Laggeta dooriyoogaara gayttidaagan inttena hagaadan oychchite: ‘Eti taani Yihoowa mintta ammananaadan maaddiyoonaa? Xoossay kessido maaraadan deꞌana mala tana minttettiyoonaa? Yihoowabaanne A tumaabaa haasayiyoonaa? Xoossay kessido maarata eti kaalliyoonaa? Tawu zoree koshshiyo wode tana zoriyoonaa?’ (Lee. 27:5, 6, 17) Intte laggeti Yihoowa siiqennaba gidikko, inttena maaddokkona. SHin intte laggeti Yihoowa siiqiyaageeta gidikko, inttena ubbatoo maaddana!—Lee. 13:20.
Ayyaanaaban Alꞌꞌobaa
Cimatoo—Geedoonappe Tamaarite
8 Ubbaban Yihooway sabettanaadan oottite. Geedooni Midiyaamata xoonido gishshawu harati A sabbido wode, I Yihooway sabettanaadan oottiis. (Daan. 8:22, 23) Cimati Geedoona waani milatana danddayiyoonaa? Eti oottidobawu Yihooway sabettanaadan oottana koshshees. (1 Qor. 4:6, 7) Leemisuwawu, issi cimay gooba asttamaare gidiyo gishshawu harati A galatiyo wode, I kaaletoy Xoossaa Qaalan deꞌiyoogaanne nuuni ubbay Yihoowa dirijjitiyaappe tamaariyoogaa yootana danddayees. Cimati Yihoowa bonchchissiya ogiyan tamaarissiyaakko woy harata maalaalissanawu koyidi tamaarissiyaakkonne loytti qoppana danddayoosona. Tiimoota giyo cimaa hanotaa beꞌite. I cima gidido wode dere haasayaa haasayiyoogaa dosees. I hagaadan giis: “Taani haasayaa doomettan yootiyo qofatinne leemisoti adussanne daro. Hegaappe denddidaagan asay tana darotoo sabbees. SHin hegee, ezggiyaageeti Geeshsha Maxaafaabaa woy Yihoowabaa gidennan tabaa qoppanaadan oottiis.” Guyyeppe Tiimooti asay abaa bessiyaagaappe aaruwan qoppennaadan I tamaarissiyo ogiyaa laammana koshshiyoogaa akeekiis. (Lee. 27:21) Hegee ay goꞌꞌaa demissidee? I hagaadan giis: “Ishanttinne michchontti metuwaa genccanaadan, paaciyaa xoonanaadan woy Yihoowakko loytti shiiqanaadan ta haasayay eta maaddidoogaa haꞌꞌi tawu yootoosona. Eti tana sabbiyo wodiyaappe aaruwan hegaa mala qofaa siyiyo wode taani keehi ufayttays.”
Haasayaa
ijwyp huuphe yohuwa 75—Cuccumaa: Ta Laggee Tana Yiilloyikko Waatana Koshshii?
Ne erana koshshiyabaa
Ne oottana danddayiyobaa
Ne laggeti giyobaa
Ne erana koshshiyabaa
● Asa gididi walaqettenna laggee baawa. Nagaranchcha gidiyo gishshawu loꞌꞌo laggee, haray atto neeni mata lagge gaada qoppiyo urikka oottiyoban woy haasayiyoban nena yiilloyana danddayees. Neenikka nagaranchcha gidiyogee qoncce. Tumaa yootanawu, neeni harata yiilloyido wodiya hassayikkii?—Yaaqooba 3:2.
● Intternneetee issi uri elle yiillotanaadan oottana danddayees. Leemisuwawu Devida giyo yelagay hagaadan giis: “Intternneetiya goꞌettiyo wode ne laggee haratuura allaxxiiddi denddido pootuwa beꞌada neeni shoobettabeenna gishshawu yiillotana danddayasa. Yaatada ne laggee nena kaddidabadan qoppada azzanana danddayaasa.”
● He metuwa waata giigissanaakko tamaarana danddayasa.
Ne oottana danddayiyobaa
Nena qora. Geeshsha Maxaafay hagaadan gees: “Hanqqoi azallati haluwaa kiyanau go7ettiyo miishsha gidiyo gishshau, elle hanqqettoppa.”—Eranchchaa 7:9.
“Issi issitoo neeni yiillotido allaallee hegaa keena gitaba gidennaagaa guyyeppe akeekaasa.”—Aliso.
Hagaa qoppa: Neeni elle lancciya asee? Haraatu balaa kaseegaappe aaruwan gencciyogaa meezetana danddayay?—Eranchchaa 7:21, 22.
Atto giyogee demissiyo goꞌꞌaa akeeka. Geeshsha Maxaafay hagaadan gees: ‘Moorida urawu atto giyogee bonchchissees.’—Leemiso 19:11.
“Neeyyo hanqqettana bessiya gaasoy deꞌikkokka coo atto giyogee loꞌꞌo; hegaa giyogee hegaabaa zaarettidi denttokko, woy izaawu zaari zaaridi atotettaa oychchanaadan oottokko giyogaa. Issitoo atto giikko hegaa dogana koshshees.”—Maloro.
Hagaa qoppa: Hanotay tumuppe wolqqaamabee? Sarotettaa medhdhanawu atto gaana danddayay?—Qolasiyasa 3:13.
Ne laggiyabaa qoppa. Geeshsha Maxaafay hagaadan gees: “Inttena haratubaykka qofissoppe attin, inttebaa xalaalay qofissoppo.”—Piliphphisiyuusa 2:4.
