ʼAukusito

Ko te ʼu manatu maʼuhiga ʼaeni ʼe lua ʼe tou maʼu ʼi te pesalemo ʼaia: (1) ʼE hoko ki te kau faitotonu ni ʼahiʼahi. (2) ʼE haofaki tatou e Sehova mai ʼotatou ʼahiʼahi. ʼO feafeaʼi? ʼE tokoni tafito mai ke tou maʼu he manatu fakapotopoto ʼo ʼuhiga mo totatou maʼuli ʼi te malama ʼaeni. ʼE moʼoni, ʼe fakapapau mai e Sehova he maʼuli fiafia moka tou tauhi kia te ia, kae ʼe mole ina fakapapau mai ʼe tou hao anai mai te ʼu faigataʼaʼia. (Esa. 66:14) ʼE ina fakalotomalohiʼi tatou ke tou sioʼi fakamamaʼu totatou ka haʼu, ia te maʼuli ʼae ʼe ina loto ke tou maʼu ʼo talu ai. (2 Ko. 4:​16-18) Kae ʼi te temi nei, ʼe tokoni mai ke hoko atu pe tatatou tauhi kia te ia ʼi te ʼaho fuli. (Tgl. 3:​22-24) ʼE feala ke tou ako mai te faʼifaʼitaki ʼo he ʼu kaugana agatonu ʼa Sehova ʼi te temi muʼa pea ʼi totatou temi. ʼE toe feala ke hoko kia tatou he faigataʼaʼia neʼe mole tou ʼamanaki ki ai. Kae kapau ʼe tou falala kia Sehova, pea ʼe tokoni mai anai.—Pes. 55:22. w23.04 14-15 ¶3-4

ʼE feala ke tou maʼu he ʼu ako mai te faʼifaʼitaki ʼa Sosefo mo Malia. Neʼe nā lotolelei ke nā fakalogo ki te ʼu pule maʼoluga logo la neʼe faigataʼa. (Luka 2:​1-6) ʼI te mahina hiva ʼo te faitama ʼa Malia, neʼe fakamaʼua age ke nā fai he meʼa neʼe faigataʼa ʼaupito. Neʼe fakatotonu e te kovana Loma ko ʼAukusito ke olo te hahaʼi ʼo tohi ʼonatou higoa ʼi te ʼu kolo ʼae neʼe natou tutupu ai. Koia neʼe tonu ai kia Sosefo mo Malia ke nā olo ki Petelehemi. Neʼe tonu ke nā faifagona ia kilometa ʼe 150,ʼo nā hake mo hifo ʼi te ʼu moʼuga. ʼE faigataʼa anai tanā olo ʼaia tafito la kia Malia. Neʼe lagi nā tuʼania ki te maʼuli malolo ʼo Malia ʼo feia mo te kiʼi fanau ʼae ka tupu mai. Kotea anai ka hoko moka fanau ia Malia ʼi tanā faifagona ʼaia? Neʼe ina fuafatuʼi ia ia ʼae ka liliu ko te Mesia. Neʼe ko he ʼu tupuʼaga lelei koa ʼaia ke nā talagataʼa ai ki te fakatotonu ʼaia mai te puleʼaga? Neʼe mole tuku e Malia mo Sosefo ʼonā tuʼania ʼaia ke nā talagataʼa ai ki te lao ʼa Sesale. Neʼe tapuakinaʼi e Sehova tanā fakalogo. Neʼe kaku haohaoa ia Malia ki Petelehemi, neʼe fanau ai pea neʼe maʼuli malolo pe te kiʼi tamasiʼi. Neʼe toe fakahoko ai mo te ʼu lea fakapolofeta.—Mik. 5:2. w23.10 8 ¶9; 9 ¶11-12

Kotea ka tokoni atu ke mole ke mataku ʼi te fai ʼo hau tali? ʼE lagi ʼaoga atu anai tau vakaʼi te ʼu tokoni ke ke teuteuʼi lelei. (Taag. 21:5) Kapau ʼe ke iloʼi lelei te ʼu manatu ʼae ʼe tuʼu ʼi te alatike, ʼe mole ke mataku anai ʼi te fai ʼo he tali. Pea ke fai he ʼu tali ʼe nounou. (Taag. 15:23; 17:27) ʼE mahino gafua age anai te nofoʼaki ki he tali ʼe nounou. Kapau ʼe tou fai he tali ʼe nounou ʼaki tatatou palalau mahani, ʼe ha ai neʼe tou teuteuʼi lelei pea ʼe tou mahino ki te manatu. Kae ʼe feafeaʼi mo kapau ʼe ke mulimuli ki te ʼu tokoni ʼaia, kae ʼe kei ke mataku, ʼo ke fai pe he tali ʼe tahi peʼe lua? Ke ke iloʼi papau ʼe maʼuhiga kia Sehova ʼau faiga fakamalotoloto ke ke fai te meʼa ʼae ʼe ke lavaʼi. (Luka 21:​1-4) ʼE mole kole atu e Sehova ke ke faiga ke laka age ʼi te meʼa ʼae ʼe ke lavaʼi. (Flp. 4:5) Koia, ʼi tau ʼosi vakaʼi te meʼa ʼae ʼe ke lavaʼi, fai he fakatuʼutuʼu ke ke fakahoko, pea kole kia Sehova ke tokoni atu ke mole ke mataku. ʼI te kamata, ʼe feala ke ke fakatuʼutuʼu ke ke fai hau tali ʼe nounou. w23.04 21 ¶6-8

ʼE fakatatau tatou e te apositolo ko Paulo ki he kau solia kua tui tonatou kofu tau pea ʼe nonofo tokaga. ʼI te temi tau, ʼe nofo teuteu tuʼumaʼu pe he tagata solia ki te tau. ʼE toe feia pe mo tatou. ʼE tou nofo teuteu ki te ʼaho ʼo Sehova moka tou kofuʼi te kofu ukamea ʼo te tui mo te ʼofa, pea mo ʼai te puloga tau ʼo te ʼamanaki. Ko te kofu ukamea ʼe ina puipui te mafu ʼo te tagata solia. ʼO toe feia pe, ʼe puipui e te tui mo te ʼofa totatou loto. ʼE tokoni mai anai ke tou haga tauhi ki te ʼAtua pea mo muliʼi ia Sesu. Ka tou maʼu te tui, ʼe tou falala ʼe fakapale anai tatou e Sehova ʼuhi ko tatatou kumi fakamalotoloto ia ia. (Hep. 11:6) ʼE uga tatou e te tui ke tou nofo agatonu ki totatou Pule, ia Sesu logo la ʼotatou fihifihia. ʼE malohi anai tatatou tui moʼo tauʼi te ʼu faigataʼaʼia, moka tou tokagaʼi te ʼu faʼifaʼitaki ʼa he ʼu kaugana ʼa Sehova ʼi totatou temi neʼe nonofo agatonu logo la tonatou fakatagaʼi peʼe ko te ʼu fihifihia fakapaʼaga. Pea ʼe mole tou to anai ki te hele ʼo te fia maʼu koloa moka ʼe tou faʼifaʼitakiʼi natou ʼae neʼe natou fakafaigafua tonatou maʼuli ke natou fakamuʼamuʼa ai te ʼu gaue ʼo te Puleʼaga ʼo te ʼAtua. w23.06 10 ¶8-9

