Sulio

Ko te ʼu meʼa fuli ʼae neʼe ui pea mo fai e Sesu, ʼo kau ai ʼana milakulo, neʼe ha lelei ai te ʼu manatu pea mo te ʼu meʼa ʼae neʼe logoʼi e tana Tamai. (Soa. 14:9) Kotea te ako ʼe tou maʼu mai te ʼu milakulo ʼa Sesu? ʼE ʼoʼofa mamahi ia Sesu mo tana Tamai ia tatou. ʼI tana ʼi te kele, neʼe fakaha e Sesu tona ʼofa lahi ki te hahaʼi ʼi tana fakaʼaogaʼi tona malohi moʼo fai ni milakulo ke tokoni kia natou ʼae neʼe mamahi. ʼI te tahi ʼaho, neʼe kole age e te ʼu tagata kivi ʼe toko lua ke tokoni age. (Mat. 20:​30-34) Tokagaʼi, ko “te ʼofa mamahi ʼa Sesu ia naua” ʼae neʼe ina uga ai ia ia ke ina fakamalolo te ʼu tagata ʼaia. ʼI te Fakakeleka, ko te kupusiga palalau “ ʼofa mamahi” ʼe fakaʼuhiga ki he toe manavaʼofa lahi. Ko te toe manavaʼofa lahi ʼaia ʼa Sesu ʼae neʼe uga ai ia ia ke ina fafaga te hahaʼi neʼe halofia pea mo fakamalolo te tagata neʼe kilia. (Mat. 15:32; Mko. 1:41) ʼE tou tui papau ai, ko Sehova te ʼAtua ʼo “te manavaʼofa lahi” pea mo tona ʼAlo ʼe nā ʼoʼofa mamahi ia tatou pea ʼe nā kaugā mamahi mo tatou. (Luka 1:78; 1 Pet. 5:7) ʼE mahino ia, kua nā fakaʼamu la ke nā pulihi te ʼu mamahi fuli ʼae ʼe tou tau mo ia! w23.04 3 ¶4-5

Ko tona fakaʼuhiga, ʼe tou faiga anai ke mole tou lau mo fakalogo te ʼu manatu ʼe kovi ʼae ʼe mafola ʼi te malama ʼa Satana. Kae ʼe tou maʼu anai ni manatu ʼe maʼa ʼaki tatatou lau mo ako te Tohi-Tapu. Pea tou kau ki te ʼu fono mo te faifakamafola. ʼE puipui anai e te ʼu gaue ʼaia ʼatatou manatu. ʼE fakapapau mai e Sehova ʼe mole ina tuku anai ke fakahalaʼi tatou ʼo fakalaka age ʼi te meʼa ʼe tou lavaʼi. (1 Ko. 10:​12, 13) Ke feala hatatou nonofo agatonu kia Sehova ʼi te ʼu ʼaho fakamuli mo faigataʼa ʼaeni, ʼe tonu ke lahi age tatatou faikole. ʼE loto e Sehova, ke tou ‘avahi ʼotatou loto kia te ia’ moka tou faikole. (Pes. 62:8) Fakavikiviki kia te ia mo ke fakamalo age ki ʼana gaue fuli. Kole age ke ina foaki atu te lototoʼa ke ke faifakamafola. Kole mamahi age ke tokoni atu ke ke lava tauʼi ʼou faigataʼaʼia, ʼo feia mo te ʼu fakahala. ʼAua naʼa taʼofi koe e he meʼa peʼe ko he tahi ke ke faikole tuʼumaʼu kia te ia. w23.05 7 ¶17-18

He koʼe ʼe tou kau ki te ʼu fono? ʼE tou kau tafito ki ai he ʼe tou fia vikiʼi ia Sehova. (Pes. 26:12; 111:1) ʼE tou toe kau ki ai ke tou fefakalotomalohiʼaki ʼi te ʼu temi faigataʼa ʼaeni. (1 Tes. 5:11) Ka tou fai hatatou tali, ʼe tou fakahoko ai te ʼu faʼahi ʼaia ʼe lua. Kae ʼe lagi faigataʼa hatatou fai ni tali. ʼE lagi tou mataku ʼi te fai ʼo he tali. Peʼe tou fia fai he tali kae ʼe mole hinoʼi mai tatou ʼi ʼihi temi. Kotea ʼae ʼe lava tokoni mai? Neʼe ui e te apositolo ko Paulo ʼe tonu ke tou tokaga tafito ʼo “fefakalotomalohiʼaki.” ʼE mole lahi fau anai tatatou matataku, moka ʼe tou manatuʼi ʼe fakalotomalohi ki ʼihi tatatou fai he tali moʼo fakaha tatatou tui. Pea kapau ʼe mole hinoʼi tuʼumaʼu tatou, ʼe tou fiafia he ʼe maʼu ai e ʼihi te faigamalie ʼae ke natou fai ni tali.—1 Pet. 3:8. w23.04 20 ¶1-3

Neʼe tala te tonu neʼe fai e te hau: Ko te kau Sutea ʼae neʼe maʼuʼuli popula ʼi Papiloni teitei taʼu ʼe 70, kua feala ke natou toe liliu ki Iselaele, tonatou fenua. (Eset. 1:​2-4) Neʼe ko Sehova ʼae neʼe ina uga te hau ke ina fai te tonu ʼaia. Koteʼuhi ʼi te agamahani, neʼe mole fakaʼateainaʼi e te kau Papiloni ʼanatou hahaʼi pilisoni. (Esa. 14:​4, 17) Kae neʼe ʼohofi ia Papiloni, pea neʼe fakagafua leva e te hau foʼou ke mavae te kau Sutea. Neʼe tonu ke fai e te kau Sutea takitokotahi, tafito te ʼu pule famili, te tonu ʼae ke natou mavae ʼi Papiloni peʼe ke natou nonofo ai. Neʼe mole faigafua te fai ʼo he tonu. Neʼe faigataʼa te faifagona ʼaia maʼa natou ʼae neʼe kua matuʼa. Pea neʼe tutupu ʼihi Sutea ʼi Papiloni, ʼo mole natou iloʼi he tahi age fenua. Maʼa natou ʼaia, ko Iselaele neʼe ko te fenua pe ia ʼo ʼonatou kui. Ko ʼihi Sutea neʼe maʼu koloa ʼi Papiloni, ʼo lagi faigataʼa ai kia natou hanatou mavae mai ʼonatou ʼu ʼapi matalelei pea mo tuku ʼanatou matagi gaue kae natou olo ʼo maʼuʼuli ʼi he fenua ʼe mole natou iloʼi. w23.05 14 ¶1-2

