Ko Sehova ʼe Lahi ʼi Te ʼOfa Agatonu
Ko Sehova . . . ʼe lahi ʼi te lotoʼofa.”—Pesalemo 145:8.
1. ʼE lahi feafeaʼi te ʼofa ʼo te ʼAtua?
“KO TE ʼAtua ʼe ʼofa.” (1 Soane 4:8, MN ) Ko te ʼu palalau fakaloto māfana ʼaia ʼe nātou fakamoʼoni ai ko te faʼahiga takitaki ʼa Sehova ʼe fakatafito ki te ʼofa. Māʼia pe la mo te hahaʼi ʼaē ʼe mole nātou fakalogo kia te ia, ʼe ina foaki fakaʼofa age kia nātou te laʼā pea mo te ʼua. (Mateo 5:44, 45) ʼUhi ko te ʼofa ʼo te ʼAtua ki te malamanei, māʼia pe la mo tona ʼu fili ʼe feala ke nātou fakahemala, ʼo tauhi kia te ia, pea mo nātou maʼu te maʼuli heʼegata. (Soane 3:16) Kae kua ōvi mai te temi ʼaē ka fakaʼauha ai e Sehova te kau agakovi ʼaē ʼe mole fia fetogi, ke feala ai ki te hahaʼi ʼaē ʼe ʼoʼofa kia te ia ke nātou maʼu te maʼuli heʼegata ʼi he mālama foʼou faitotonu.—Pesalemo 37:9-11, 29; 2 Petelo 3:13.
2. E feafeaʼi te ʼofa ʼaē ʼe fakahā e Sehova kia nātou ʼaē ʼe tauhi kia te ia?
2 ʼE fakahā e Sehova te ʼofa ki tana kau atolasio moʼoni ʼi hona ʼaluʼaga maʼuhiga pea mo tologa. Ko te taʼi ʼofa ʼaia ʼe fakaliliu mai te faka Hepeleo ʼaki te kupu “lotoʼofa,” peʼe ko te “ ʼofa agatonu.” Ko Tavite, te Hau ʼo te Iselaele ʼāfea, neʼe maʼuhiga ʼaupito ki ia te lotoʼofa ʼo te ʼAtua. ʼAki te ʼu meʼa ʼaē neʼe hoko kia ia totonu pea mo tana metitasio ki te aga ʼa te ʼAtua ki te hahaʼi, neʼe hiva fēnei ia Tavite ʼaki he loto falala: “Ko Sehova . . . ʼe lahi ʼi te lotoʼofa [peʼe ko te “ ʼofa agatonu”].”—Pesalemo 145:8.
Ko Ai Te Kau Agatonu ʼa Te ʼAtua?
3, 4. (a) ʼE tokoni feafeaʼi mai te Pesalemo 145 ke tou ʼiloʼi peʼe ko ai te kau agatonu ʼa Sehova? (b) ʼE lava “tapuakiʼi” feafeaʼi te ʼAtua e te kau agatonu ʼaia?
3 ʼO ʼuhiga mo Sehova ʼAtua, neʼe ʼui fēnei e Ana, te faʼe ʼa te polofeta ko Samuele: “ ʼE ina taupau te ʼu vaʼe ʼo tana kau agatonu.” (1 Samuele 2:9) Ko ai te “kau agatonu” ʼaia? ʼE tali kiai te Hau ko Tavite. ʼI tana ʼosi vikiʼi te ʼu kalitate fakatalakitupua ʼo Sehova, ʼe ina ʼui fēnei: “Ko tau kau agatonu ʼe nātou tapuakiʼi anai koe.” (Pesalemo 145:10) ʼE lagi koutou feʼekeʼaki peʼe lava tapuakiʼi feafeaʼi e te hahaʼi ia te ʼAtua. ʼE nātou fai te faʼahi ʼaia ʼuluaki ʼi tanatou fakavikiviki kia te ia, peʼe ko tanatou palalau ʼo ʼuhiga mo ia.