“Laggeti issoy issuwa siiqiyabanne bonchchiyaba gidikko, merettiya metuwa sohuwara giigissoosona; ayssi giikko laggetettaa minttanawu eti darobaa oottidosona. Intte hegawu daro baaxetido gishshawu, intte laggetettay moorettanaadan koyekketa.”—Nikoolo.
Hagaa qoppa: Ne laggee hegaa oottido ammanttiya gaasoy deꞌii?—Piliphphisiyuusa 2:3.
Qoppana koshshiyabaa: Nena asi yiilloyiyo wode neeni waatanaakko eriyogee gita asa gidiyo wodekka nena maaddana danddayiya hiilla. Yaatin he hiillaa haꞌꞌi ayssi tamaarikkii?
Ne Laggeti giyobaa
“Uttidi haasayana koshshiyoy ubba allaalliya gidenna. Hegee ta giigissana danddayiyobaa gidikko giigissays. Hegaadan oottiyogee hanqqettido ubbabaa haasayiyogaappe aaruwan sarotettaa demissees.”—Kiyano.
“Issi issi hanotan tana hagaadan oychchays, ‘Ha allaallee taani ta laggiyappe shaahettanaadan oottiyagaa keena gitabee?’ Darotoo hegaa zaaroy gidenna giyagaa.”—Tireya.
Laggetu giddon merettida metuwabaa ubbatoo haasayiyogee, hoꞌꞌiya keettaa penggiya zaari zaari dooyidi meeguwa soo gelissiyogaa mala
NAASE 25-31
XOOSSAA QAALAN DEꞌIYA ALꞌꞌOBAA LEEMISO 28
Iita Uranne Xillo Ura Giddon Deꞌiya Dummatettaa
w93 5/15 26 ¶2
Kumetta Hanotan Yihoowa Kaalleetii?
“Xilloti gaammo mala xala.” (Leemiso 28:1) Eti ammanettiyogaa bessoosona; xalidi Xoossaa Qaalan ammanettoosona; qassi qohiya aybanne gencciyogan Yihoowa oosuwa xalatettan minni oottoosona.
it-2 1139 ¶3
Akeekiyogaa
Akeekaa pulttuwappe wora simmiyageeta. Nagaraa oottanawu simmiya uri issibaa kuuyiyo woy halchchiyo wode Xoossaabaa qoppiyogaa aggibayees. (Iyy 34:27) Hegaa mala uri I oottiyo iitabaa akeekennaadan ba wozanaa dammetteesinne akeekaa xayees. (Maz 36:1-4) I Xoossawu goynniyabadan qoppikkonne, Xoossagaappe asaa kaaletuwa kaseyees, woy hegaa kaallanawu doorees. (Isi 29:13, 14) I oottiyo iitabaa ‘kaassadan’ xeellees. (Lee 10:23) Qassi I oottiyobaa Xoossay beꞌana woy akeekana danddayenna giidi qoppiyo gishshawu eeyyabaa, geellabanne meqqetti baynnabaa oottees. (Maz 94:4-10; Isi 29:15, 16; Erm 10:21) I ba oottiyobaaninne haniyoban ‘Yihooway baawa’ gees. (Maz 14:1-3) Qassi Xoossaa aggiigees. I Xoossaa maarata kaallenna gishshawu issibaa suure xeellanawu, loytti akeekanawunne loꞌꞌobaa kuuyanawu danddayenna.—Lee 28:5.
it-1 1211 ¶4
Suuretettaa
Suuretettaa naagiyogee issi ura kanduwa geeshshatettan beettiyaba gidennan, Yihoowaninne I ashshiyo wolqqan mintti ammanettiyogaa xaallan beettiyaba. (Maz 25:21) Xoossay suuretettaa naagiyageetussi ‘gonddallenne’ “baqati attiyo soho” gidanawu qaalaa geliis. (Lee 2:6-8; 10:29; Maz 41:12) Eti Yihoowan nashshettanawu ubbatoo koyiyogee bantta deꞌuwan woppu gaanadaaninne bantta halchchuwa suure polanaadan maaddees. (Maz 26:1-3; Lee 11:5; 28:18) Iitatu haaruwappe denddidaagan xillota metoy gakkiyogaanne xillotikka iitatudan hayyqqiyo gaasuwa Iyyoobi akeekanawu metotikkonne, Yihooway boree baynna uraa naaganaagaa, woyttanaagaa, sinttappe awu sarotettaanne woppaa immanaagaa qaalaa geliis. (Iyy 9:20-22; Maz 37:18, 19, 37; 84:11; Lee 28:10) Iyyooba hanotay bessiyogaadan, issi ura bonchchissiyay I suure asa gidiyogaappe attin ayyo deꞌiya duretettaa gidenna. (Lee 19:1; 28:6) Hegaa mala aaway deꞌiyo naati, bantta aawawu deꞌiya loꞌꞌo sunttaappenne bonchchuwappe denddidaagan, A leemisuwa kaalliyo gishshawu ufayttoosona. (Lee 20:7)
Ayyaanaaban Alꞌꞌobaa
Paaciya Eqettanawu Ubbatoo Giiga Utta
19 Nuuni hanno gakkanawu xoonibeenna nu shugo miyyee nuuni balabaa oottanaadan denttettibeennaba gidikkonne waatana danddayiyoo? Yesuusi paaciyara gayttidaagan “naagi uttite” giidi zorido zoriya kaallana danddayoos. Neeni mino gididabadan qoppiyo wodetunkka paacettanaadan oottiya hanotatuppe ubbatoo naagetta. (1 Qor. 10:12) Ne shugo miyyiya xoonanaadan maaddidabata oottiyogaa aggoppa. Paaciyappe ubbatoo nena naaganawu ‘minna’ baaxeta.—2 PHe. 3:14.