Ko he tahi ʼe lotololomi, ʼe ina puleʼi te ʼu meʼa ʼae ʼe ina logoʼi mo tana aga. ʼE ʼaoga kia tatou te lotololomi ke tou fai te meʼa ʼae ʼe lelei, tafito la moka ko he gaue faigataʼa peʼe mole tou loto ke tou fai te gaue ʼaia. Manatuʼi ʼe kau te lotololomi ki te fua ʼo te laumalie maʼoniʼoni. Koia kole kia Sehova ke ina foaki atu tona laumalie maʼoniʼoni ke ke maʼu te kalitate ʼaia. (Luka 11:13 Kal. 5:​22, 23) Hoko atu ʼau faiga logo la te ʼu faigataʼaʼia. ʼI te malama ʼaeni, ʼe mole hala anai he ʼaho mo ni faigataʼaʼia. Ka tou atali ki te ʼaho ʼae ʼe tou hala ai mo ni faigataʼaʼia, pea ʼe mole tou fakahoko anai tatatou fakatuʼutuʼu. ʼI ʼihi temi ʼe mole tou loto ke tou fakahoko ʼatatou fakatuʼutuʼu he ʼe hage ʼe faigataʼa kia tatou. Kapau ko tau manatu ʼaia, he koʼe ʼe mole ke kamata ʼaki he ʼu fakatuʼutuʼu ʼe faigafua kia koe? Ohage la, kapau ʼe ke fia maʼu he kalitate, he koʼe ʼe mole ke faiga ke ke fakaha ʼi he ʼu kiʼi aluʼaga pe? Kapau ʼe ke loto ke mole to ʼi he ʼaho tau lau te Tohi-Tapu, he koʼe ʼe mole ke fakatuʼutuʼu he ʼu kiʼi temi nounou pe ʼi te ʼaho fuli? w23.05 29 ¶11-13

Talu mai te kamata ʼo te ʼu ʼaho fakaʼosi, ʼe haga foaki mai pe e Sehova te meʼa kai fakalaumalie ʼaki tana kautahi moʼo tokoni mai ke tou haga haʼele ʼi “te Ala ʼo Te Maʼoniʼoni.” (Esa 35:8; 48:17; 60:17) Ka tali e he tahi ke fai hana ako Tohi-Tapu, ʼe foaki age te faigamalie ʼae ke haʼele ʼi “te Ala ʼo Te Maʼoniʼoni.” Ko ʼihi ʼe natou haʼele ai kae mole fualoa pea natou mavae. Ko ʼihi ʼe hoko atu tanatou haʼele ʼi te ala ʼaia ʼo kaku ki tona tauʼaga. ʼE tau kifea te ala ʼaia? Ko natou ʼae ʼe ʼamanaki maʼuʼuli ʼi selo, ʼe taki natou e “te Ala ʼo Te Maʼoniʼoni” ki “te palatiso ʼo te ʼAtua” ʼi selo. (Apk. 2:7) Ko natou ʼae ʼe ʼamanaki maʼuʼuli ʼi te kele, ʼe taki natou e te ala ʼaia ki te maʼuli haohaoa ʼae ka natou maʼu anai ʼi te ʼosi ʼo te ʼu taʼu ʼe 1 000. Kapau ʼe ke haʼele ʼi te temi nei ʼi te ala ʼaia, ʼaua naʼa ke manatu ki te ʼu meʼa ʼae neʼe ke liʼaki ke feala hau haʼele ʼi te ala. Pea ʼaua naʼa ke mavae mai ai kae heʼeki kaku tau faifagona ki te malama foʼou! w23.05 17 ¶15; 19 ¶16-18

Kapau ʼe ke manatuʼi ia te ʼu meʼa ʼae neʼe fai e Sehova maʼa koe, ʼe tuputupu ai tau fia foaki tou maʼuli kia te ia. (Pes. 116:​12-14) ʼE fakamahino ʼi te Tohi-Tapu ʼe ko ia ʼae ʼe ina Foaki “te ʼu meʼa ʼofa lelei fuli mo haohaoa.” (Sakp. 1:17) ʼE kau ʼi te ʼu meʼa ʼofa ʼaia te toe meʼa ʼofa maʼuhiga ʼaeni ia te sakilifisio ʼo tona ʼAlo ia Sesu. Fakakaukauʼi age muʼa te aluʼaga ʼaeni, ʼe feala ke ke maʼu he ʼu felogoi lelei mo Sehova pea mo maʼuli ʼo heʼe gata ʼuhi ko te totogi. (1 Soa. 4:​9, 10) Ka ke foaki tou maʼuli kia Sehova, ʼe ko hau fakaha ʼaia tau lotofakafetaʼi ki te sakilifisio. ʼEi, ʼe ke lotofakafetaʼi ki te toe ʼofa lahi ʼaia ʼa te ʼAtua pea mo ʼihi atu tapuakina ʼe ina foaki atu.—Tet. 16:17; 2 Ko. 5:15. w24.03 5 ¶8.

Ka tou sisio ki te aga heʼe ʼaoga ʼa te hahaʼi ʼi te temi nei, ʼe tou hage ko te tagata agatonu ko Lote. “Neʼe lotomamahi ʼaupito ʼuhi ko te ʼu aga fakalialia ʼa te hahaʼi agakovi,” he neʼe ina iloʼi ʼe fehiʼa tatatou Tamai ʼae ʼi selo ki te ʼu aga ʼae ʼe kovi. (2 Pet. 2:​7, 8) Ko te manavasiʼi ʼo Lote pea mo tona ʼofa ki te ʼAtua, neʼe ina uga ia ia ke ina tekeʼi te ʼu aga heʼe ʼaoga ʼa te hahaʼi ʼo tona temi. ʼE toe feia mo tatou, ʼe tou maʼuli mo ni hahaʼi ʼe mole natou fakaʼapaʼapa ki te ʼu lao ʼa Sehova ʼo ʼuhiga mo te aga ʼae ʼe tonu ke fai. Logo la te faʼahi ʼaia, ʼe feala ke tou taupau he aga ʼe maʼa mo kapau ʼe tou haga ʼoʼofa pea mo manavasiʼi ki totatou ʼAtua. (Taag. 14:2) ʼE tou lava fai te faʼahi ʼaia he ʼe tokoni mai ia Sehova ʼaki te ʼu fakalotomalohi ʼae ʼe tou maʼu ʼi te tohi ʼo Taʼaga Lea. ʼE feala ke fua lelei ki te kau Kilisitiano fuli, tagata mo fafine, tupulaga mo matuʼa, te ʼu tokoni poto ʼae ʼe tuʼu ʼi ai. Ka tou manavasiʼi kia Sehova ʼe tou tokaga ke mole tou kaumeʼa mo ni hahaʼi ʼe natou fai ni aga ʼe kovi. w23.06 20 ¶1-2; 21 ¶5