ʼE fakalotomalohiʼi tatou ʼi te Folafola ʼa te ʼAtua ke tou faʼa kataki, mo manavaʼofa pea mo ʼofa. ʼE ui ia Luka 21:19: “Kapau ʼe kotou faʼa kataki, ʼe kotou haofaki anai tokotou maʼuli.” ʼE ui ia Kolose 3:12: “Kotou kofuʼi . . . te manavaʼofa.” Pea ia 1 Tesalonika 4:9, 10 ʼe ui ai: “Koteʼuhi ʼe akoʼi totonu koutou e te ʼAtua ke kotou feʼofaʼaki. . . . Kae, ʼu tehina, ʼe matou fakalotomalohiʼi koutou ke kotou haga fai te faʼahi ʼaia ʼo laka age.” Neʼe fai te ʼu palalau ʼaia ki te ʼu tisipulo neʼe kua natou faʼa kataki, mo manavaʼofa pea mo fakaha te ʼofa. Kae neʼe tonu pe ke natou haga maʼuliʼi te ʼu kalitate ʼaia. ʼO toe feia mo tatou, moʼo tokoni mai kia tatou, ʼe tou vakaʼi anai pe neʼe fakaha feafeaʼi e te ʼu ʼuluaki Kilisitiano te ʼu kalitate ʼaia. Pea ʼe tou toe vakaʼi anai pe ʼe feafeaʼi hatatou faʼifaʼitakiʼi te ʼu tisipulo ʼaia ke tou tokalelei ai ki te mamahi lahi. Pea ka kamata te mamahi lahi, kua ke faʼa kataki pea ʼe ke fia hoko atu anai tau faʼa kataki. w23.07 3 ¶4, 8

Pe ʼe tou kau ʼi te kau fakanofo peʼe ʼi “ ʼihi atu ovi” ʼe tonu ke tou haga nonofo ʼi “te Ala ʼo Te Maʼoniʼoni.” ʼE tou maʼu ai ʼi te temi nei te ʼu tapuakina ʼo te palatiso fakalaumalie pea mo ʼae ka foaki mai anai ʼi te ka haʼu e te Puleʼaga. (Soa. 10:16) Talu mai te taʼu 1919, ko te toko miliona hahaʼi tagata, fafine pea mo ni fanau kua natou mavae mai Papiloni Lahi, te kautahi fakamalamanei ʼo te lotu hala pea mo natou haʼele ʼi te ala fakata ʼaia. Neʼe tokaga ia Sehova ke toʼo ʼi te ala te ʼu faʼahi ʼae neʼe feala ke taʼofi ai te haʼele ʼa te kau Sutea ʼae neʼe mavae mai Papiloni. (Esa. 57:14) ʼE feafeaʼi ki “te Ala ʼo Te Maʼoniʼoni” ʼi te temi nei? ʼI ni taʼu ʼe lauʼi teau ʼi muʼa ʼo te taʼu 1919, neʼe fakaʼaogaʼi e Sehova ni tagata neʼe manavasiʼi kia te ia ke natou fakamaʼa te ala ʼae ka haʼele ai te hahaʼi neʼe mavae mai Papiloni Lahi. (Vakaʼi mo Esaia 40:3.) ʼE feala pe ke tou ui neʼe teuteuʼi e te ʼu tagata ʼaia te ala fakata ʼaia. Neʼe ʼaoga ʼaupito te ʼu gaue ʼaia ke feala ki muli age ke mavae te hahaʼi fakamalotoloto mai Papiloni Lahi pea ke natou hu ki te palatiso fakalaumalie, ʼae kua ʼosi fakatuʼu ai te tauhi maʼa. w23.05 15-16 ¶8-9

ʼE loto e Sehova ke tou fiafia ʼi tatatou tauhi kia te ia pea ke tou fai ʼaki totatou loto katoa. (2 Ko. 9:7) Koia ʼe tonu koa ke tou faiga ʼo fakahoko he fakatuʼutuʼu fakalaumalie maʼia moka mole tou loto ki ai? Tokagaʼi te meʼa ʼae neʼe ui e te apositolo ko Paulo: “ ʼE au tuki palaʼi toku sino pea mo au taki ohage ko he kaugana.” (1 Ko. 9:​25-27) ʼI ʼihi temi neʼe mole fia fai e Paulo te ʼu meʼa neʼe kole age e Sehova, kae neʼe faiga fakakinau pe ke ina fakahoko. Neʼe tali koa e Sehova te tauhi ʼa Paulo? ʼE mahino ia! Pea neʼe fakapale e Sehova tana ʼu faiga. (2 Tim. 4:​7, 8) ʼO feia pe, ʼe fiafia ia Sehova ʼi tana sio mai ʼe tou fakahoko he fakatuʼutuʼu logo la ʼe mole tou loto ki ai. ʼE fiafia he ʼe ina iloʼi ʼe tou fai ʼuhi ko totatou ʼofa kia te ia. ʼE mole lagi tou faʼa leleiʼia te gaue ʼaia, kae ʼe tou ʼoʼofa kia Sehova. ʼE tapuakinaʼi anai e Sehova ʼatatou faiga ohage ko tana fai kia Paulo. (Pes. 126:5) Pea ʼi tatatou sisio ki te tapuakinaʼi ʼo tatou e Sehova, ʼe feala pe la ke tou kamata loto ai ke tou fakahoko tatatou fakatuʼutuʼu. w23.05 29 ¶9-10

Neʼe fakatatau e te apositolo ko Paulo ia natou ʼae ʼe mole hao anai ʼi te ʼaho ʼo Sehova, ki ni hahaʼi ʼe momoe. Kotea tona tupuʼaga? Koteʼuhi ʼe mole natou tokagaʼi te ʼu aluʼaga ʼae ʼe hoko ʼi te malamanei peʼe ko te fakalaka ʼo te temi. Koia, ʼe mole feala ai hanatou mahino ki te maʼuhiga ʼo te ʼu aluʼaga ʼaia, pea mole natou fai ai he ʼu tonu. Tokolahi ia ʼaho nei ʼe natou tulemomoe ʼi te faʼahi fakalaumalie. (Loma 11:8) ʼE mole natou tui ki te ʼu fakamoʼoni ʼae ʼe tou maʼuli nei ʼi “te ʼu ʼaho fakamuli” pea kua vave hoko mai te mamahi lahi. (2 Pet. 3:​3, 4) Kae ʼe ha lelei mai, ʼaki te fakalaka ʼo te temi, ʼe maʼuhiga ke tou muliʼi te tokoni ʼa Paulo, ʼae ke tou nonofo ʼalaʼala. (1 Tes. 5:6) He koʼe ʼe maʼuhiga ke fena te kau Kilisitiano? Kotea tona tupuʼaga? Koteʼuhi ʼe mole tonu ke natou kau ki te ʼu fihifihia fakapolitike peʼe fakasosiale ʼo te malamanei. ʼI te fakaovi mai ʼo te ʼaho ʼo Sehova ʼe toe ʼaʼasili anai totatou fakaneke ʼae ke tou kau ki te ʼu fihifihia ʼaia. Kae ʼe mole tonu ke tou tuʼania fau pe ʼe feafeaʼi anai tatatou aga. ʼE tokoni mai anai te laumalie ʼo te ʼAtua ke tou maʼu te tokalelei mo tou malohi, pea ke tou fai he ʼu tonu ʼe lelei.—Luka 12:​11, 12. w23.06 10 ¶6-7

