ʼE Mole Manukiʼi e Sehova He Loto Lavea

“Ko te ʼu sakilifisio ʼaē ki te ʼAtua, ʼe ko he ʼatamai lavea; ko he loto lavea mo taʼomia, ê ʼAtua, ʼe mole ke fehiʼa anai ki ai.” — Pesalemo 51:17.

1. Koteā te manatu ʼa Sehova ki tana kau atolasio ʼaē ʼe agahala mamafa pea ʼe nātou fakahemala?

ʼE FEALA ke haga ia Sehova ‘ ʼaki he ʼao ʼo māpunuʼi te ʼu huʼaga fuli kia te ia, ke mole fakalaka te faikole’. (Tagilāulau 3:44.) Kae ko tona loto ke fetapā age tana hahaʼi kia te ia. Tatau aipe pe ko he tahi ʼi tana kau atolasio ʼe hēhē moʼoni anai kae ʼe fakahemala ki tana aga ʼaia, ko tatatou Tāmai ʼe ʼi selo ʼe ina manatuʼi te ʼu meʼa lelei neʼe fai e te tagata pe ko te fafine ʼaia. Koia, neʼe feala ke ʼui ai e te ʼapositolo ko Paulo ki tana ʼu kaugā fagona kilisitiano, ʼo fēnei: “ ʼE mole heʼe agatonu te ʼAtua ʼo galoʼi takotou gāue mo te ʼofa ʼaē neʼe koutou fakahā ʼo ʼuhiga mo tona huafa.” — Hepeleo 6:10.

2, 3. Koteā te meʼa ʼe tonu anai ke tokagaʼi e te kau tagata ʼāfea mokā ʼe nātou vakaʼi te ʼu hāla ʼo ʼonatou kaugā fagona kilisitiano?

² ʼE tonu anai ke toe tokagaʼi e te kau tagata ʼāfea te ʼu taʼu neʼe gāue agatonu ai ʼonatou kaugā fagona ʼi te tui ki te ʼAtua. ʼE pipiki ki te meʼa ʼaia te gāue taputapu ʼa nātou ʼaē neʼe fakahemala ʼaē neʼe nātou fai te meʼa ʼe kovi peʼe lagi ko he agahala mamafa. Ko te kau tagata tauhi ōvi kilisitiano ʼe nātou kumi te fīmālie fakalaumālie ʼo nātou fuli ʼaē ʼi te faga ōvi ʼa te ʼAtua. — Kalate 6:1, 2.

³ Ko he tagata agakovi ʼe fakahemala ʼe ʼaoga kia ia te manavaʼofa ʼo Sehova. Kae, ʼe ko he tahi age meʼa ʼe maʼuhiga. Ko te meʼa ʼaia ʼe fakamahino lelei mai e te ʼu palalau ʼa Tavite ia Pesalemo 51:10-19.

ʼE tonu ke maʼu he loto maʼa

4. He koʼe koa neʼe kole e Tavite he loto maʼa pea mo he laumālie foʼou?

⁴ Kapau ko he kilisitiano kua foaki tona maʼuli ʼe nofo ʼi te ʼaluʼaga fakalaumālie kovi ʼuhi ko tana agahala, koteā te tahi meʼa ʼi te manavaʼofa pea mo te fakamolemole ʼa Sehova ʼe feala ke ʼaoga kia te ia? Neʼe fēnei te kole ʼa Tavite: “Fakatupu ia te ʼau he loto maʼa, ê ʼAtua, pea ke ke tuku ki toku loto he laumālie foʼou, he laumālie mālohi.” (Pesalemo 51:10). Pea tahi ʼaē, neʼe fai e Tavite te kole ʼaia koteʼuhi neʼe ina ʼiloʼi ko te manatu ʼaē ki te agahala ʼe nofo tuʼumaʼu pe ʼi tona loto. ʼE feala ke mole tou fai te ʼu faʼahiga agahala ʼaē neʼe fakahalaʼi ia Tavite ʼo ʼuhiga mo Pati-Sepa pea mo Ulia, kae ʼe ʼaoga kia tatou te tokoni ʼa Sehova ke tou tekeʼi hatatou to gafua ki te fakahala ʼo he aga ʼe ina taki ki he agahala mamafa. Koia ʼaē, ʼe feala ke ʼaoga kia tatou takitokotahi te tokoni fakaʼatua moʼo fakamamaʼo ʼi totatou loto te ʼu faʼahiga aga ohage ko te mānumānu pea mo te loto fehiʼa, te kaihaʼa pea mo te fakapō. — Kolose 3:5, 6; 1 Soane 3:15.