Neʼe kua fakafeagai atu koa he tahi ʼi tou famili? Pe neʼe ke fai koa he ʼu sakilifisio ʼi te faʼahi fakapaʼaga ke ke fakamuʼamuʼa ai te Puleʼaga? (Mat. 6:33) Kapau koia, pea neʼe tokagaʼi moʼoni e Sehova ia tau agatonu. (Hep. 6:10) ʼE mahino ia, neʼe ke tokagaʼi ia te moʼoni ʼo te ʼu palalau ʼaeni ʼa Sesu: “Ko he tahi kua ina tuku tona ʼapi, peʼe ko ʼona tehina, peʼe ko ʼona tokolua, peʼe ko tana faʼe, peʼe ko tana tamai, peʼe ko ʼana fanau, peʼe ko ʼana gaueʼaga ʼuhi ko au pea mo te logo lelei, ʼe ina maʼu anai ʼo liuga 100 ʼi te temi nei ni ʼapi, mo ni tehina, mo ni tokolua, mo ni faʼe, mo ni fanau, mo ni gaueʼaga, ʼaki he ʼu fakataga pea ʼe ina maʼu anai mo te maʼuli heʼe gata ʼi te tuʼu ʼo te ʼu faʼahiga meʼa ka hoko mai.” (Mko. 10:​29, 30) ʼE mole lahi age koa la te ʼu tapuakina ʼae neʼe ke maʼu ʼi te ʼu sakilifisio ʼae neʼe ke fai?—Pes. 37:4. w24.03 9 ¶5

Neʼe hoko ki te kau Kilisitiano ʼi Sutea ʼi te temi ʼae neʼe to ai te toe hoge lahi, ko te ʼu tehina mo tuagaʼane ʼo te kokelekasio ʼo Atiokia, neʼe natou “fakatuʼutuʼu ai . . . ʼo tahi mulimuli ki tona fealagia, ke natou momoli he tokoni ki te ʼu tehina ʼae ʼe maʼuʼuli ʼi Sutea.” (Gaue 11:​27-30) Logo la te vaha mamaʼo ʼa te kau Kilisitiano ʼi Atiokia mo ʼonatou tehina ʼae ʼi Sutea, kae neʼe natou loto moʼoni ke natou tokoni kia natou. (1 Soa. 3:​17, 18) ʼE feala mo tatou ke tou fakaha ia ʼaho nei te manavaʼofa moka hoko he tuʼutamaki fakanatula ki ʼotatou tehina mo tuagaʼane. ʼE tou fia tokoni atu aipe kia natou ʼo lagi tou kole ki te ʼu tagata ʼafeā pe ʼe feala ke tou kau ki he fakatuʼutuʼu gaue, peʼe tou fai he meʼa ʼofa ki te gaue fakamalamanei, peʼe tou hufakiʼi natou ʼae ʼe tau mo te tuʼutamaki fakanatula ʼaia. ʼE lagi tonu anai ke tou toe foaki ki ʼotatou tehina mo tuagaʼane te ʼu meʼa ʼae ʼe ʼaoga kia natou ʼi te faʼahi fakasino. Ka fakahoko anai e Sesu, te Hau, ia te fakamau, ʼofa pe ke ina maʼu mai tatou, ʼe tou fakaha te manavaʼofa pea mo ina fakaafe tatou ke tou “maʼu te Puleʼaga.”—Mat. 25:​34-40. w23.07 4 ¶9-10; 6 ¶12

Neʼe fakapotopoto ia Sesu ohage ko Sehova. Neʼe fekauʼi ifo ia ia ki te kele ke alu ʼo faifakamafola “ki te ʼu ovi ʼae kua hehe ʼo te puleʼaga ʼo Iselaele.” Neʼe mulimuli Sesu ki ai kae neʼe toe fakapotopoto. Ohage la, neʼe alu age te fafine neʼe mole ko he Iselaele ʼo kole mamahi ke ina fakamalolo tana kiʼi taʼahine ʼae “neʼe ulu sino ai te temonio.” Neʼe manavaʼofa ia Sesu ʼo mulimuli ki te kole ʼa te fafine. Neʼe ina fakamalolo tana kiʼi taʼahine. (Mat. 15:​21-28) Tou vakaʼi te tahi aluʼaga neʼe hoko. ʼI te kamata e Sesu tana minisitelio, neʼe ina ui: “Ko ʼae ʼe fakafisi kia te au . . . , ʼe au fakafisi anai mo au kia ia.” (Mat. 10:33) Kae neʼe fakafisi koa kia Petelo ʼae neʼe fakafisi tuʼa tolu kia te ia? Kailoa. Neʼe tokagaʼi e Sesu te fakahemala moʼoni ʼa Petelo pea mo tana tui. Hili te fakatuʼuake ʼo Sesu, neʼe ha kia Petelo pea lagi neʼe ina ui age kua ina fakamolemole ki ai pea ʼe kei ʼofa pe ia ia. (Luka 24:​33, 34) Ko Sehova mo Sesu ʼe nā fakapotopoto. Kae ʼe feafeaʼi tatou? ʼE loto e Sehova ke tou fakapotopoto mo tatou. w23.07 21 ¶6-7

Kotea ʼae ʼe feala ke tou ui ki te hahaʼi ke toe tui mo natou ki ai? ʼUluaki, ʼe ko Sehova totonu ʼae ʼe ina fai te fakapapau ʼaia. ʼE tou lau fenei ʼi te tohi ʼo Fakaha: “Neʼe ui fenei e Ia ʼae ʼe heka ʼi te hekaʼaga fakahau: ‘Koʼeni, ʼe au fakafoʼou ia meʼa fuli.’” ʼE ina maʼu te poto pea mo te malohi moʼo fakahoko tana fakapapau, pea ʼe toe loto moʼoni ki ai. Lua, kia Sehova ko te meʼa ʼae ʼe ina ui ʼe hage ia kua hoko moʼoni. Ko te tupuʼaga la ʼae ʼo tana ui fenei: “Ko te ʼu folafola ʼaia ʼe agatonu pea mo moʼoni. . . . Kua hoko te ʼu folafola ʼaia!” Tolu, ʼe mole he meʼa ʼe feala ke ina taʼofi ia Sehova ke ina fakaʼosi he gaue neʼe ina kamata. Koia, ʼe ina ui fenei ai: “Ko au te Kamataʼaga pea mo te Fakaʼosiʼaga.” (Fkha. 21:6) ʼE fakaha lelei ai anai e Sehova ko Satana ʼe gutuloi pea ʼe mole ina lava taʼofi ia Sehova ke ina fakahoko tana fakatuʼutuʼu. Koia, ka ui atu “ ʼE ko he logo lelei foki, kae ʼe faigataʼa kia au haku tui ki ai,” ʼe feala ke ke lau pea mo fakamahino age ia Fakaha 21:​5, 6. Fakaha age pe ʼe fakamoʼoni feafeaʼi e Sehova ʼi te ʼu vaega ʼaia ʼe ina fakahoko katoa anai tana fakapapau.—Esa. 65:16. w23.11 7 ¶18-19

Neʼe fai e Sehova te fakapapau ʼaia kia Apalahamo ʼi tona taʼu 75, neʼe mole hana fanau. Neʼe sio koa ia Apalahamo ki te fakahoko ʼo te fakapapau ʼaia? Neʼe sio pe ki te fakahoko ʼo hona kiʼi koga. Hili taʼu ʼe 25 ʼi tana ʼosi fakalaka ʼi te vai tafe ʼo te Efalate, neʼe tupu fakamilakulo tona foha ko Isaake. Pea hili ki ai taʼu ʼe 60, neʼe tupu ʼona mokopuna ko Isaake mo Sakopo. (Hep. 6:15) Kae neʼe mole sio ia Apalahamo ki te liliu ʼo tona hakoga ko he puleʼaga lahi pea mo natou maʼu te Kele ʼo Te Fakapapau. Logo la te faʼahi ʼaia, kae ko te tagata agatonu ʼaia neʼe kaumeʼa mo tona Tupuʼaga ʼi tona maʼuli katoa. (Sakp. 2:23) Pea fakakaukauʼi age muʼa, moka ina iloʼi anai ʼi tona fakatuʼuake, neʼe tapuakinaʼi te ʼu puleʼaga fuli ʼuhi ko tana tui pea mo tana kataki fualoa. (Sen. 22:18) Kotea te ako maʼa tatou? ʼE mole lagi tou mamata anai ki te fakahoko ʼo te ʼu fakapapau fuli ʼa Sehova. Kae kapau ohage ko Apalahamo ʼe tou kataki fualoa, ʼe feala ke tou tui papau ʼe fakapale tatou e Sehova ʼi te temi nei pea mo lahi age ʼi te malama foʼou ʼae ʼe ina fakapapauʼi mai.—Mko. 10:​29, 30. w23.08 24 ¶14

ʼI tona temi tupulaga, neʼe agavaivai te Hau ko Osiasi. Neʼe akoʼi age kia ia “te manavasiʼi ki te ʼAtua moʼoni.” Pea neʼe tapuakinaʼi e Sehova te ʼu teitei taʼu ʼe 68 ʼo tona maʼuli. (2 Klk. 26:​1-4) Neʼe lahi te ʼu puleʼaga neʼe ina tauʼi pea mo malo ai pea neʼe ina fai ni gaue moʼo puipui ia Selusalemi. (2 Klk. 26:​6-15) ʼE mahino ia neʼe fiafia ʼi te ʼu gaue fuli ʼae neʼe ina fakahoko ʼaki te tokoni ʼa Sehova. (Ekl. 3:​12, 13 ) Ka fai e te Hau ko Osiasi he ʼu fakatotonu, neʼe fakalogo ʼihi ki ai. Neʼe lagi tupu ai tana manatu ʼae ʼe mole ʼaoga ke fakalogo ki te ʼu fakatotonu ʼa Sehova. ʼI te tahi ʼaho, neʼe ulu ki te fale lotu pea ʼi tana fiameʼalahi neʼe ina fia tutu te iseso ʼi te ʼaletale. Neʼe mole fakagafua ki te ʼu hau ke natou fai te faʼahi ʼaia. (2 Klk. 26:​16-18) Neʼe fia taʼofi ia ia e te Pelepitelo Lahi ko Asalia, kae neʼe kovi ʼosi tona ita. Meʼa fakaʼofaʼofa foki, he neʼe agatonu kia Sehova lolotoga ni taʼu, kae neʼe ina fai leva he aga ʼe kovi. Neʼe fakatuʼā ia ia e Sehova ʼo liliu ʼo kilia. (2 Klk. 26:​19-21) Ka na pau la neʼe ina taupau tona agavaivai, neʼe mole hoko te ʼu aluʼaga ʼaia ʼi tona maʼuli. w23.09 10 ¶9-10

Logo la tona kua fakanofo ʼaki te laumalie maʼoniʼoni, neʼe kei tonu pe ke tauʼi e te apositolo ko Petelo ʼona vaivaiʼaga. ʼI te taʼu 36 H.T.S, ko Kolonelio ʼae neʼe mole ko he Sutea neʼe fakanofo ʼaki te laumalie maʼoniʼoni. ʼI tona fakanofo ʼaia, neʼe ha ai “ ʼe mole fakapalatahi te ʼAtua” pea kua feala kia natou ʼae ʼe mole Sutea ke kau ki te kokelekasio. Neʼe sio mata ia Petelo ki te faʼahi ʼaia. (Gaue 10:​34, 44, 45) Hili ʼaia, neʼe kamata kai leva ia Petelo mo natou ʼae ʼe mole Sutea. Ko he aluʼaga neʼe mole manatu pe la ʼe feala anai ʼi he ʼaho. Kae neʼe manatu ʼihi Kilisitiano Sutea neʼe mole feala ke kakai fakatahi te kau Sutea mo natou ʼae ʼe mole Sutea. Koia ʼi te ʼomai ʼa ʼihi ia natou ʼaia ki Atiokia, neʼe mole kei kai fakatahi leva ia Petelo mo ʼona tehina ʼae mole Sutea, he neʼe lagi mataku naʼa iita te kau Kilisitiano Sutea ʼaia. Neʼe tokagaʼi e te apositolo ko Paulo ia tana malualoi pea neʼe ina fakatonutonuʼi ia muʼa ʼo te kaugamalie. (Kal. 2:​13, 14) Logo la tana hala ʼaia, kae neʼe haga tauhi agatonu pe ia Petelo kia Sehova. w23.09 22 ¶8

ʼU tagata ʼafeā, ʼe kotou lotomalohi koa ke kotou tokaga ki te ʼu ovi ʼa Sehova ʼaki he lotolelei mo he faʼafai? Ka ke sivisivi ia koe totonu, ʼe ke maʼu anai he ʼu faʼahi ʼe ke toto ai, kae ʼaua naʼa ke lotovaivai. “Ko te ʼAliki ʼe agalelei” pea ʼe tokoni atu anai ke hikihiki ke lelei age tau fai. (1 Pet. 2:3) Neʼe ui e te apositolo ko Petelo: “Ko te ʼAtua . . . ʼe ina fakakatoa anai e ia totonu takotou akoako. ʼE ina fakalotomalohiʼi anai koutou.” ʼI te kamata, neʼe manatu ia Petelo ʼe mole tuha ke fakatahi mo te ʼAlo ʼo te ʼAtua. (Luka 5:8) Kae ʼaki te tokoni ʼofa ʼo Sehova mo Sesu, neʼe feala ke hoko atu tana mulimuli ia Kilisito. Pea neʼe fakafealagia kia Petelo ke hu ki “te Puleʼaga ʼae ʼe heʼe gata ʼo Sesu Kilisito, totatou ʼAliki pea mo totatou Fakamaʼuli.” (2 Pet. 1:11) Ko he fakapale taulekaleka ʼaia! Kapau ʼe ke faʼa kataki ohage ko Petelo pea mo ke tuku ke akoako koe e Sehova, ʼe toe foaki atu anai kia koe te fakapale ʼae ko te maʼuli heʼe gata. ʼE ke ‘kaku anai ki te ikuʼaga ʼo tau tui, ʼae ko te haofaki ʼo tou maʼuli.’—1 Pet. 1:9. w23.09 31 ¶16-17

ʼI te tapenakulo neʼe ʼi ai te malaʼe mo tona ʼa. Neʼe fakahoko ʼi ai e te kau pelepitelo ʼanatou gaue. Ko te ʼaletale kapa lahi ʼae neʼe tutu ai te ʼu holokoseta neʼe tuʼu ʼi te malaʼe, ʼo feia mo te foʼi topu vai kapa. Neʼe fakaʼaogaʼi e te ʼu pelepitelo te topu vai ʼaia moʼo ʼonatou fakamaʼa ʼi muʼa ʼo tanatou fakahoko tanatou tauhi taputapu. (Eke. 30:​17-20; 40:​6-8) Ia ʼaho nei, ko te ʼu tehina fakanofo ʼo Kilisito ʼe natou tauhi agatonu ki te ʼAtua ʼi te kele, ʼi te loto malaʼe ʼo te fale lotu fakalaumalie. Ko te foʼi topu vai ʼae neʼe tuʼu ʼi te malaʼe ʼo te tapenakulo pea mo te fale lotu, ʼe ina fakamanatuʼi ai kia natou, ʼo feia mo te kau Kilisitiano fuli, te maʼuhiga ʼae ke natou maʼa ʼi te aga ʼae ʼe tonu ke fai pea ʼi te faʼahi fakalaumalie. Pea ʼe atolasio leva ʼifea ia te “toe hahaʼi tokolahi”? Neʼe sio ia te apositolo ko Soane “ ʼe natou tutuʼu ia muʼa ʼo te hekaʼaga fakahau.” Ko tona fakaʼuhiga, ʼe natou ʼi te kele, ʼi te tuʼa malaʼe pea “ ʼe natou foaki [ki te ʼAtua] he tauhi taputapu ʼi te ʼaho mo te po ʼi tona fale lotu.” (Fkha. 7:​9, 13-15) ʼE tou fakamalo lahi kia Sehova tana foaki mai te fealagia maʼuhiga ʼae ke tou atolasio kia te ia ʼi tona fale lotu lahi fakalaumalie. w23.10 28 ¶15-16

ʼE toe fakaʼaogaʼi e Sehova te ʼu tagata ʼafeā moʼo foaki mai te malohi. Ko te ʼu tagata ʼaia ʼe ko he ʼu meʼa ʼofa mai te ʼAtua pea ʼe natou tokoni mai mo fakalotomalohiʼi tatou. (Esa. 32:​1, 2) Koia ka ke hoha, palalau ki te faʼahi ʼaia mo te ʼu tagata ʼafeā. Pea ke ke tali te tokoni ʼae ʼe natou foaki atu. ʼE foaki atu anai e Sehova te malohi ʼaki te ʼu tagata ʼaia. ʼE foaki mai e te ʼu fakapapau ʼae ʼi te Tohi-Tapu ia te ʼamanaki ʼae ke tou maʼuʼuli ʼo heʼe gata ʼi selo peʼe te ʼamanaki ʼae ke tou maʼuʼuli ʼo heʼe gata ʼi te Palatiso ʼi te kele pea mo te malohi ke tou haga tauhi kia Sehova. (Loma 4:​3, 18, 19) ʼE foaki mai e tatatou ʼamanaki te malohi ʼae ke tou ʼutakiʼi te ʼu faigataʼaʼia, ke tou fakamafola te logo lelei, pea mo fakahoko ʼatatou gaue kehekehe ʼi te kokelekasio. (1 Tes. 1:3) Neʼe maʼu e te apositolo ko Paulo te malohi ʼuhi ko tana ʼamanaki. Neʼe ina ui neʼe “taʼomia,” neʼe ‘mole ina iloʼi he meʼa ke ina fai,’ neʼe “fakatagaʼi” pea neʼe ‘toka ki te kele.’ Neʼe hoko ni aluʼaga neʼe feala pe ke mate ai. (2 Ko. 4:​8-10) Neʼe maʼu e Paulo te malohi ke faʼa kataki he neʼe mole galo kia ia tana ʼamanaki. (2 Ko. 4:​16-18) Neʼe manatuʼi tuʼumaʼu pe e Paulo tona ka haʼu. Ko tana ʼamanaki ʼae ke maʼuli ʼo heʼe gata ʼi selo. Neʼe metitasio ia Paulo ki tana ʼamanaki, pea neʼe ‘fakafoʼou ai ia ia ʼi te ʼaho fuli.’ w23.10 15-16 ¶14-17

Ka tou faikole, tou feuiʼaki “Pe ʼe ko te temi totonu koa ʼaeni ke tali mai ai Sehova ki taku kole?” ʼE lagi tou manatu ʼe tonu ke foimo tali mai ia Sehova ki tatatou kole. Kae ʼe iloʼi lelei age e Sehova te temi totonu ʼae ke tokoni mai. (Hep. 4:16) Kapau ʼe mole tali fakavilivili mai Sehova, ʼe lagi tou manatu ʼe mole loto ia ki ai. Kae ʼi tona ʼuhiga moʼoni, ʼe lagi loto e Sehova ke tou talitali muʼa. Ohage la ko he tehina tupulaga neʼe faikole ke pulihi e Sehova tona mahaki. Kae neʼe ʼaʼasili pe tona mahaki. Kapau neʼe fai e Sehova he milakulo ʼo ina fakamalolo ia ia, neʼe feala ke ui e Satana ʼe haga tauhi te tehina kia Sehova ʼuhi pe he neʼe fakamalolo ia ia. (Sopo 1:​9-11; 2:4) Tahi ʼae, kua fakatuʼutuʼu e Sehova he temi ke ina pulihi ai te ʼu mahaki fuli. (Esa. 33:24; Fkha. 21:​3, 4) Koia ʼe mole feala ke tou fakaʼamu ke fakamalolo e Sehova ʼotatou mahaki. ʼE feala ke kole e te tehina ke foaki age e Sehova te malohi mo te tokalelei ke ina katakiʼi tona mahaki pea mo tauhi agatonu ki te ʼAtua. w23.11 24 ¶13

Neʼe fai e Samisoni he hala mamafa. Kae neʼe hoko atu pe tana fai te finegalo ʼo Sehova. Neʼe ina kumi he faigamalie ke ina fakahoko ai te gaue ʼae neʼe foaki age e te ʼAtua, ʼae ko te tauʼi ʼo te kau Filisitini. (Tfm. 16:​28-30) Neʼe faikole mamahi fenei kia Sehova: “Ke au fai he lagavaka ki te kau Filisitini.” Neʼe tali e te ʼAtua moʼoni ki tana faikole, pea neʼe ina toe foaki kia ia he malohi makehe. Koia, neʼe kaugamalie age te kau Filisitini ʼae neʼe matehi e Samisoni ʼi te ʼaho ʼaia ia natou ʼae neʼe ina tamateʼi ʼi muʼa atu. Logo la neʼe tau ia Samisoni mo ni mamahi ʼuhi ko tana hala, kae neʼe hoko atu pe tana fai te finegalo ʼo Sehova. Maʼia pe neʼe tou fai he hala pea fakatonutonuʼi ai tatou, peʼe neʼe toʼo hotatou pilivilesio, ʼaua naʼa tou tuku te fakahoko ʼo te finegalo ʼo Sehova. Tou manatuʼi ʼe fakamolemole ia Sehova kia tatou. (Pes. 103:​8, 9) Kapau neʼe tou fai ni hala ʼi te temi muʼa, ʼe tou tui papau ʼe feala ke foaki mai e Sehova te malohi ke tou fakahoko tona finegalo ohage pe ko tana fai kia Samisoni. w23.09 6 ¶15-16

Ka ke faʼa kataki, ʼe leleiʼia koe e Sehova. ʼE mole fakaʼuhiga leva ʼe fiafia ia Sehova moka ke mamahi. Kae ʼe fiafia ia ʼuhi ko tau faʼa kataki agatonu. ʼE fakalotomalohi tatatou iloʼi ʼae ka tou faʼa kataki, pea ʼe fiafia ai ia Sehova. (Pes. 5:12) Manatuʼi neʼe faʼa kataki ia Apalahamo ʼi ni aluʼaga faigataʼa, ʼo tupu ai tona leleiʼia e te ʼAtua. Neʼe liliu ʼo kaumeʼa mo Sehova pea mo faitotonu ʼi ʼona muʼa. (Sen. 15:6; Loma 4:​13, 22) ʼE feala ke toe feia mo tatou. ʼE mole leleiʼia tatou e te ʼAtua ʼuhi ko te ʼu tuʼuga gaue ʼae ʼe tou fai peʼe ko te ʼu maʼua ʼae ʼe tuku mai. Kae ʼe ina leleiʼia tatou he ʼe tou faʼa kataki agatonu. ʼE feala kia tatou fuli ke tou faʼa kataki, tatau aipe pe tou taʼu fia, totatou aluʼaga, peʼe ko te ʼu fealagia ʼae ʼe tou maʼu. ʼE ke lolotoga faʼa katakiʼi koa he aluʼaga faigataʼa? Kapau koia, manatuʼi ʼe ke fakafiafiaʼi ai te loto ʼo Sehova. Ka tou iloʼi ʼe leleiʼia tatou e te ʼAtua, ʼe toe malohi age ai tatatou ʼamanaki. w23.12 11 ¶13-14

Ko tona fakaʼuhiga, ke ke fagono ki ʼae ʼe palalau atu mo mahino ki ʼana manatu pea mo te ʼu meʼa ʼae ʼi tona loto. (Taag. 20:5) Pea ʼe ke lava tokagaʼi ʼi tona leʼo, mo tona fofoga pea mo tana aga te ʼu meʼa ʼae ʼi tona loto. ʼE mole feala hau fai te faʼahi ʼaia moka ʼe ke felogoi mo faitohi tuʼumaʼu pe ʼi te Neti. Koia ke lahi age tau alu tonu ʼo faipalalau mo te hahaʼi. (2 Soa. 12) Ko he tehina kua fotufotuʼa ʼi te faʼahi fakalaumalie ʼe poto ʼi te taupau ʼo tona maʼuli pea mo tona loto fale. (1 Tim. 5:8) ʼE ʼaoga ke poto he tupulaga ʼi te fai ʼo he gaue, he ʼe faigafua anai tana maʼu hana gaue. (Gaue 18:​2, 3; 20:34; Efe. 4:28) Ke ke faʼafai moka ke akoako he gaue pea mo fakaʼosi he koga neʼe ke kamata. ʼE tokagaʼi anai e ʼihi te faʼahi ʼaia pea mo natou vikiʼi tau gaue lelei. ʼE feala anai hau maʼu pea mo taupau hau gaue. w23.12 27 ¶12-13

Ka palalau ʼi te Tohi-Tapu ki “te ʼaho ʼo Sehova” ʼe fakaʼuhiga ki te temi ʼae ʼe fakamauʼi ai e Sehova ʼona fili pea mo haofaki tana hahaʼi. Neʼe kua fakahoko e Sehova te ʼu fakamau ʼaia ʼi te temi muʼa. (Esa. 13:​1, 6; Esk. 13:5; Sofo. 1:8) ʼI totatou temi, ʼe kamata anai “te ʼaho ʼo Sehova” ʼaki te ʼohofi ʼo Papiloni Lahi pea fakaʼosi ʼaki te tau ʼo Alamaketone. Ke tou hao ʼi “te ʼaho” ʼaia, ʼe tonu ke tou teuteu atu ʼi te temi nei. Neʼe akoʼi mai e Sesu ʼe tonu ke tou “nonofo teuteu” ki te “toe mamahi lahi.” ʼE ha mai ai ko he faʼahi ʼe tonu ke tou haga fai. (Mat. 24:21; Luka 12:40) ʼI tana ʼuluaki tohi ki te kau Tesalonika, neʼe fakaʼaogaʼi e te apositolo ko Paulo he ʼu fakata moʼo tokoni kia natou ke natou nonofo teuteu ki te ʼaho lahi ʼo te fakamau ʼo Sehova. Neʼe iloʼi e Paulo ʼe mole hoko anai te ʼaho ʼo Sehova ʼi te temi ʼae neʼe ina fai ai tana tohi. (2 Tes. 2:​1-3) Kae neʼe ina foaki pe ni tokoni ki ʼona tehina ke natou nonofo teuteu ki te ʼaho ʼaia ohage pe kua vave hoko mai. ʼE toe ʼaoga kia tatou ʼana tokoni ʼaia. w23.06 8 ¶1-2