Ka ke logo ki te higoa ʼo Samisoni, kotea ʼae ʼe ke manatu ki ai? ʼE lagi ke manatu ki he tagata neʼe ina maʼu he malohi ʼe makehe, pea ʼe moʼoni. Kae neʼe fai foki e Samisoni he tonu neʼe mole lelei pea neʼe tau ai mo ni aluʼaga fakalotomamahi. Logo la te faʼahi ʼaia, kae neʼe maʼuhiga age kia Sehova te nofo agatonu ʼa Samisoni, pea neʼe tokaga Sehova ke tohi ʼi te Tohi-Tapu tana faʼifaʼitaki ke tou taʼofi mai ai he ʼu ako. Neʼe filifili e Sehova ia Samisoni ke ina fai he ʼu gaue fakaofoofo moʼo tokoni ki Iselaele, tana hahaʼi. Hili ni taʼu ʼe lauʼi teau ki te mate ʼa Samisoni, neʼe takitaki e Sehova ia te apositolo ko Paulo ke ina tohi fakatahi te higoa ʼo Samisoni mo ʼae ʼo te ʼu tagata mo fafine neʼe tui malohi. (Hep. 11:​32-34) ʼE feala ke fakalotomalohi kia tatou te faʼifaʼitaki ʼa Samisoni. Neʼe falala kia Sehova, maʼia ʼi te ʼu aluʼaga faigataʼa. ʼE feala ke tou taʼofi te ʼu ako mai ia Samisoni pea ʼe fakalotomalohiʼi feafeaʼi tatou e tana faʼifaʼitaki. w23.09 2 ¶1-2

ʼE feala ke malohi age tatatou faʼa kataki moka ʼe tou faikole tuʼumaʼu mo fakaha ʼotatou tuʼania fuli kia Sehova. (1 Tes. 5:17) ʼE lagi mole ke lolotoga tau nei mo he fihifihia ʼe kovi ʼosi, kae ʼe ke faikole koa kia Sehova ke tokoni atu ʼi te ʼu lakaga ʼae ʼe ke lotovaivai ai, peʼe ke hoha peʼe mole kei ke iloʼi te meʼa ʼae ʼe tonu ke ke fai? Kapau ko tau agamahani ko te kole tuʼumaʼu kia Sehova ke tokoni atu ʼi te ʼu fihifihia ʼae ʼe ke lolotoga tau nei mo ia, pea ʼe faigafua anai hau faikole kia te ia moka ke tau mo ni fihifihia ʼe kovi ʼosi age. Pea ʼe ke tui papau anai ʼe iloʼi e Sehova te temi ʼae ʼe tonu ke tokoni atu ai pea mo te meʼa ʼae ʼe tonu ke ina fai. (Pes. 27:​1, 3) ʼE feala anai hatatou faʼa kataki ʼi te mamahi lahi ʼae ka hoko mai moka ʼe tou katakiʼi ʼi te temi nei ʼotatou fihifihia. (Loma 5:3) Kotea tona tupuʼaga? Tokolahi ʼi te ʼu tehina mo tuagaʼane neʼe natou tokagaʼi ko tanatou katakiʼi he ʼu fihifihia ʼi te temi muʼa, neʼe tokoni kia natou ke natou faʼa kataki ʼi te temi nei. Ka natou katakiʼi he fihifihia ʼaki te tokoni ʼa Sehova, ʼe toe malohi age tanatou tui ʼae ʼe fia tokoni mai Sehova kia natou. Pea ʼuhi ʼae kua toe malohi age tanatou tui, ʼe feala ai leva ke natou katakiʼi he tahi age fihifihia.—Sakp. 1:​2-4. w23.07 3 ¶7-8

ʼE fakapotopoto ia Sehova ki te hahaʼi he ʼe agavaivai pea mo manavaʼofa. Ohage la, neʼe agavaivai ʼi te temi ʼae neʼe ina ʼamanaki pulihi ai te hahaʼi agakovi ʼo te kolo ko Sotoma. Neʼe ina fekauʼi he ʼu ʼaselo ke olo ʼo ui age ki te tagata faitotonu ko Lote ke hola ki te potu moʼugaʼia. Kae neʼe mataku ia Lote ʼi te alu ki ai. Neʼe ina kole mamahi kia Sehova ke alu mo tona kiʼi famili ki te kolo ko Tesoa, kae ko te kiʼi kolo ʼaia neʼe tonu ke maumauʼi. Neʼe feala pe ke fakamaʼua e Sehova kia Lote ke fakalogo ki tana fakatotonu. Kae ʼi te aluʼaga ʼaeni, neʼe tali e Sehova te kole ʼa Lote pea neʼe mole ina maumauʼi ia Tesoa. (Sen. 19:​18-22) Hili ki ai ni lauʼi taʼu, neʼe fakaha e Sehova tona manavaʼofa ki te hahaʼi ʼo te kolo ko Ninive. Neʼe ina fekauʼi te polofeta ko Sonasi ke alu ʼo fakaha kia natou ʼe ina pulihi anai natou ʼuhi ko tanatou agakovi ʼo feia mo tonatou kolo. Kae neʼe fakahemala leva te kau Ninive. Neʼe ʼofa ai Sehova kia natou pea neʼe mole ina maumauʼi te kolo.—Son. 3:​1, 10; 4:​10, 11. w23.07 21 ¶5

Kotea te ako ʼe tou maʼu mai ia Seoasi? Neʼe hage pe ia Seoasi ko he fuʼu ʼakau ʼe mole tauaka loloto, neʼe ʼaoga ki ai hona tekeni ke tuʼu tonu. ʼI te mate ʼo Seosata, ʼae neʼe ko tona tekeni, neʼe kamata mulimuli leva ki te ʼu aposita ʼae neʼe natou hage ko he tuʼani matagi, pea neʼe toka ai. ʼE ha lelei mai ai ʼe mole tou manavasiʼi anai kia Sehova ʼuhi pe he ʼe tou fakakaumeʼa lelei mo te ʼu tehina mo tuagaʼane pea mo ʼihi ʼo totatou famili. Ke tou malolohi tuʼumaʼu ʼi te faʼahi fakalaumalie, ʼe tonu ke tou fakamalohi totatou ʼofa mo tatatou manavasiʼi kia Sehova ʼaki tatatou ako tuʼumaʼu ʼo te Tohi-Tapu, mo metitasio pea mo faikole. (Sel. 17:​7, 8; Kol. 2:​6, 7) ʼE mole lahi te ʼu meʼa ʼe kole mai e Sehova ke tou fai. Ko te meʼa pe ʼae ʼe loto ki ai ʼe tuʼu ia Ekelesiasi 12:​13, ʼae ʼe ui ai: “Manavasiʼi ki te ʼAtua moʼoni pea ke fakalogo ki ʼana fakatotonu, koʼena te fakamaʼua katoa ki te tagata.” Ka tou manavasiʼi kia Sehova pea ʼe tou lava tauʼi ai anai te ʼu faigataʼaʼia ʼae ka hoko mai pea mo nofo agatonu. ʼE mole ʼi ai anai he meʼa ʼe feala ke ina maumauʼi tatatou felogoi lelei mo Sehova. w23.06 19 ¶17-19