4 Ko te kau agatonu ʼa Sehova, ʼe feala ke tou ʼui ʼe ko nātou ʼaē ʼe nātou fakaʼaogaʼi tonatou gutu moʼo vikiʼi ia ia. ʼI tanatou ʼu fakatahi fakakaumeʼa peʼe ʼi te ʼu fono, koteā ʼaē ʼe nātou palalau tāfito kiai? ʼE nātou palalau tāfito ki te Puleʼaga ʼo Sehova. ʼE maʼu e te kau kaugana agatonu ʼa te ʼAtua te manatu ʼa Tavite, ʼaē neʼe hiva fēnei: “ ʼE nātou tala anai te kolōlia ʼo tau ʼafio [Sehova], pea ʼe nātou palalau anai ʼo ʼuhiga mo tou mālohi.”—Pesalemo 145:11.
5. ʼE tou ʼiloʼi feafeaʼi ʼe fakalogo e Sehova mokā vikiʼi ia ia e tana kau agatonu?
5 ʼE fakalogo koa e Sehova ki tona vikiʼi ʼaia e tana kau agatonu? Ei, ʼe ina fakalogo te ʼu meʼa ʼaē ʼe nātou palalau kiai. ʼI te lea faka polofeta ʼo ʼuhiga mo te tauhi moʼoni ʼi totatou temi, neʼe tohi fēnei e Malakia: “ ʼI te temi ʼaia, ko nātou ʼaē ʼe manavasiʼi kia Sehova neʼe nātou fefaipalalauʼaki, ʼo tahi fai palalau mo tona kaumeʼa, pea neʼe tokagaʼi e Sehova pea mo fakalogo. Pea neʼe ʼi ai te tohi fakamanatu neʼe kamata tohi ʼi ʼona muʼa maʼa nātou ʼaē ʼe manavasiʼi kia Sehova pea mo nātou ʼaē ʼe nātou manatuʼi tona huafa.” (Malakia 3:16) ʼE fiafia lahi ia Sehova mokā vikiʼi ia ia e tana kau agatonu, pea ʼe ina manatuʼi ia nātou.
6. Koteā te gāue ʼe tokoni mai ai ke tou ʼiloʼi peʼe ko ai te kau agatonu ʼa te ʼAtua?
6 ʼE feala ke tou toe ʼiloʼi peʼe ko ai te kau kaugana agatonu ʼa Sehova, heʼe nātou lototoʼa ʼo fakaʼaogaʼi te ʼu faigamālie fuli moʼo palalau ki te hahaʼi ʼaē mole heʼeki tauhi ki te ʼAtua moʼoni. Koia ko te kau agatonu ʼa te ʼAtua ʼe nātou “fakahā ki te ʼu foha ʼo te ʼu tagata tana ʼu gāue mālohi pea mo te kolōlia ʼo te taulekaleka ʼo tana ʼafio.” (Pesalemo 145:12) ʼE koutou kumi koa pea mo fakaʼaogaʼi koa te ʼu faigamālie fuli moʼo palalau ki te hahaʼi ʼo ʼuhiga mo te ʼafio ʼa Sehova? Ko tana ʼafio ʼe heʼegata, ʼo mole hage ko te ʼu puleʼaga faka tagata ʼaē ka vave fakaʼauha. (1 Timoteo 1:17) ʼE maʼuhiga ke ʼiloʼi e te hahaʼi te ʼafio heʼegata ʼa Sehova pea mo nātou liliu ʼo lagolago kiai. Neʼe hiva fēnei e Tavite: “Ko tau ʼafio ʼe ko he ʼafio ki te ʼu temi fuli ʼaē ʼe mole ʼiloʼi honatou gataʼaga, pea ko tau pule ʼe hoko atu ʼi te ʼu taʼiake fuli.”—Pesalemo 145:13.
7, 8. Koteā ʼaē neʼe hoko ʼi te taʼu 1914, pea koteā ʼaē ʼe ina fakamoʼoni ai ʼe lolotoga pule nei te ʼAtua ʼaki te Puleʼaga ʼo tona ʼAlo?
7 Talu mai te taʼu 1914, ʼe ʼi ai te tahi tupuʼaga ke tou palalau ai ʼo ʼuhiga mo te ʼafio ʼa Sehova. ʼI te taʼu ʼaia, neʼe fakatuʼu e te ʼAtua te Puleʼaga Faka Mesianike ʼi selo pea ko tona Hau ko Sesu Kilisito, te ʼAlo ʼo Tavite. Neʼe fakahoko ai e Sehova tana fakapapau ʼaē ko te ʼafio ʼa Tavite ʼe tuʼu mālohi anai ʼo aʼu ki he ʼu temi ʼe mole ʼiloʼi honatou gataʼaga.—2 Samuele 7:12, 13; Luka 1:32, 33.
8 Ko te fakamoʼoni ʼaē ʼe lolotoga pule nei ia Sehova ʼaki te Puleʼaga ʼo tona ʼAlo, ia Sesu Kilisito, ʼe ko tatatou sio ki te fakahoko ʼo te fakaʼiloga ʼo te ʼi henī ʼa Sesu. Ko te faʼahi maʼuhiga ʼo te fakaʼiloga ʼaia ʼe ko te gāue ʼaē neʼe fakakikite e Sesu ka fakahoko anai e te kau agatonu fuli ʼa te ʼAtua, ʼi tana ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:3-14, MN ) ʼUhi ko te fakahoko e te kau agatonu ʼa te ʼAtua te lea faka polofeta ʼaia ʼaki he loto faʼafai, koia ko te toko ono miliona tupu hahaʼi tagata, mo fafine, pea mo fānau ʼe nātou kau mo nātou ki te gāue lahi pea mo makehe ʼaia. Kua ōvi mai te temi ʼaē ka pulihi ai ia nātou fuli ʼaē ʼe fakafeagai ki te Puleʼaga ʼo Sehova.—Apokalipesi 11:15, 18.
Te ʼu Fua Lelei ʼAē ʼe Tou Maʼu Mai Te Pule ʼa Sehova
9, 10. Koteā ʼaē ʼe kehekehe ai ia Sehova pea mo te ʼu pule fakatagata?
9 Kapau kua tou foaki totatou maʼuli kia Sehova, pea kua tou maʼu te ʼu fua lelei lahi mai tatatou ʼu felogoi mo te Tui ʼAliki ko Sehova. (Pesalemo 71:5; 116:12) Ohage la, ʼuhi ʼaē heʼe tou manavasiʼi ki te ʼAtua pea mo maʼuliʼi te faitotonu, ʼe ʼofa ai kia tatou pea ʼe tou ōvi kia te ia ʼi te faʼahi fakalaumālie. (Gaue 10:34, 35; Sakopo 4:8) Kae ko te kau takitaki ʼo te ʼu puleʼaga faka tagata, ʼe tou tau sio ki tanatou fakatahi mo te hahaʼi maʼuhiga, ohage ko te kau pule solia, mo te ʼu tagata maʼu paʼaga, mo te ʼu hahaʼi ʼaē ʼe ʼiloa ʼi te ʼu faigaoʼi pea mo te televisio. Ohage ko tona tohi ʼi te nusipepa Afelika Sowetan, neʼe ʼui fēnei e te tagata maʼuhiga ʼo te puleʼaga ʼo ʼuhiga mo te ʼu kolo masiva ʼo tona fenua: “ ʼE ʼau mahino pe koʼe ʼe mole loto e te tokolahi ia mātou ʼaenī ke mātou ʼolo ki te ʼu kolo ʼaia. Ko tona tupuʼaga pe ʼaē heʼe mole mātou fia tokagaʼi te ʼu kolo ʼaia. ʼE hoha ai tomatou leʼo ʼo loto pea ʼe mātou ufiufi ʼuhi ko tamatou feʼoloʼaki ʼi [te ʼu motokā] totogi kovi.”
10 ʼE mahino ia, ko ʼihi pule ʼe nātou tuʼania moʼoni ki te ʼaluʼaga ʼo te hahaʼi ʼo tonatou fenua. Kae māʼia pe la mo te pule ʼaē ʼe agalelei ʼaupito ia nātou, ʼe mole ina ʼiloʼi lelei tana hahaʼi. Koia, ʼe feala ke tou lagaʼi te fehuʼi ʼaenī: ʼE ʼi ai koa he pule ʼe tokaga ki tana hahaʼi fuli ʼo foimo tokoni kia nātou takitokotahi ʼi te ʼu temi ʼaē ʼe hoko ai he ʼu faigataʼa? Ei, he neʼe tohi fēnei e Tavite: “ ʼE poupouki e Sehova ia nātou ʼaē ʼe fetōkaʼi, ʼe ina fakatuʼu ake ia nātou ʼaē kua mapelu ki lalo.”—Pesalemo 145:14.
11. Ko te ʼu ʼahiʼahi fea ʼaē ʼe hoko ki te kau agatonu ʼa te ʼAtua, pea koteā te tokoni ʼe nātou maʼu?
11 ʼE lahi te ʼu faigataʼaʼia pea mo te ʼu tuʼutāmaki ʼe hoko ki te hahaʼi ʼaē ʼe agatonu kia Sehova ʼAtua, ʼuhi ko tonatou ʼuhiga agahala pea ʼuhi heʼe nātou maʼuʼuli ʼi he mālama ʼe puleʼi e Satana, “te Kovi.” (1 Soane 5:19; Pesalemo 34:19) ʼE fakatagaʼi te kau Kilisitiano, pea ko ʼihi ʼe nātou tau mo te ʼu mamahi ʼuhi ko te mahaki kovi peʼe ʼuhi ko te mate ʼo he tahi neʼe nātou ʼoʼofa ai. ʼI ʼihi temi, ko te ʼu hala ʼa te kau agatonu ʼa Sehova ʼe tupu ai tanatou ‘mapelu’ ʼi tanatou lotovaivai. Kae tatau aipe peʼe koteā te ʼu ʼahiʼahi ʼaē ʼe hoko kia nātou, kae ʼe foaki tuʼumaʼu e Sehova kia nātou takitokotahi he fakaloto fīmālie pea mo he mālohi fakalaumālie. Ko te Hau ko Sesu Kilisito ʼe toe ʼofa feiā, ʼo tokaga ki tana kau agatonu ʼaē ʼe fakalogo kia te ia.—Pesalemo 72:12-14.
Ko He Meʼa Kai Fakafiafia ʼi Tona Temi Totonu
12, 13. ʼE fafaga feafeaʼi e Sehova “te meʼa maʼuli fuli pe”?
12 ʼAki he lotoʼofa lahi, ʼe foaki e Sehova ki tana ʼu kaugana te ʼu meʼa fuli ʼaē ʼe ʼaoga kia nātou, ʼaē ʼe kau kiai te meʼa kai ʼe nātou maʼu ai he mālohi. Neʼe tohi fēnei e te Hau ko Tavite: “ ʼAki he loto falala, ko te ʼu mata ʼo te hahaʼi fuli ʼe nātou sio kia te koe [Sehova], pea ʼe ke foaki kia nātou te meʼa kai ʼi tona temi totonu. ʼE ke avahi tou nima pea ʼe ke fafaga te loto ʼo te meʼa maʼuli fuli pe.” (Pesalemo 145:15, 16) Māʼia ʼi te ʼu temi ʼaē ʼe hoko ai he tuʼutāmaki, ʼe feala kia Sehova ke ina fakahoko he ʼu meʼa ke feala ki tana kau agatonu ke nātou maʼu tanatou “meakai ki te aho.”—Luka 11:3; 12:29, 30.
13 Neʼe fakahā e Tavite ʼe fafaga anai “te meʼa maʼuli fuli pe,” ʼo kau kiai te ʼu manu. Kanapaula neʼe mole he tuʼuga ʼakau ʼi kele pea mo he ʼu ʼakau ʼi te tai, pea ko te ʼu manu ʼaē ʼe maʼuʼuli ʼi te tai, mo te ʼu manu lele pea mo te ʼu manu ʼi te kele ʼe mole nātou maʼu anai hanatou meʼa kai pea mo he ʼaele ki tanatou mānava. (Pesalemo 104:14) Kae neʼe tokaga ia Sehova ke ʼi ai he meʼa kai maʼa te ʼu manu fuli.
14, 15. ʼE foaki feafeaʼi ʼi te temi nei te meʼa kai fakalaumālie?
14 ʼO mole hage ko te ʼu manu, ʼe maʼu e te tagata te holi ki te ʼu meʼa fakalaumālie. (Mateo 5:3) ʼI he ʼaluʼaga fakaofoofo, ʼe fafaga e Sehova tana kau agatonu ʼi te faʼahi fakalaumālie. ʼI muʼa ʼo tana mate, neʼe fakapapau ia Sesu ko “te tagata kaugana agatonu mo poto” ʼe ina foaki anai ki te ʼu tisipulo ʼa Sesu tanatou “meʼa kai [fakalaumālie] ʼi tona temi tonu.” (Mateo 24:45) Ko te toe ʼo te toko 144 000 kau fakanofo ʼe ko nātou te kalasi ʼo te tagata kaugana ʼo totatou temi. ʼAki ia nātou ʼaia, ʼe foaki e Sehova te meʼa kai fakalaumālie ʼe lahi ʼaupito.
15 Ohage la, ʼe tokolahi ʼi te hahaʼi ʼa Sehova kua nātou maʼu te fakaliliu foʼou pea mo totonu ʼo te Tohi-Tapu ʼi tanatou lea. ʼE ko he tapuakina lahi te Tohi-Tapu Les Saintes Écritures — Traduction du monde nouveau ! Tahi ʼaē meʼa, ko te ʼu lauʼi miliona tohi faka Tohi-Tapu ʼe tā ia lea e 300 tupu moʼo fai te ʼu ako Tohi-Tapu. Ko te meʼa kai fakalaumālie katoa ʼaia neʼe ko he tapuakina ki te kau atolasio ʼi te kele katoa. Ko ai ʼaē ʼe tonu ke vikiʼi? Ko Sehova ʼAtua. ʼUhi ko tona lotoʼofa lahi, neʼe ina faka fealagia ki te kalasi ʼo te kaugana ke ina foaki te “meʼa kai ʼi tona temi totonu.” ʼAki te meʼa kai ʼaia ʼaē ʼe ina foaki, ʼe ina fafaga ʼi te temi ʼaenī “te loto ʼo te meʼa maʼuli fuli pe” ʼaē ʼe maʼuʼuli ʼi te palatiso fakalaumālie. Pea ʼe fiafia lahi te kau kaugana ʼa Sehova, heʼe kua vave hoko mai te temi ʼaē ka liliu ai te kele ko he palatiso!—Luka 23:42, 43.
16, 17. (a) Koutou tuku mai he faʼifaʼitaki ʼo te faʼahiga meʼa kai fakalaumālie ʼaē neʼe foaki ʼi tona temi totonu. (b) ʼE fakahā feafeaʼi e te Pesalemo 145 te manatu ʼa te kau agatonu ʼa te ʼAtua ʼo ʼuhiga mo te fehuʼi maʼuhiga ʼaē neʼe lagaʼi e Satana?
16 Tou vakaʼi te faʼifaʼitaki maʼuhiga ʼo te meʼa kai fakalaumālie ʼaē ʼe tou maʼu ʼi tona temi totonu. ʼI te taʼu 1939, neʼe kamata te Lua Tau Faka Malamanei ʼi Eulopa. ʼI te taʼu pe ʼaia, ʼi te ʼaho 1 ʼo Novepeli neʼe tuʼu ʼi Te Tule Leʼo Fakapilitania, te alatike ko tona kupu tāfito “Neutrality” (ʼE Mole Nātou Kau Ki Te Tau). ʼAki te ʼu manatu ʼaē neʼe tohi lelei ai, neʼe mahino ki te kau Fakamoʼoni ʼa Sehova ʼi te malamanei katoa, te ʼaoga ʼaē ke mole nātou kau ki te fetauʼaki ʼa te ʼu puleʼaga. Neʼe tupu ai te ʼiʼita ʼa te ʼu puleʼaga ʼo te ʼu fenua ʼaē neʼe fetauʼaki lolotoga taʼu e ono. Logola neʼe kapu pea mo fakatagaʼi ia nātou, kae neʼe hoko atu pe te faka mafola ʼo te logo lelei ʼo te Puleʼaga e te kau agatonu ʼa te ʼAtua. Mai te taʼu 1939 ʼo aʼu ki te taʼu 1946, neʼe tapuakina ia nātou he neʼe hoko te tuputupu lahi ko te 157 ʼi te teau. Tahi ʼaē meʼa, ko te ʼu fakamatala fakaloto mālohi ʼo tanatou nonofo agatonu ʼi te ʼu temi tau, ʼe kei tokoni aipe ki te hahaʼi ke nātou ʼiloʼi ia te lotu moʼoni.—Isaia 2:2-4.
17 Ko te meʼa kai fakalaumālie ʼa Sehova ʼe mole gata ʼaki pe tana foaki mai ʼi tona temi totonu, kae ʼe tou toe fiafia lahi ai. ʼI te temi ʼaē neʼe tokakaga tāfito ai te ʼu puleʼaga ki te tau lolotoga te Lua Tau Faka Malamanei, neʼe foaki te ʼu tokoni ki te hahaʼi ʼa Sehova ke nātou tokakaga tāfito ki te meʼa ʼe maʼuhiga age ʼi tanatou faiga ke nātou hāofaki tonatou maʼuli. Neʼe tokoni ia Sehova kia nātou ke nātou mahino ko te faʼahi maʼuhiga, ʼaē ʼe toe pipiki kiai te malamanei katoa, ʼe ko te pule faʼifaʼitaliha ʼa Sehova. ʼE ko he meʼa fakafiafia te ʼiloʼi ʼaē ʼi tanatou nonofo agatonu, ko te kau Fakamoʼoni ʼa Sehova takitokotahi ʼe nātou kau ʼi he kiʼi koga veliveli pe, ki te lagavaka ʼo te pule faʼifaʼitaliha ʼa Sehova pea mo fakamoʼoni ai neʼe loi ia te Tevolo. (Tāʼaga Lea 27:11) ʼO mole hage ko Satana, ʼaē neʼe fasituʼu kia Sehova pea mo tana pule, ko te kau agatonu ʼa Sehova ʼe nātou hoko atu tanatou tala ia muʼa ʼo te hahaʼi: “Ko Sehova ʼe faitotonu ʼi tona ʼu ala fuli.”—Pesalemo 145:17.
18. Koteā te meʼa kai fakalaumālie foʼou neʼe tou maʼu ʼi tona temi totonu pea mo fakafiafia lahi?
18 Ko te tahi faʼifaʼitaki ʼo ʼuhiga mo te meʼa kai fakalaumālie ʼaē ʼe tou maʼu ʼi tona temi totonu pea mo tou fiafia ai, ʼe ko te tohi Approchez-vous de Jéhovah, ʼaē neʼe fakahā ʼi te ʼu lauʼi teau Fakatahi Faka Tisitilike ʼaē ko tona kupu tāfito “Te Kau Fai Faka Mafola Faʼafai ʼo Te Puleʼaga,” neʼe fai ʼi te malamanei katoa ʼi te taʼu 2002/2003. Ko te tohi ʼaia, ʼaē neʼe fai e “te tagata kaugana agatonu mo poto” pea mo tā e te kau Fakamoʼoni ʼa Sehova, ʼe ina fakahā lelei te ʼu kalitate fakatalakitupua ʼo Sehova ʼAtua, ʼo kau ai mo te ʼu kalitate ʼaē ʼe talanoa kiai ia Pesalemo 145. ʼE mahino ia, ʼe maʼuhiga anai te tohi ʼaia moʼo tokoni ki te kau agatonu ʼa Sehova ke nātou fakaōvi lelei kia te ia.
Ko He Temi Ke Tou Fakaōvi Lelei Ai Kia Sehova
19. Koteā te faʼahi maʼuhiga ʼaē kua vave hoko, pea koteā ʼaē ʼe tonu ke tou fai?
19 Kua vave hoko te faʼahi maʼuhiga moʼo fakatokatoka te fakafihiʼi ʼo te pule faʼitaliha ʼa Sehova. Ohage ko tona fakakikite ia Esekiele kapite 38, ʼe fakahoko katoa anai e Satana tona ʼuhiga “Koke ʼo te fenua ʼo Makoke.” ʼE ina ʼohofi anai te hahaʼi ʼa Sehova ʼi te malamanei katoa. ʼE faiga lahi anai ia Satana ke ina maumauʼi te agatonu ʼa te hahaʼi ʼa te ʼAtua. ʼE tonu anai ke toe mālohi age te pāui fakamalotoloto ʼa te kau atolasio ʼa Sehova kia te ia ke tokoni age kia nātou. ʼE vaʼiganoa anai koa tanatou manavasiʼi ki te ʼAtua pea mo tanatou ʼoʼofa kia te ia? Kailoa, heʼe ʼui fēnei ia Pesalemo 145: “ ʼE ōvi ia Sehova kia nātou fuli ʼaē ʼe fetapā kia te ia, ia nātou fuli ʼaē ʼe fetapā kia te ia ʼi te agatonu. ʼE ina fakahoko anai te meʼa ʼaē ʼe loto kiai ia nātou ʼaē ʼe manavasiʼi kia te ia, pea ʼe logo anai ki tanatou pāui ʼaē ke tokoni age kia nātou, pea ʼe ina hāofaki anai ia nātou. ʼE hāofaki e Sehova ia nātou fuli ʼaē ʼe ʼoʼofa kia te ia, kae ʼe ina fakaʼauha anai te kau agakovi fuli.”—Pesalemo 145:18-20.
20. ʼE hoko feafeaʼi anai te ʼu vaega ʼo te Pesalemo 145:18-20 ʼi te temi kua ōvi mai?
20 ʼE tou fiafia anai ʼi tatatou sio ki te ōvi mai ʼa Sehova pea mo tona mālohi moʼo hāofaki ʼo tatou ʼi tana fakaʼauha te kau agakovi! ʼE mahino papau ia, ʼi te temi maʼuhiga ʼaia ʼaē kua ōvi mai, ʼe logoʼi anai e Sehova tanatou “fetapā kia te ia ʼi te agatonu.” ʼE mahino ia ʼe mole fakalogo anai ki te kau malualoi. ʼE fakahā lelei e te Folafola ʼa te ʼAtua, ʼe mole he ʼuhiga anai ki te tagata agakovi ke faiga ke ina fetogi tona maʼuli ʼi te ʼaho ʼaia.—Tāʼaga Lea 1:28, 29; Mikea 3:4; Luka 13:24, 25.
21. ʼE fakahā feafeaʼi e te kau agatonu ʼa Sehova ʼe nātou leleiʼia te fakaʼaogaʼi ʼo te huafa ʼo te ʼAtua?
21 Ko te temi ʼaenī ʼaē ʼe maʼuhiga tāfito ai kia nātou ʼaē ʼe manavasiʼi kia Sehova ke nātou “fetapā kia te ia ʼi te agatonu.” ʼE leleiʼia e tana kau agatonu te fakaʼaogaʼi ʼo tona huafa ʼi tanatou ʼu faikole pea mo tanatou ʼu tali ʼi te ʼu fono. ʼE nātou fakaʼaogaʼi te huafa ʼo te ʼAtua ʼi tanatou ʼu fai palalau. Pea ʼaki he lototoʼa, ʼe nātou fakaʼaogaʼi te huafa ʼo Sehova ʼi tanatou fai faka mafola.—Loma 10:10, 13-15.
22. He koʼe ʼe maʼuhiga ke kita tauʼi te ʼu aga peʼe ko te ʼu holi ʼo te mālama ʼaenī?
22 Ke tou maʼu tuʼumaʼu he ʼu lelei mai tatatou ʼu felogoi ʼaē mo Sehova ʼAtua, ʼe toe maʼuhiga ke tou tauʼi te ʼu meʼa ʼaē ʼe feala ke tou tuʼutāmaki ai ʼi te faʼahi fakalaumālie, ohage ko te kumi ʼo te ʼu koloā, peʼe ko te ʼu fakafiafia heʼeʼaoga, peʼe ko te mole loto fakamolemole, peʼe ko te mole ʼofa ki te hahaʼi ʼaē ʼe faigataʼaʼia. (1 Soane 2:15-17; 3:15-17) Kapau ʼe mole tou fetogi, pea ko te ʼu aga ʼaia ʼe feala ke iku ki he agahala mamafa ʼo mole kei tou felogoi lelei ai mo Sehova. (1 Soane 2:1, 2; 3:6) ʼE ko he agapoto hatatou manatuʼi ko Sehova ʼe ina hoko atu anai tona lotoʼofa, peʼe ko tona ʼofa agatonu, kia tatou mo kapau ʼe tou nonofo agatonu kia te ia.—2 Samuele 22:26.
23. Koteā te ka haʼu taulekaleka ʼaē ʼe atalitali kiai te kau agatonu fuli ʼa te ʼAtua?
23 Koia, tou haga tokaga tāfito ki te ka haʼu taulekaleka ʼaē ʼe atalitali kiai te kau agatonu fuli ʼa Sehova. Kapau ʼe tou fai feiā, pea ʼe tou maʼu anai te ʼamanaki taulekaleka ʼaē ke tou kau ia nātou ʼaē ka nātou fiafia anai ʼo tapuakiʼi pea mo vikiʼi ia Sehova “ ʼi te ʼaho katoa” pea mo “talu ai.” (Pesalemo 145:1, 2) Koia tou ‘nofo ʼi te ʼofa ʼo te ʼAtua ʼo tou talitali ki te maʼuli heʼegata.’ (Suta 20, 21) ʼAki te ʼu kalitate taulekaleka ʼo tatatou Tāmai ʼaē ʼi selo, ʼaē ʼe kau kiai tona lotoʼofa lahi ʼaē ʼe ina fakahā kia nātou ʼaē ʼe ʼoʼofa kia te ia, ʼofa pe ke tou manatu tuʼumaʼu ohage ko Tavite ʼaē neʼe ina fai te ʼu palalau fakaʼosi ʼaenī ʼo te Pesalemo 145: “ ʼE fakavikiviki anai toku gutu kia Sehova; pea ke tapuakiʼi e te hahaʼi fuape tona huafa maʼoniʼoni ʼo aʼu ki he ʼu temi ʼe mole ʼiloʼi honatou gataʼaga, io ʼo talu ai.”
ʼE Koutou Tali Feafeaʼi Anai?
• ʼE tokoni feafeaʼi mai ia Pesalemo 145 ke tou ʼiloʼi peʼe ko ai te kau agatonu ʼa te ʼAtua?
• ʼE fafaga feafeaʼi e Sehova “te meʼa maʼuli fuli pe”?
• He koʼe ʼe tonu ke tou toe fakaōvi lahi age kia Sehova?
[Paki ʼo te pasina 16]
Ko te kau agatonu ʼa te ʼAtua ʼe nātou leleiʼia te palalau ki tana ʼu gāue mālohi
[Paki ʼo te pasina 17]
ʼAki he lototoʼa, ʼe tokoni te kau kaugana ʼa Sehova ki te kau matāpule ke nātou ʼiloʼi te kolōlia ʼo tana pule
[Paki ʼo te pasina 18]
ʼE foaki e Sehova te meʼa kai maʼa “te meʼa maʼuli fuli pe”
[Haʼuʼaga ʼo te paki]
Animals: Parque de la Naturaleza de Cabárceno
[Paki ʼo te pasina 19]
ʼE foaki e Sehova te mālohi pea mo te takitaki ki tana kau agatonu, ʼaē ʼe nātou kumi ia ia ʼi te faikole