ʼI te taʼu 1978, neʼe fakatuʼu he foʼi fale fata maʼoluga ʼi te kolo ko Tokyo, ʼi Saponia. Neʼe feʼekeʼaki e te hahaʼi pe ʼe feafeaʼi anai hana tuʼu malohi moka hoko he mafuike. Kotea ʼae neʼe fai e te hahaʼi ʼae neʼe natou fakakaukauʼi ia te faʼu ʼo te fale fata maʼoluga ʼaia? Neʼe natou faʼu te fale ke tuʼu malohi, kae neʼe feala pe ke ʼai hana kiʼi gatū kae mole holo moka galulu te kele. ʼE feala ke fakatatau te kau Kilisitiano ki te foʼi fale fata maʼoluga ʼaia. ʼO feafeaʼi? ʼE tonu ke iloʼi e he Kilisitiano pe ko te ʼu aluʼaga fea ʼae ʼe tonu ke tuʼu malohi ai pea mo te ʼu aluʼaga ʼae ʼe tonu ke fakapotopoto ai. ʼE tonu ke tuʼu malohi mo fakalogo tuʼumaʼu ki te ʼu lao ʼa Sehova. ʼE fakalogo “ ʼaki he lotolelei” maʼia moka tau mo he aluʼaga faigataʼa ʼaupito. Pea ʼi te tahi age faʼahi, ʼe fakapotopoto anai moka ʼe feala pea moka ʼe ʼaoga. (Sakp. 3:17) Ko he Kilisitiano kua feala hana fakafuafua lelei te ʼu faʼahi ʼaia, ʼe mole fefeka fau anai pea ʼe mole ina fakagafua anai ia meʼa fuli. w23.07 14 ¶1-2

Neʼe tonu ke tauʼi malohi e Sesu te ʼu fakahala ʼa Satana te Tevolo ke mole nofo agatonu kia Sehova. (Mat. 4:​1-11) Neʼe ko te fakatotonu ʼaia ʼa Satana ke agahala ia Sesu ke mole feala ai hana foaki te totogi. Lolotoga tana minisitelio, neʼe toe tau pe ia Sesu mo te tahi ʼu fihifihia. Neʼe fakatagaʼi e ʼona fili pea neʼe natou fia matehi ia ia. (Luka 4:​28, 29; 13:31) Neʼe tonu ke ina katakiʼi te ʼu vaivaiʼaga ʼo ʼana tisipulo. (Mko. 9:​33, 34) ʼI muʼa ʼo tona mate, neʼe vaʼi ia ia pea mo gaohi koviʼi. Neʼe mamahi ʼaupito ia Sesu pea neʼe fakaufiufi tona mate, he neʼe matehi ia ia ohage ko he tagata faifakapo. (Hep. 12:​1-3) Pea ʼi te temi ʼae neʼe kua vave mate ai, neʼe mole puipui ia ia e Sehova, kae neʼe faʼa kataki tokotahi pe ʼo aʼu ki tana mate. (Mat. 27:46) ʼE ha mai ai neʼe ʼutakiʼi e Sesu te ʼu mamahi ke feala ai hana foaki te totogi. Ka tou metitasio ki te ʼu meʼa fuli ʼae neʼe lotolelei Sesu ke ina sakilifisioʼi maʼa tatou, mole toe lahi age ai koa tatatou ʼofa ʼae kia te ia? w24.01 10-11 ¶7-9

Ka tou kataki fualoa, ʼe tou felogoi lelei anai mo ʼihi. ʼE tou fakalogo lelei anai moka palalau mai ʼihi. (Sakp. 1:19) ʼE tou tokalelei anai mo natou. Pea ka tou hoha, ʼe mole tou fai anai ni palalau fakatupu lotomamahi. Ka tou mamahi ki he tahi ʼuhi ko he palalau peʼe ko he aga neʼe ina fai, ʼe mole tou ita anai. ʼE mole tou liufaki anai te kovi ʼaki te kovi, kae ʼe tou “haga fekatakiʼaki, pea mo fefakamolemoleʼaki ʼaki he lotolelei.” (Kol. 3:​12, 13) Kapau ʼe tou kataki fualoa, ʼe tou toe fai anai ni tonu ʼe lelei. ʼE tou toʼo anai he temi ke tou fai ni fekumi pea mo vakaʼi te ʼu fealagia ʼae ʼe tuku mai pea ʼe mole tou ʼoho noa. Ohage la, ka tou kumi gaue ʼe lagi tou fia tali atu aipe te ʼuluaki gaue ʼae ʼe tuku mai. Kae kapau ʼe tou kataki fualoa, ʼe tou toʼo anai he temi ke tou vakaʼi tona ʼu fua ki totatou maʼuli fakafamili mo ʼatatou felogoi mo Sehova. Kapau ʼe tou kataki fualoa ʼe mole tou fai anai he ʼu tonu ʼe kovi. w23.08 22 ¶8-9

Kapau ʼe ke lotovaivai ʼuhi he ʼe ke tauʼi he ʼu holi ʼe kovi, manatuʼi te fakapapau ʼae neʼe ke fai kia Sehova ʼi tau foaki tou maʼuli kia te ia. ʼE ke lotomalohi anai moʼo fakatotonu ʼe ke tekeʼi ia te fakahala. ʼO feafeaʼi? Ka ke foaki tou maʼuli kia Sehova, ʼe ke fakafisi kia koe totonu. Ko tona fakaʼuhiga ʼe ke liʼaki he ʼu holi mo he ʼu fakatuʼutuʼu ʼe mole leleiʼia e Sehova. (Mat. 16:24) Koia ka ʼahiʼahiʼi koe, ʼe mole ʼaoga anai ke ke feuiʼaki kotea ʼae ʼe tonu ke ke fai. Neʼe kua ke ʼosi iloʼi te meʼa ʼae ʼe tonu anai ke ke fai. Ko tona fakaʼuhiga neʼe kua ke filifili ke ke nofo agatonu kia Sehova. ʼE ke fakatotonu anai ke ke fakafiafiaʼi tona loto. ʼE ke hage anai ko Sopo. Logo la neʼe tau mo ni ʼahiʼahi fakamataku kae neʼe ina fakatotonu malohi fenei: “ ʼE mole au fakafisi anai ki taku agatonu.”—Sopo 27:5. w24.03 9 ¶6-7

Ko Sehova ko “te ʼAtua ʼo te ʼofa” ʼe nofo mo ʼana kaugana! (2 Ko. 13:11) ʼE tokaga ia kia tatou taki tokotahi. Pea ʼe ina puipui tatou ʼaki tona ʼofa agatonu. (Pes. 32:10) Ka lahi tatatou metitasio ʼae ki tana faʼahiga fakaha mai ʼo tona ʼofa, mo tatatou iloʼi ʼae ʼe tokaga kia tatou ʼe toe lahi age ai tatatou fakaovi kia te ia. ʼAua naʼa tou tuʼania ʼi te faikole kia te ia ʼo kole age ʼe ʼaoga ʼaupito kia tatou tona ʼofa. Fakaha kia te ia ʼotatou tuʼania fuli ʼaki tatatou tui ʼae ʼe lotomahino pea ʼe fia tokoni mai kia tatou. (Pes. 145:19) Ohage pe ko hatatou fakamafana ʼi he afi, ʼi he ʼaho momoko ʼe toe feala pe ke fakamalohiʼi tatou e te ʼofa ʼo Sehova moka tou tau mo ni ʼahiʼahi. Tali te ʼofa ʼo Sehova ʼae ʼe ke maʼu ai te malohi mo te tokalelei. Pea ʼi tatatou fakamalo ki tona ʼofa ʼaua naʼa tou tuʼania ʼi te ui: “ ʼE au ʼofa ia Sehova”!—Pes. 116:1. w24.01 31 ¶19-20

Neʼe mole fakaha pe e Sesu ko te huafa ʼo te ʼAtua ʼe ko Sehova, koteʼuhi neʼe kua iloʼi pe e te kau Sutea ʼae neʼe ina akoʼi te huafa ʼo te ʼAtua. Kae ʼe ui ʼi te Tohi-Tapu, neʼe ko Sesu ʼae neʼe ina ‘fakamahino pe ko ai te ʼAtua.’ (Soa. 1:​17, 18) Ohage la, neʼe kua fakaha ʼi te ʼu Koga Tohi Fakahepeleo ko Sehova ko he ʼAtua manavaʼofa. (Eke. 34:​5-7) Kae ʼi te lea fakata ʼo te tamai mo tona foha ʼae neʼe puli, neʼe fakamahino lelei ai e Sesu te moʼoni ʼaia. ʼI te sio ʼa te tamai ki tona foha ʼae neʼe fakahemala logo la tana kei mamaʼo, neʼe lele ʼo faʼufua mo ʼuma mamahi ki ai pea mo fakamolemole age ʼaki he loto katoa. ʼE ha lelei ʼi te hisitolia ʼaia te manavaʼofa fakaofoofo ʼa Sehova. (Luka 15:​11-32) Koia, neʼe fakamahino lelei e Sesu te ʼuhiga totonu ʼo tana Tamai. w24.02 10 ¶8-9

ʼE foaki e Sehova he fiafia mo he fakafimalie kia natou ʼae ʼe lotomamahi. ʼE feafeaʼi hatatou faʼifaʼitakiʼi ia Sehova, ʼo tou manavaʼofa pea mo fakafimalieʼi ai ʼihi? ʼE feala anai mo kapau ʼe tou faiga ke tou maʼu he ʼu kalitate. Kotea la ʼihi kalitate? Kotea ʼae ka tokoni mai ke tou ʼoʼofa pea mo tou “haga fefakafimalieʼaki” ʼi te ʼaho fuli? (1 Tes. 4:18) ʼE tonu anai ke tou maʼu te ʼu kalitate ohage ko te kaugā mamahi, mo te ʼofa fakatautehina, pea mo te agaʼofa. (Kol. 3:12; 1 Pet. 3:8) He koʼe ʼe ʼaoga te ʼu kalitate ʼaia? Ka tou manavaʼofa ki ʼotatou tehina pea mo maʼu mo te ʼu kalitate ʼaia, ʼe malohi anai tatatou fia fakafimalieʼi natou moka natou tau mo ni faigataʼaʼia. Ohage ko tona ui e Sesu: “ ʼE haʼu mai te gutu te meʼa ʼae ʼe fonu ʼi te loto. Ko te tagata ʼae ʼe agalelei, ʼe ina toʼo mai tona koloa ʼae ʼe lelei te ʼu meʼa ʼae ʼe lelei.” (Mat. 12:​34, 35) ʼEi ko tatatou fakafimalieʼi ʼotatou tehina mo tuagaʼane ʼae ʼe felaveʼi mo ni faigataʼaʼia, ʼe ko he faʼahi maʼuhiga ʼaia ke tou fakaha ai totatou ʼofa kia natou. w23.11 10 ¶10-11

Ke tou mahino ki te ʼu lea fakapolofeta, ʼe tonu ke tou kole tokoni. ʼE hage pe ko hau faifolau mo ʼou kaumeʼa, pea ʼe ke fia mamata ki he koga meʼa heʼeki ke iloʼi. Ko he tahi ʼi ʼou kaumeʼa ʼe ina iloʼi lelei te koga meʼa ʼaia. ʼE ina iloʼi lelei te potu ʼae kua kotou ʼi ai pea ʼe taki kifea te ʼu ala fuli. ʼE mahino ia, ʼe ke fiafia anai moka ke alu mo tou kaumeʼa ʼaia ki te koga meʼa ʼe ke fia mamata ai. ʼO toe feia pe, ʼe iloʼi lelei e Sehova te temi ʼae ʼe tou lolotoga maʼuʼuli ai nei pea ʼe feafeaʼi anai tatatou ka haʼu. Koia, ke tou mahino ki te ʼu lea fakapolofeta ʼi te Tohi-Tapu, ʼe tonu ke tou agavaivai ʼo kole tana tokoni. (Tan. 2:28; 2 Pet. 1:​19, 20) Ohage pe ko te ʼu matuʼā agalelei fuli, ʼe loto e Sehova ke maʼu e ʼana fanau he ka haʼu fiafia. (Sel. 29:11) Kae ko te faʼahi leva ʼae ʼe kehe ai ia Sehova pea mo he ʼu matuʼā, he ʼe ina lava fakaha mai te ʼu meʼa fuli ka hoko ʼi te ka haʼu pea ʼe moʼoni tuʼumaʼu pe ia. Neʼe ina loto ke tohi he ʼu lea fakapolofeta ʼi tana Folafola, ke tou iloʼi ai te ʼu aluʼaga maʼuhiga ʼae ka hoko mai.—Esa. 46:10. w23.08 8 ¶3-4