Kia Tito
1 Ko au Paulo, te tagata kaugana ʼa te ʼAtua pea mo apositolo ʼa Sesu Kilisito.* Ko taku tui mo taku gaue fakaapositolo ʼe mulimuli ki te tui ʼa natou ʼae neʼe filifili e te ʼAtua, pea mo te ʼatamai malama totonu ʼo te moʼoni ʼae ʼe alu tahi mo te pipiki ki te ʼAtua. 2 Ko te ʼu meʼa ʼaia ʼe fakatafito ki te ʼamanaki ʼo te maʼuli heʼe gata.+ Ko te ʼAtua ʼae ʼe mole feala ke loi+ neʼe ina fakapapauʼi mai te faʼahi ʼaia talu mai fualoa. 3 Kae ʼi tona temi totonu, neʼe ina fakaha tana folafola ʼaki te fakamafola ʼo te logo lelei ʼae neʼe tuku mai kia au,+ ʼo mulimuli ki te fakatotonu ʼa te ʼAtua, totatou Fakamaʼuli. 4 ʼE au faitohi kia Tito, taku fanau ʼofaina ʼae ʼe ma tui fakatahi:
Ke foaki atu e te ʼAtua te Tamai pea mo totatou Fakamaʼuli ko Kilisito Sesu ia te ʼofa makehe pea mo te tokalelei.
5 Neʼe au tuku koe ʼi Kelete ke ke fakatokatoka te ʼu meʼa ʼae ʼe tonu ke fakatonutonuʼi, pea mo fakanofo he ʼu tagata ʼafeā ʼi te ʼu kolo takitahi, ʼo mulimuli ki te ʼu tokoni neʼe au fai atu: 6 ʼE tonu ki he tagata ʼafeā ke* mole fai he tukugakovi ki ai, ke ʼohoana mo he fafine ʼe tahi, ke tui ʼana fanau pea ke mole tukugakoviʼi natou ʼe natou fai he ʼu aga heʼe ʼaoga* pea mo talagataʼa.+ 7 ʼI tona ʼuhiga tagata tauhi ʼapi ʼa te ʼAtua, ʼe tonu ki he taupau ke mole fai he tukugakovi ki ai, ke mole logogataʼa,+ ke mole hoko ita,+ ke mole inu kava fakavale, ke mole agamalohi,* ke mole holi ki he paʼaga ʼe maʼu ʼaki he agakaka. 8 Kae ʼe tonu ke tali kaiga,+ mo ʼofa ki te meʼa ʼae ʼe lelei, mo fakapotopoto,+ mo faitotonu, mo agatonu+ pea mo lotololomi.+ 9 ʼE tonu ke pipiki malohi ki te folafola agatonu* moka faiakonaki,+ ke feala ai hana fakalotomalohiʼi ʼihi ʼaki te akonaki ʼae ʼe lelei*+ pea mo fakatonutonuʼi+ ia natou ʼae ʼe fakafeagai.
10 ʼE kaugamalie te kau agatuʼu, mo natou ʼae ʼe palalau noa, mo natou ʼae ʼe kaka, tafito ia natou ʼae ʼe pipiki ki te silikosisio.*+ 11 Koia ʼe tonu ke mapunuʼi ʼonatou gutu, koteʼuhi ko te ʼu tagata ʼaia ʼe natou fia maʼu paʼaga ʼaki he agakaka, ʼo natou fakamaveuveuʼi te ʼu loto fale ʼaki tanatou akonakiʼi te ʼu meʼa ʼae ʼe mole tonu ke natou akonakiʼi. 12 Neʼe tala e he polofeta ʼe natou fenua tahi: “Ko te hahaʼi Kelete ʼe natou gutuloi tuʼumaʼu, pea ʼe ko he ʼu manu fekai, ʼe natou kai fakavale pea mo pipiko.”
13 ʼE moʼoni te palalau ʼaia. Koia ʼe tonu ai ke ke haga fakatonutonuʼi natou ke malohi ai tanatou tui, 14 ke mole natou tokagaʼi te ʼu fagana Fakasutea pea mo te ʼu fakatotonu ʼa he ʼu tagata ʼe fakamamaʼo mai te moʼoni. 15 Ko meʼa fuli ʼe maʼa ki te hahaʼi ʼae ʼe maʼa.+ Kae kia natou ʼae ʼe ʼuli pea mo heʼe tui, ʼe mole maʼa he meʼa, koteʼuhi ʼe ʼuli ʼonatou ʼatamai pea mo ʼonatou leʼo ʼo loto.+ 16 ʼE natou tala ia muʼa ʼo te hahaʼi ʼe natou iloʼi te ʼAtua, kae ʼe natou fakafisi kia te ia ʼaki ʼanatou gaue,+ koteʼuhi ʼe natou fakalialia, mo talagataʼa, pea ʼe mole natou tuha ki te fai ʼo he gaue ʼe lelei.