5. a) Koteā te ʼuhiga ʼo te maʼu ʼo he loto maʼa? b) Koteā te meʼa ʼaē neʼe loto Tavite ki ai ʼi tana kole ʼaē ʼo he laumālie foʼou?

⁵ Ko Sehova ʼe ina fakamaʼua ke maʼu e tana ʼu kaugana “he loto maʼa”, ʼaē ko tona faka ʼuhiga ko he manatu pea mo he gāue ʼe maʼa. ʼI tana ʼiloʼi ʼaē neʼe mole ina fakahā he ʼaluʼaga maʼa feiā, neʼe kole e Tavite ki te ʼAtua ke ina fakamaʼa tona loto pea ke mulimuli tona loto ki te ʼu lekula ʼa te ʼAtua. Neʼe loto foki te tagata fai pesalemo ki hona laumālie foʼou pea mo totonu, peʼe ko he manatu ʼe ina uga tona ʼatamai. Neʼe ina loto ki he laumālie ʼe tokoni anai kia ia ke ina tekeʼi te fakahala pea mo taupau mālohi te ʼu lao ʼa Sehova pea mo tana ʼu fakatuʼutuʼu.

Ko te gāue tāfito ʼa te laumālie maʼoniʼoni

6. He koʼe koa neʼe kolekole e Tavite kia Sehova ke mole ina toʼo ia te ia tona laumālie maʼoniʼoni?

⁶ ʼI hatatou lotomamahi lahi ʼi ʼatatou ʼu agahala peʼe ko hatatou agakovi, ʼe feala ke tou logoʼi kua hage kua liaki tatou e te ʼAtua pea mo ina toʼo ia tatou tona laumālie maʼoniʼoni, peʼe ko tona mālohi gāue. Neʼe logoʼi e Tavite te ʼaluʼaga ʼaia, koʼena te tupuʼaga ʼo tana faikole ʼaenī kia Sehova: “ ʼAua naʼa ke līaki ʼau ʼi ʼou muʼa; pea ko tou laumālie maʼoniʼoni! ʼaua naʼa ke toʼo ia te ʼau.” (Pesalemo 51:11). Ko te fakahemala pea mo te agavaivai ʼa Tavite neʼe ina fai ke ina logoʼi ʼe mole kei tau mo ia tana tauhi kia Sehova ʼuhi ko tana ʼu agahala. Ko te fakaliliu ʼo te līaki ia muʼa ʼo te ʼAtua ko te puli ʼo tona ʼofa, tona fīmālie, pea mo tana tapuaki. Kapau neʼe tonu ke maʼu e Tavite te fīmālie fakalaumālie, neʼe ʼaoga kia te ia te laumālie maʼoniʼoni ʼo Sehova. ʼI tana maʼu te laumālie maʼoniʼoni, neʼe feala ke kumi e te hau ʼi te faikole te taki fakaʼatua koteʼuhi ke leleiʼia ia ia e Sehova, ke feala hana tekeʼi te agahala, pea ke fai tana pule ʼaki te poto. ʼI tana mahino ʼaē neʼe agahala kia ia ʼaē ʼe ina foaki te laumālie maʼoniʼoni, neʼe tau te kole ʼa Tavite kia Sehova ke mole ina toʼo ia te ia tona laumālie maʼoniʼoni.

7. He koʼe koa ʼe tonu anai ke tou kole te laumālie maʼoniʼoni pea ke ʼaua naʼa tou fai he meʼa ke lotomamahi ai?

⁷ Koteā te ʼui kia tatou? ʼE tonu anai ke tou kole te laumālie maʼoniʼoni pea ʼe tonu ke tou nofo tokaga naʼa tou fakaloto mamahiʼi te laumālie maʼoniʼoni ʼi hatatou mole mulimuli ki tana taki ia tatou (Luka 11:13; Efesi 4:30). Pea tahi ʼaē, ʼe feala ke puli ia tatou te laumālie ʼo mole feala ai anai ke tou maʼu te ʼu fua ʼo te laumālie ʼaē mai te ʼAtua, ohage la ko te ʼofa, ko te fiafia, te tokalelei, te manavaʼofa, te finegaloʼofa, te agalelei, te tui, te agamālū, te lotoʼutaki. ʼE toʼo anai e Sehova ʼAtua tona laumālie maʼoniʼoni ia tatou mo kapau ʼe mole tou fakahemala ʼi tatatou agahala ʼaē kia te ia.

Fakafiafia ʼi te hāofaki

8. Kapau ʼe tou fai he agahala kae ʼe tou fia maʼu te fiafia ʼo te hāofaki, koteā te meʼa ʼaē ʼe ʼaoga ke tou fai?

⁸ Ko te tagata fakahemala ʼe ina maʼu tona fīmālie fakalaumālie ʼe feala ke fakafiafia ʼi te fakatuʼutuʼu neʼe fai e Sehova ʼo ʼuhiga mo te maʼuli. ʼI tana holi mālohi ke ina maʼu te fiafia ʼaia, neʼe kolekole e Tavite ki te ʼAtua, ʼo fēnei: “Tuku mai kia te ʼau te fiafia ʼo tau hāofaki, pea ke ke lagolago ʼau ʼaki he laumālie ʼe lotolelei.” (Pesalemo 51:12). ʼE ko he meʼa taulekaleka he fakafiafia ʼi te falalaʼaga moʼoni ko Sehova ʼAtua! (Pesalemo 3:8.) ʼI te ʼosi ʼo tana agahala ki te ʼAtua, neʼe kumi e Tavite ke ina maʼu te fakafiafia ʼo te hāofaki mai ia te ia. Ki muli age, neʼe foaki e Sehova te hāofaki ʼaki te sakilifisio faitotogi ʼo tona ʼAlo, ko Sesu Kilisito. Kapau ko tatou ʼaenī ko te ʼu kaugana ʼa te ʼAtua ʼe tou fai he agahala mamafa kae ʼe tou fia maʼu te fakafiafia ʼo te hāofaki ke tou fīmālie ai, ʼe tonu ke tou maʼu he aga fakahemala koteʼuhi ke mole tou agahala ki te laumālie maʼoniʼoni. — Mateo 12:31, 32; Hepeleo 6:4-6.

9. Neʼe koteā te meʼa ʼaē neʼe loto ki ai Tavite ʼi tana kole ʼaē ki te ʼAtua ke ina lagolago ia ia “ ʼaki he laumālie ʼe lotolelei”?

⁹ Neʼe kole e Tavite kia Sehova ke ina haga ʼo lagolago ia ia “ ʼaki he laumālie ʼaē ʼe lotolelei ki ai”. ʼE ʼiloga ia, neʼe mole ko te lotolelei ʼo te ʼAtua ke ina fai he meʼa ʼe lelei peʼe ko tona laumālie, kae ko te ʼatamai ʼa Tavite. Neʼe loto e Tavite ke haga te ʼAtua ʼo lagolago ia ia ʼo tuku age kia te ia he laumālie lotolelei ke ina fai te meʼa ʼe tonu pea ke ʼaua naʼa toe to ki te agahala. Neʼe haga aipe Sehova ʼAtua ʼo tokoniʼi tana ʼu kaugana pea mo fakatuʼu ia nātou ʼaē neʼe vaivai ʼi he ʼu faʼahiga faigataʼa (Pesalemo 145:14). ʼE ko he meʼa fakafimālie he ʼiloʼi ʼo te faʼahi ʼaia, tāfito la mo kapau neʼe tou hēhē kae ʼe tou fakahemala pea ʼe tou fia tauhi agatonu kia Sehova ʼo heʼegata!

Koteā te meʼa ke akoʼi ki te kau talagataʼa?

10, 11. a) Koteā te meʼa neʼe feala ke akoʼi e Tavite ki te kau Iselaele talagataʼa? b) Koteā te meʼa neʼe feala ke akoʼi e Tavite ki te kau agahala ʼi tana kua ʼosi fai pe ʼe ia te meʼa ʼaia?

¹⁰ Kapau neʼe tuku e te ʼAtua te faʼahi ʼaia, neʼe loto moʼoni Tavite ke ina fai he meʼa ke ina fakahā anai tana leleiʼia te manavaʼofa ʼo Sehova pea ke ina tokoniʼi anai ʼihi. ʼAki tana faikole fakamalotoloto kia Sehova, neʼe fēnei te ʼui ʼa te hau fakahemala: “ ʼE ʼau akoʼi anai tau ʼu ala ki te kau talagataʼa, koteʼuhi ke maliu fakavilivili mai te kau agahala kia te koe.” (Pesalemo 51:13). Neʼe feafeaʼi te fealagia ki te agahala ʼa Tavite hana akoʼi te kau talagataʼa ki te Lao ʼa te ʼAtua? ʼE feala koa hatatou ʼiloʼi te meʼa neʼe ina ʼui age kia nātou? Pea koteā tona fua lelei?

¹¹ ʼI te temi ʼaē neʼe talagataʼa ai te kau Iselaele ki te ʼu ala ʼo Sehova, ʼi tana fakaʼamu ʼaē ke nātou maliu mai tanatou ala agakovi, neʼe feala ke fakatokagaʼi age e Tavite kia nātou te kovi ʼaē ʼo te agahala, pea koteā te ʼuhiga ʼo te fakahemala, pea ʼe feafeaʼi hanatou maʼu te fakamolemole ʼa te ʼAtua. ʼI tana kua mahino ki te mamahi ʼo te tautea ʼa Sehova feiā aipe mo te leʼo ʼo loto tokakovi, ʼe mahalope ko Tavite ʼe ko he tagata faiako manavaʼofa ki te kau fakahemala, pea mo te kau agahala loto lāvevea. ʼIo, neʼe feala ke ina fakaʼaoga te meʼa neʼe hoko kia te ia moʼo akoʼi ʼihi ʼi tana ʼosi tali te ʼu pelesepeto ʼa Sehova pea mo ina maʼu Tana fakamolemole, pea ko nātou ʼaē ʼe mole nātou fia fakalogo ki te ʼu fakatuʼutuʼu ʼa te ʼAtua ʼe mole tonu ke nātou ‘lau te ʼu pelesepeto ʼa te ʼAtua’. — Pesalemo 50:16, 17.

12. Neʼe feafeaʼi te fua lelei ʼo te mālama ʼa Tavite ki te haga ʼa te ʼAtua ʼo hāofaki ia ia mai tana aga fakapō?

¹² ʼI tana toe talanoa ki tana ʼu aga neʼe ina fai, neʼe ʼui e Tavite ʼo fēnei: “Hāofaki ʼau mai te fakapō, ê ʼAtua, ʼAtua ʼo toku maʼuli, koteʼuhi ke haga toku ʼalelo ʼo fakamatala fakafiafia tau faitotonu.” (Pesalemo 51:14). Neʼe matehi ia ia ʼaē neʼe aga fakapō (Senesi 9:5, 6). Koia ʼi tana ʼiloʼi ʼaē ko te ʼAtua ʼo tona maʼuli neʼe ina hāofaki ia ia mai tana aga fakapō kia Ulia, ʼe maʼu anai e Tavite he loto pea mo he ʼatamai fīmālie. Ki muli age, ko tona ʼalelo neʼe feala ke hiva fakafiafia ʼo ʼuhiga mo te faitotonu ʼa te ʼAtua, kae neʼe mole ko tana faitotonu ʼo ia (Tagata Tānaki 7:20; Loma 3:10). Neