ʼUluaki Samuele
1 Neʼe ʼi ai he tagata mai Lamataimi-tesofimi*+ ʼi te potu moʼugaʼia ʼo Efalaimi+ neʼe higoa ko Elekana,+ te foha ʼo Seloame, te foha ʼo Eliu, te foha ʼo Tou, te foha ʼo Tesufe, te tagata Efalaimi. 2 Pea neʼe ko ʼona ʼohoana ʼe lua, neʼe higoa te tahi ko Ana, pea ko te tahi ko Penina. Neʼe maʼu fanau ia Penina, kae neʼe mole ʼi ai he fanau ʼa Ana. 3 ʼI te taʼu fuli, neʼe mavae te tagata ʼaia ʼi tona kolo ʼo alu ki Silo, ʼo atolasio* pea mo momoli he sakilifisio kia Sehova ʼo te ʼatu kautau.+ Neʼe gaue ʼi ai te ʼu foha ʼe lua ʼo Eli, ia Ofeni mo Fineasi,+ ʼi tonā ʼuhiga pelepitelo ʼa Sehova.+
4 ʼI te tahi ʼaho, ʼi te momoli ʼae e Elekana ia he sakilifisio, neʼe ina foaki ni vahe kia Penina mo ʼana tama pea mo ʼana taʼahine fuli,+ 5 kae neʼe ina foaki kia Ana he vahe ʼe makehe, he neʼe lahi age tona ʼofa ʼae kia Ana. Kae neʼe mole foaki age e Sehova hana fanau. 6 Tahi ʼae meʼa, neʼe manukiʼi tuʼumaʼu pe ia ia e Penina,* ke tupu ai hana lotomamahi ʼi te mole foaki age e Sehova hana fanau. 7 Neʼe ina fai te faʼahi ʼaia ʼi te taʼu fuli. ʼI te temi fuli pe ʼae neʼe alu ai ia Ana ki te fale ʼo Sehova,+ neʼe lahi tona manukiʼi e tona fili, ʼo tagi mamahi ai pea neʼe mole kei kai. 8 Kae neʼe ui age e Elekana tona ʼohoana: “Ana, he koʼe ʼe ke tagi, he koʼe ʼe mole kei ke kai, pea he koʼe ʼe ke lotomamahi feia? ʼE mole au maʼuhiga age koa la kia koe ʼi he ʼu tama ʼe toko hogofulu?”
9 Neʼe tuʼu ake leva ia Ana ʼi tanatou ʼosi kakai mo iinu ʼi Silo. ʼI te lakaga ʼaia, neʼe heka ia te pelepitelo ko Eli ʼi te hekaʼaga, ʼi te huʼaga ʼo te fale lotu*+ ʼo Sehova. 10 Neʼe lotomamahi ʼaupito ia Ana, ʼo kamata faikole ai kia Sehova+ pea neʼe mole feala ke tuku tana tagi. 11 Pea neʼe ina fai te fakapapau ʼaeni: “Sehova ʼo te ʼatu kautau, sio ifo ki te mamahi ʼo tau kaugana. Kapau ʼe ke manatuʼi au ʼo mole ke galoʼi au mo foaki mai haku tamasiʼi tagata,+ ʼe au foaki atu anai ia ia kia te koe, Sehova, ke tauhi kia te koe ʼi tona maʼuli katoa, pea ʼe mole kosi anai tona ʼulu ʼi he temi.”+
12 ʼI tana faikole loaloaga ʼaia ia muʼa ʼo Sehova, neʼe sioʼi e Eli tona gutu. 13 Neʼe palalau ia Ana ʼi tona loto, pea ko ʼona laugutu pe ʼae neʼe gaugaue kae neʼe mole logo tona leʼo. Koia neʼe manatu ai ia Eli ʼe konahia. 14 Neʼe ui age e Eli: “ ʼE ke konahia anai koa ʼo kaku ki ʼafea? Tuku tau inu te vino.” 15 Pea neʼe tali age e Ana: “Kailoa, siʼoku ʼaliki! Ko au ʼe ko he fafine ʼe lotomamahi ʼaupito. Neʼe mole au inu he moʼi vino peʼe ko he moʼi kava, kae ʼe au avahi toku loto* kia Sehova.+ 16 ʼAua naʼa ke manatu ʼe mole hoku ʼuhiga, koteʼuhi ʼe au palalau ʼi te lahi ʼo toku mamahi mo taku hoha, ʼo kaku mai ki te temi nei.” 17 Neʼe tali leva e Eli: “Alu la ʼi te fimalie, pea ke tali e te ʼAtua ʼo Iselaele tau kole ʼae neʼe ke fai kia te ia.”+ 18 Neʼe ina tali age: “Ke ke ʼofa ki tau kaugana.” Pea neʼe alu ai te fafine ʼo kai pea neʼe mole kei matamamahi.
19 Neʼe natou tutuʼu ake ʼi te kei hegihegi, ʼo tulolo ia muʼa ʼo Sehova, pea hili ʼaia, neʼe natou toe liliu leva ki tonatou ʼapi ʼi Lama.+ Neʼe momoe leva ia Elekana mo tona ʼohoana ko Ana, pea neʼe tokagaʼi* ia ia e Sehova.+ 20 Neʼe faitama leva ia Ana, pea ʼosi te taʼu katoa, neʼe kua ina* fanauʼi he tamasiʼi tagata ʼo ina fakahigoaʼi+ ko Samuele,* koteʼuhi, ohage pe ko tana ui, “neʼe au kole ia ia kia Sehova.”
21 Ki muli age, neʼe alu ia Elekana mo tona loto fale katoa ʼo momoli kia Sehova te sakilifisio ʼae neʼe ina fai ʼi te taʼu fuli,+ pea mo te molaga ʼo ʼuhiga mo tana fakapapau. 22 Kae neʼe mole alu ia Ana,+ he neʼe ina ui ki tona ʼohoana: “ ʼI te temi pe ʼae ka au vaheʼi ai te tamasiʼi, ʼe au ʼave anai ki te fale ʼo Sehova.* Pea ʼe nofo anai ʼi ai ʼo talu ai.”+ 23 Pea neʼe ui e Elekana tona ʼohoana kia ia: “Fai te meʼa ʼae ʼe ke manatu ʼe lelei.* Nofo ʼi fale ʼo aʼu ki te temi ʼae ʼe ke vaheʼi ai ia ia. ʼOfa pe ke fakahoko e Sehova te meʼa ʼae neʼe ke ui.” Koia, neʼe nofo ai te fafine ʼi fale ʼo fafaga tana tamasiʼi ʼo kaku ki tona vaheʼi.
24 ʼI te temi pe ʼae neʼe ina vaheʼi ai, neʼe alu mo ia ki Silo, pea neʼe ina ʼave mo he vitulo ʼe taʼu tolu, mo he efa* falena ʼe tahi, mo he ʼaiʼaga vino lahi.+ Neʼe alu ai ki te fale ʼo Sehova ʼi Silo+ mo tana kiʼi tama. 25 Neʼe matehi leva te vitulo pea neʼe ʼave te kiʼi tama kia Eli. 26 Neʼe ina ui leva: “Fakalelei mai, siʼoku ʼaliki. Kae ʼe au tala moʼoni atu, ʼe ko au te fafine ʼae neʼe tutuʼu mo koe ʼi te faʼahi ʼaeni ʼo faikole kia Sehova.+ 27 Neʼe au faikole ʼo ʼuhiga mo te kiʼi tama ʼaeni, pea neʼe tali e Sehova taku kole ʼae neʼe au fai kia te ia.+ 28 ʼI te temi leva ʼaeni, ʼe au foaki ia ia kia Sehova. ʼE foaki ia ia kia Sehova ke tauhi kia te ia ʼi tona maʼuli katoa.”
Pea neʼe tulolo* ia muʼa ʼo Sehova.