ʼE tou lau ʼi te vaega 5: “Neʼe ui fenei e Ia ʼae ʼe heka ʼi te hekaʼaga fakahau.” (Fkha. 21:​5, ʼuluaki koga) ʼE makehe te ʼu palalau ʼaia he ʼe tuʼa tolu pe te fai e Sehova totonu ia te ʼu palalau ʼaia ʼi te tohi ʼo Fakaha. Koia ko te fakamoʼoni ʼaia ʼe mole haʼu ia mai he ʼaselo malohi, peʼe mai ia Sesu ʼae kua fakatuʼuake. Kailoa ia, kae ʼe haʼu totonu ia mai ia Sehova! Pea ʼe feala ai ke tou falala ki te hoko atu e Sehova tana palalau. Kotea tona tupuʼaga? Koteʼuhi ko Sehova “ ʼe mole feala ke loi.” (Tito 1:2) Koia ʼe feala ke tou falala ʼe hoko moʼoni anai te ʼu palalau ʼae ia Fakaha 21:​5, 6. Tokagaʼi ʼi te temi nei ia te kupu “Koʼeni.” Ko te kupu Fakakeleka ʼae neʼe fakaliliu ʼaki te kupu “koʼeni” ʼe fakaʼaogaʼi liuliuga ʼi te tohi ʼo Fakaha. Pea kotea ʼae ʼe hoa mai ki ai? Ko te ʼu folafola ʼaeni ʼa te ʼAtua: “ ʼE au fakafoʼou ia meʼa fuli.” ʼE moʼoni ʼe palalau ia Sehova ki he ʼu fetogi ka ina fakahoko anai ʼi te ka haʼu. Kae ʼi tana iloʼi papau ʼae ʼe hoko moʼoni anai, ʼe ha ʼi ʼana palalau ʼaia ʼe hage ia kua lolotoga hoko nei.—Esa. 46:10. w23.11 3-4 ¶7-8

Neʼe tauʼi e te apositolo ko Petelo ʼona vaivaiʼaga. Tou vakaʼi ni aluʼaga neʼe hoko. ʼI te fakaha age e Sesu ʼe tonu anai ke mamahi pea mo mate, ohage ko tona tuʼu ʼi te lea fakapolofeta, neʼe fakatonutonuʼi e Petelo ia ia. (Mko. 8:​31-33) Neʼe tau fefihiʼaki ia Petelo mo te ʼu apositolo pe ko ai ʼae neʼe lahi age ia natou. (Mko. 9:​33, 34) ʼI te po fakaʼosi ʼi muʼa ʼo te mate ʼo Sesu, neʼe ʼohofi e Petelo he tagata ʼo ina tuʼusi tona taliga. (Soa. 18:10) ʼI te po pe ʼaia, neʼe mataku ia Petelo, ʼo ina fakafisi tuʼa tolu ʼe mole ina iloʼi tona kaumeʼa ko Sesu. (Mko. 14:​66-72) Neʼe tagi mamahi ai ia Petelo. Kae neʼe mole liʼaki e Sesu tana apositolo ʼae neʼe kua lotovaivai. Hili tona fakatuʼuake, neʼe toe foaki age e Sesu he faigamalie ke fakaha age e Petelo tona ʼofa ia te ia. Neʼe kole age e Sesu ke tauhi e Petelo ʼaki he agavaivai tana faga ovi. (Soa. 21:​15-17) Neʼe tali koa e Petelo te gaue ʼaia? ʼEi. Pea neʼe nofo ia Petelo ʼi Selusalemi ʼi te ʼaho ʼo te Penikosite, ʼo kau ai ʼi te ʼu ʼuluaki Kilisitiano ʼae neʼe fakanofo ʼaki te laumalie maʼoniʼoni. w23.09 22 ¶6-7

Neʼe tohi fenei e te apositolo ko Petelo ki te ʼu tagata ʼafeā ʼi tona temi: “Kotou tauhi te faga ovi ʼa te ʼAtua.” (1 Pet. 5:​1-4) ʼE matou iloʼi, ʼu tagata ʼafeā ʼe kotou ʼoʼofa ki ʼokotou tehina mo tuagaʼane pea mo kotou fia tokaga kia natou. Kae ʼe feala ʼi ʼihi temi ke faigataʼa he ʼe lahi ʼakotou gaue peʼe kotou gaʼegaʼe. Kotea ʼae ʼe feala ke tokoni atu? Avahi tokotou loto kia Sehova. Neʼe tohi fenei e Petelo: “Kapau ʼe tokoni he tahi ki ʼihi, ke falala ki te malohi ʼae ʼe foaki e te ʼAtua.” (1 Pet. 4:11) Ko ʼihi faigataʼaʼia ʼae ʼe tau mo ʼokotou tehina mo tuagaʼane ʼe mole feala anai ke pulihi ʼi te malama ʼaeni. Kae kotou manatuʼi, ko Sesu Kilisito, “te pule ʼo te ʼu tauhi ovi” ʼe lava tokoni kia natou, ʼo laka age ʼi te ʼu meʼa ʼae ʼe feala ke kotou fai. Pea ʼe lava tokoni kia natou ʼi te temi nei pea ʼi te malama foʼou. Ko te faʼahi ʼae ʼe kole e te ʼAtua ki te ʼu tagata ʼafeā, ke natou ʼoʼofa ki ʼonatou tehina, mo tokaga kia natou pea mo “liliu ko he ʼu faʼifaʼitakiʼaga maʼa te faga ovi.” w23.09 29-30 ¶13-14

ʼE mole tonu ke tou mulimuli ki te ʼu manatu fakatagata. Ka tou kamata maʼu he ʼu manatu fakatagata, ʼe tou galoʼi ai ia Sehova pea mo ʼana lao. (1 Ko. 3:19) ʼE tau uga e “te poto ʼo te malamanei” ia te hahaʼi ke natou fakahoko ʼonatou holi ʼae ʼe kovi. ʼI te temi ʼo te ʼu ʼuluaki Kilisitiano, neʼe atolasio te hahaʼi ʼo te ʼu kolo ko Pelekame mo Tiatile ki te ʼu taula ʼatua pea mo natou fai he ʼu felaveʼi fakasino heʼe ʼaoga. Pea neʼe fai e ʼihi Kilisitiano te ʼu aga ʼaia. Koia neʼe fakatonutonuʼi ai e Sesu te ʼu kokelekasio ʼi te ʼu kolo ʼaia ʼe lua, he neʼe natou tuku ke fai ai te ʼu taʼi aga ʼaia. (Fkha. 2:​14, 20) Ia ʼaho nei, ʼe toe uga tatou e te malama ʼaeni ke tou maʼu te ʼu manatu hala ʼaia. ʼE faiga anai e totatou famili peʼe ko ʼotatou feilo, ke tou manatu ʼe fefeka fau te ʼu lao ʼa Sehova pea ʼe mole kovi moka mole tou fakalogo ki ai. Ohage la ʼe feala ke natou ui mai ʼe mole kovi te fai ʼo te ʼu aga heʼe ʼaoga pea ko te ʼu lao ʼi te Tohi-Tapu kua ʼafeā ia. ʼE feala ʼi ʼihi temi ke tou ui ʼe mole mahino lelei te ʼu lao ʼa Sehova. Pea ʼe lagi feala pe ke tou fia “fakalaka ʼi te ʼu meʼa ʼae kua ʼosi tohi.”—1 Ko. 4:6. w23.07 16 ¶10-11

Ko Malia, te faʼe ʼa Sesu, neʼe ʼaoga ki ai he tokoni ke feala hana fakahoko te finegalo ʼo Sehova. Logo la heʼeki ʼohoana, kae ʼe faitama anai. Neʼe heʼeki poto ʼi te pusiaki ʼo he tamasiʼi, kae neʼe tonu ke ina taupau te kiʼi tamasiʼi ʼae ka liliu anai ko te Mesia. Pea neʼe heʼeki momoe mo he tagata, kae neʼe tonu ke ina fakaha age kia Sosefo kua faitama. ʼE mahino ia neʼe ko he aluʼaga faigataʼa kia Malia. (Luka 1:​26-33) ʼE maʼu feafeaʼi anai e Malia te tokoni? Neʼe falala ʼe tokoni anai ʼihi kia ia. Ohage la, neʼe faifehuʼi kia Kapeliele ʼo ʼuhiga mo te aluʼaga ʼae ka hoko kia ia. (Luka 1:34) Hili ʼaia, neʼe alu atu aipe ki “te fenua moʼugaʼia” ʼi Suta ʼo fakasiosio tona kaiga ko Elisapeta. Neʼe vikiʼi e Elisapeta ia Malia pea neʼe uga e Sehova ia Elisapeta ke faifakakikite ʼo ʼuhiga mo te tamasiʼi ʼa Malia ʼae neʼe heʼeki tupu. Neʼe lagi lotomalohi ai ia Malia. (Luka 1:​39-45) Neʼe ui e Malia ʼo ʼuhiga mo Sehova “neʼe ina fai he gaue malohi ʼaki tona nima.” (Luka 1:​46-51) Koia, ʼaki ia Kapeliele mo Elisapeta neʼe foaki e Sehova te tokoni ʼae neʼe ʼaoga kia Malia. w23.10 14-15 ¶10-12

ʼE tokosiʼi te ʼu tisipulo ʼa Kilisito neʼe fakanofo ʼaki te laumalie maʼoniʼoni pea mo natou maʼu he ʼu felogoi makehe mo Sehova. ʼE kauga gaue anai te toko 144 000 ʼaia mo Sesu ohage ko ni pelepitelo ʼi selo. (Fkha. 14:1) Ko te Potu Taputapu ʼo te tapenakulo ʼe ina fakata tonatou vaheʼi e te ʼAtua ko hona ʼu foha fakalaumalie, ʼi tanatou kei maʼuʼuli ʼi te kele. (Loma 8:​15-17) Ko te Potu Taputapu ʼAupito ʼo te tapenakulo ʼe ina fakata te ʼafioʼaga ʼo Sehova, ʼae ko selo. Ko “te lito” ʼae neʼe ina vaheʼi te Potu Taputapu mo te Potu Taputapu ʼAupito ʼe ina fakata te sinoʼi tagata ʼo Sesu. Neʼe mole feala ke ulu Sesu, te Pelepitelo Lahi maʼoluga ʼo te fale lotu fakalaumalie mo tona sino ʼaia ki selo. ʼI tana foaki tona sinoʼi tagata ko he sakilifisio maʼa te malamanei, neʼe avahi ai e Sesu te ala ki te maʼuli ʼi selo maʼa te kau Kilisitiano fakanofo fuli. ʼE tonu ke natou toe liʼaki mo natou ʼonatou sinoʼi tagata ke feala hanatou maʼu tonatou fakapale ʼi selo.—Hep. 10:​19, 20; 1 Ko. 15:50. w23.10 28 ¶13

Neʼe mole ita ia Seteone ʼi tona valokiʼi e te kau Efalaimi. (Tfm. 8:​1-3) Neʼe mole tali ita age kia natou. Neʼe fagono lelei ʼaki he agavaivai ki tanatou meo, pea neʼe palalau age kia natou mo he agalelei. Neʼe malu ifo ai tonatou ita. Ko te ʼu tagata ʼafeā ʼae ʼe natou maʼu te poto ʼe natou faʼifaʼitakiʼi ia Seteone. ʼE natou fagono fakalelei pea mo natou tali ʼaki he agamalū moka valokiʼi natou. (Sakp. 3:13) ʼE maʼu ai te tokalelei ʼi te kokelekasio. ʼI te vikiʼi e te ʼu tagata ia Seteone ʼi tana malo ʼi te kau Matiane, neʼe ina fakakololiaʼi ia Sehova. (Tfm. 8:​22, 23) ʼE faʼifaʼitakiʼi feafeaʼi e te ʼu tagata ʼafeā ia Seteone? ʼE tonu ke natou foaki te kololia kia Sehova. (1 Ko. 4:​6, 7) Ohage la, ka vikiʼi he tagata ʼafeā he ʼe faiakonaki lelei, ʼe feala ke ina ui age ʼe haʼu mai te Folafola ʼa te ʼAtua te ʼu manatu ʼae neʼe ina fakaʼaogaʼi, peʼe ko te kautahi ʼa Sehova ʼae ʼe ina akoʼi tatou ke tou popoto. ʼI ʼihi temi, ʼe feala ki te ʼu tagata ʼafeā ke natou sivisivi pe ia natou totonu, pe ʼe fakakololiaʼi e tanatou faʼahiga faiakonaki ia Sehova, peʼe natou loto pe ke vikiʼi natou e te hahaʼi. w23.06 4 ¶7-8

Kapau ʼe mole tali mai Sehova ki tatatou faikole, ʼe feala ke tou fai te ʼu fehuʼi ʼaeni ʼe tolu. ʼUluaki: “ ʼE fua lelei koa kia au te meʼa ʼaeni ʼe au kole kia Sehova?” ʼI ʼihi temi ʼe tou manatu ʼe tou iloʼi te meʼa ʼae ʼe lelei maʼa tatou. Kae ko te faʼahi ʼae ʼe tou kole ʼe lagi mole fua lelei anai kia tatou. ʼE lagi tou fakaha age kia Sehova tatatou manatu moʼo fakatokatoka ʼo he fihifihia. Kae ʼe lagi ʼi ai he tahi age puleʼaki ʼe lelei age. Pea ko ʼihi faʼahi ʼae ʼe tou kole kia Sehova ʼe mole alu tahi mo te finegalo ʼo Sehova. (1 Soa. 5:14) Ohage la ko he ʼu matuʼā ʼe nā kole ke ʼofa age Sehova ʼo taupau tanā tamasiʼi ʼi te moʼoni. ʼE mole kovi tanā kole ʼaia. Kae ʼe mole feala ke fakakinauʼi e Sehova he tahi ke tauhi kia te ia. ʼE loto ia ke tou filifili ke tou tauhi kia te ia, ʼo feia pe mo ʼatatou fanau. (Tet. 10:​12, 13; 30:​19, 20) Koia, ʼe lelei age ke kole e te ʼu matuʼā kia Sehova ke tokoni age ke malave tanatou ako ki te loto ʼo ʼanatou fanau. ʼE feala anai ke ʼoʼofa ʼanatou fanau kia Sehova pea mo natou kaumeʼa mo ia.—Taag. 22:6; Efe. 6:4. w23.11 21 ¶5; 23 ¶12

He koʼe ʼe ko he faʼahi maʼuhiga ʼaia? ʼE ui ʼi he tohi Fakatohi-tapu ko te kupu “fakafimalie” ʼae neʼe fakaʼaogaʼi e Paulo ʼe fakaʼuhiga ki “takita nofo mo he tahi ʼo fakalotomalohiʼi ia ia moka felaveʼi mo ni faigataʼaʼia ʼaupito.” Koia, ka tou fakafimalieʼi he tehina peʼe ko he tuagaʼane ʼe lotomamahi, ʼe tou tokoni kia ia ke hoko atu tana tauhi agatonu kia Sehova. Pea ʼi te temi fuli pe ʼae ʼe tou fakafimalieʼi ai hotatou tehina peʼe tuagaʼane, ʼe tou fakaha ai ʼe tou ʼoʼofa ia ia. (2 Ko. 7:​6, 7, 13) ʼE tau hoa ia te manavaʼofa pea mo te fakafimalieʼi ʼo he tahi. ʼO feafeaʼi? Ka manavaʼofa he tahi, ʼe ina fia fakafimalieʼi ʼihi pea mo tokoni kia natou. Koia, ka tou manavaʼofa pea ʼe uga ai tatou ke tou fakafimalieʼi ʼotatou tehina mo tuagaʼane. Tokagaʼi pe ʼe fakapipiki feafeaʼi e Paulo te manavaʼofa ʼo Sehova pea mo tana fakafimalieʼi ia te hahaʼi. ʼE ina ui ʼo ʼuhiga mo Sehova ʼe ko “te Tamai ʼo te ʼu manavaʼofa pea mo te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe.”—2 Ko. 1:3. w23.11 9-10 ¶8-10

ʼE feala ke felaveʼi te ʼu tisipulo fuli ʼa Kilisito mo ni faigataʼaʼia. Ko te aluʼaga ʼaia neʼe hoko ki te apositolo ko Paulo, ʼae neʼe ina ui fenei ki te ʼu Kilisitiano ʼi Tesalonika: “ ʼI tamatou nonofo mo koutou, neʼe matou tala fakatomuʼa atu ʼe tonu ke tou tau mo he ʼu mamahi, pea neʼe hoko ia.” (1 Tes. 3:4) Pea neʼe ina tohi ki te kau Kolonito: “ ʼE matou loto ke kotou iloʼi, ʼu tehina, te mamahi ʼae neʼe hoko kia matou . . . neʼe mole matou iloʼi papau pe la pe neʼe feala ke matou maʼuʼuli.” (2 Ko. 1:8; 11:​23-27) ʼE toe tau te kau Kilisitiano fuli ia ʼaho nei mo he ʼu faigataʼaʼia kehekehe. (2 Tim. 3:12) Neʼe fakatagaʼi koa koe he ʼe ke tui mo mulimuli ia Sesu? Neʼe lagi vaʼi koe e ʼou kaumeʼa pea mo ʼou famili, peʼe natou gaohi koviʼi koe. Neʼe ke tau koa mo he faigataʼaʼia ʼi tou fale gaue ʼuhi he ʼe ke fia taupau tau aga fakahagatonu ia meʼa fuli? (Hep. 13:18) Peʼe mole loto koa e te ʼu pule taki ke ke palalau ki te hahaʼi ʼo ʼuhiga mo tau ʼamanaki? Tatau aipe te faigataʼaʼia ʼae ʼe tou tau mo ia, kae neʼe ui e Paulo ʼe tonu ke tou fiafia. w23.12 10-11 ¶9-10

Neʼe hoko kia Sakopo te tahi ʼu faigataʼaʼia. Ko Simeone mo Levi neʼe nā ʼulihi te higoa ʼo te famili mo te huafa ʼo te ʼAtua. Ko Lasele, te ʼohoana ʼofaina ʼo Sakopo neʼe mate ʼi tana fanauʼi tanā tama lua. Pea neʼe hoko leva te hoge, ʼo maʼua ai ke alu ia Sakopo ʼo maʼuli ʼi Esipito kae neʼe kua matuʼa. (Sen. 35:​16-19; 37:28; 45:​9-11, 28) Logo la te ʼu malaʼia fuli ʼaia, kae neʼe haga tui pe ia Sakopo kia Sehova mo ʼana fakapapau. Pea neʼe fakaha lelei age e Sehova tona ʼofa ia ia. Ohage la, neʼe lahi ʼona koloa he neʼe tapuakinaʼi ia ia e Sehova. Pea fakakaukauʼi age muʼa te lotofakafetaʼi ʼa Sakopo kia Sehova ʼi tana toe fesioʼaki mo Sosefo, tona foha ʼofaina ʼae neʼe manatu kua mate. Neʼe lava ʼutakiʼi e Sakopo te ʼu ʼahiʼahi ʼaia he neʼe kaumeʼa lelei mo Sehova. (Sen. 30:43; 32:​9, 10; 46:​28-30) Kapau ʼe tou kaumeʼa lelei mo Sehova, ʼe toe feala pe anai ke tou ʼutakiʼi te ʼu faigataʼaʼia ʼae ʼe feala ke hoko ʼi totatou maʼuli. w23.04 15 ¶6-7

Ko te Pesalemo 23 ʼe ko he hiva ʼe fakaha ai e Tavite tana tui papau ʼae ʼe ʼofa pea mo tokaga lelei ia Sehova kia ia. ʼE fakaha ai tana ʼu felogoi lelei pea mo Sehova ia tona Tauhi Ovi. Neʼe tuku e Tavite ia ia ke takitaki e Sehova, ʼo ina logoʼi ai tona puipui pea neʼe falala katoa kia te Ia. Neʼe iloʼi e Tavite ʼe taupau anai ia ia e te ʼofa agatonu ʼo Sehova ʼi te ʼaho fuli ʼo tona maʼuli. He koʼe neʼe tui papau ki te faʼahi ʼaia? Neʼe logoʼi ʼe Tavite te fakapelepeleʼi ʼo tona loto he neʼe foaki tuʼumaʼu pe e Sehova te ʼu meʼa fuli ʼae neʼe ʼaoga kia ia. Neʼe ina iloʼi ko tona ʼAtua neʼe ko tona kaumeʼa pea neʼe leleiʼia ai ia ia. Koia neʼe tui papau ia Tavite logo la he ʼu aluʼaga ʼe tau anai mo ia ʼe foaki pe anai e Sehova te ʼu meʼa ʼae ʼe ʼaoga kia ia. Neʼe tui papau ia Tavite ʼe ʼofa mamahi pea mo tokaga ia Sehova kia ia. Koia, neʼe tokoni ai ke mole hoha ki he meʼa kae ke fiafia ʼi te ʼu meʼa fuli ʼae ʼe ina maʼu.—Ps. 16:11. w24.01 29 ¶12-13

Talu mai te Lua Tau Fakamalamanei, ʼe lahi te ʼu fenua ʼe faifakamafola ʼateaina ai te hahaʼi ʼa Sehova. Koia, kua mafola te logo lelei ʼi te malamanei katoa. Ia ʼaho nei, ʼe hoko atu pe te kumi e te ʼu tehina ʼo te Kolesi Pule te takitaki ʼa Kilisito. Ko te ʼu fakatotonu ʼae ʼe natou foaki ki te ʼu tehina, ʼe natou loto ke fakaʼata te faʼahiga sio ʼa Sehova. Pea ʼe natou fakaʼaogaʼi leva te kau taupau siliko mo te kau tagata ʼafeā ke natou foaki te ʼu fakatotonu ki te ʼu kokelekasio. ʼE puke e Kilisito ʼi “tona nima mataʼu” te ʼu tagata ʼafeā fakanofo, ʼo kau ai mo te ʼu tagata ʼafeā fuli ʼo te ʼu kokelekasio. (Fkha. 2:1) ʼE moʼoni foki, ko te ʼu tagata ʼafeā ʼaia ʼe natou lakahala he ʼe natou agahala. Neʼe toe lakahala pe la mo Moisese pea mo Sosue, ʼo toe feia pe mo te kau apositolo. (Num. 20:12; Sos. 9:​14, 15; Loma 3:23) Kae, ʼe takitaki lelei pe e Kilisito te tagata faifekau agatonu mo te kau tagata ʼafeā, pea ʼe toe hoko atu pe tana takitaki ʼaia ʼo natou. Koia ʼae, ʼe tonu ai ke tou falala katoa ki te takitaki ʼae ʼe foaki e Kilisito kia natou ʼaia neʼe ina fakanofo moʼo takitaki ʼo tatou. w24.02 23-24 ¶13-14

Ia ʼaho nei, ʼe tou fakafiafiaʼi ia Sehova ʼi tatatou palalau ʼo ʼuhiga mo ia ʼaki he lotomafana, mo he lotofakafetaʼi mo te ʼofa. Ka tou faifakamafola, ʼaua naʼa galo kia tatou, ʼe tonu ke tou taki mai te hahaʼi kia Sehova, pea mo tokoni kia natou ke natou logoʼi te ʼofa ʼae kia te ia ohage pe ko te ʼofa ʼae ʼe tou logoʼi ki tatatou Tamai. (Sakp. 4:8) Ko he toe fiafia lahi tatatou akoʼi te hahaʼi ʼaki te Tohi-Tapu ke natou iloʼi ia Sehova, tafito ʼona kalitate ohage ko tona ʼofa, tana faitotonu, tona poto, tona mafimafi pea mo ʼihi atu kalitate taulekaleka. Pea tahi, ʼe tou vikiʼi pea mo fakafiafiaʼi ia Sehova ʼaki tatatou faiga ʼae ke tou faʼifaʼitakiʼi ia ia. ʼI te malama ʼaeni ʼae tou maʼuʼuli ai, ʼe tokagaʼi e te hahaʼi tatatou aga ʼo natou feuiʼaki pe koʼe ʼe mole tou tatau mo natou. (Mat. 5:​14-16) Ohage la, ka tou felaveʼi mo natou ʼi te ʼu aluʼaga ʼae ʼo te ʼaho fuli, ʼe tou maʼu ai te faigamalie ke tou fakamahino kia natou ʼo ʼuhiga mo tatatou aga. Ka tou fai feia, ʼe tou taki mai ai te hahaʼi fakamalotoloto ki totatou ʼAtua. Ka tou vikiʼi ia Sehova ʼi te ʼu faʼahi kehekehe ʼaia, ʼe tou fakafiafiaʼi lahi ai tona loto.—1 Tim. 2:​3, 4. w24.02 10 ¶7

Ko he tehina kua fotufotuʼa ʼi te faʼahi fakalaumalie ʼe ina tali leleiʼi ke ina fai he ʼu gaue ʼi te kokelekasio, ʼe felogoi lelei mo te hahaʼi, pea ʼe gaue ke ina maʼu te ʼu meʼa ʼae ʼe ʼaoga kia ia mo tona kiʼi famili. Koia, ʼe tonu ke maʼu e he tehina kei tupulaga he ʼu fealagia ke ina fakahoko te ʼu faʼahi ʼaia. Ohage la, ke ke poto ʼi te lautohi mo te faitohi. ʼE ui ʼi te Tohi-Tapu ʼe fiafia te tagata ʼae ʼe ina lau mo metitasioʼi te Folafola ʼa te ʼAtua pea ʼe to lelei ʼana gaue. (Pes. 1:​1-3) ʼI tana lau te Tohi-Tapu ʼi te ʼaho fuli, ʼe mahino lelei age ki te manatu ʼa Sehova, pea feala ai ke mulimuli ki ʼana tokoni ʼi tona maʼuli. (Taag. 1:​3, 4) ʼEi, ʼe ʼaoga ki te kokelekasio he ʼu tehina ʼe faitokoni pea mo faiakonaki ʼo fakatafito ki te Tohi-Tapu. Kapau ʼe ke faiga ke lelei age tau lautohi mo tau faitohi, ʼe feala anai hau fai ni akonaki pea mo ni tali ʼe tokoni anai ki te ʼu tehina mo tuagaʼane pea mo fakamalohi ai tanatou tui. Pea ʼe ke poto anai ʼi te tohi ʼo te ʼu manatu ʼae ʼe maʼuhiga pea ʼe malohi ai anai tau tui pea ʼe feala hau fakaʼaogaʼi te ʼu manatu ʼaia moʼo tokoni ki ʼou tehina mo tuagaʼane. w23.12 26-27 ¶9-11

Ka ke mataku, metitasioʼi te ʼu meʼa ʼae ka fai e Sehova ʼi te ka haʼu moka puli anai ia Satana ʼo talu ai. ʼI te fakatahi fakafenua 2014, neʼe fakaha ʼi te faʼifaʼitaki neʼe palalau ai te tamai ki te maʼuli ka tou maʼu anai ʼi te Palatiso. Neʼe ina fetogi ai te ʼu palalau ʼae ia 2 Timoteo 3:​1-5 ʼo ui fenei: “ ʼI te malama foʼou, ʼe ʼi ai anai he ʼu temi fakafiafia. Koteʼuhi ʼe feʼofaʼofani anai te hahaʼi, mo manako ki te ʼu koloa fakalaumalie, mo fiamalalo, mo agavaivai, mo fakavikiviki ki te ʼAtua, mo agalelei ki te hahaʼi, mo fakalogo ki ʼanatou matuʼā, mo lotofakafetaʼi, mo agatonu, mo ʼofa ki ʼonatou famili, mo felogoi lelei, mo palalau tuʼumaʼu ki ʼihi, mo lotololomi, mo agamalū, mo ʼofa ki te lelei, mo tuha mo te falala, mo fakalogo, mo fia vaivai mo natou ʼoʼofa ki te ʼAtua kae mole ki te ʼu fakafiafia, pea ʼe natou fia fakaha ʼe natou pipiki ki te ʼAtua ʼo natou fai ʼi ʼonatou maʼuli. Ke ke fakaovi tuʼumaʼu ki te hahaʼi ʼaia.” ʼE ke faipalalau koa mo tou kiʼi famili peʼe ko ʼou kaumeʼa ki te maʼuli lelei tukupau ʼae ka tou maʼu anai ʼi te malama foʼou? w24.01 6 ¶13-14

ʼE fakalotofimalie tatatou iloʼi ʼae ʼe fiafia ia Sehova ʼo ʼuhiga mo ʼana kaugana fuli. Koia, ʼe ui fenei ʼi te Tohi-Tapu: “ ʼE ʼofa ia Sehova ʼi tana hahaʼi.” (Pes. 149:4) Kae ʼi ʼihi temi ʼe feuiʼaki e ʼihi moka ʼe natou lotovaivai: ‘ ʼE fiafia koa ia Sehova ʼo ʼuhiga mo au?’ ʼI te temi muʼa, tokolahi te ʼu kaugana ʼa Sehova neʼe natou lotolotolua feia. (1 Sam. 1:​6-10; Sopo 29:​2, 4; Pes. 51:11) ʼE fakaha lelei ʼi te Tohi-Tapu logo la totatou ʼuhiga agahala kae ʼe feala ke fiafia te ʼAtua ʼo ʼuhiga mo tatou. Kotea ʼae ʼe tonu ke tou fai? ʼE tonu ke tou tui kia Sesu pea mo papitema. (Soa. 3:16) ʼAki te papitema, ʼe tou fakaha ki te kaugamalie kua tou fakahemala ki ʼatatou agahala pea neʼe tou fakapapau ki te ʼAtua ʼe tou fai anai tona finegalo. (Gaue 2:38; 3:19) ʼE fiafia ʼosi ia Sehova ʼi tana sio mai ʼae ʼe tou fakahoko te ʼu aluʼaga ʼaia ke tou liliu ai ko hona ʼu kaumeʼa. Kapau ʼe tou fai te ʼu meʼa ʼae ʼe tou lavaʼi moʼo fakahoko tatatou fakapapau, pea ʼe fiafia anai ia Sehova ʼo ʼuhiga mo tatou pea mo tou maʼu anai he ʼu felogoi lelei mo ia.—Pes. 25:14. w24.03 26 ¶1-2

Tou faʼifaʼitakiʼi te ʼu ʼuluaki tisipulo, ʼo hoko atu tatatou faifakamafola tatau aipe pe tapuʼi e te ʼu pule taki. ʼE feala mo tatou ke tou falala ʼe tokoni mai anai Sehova ke tou fakahoko tatatou minisitelio. Koia, ʼe feala ke tou kole kia te ia ke ina foaki mai te lototoʼa mo te poto. Kole kia Sehova ke tokoni atu ke ke tauʼi ʼou faigataʼaʼia. Tokolahi ia tatou ʼe mahamahaki, peʼe lotomamahi ʼaupito, pe neʼe mate he tahi neʼe tou ʼoʼofa ai. ʼE toe tau ʼihi mo he aluʼaga fakafamili faigataʼa, peʼe ko te fakataga, peʼe ko he tahi age fihifihia. Pea ʼe faigataʼa age te ʼutakiʼi ʼo te ʼu aluʼaga ʼaia moka hoko he taʼi mahaki peʼe ko te tau. Kotea ʼae ʼe feala ke tou fai? Avahi kia Sehova tou loto. Palalau age ki te aluʼaga ʼae ʼe ke tau mo ia, ohage ko hau fai ki hou kaumeʼa. Pea ke ke tui papau “ ʼe tokoni atu anai kia koe.” (Pes 37:​3, 5) ʼE tokoni mai anai te faikole ke tou “katakiʼi te ʼu mamahi.” (Loma 12:12) ʼE iloʼi e Sehova te ʼu faigataʼaʼia ʼae ʼe tau mo ʼana kaugana. “ ʼE logo ki ʼanatou kole tokoni.”—Pes. 145:​18, 19. w23.05 5-6 ¶12-15

Ka tou toʼo he tonu maʼuhiga, ʼe tonu ke tou mahino pe “kotea te finegalo ʼo Sehova” pea ke tou tokagaʼi. (Efe. 5:17) Ka tou kumi he pelesepeto ʼo ʼuhiga mo totatou aluʼaga, pea ʼe tou kumi te manatu ʼa te ʼAtua. Pea kapau ʼe tou maʼuliʼi te ʼu pelesepeto ʼaia, pea ʼe feala anai ke tou toʼo he ʼu tonu ʼe lelei. ʼE loto e Satana, totatou fili, ke tou maʼumaʼua ʼo fai te ʼu gaue ʼo te malama ʼaeni ke mole tou toe maʼu he temi ki tatatou tauhi ki te ʼAtua. (1 Soa. 5:19) ʼE feala leva ki he tehina ke tokaga tafito ki te falā, peʼe ki te ako peʼe ki he gaue, kae mole ki he ʼu faigamalie ʼe feala ke ina maʼu moʼo tauhi kia Sehova. Kapau ʼe fai feia, ʼe ha mai ai kua ina maʼu ia te faʼahiga manatu ʼa te malama ʼaeni. ʼE mahino ia, ʼe mole kovi ia te ʼu koga ʼaia, kae ʼe mole tonu ke takimuʼa ʼi totatou maʼuli. w24.03 24 ¶16-17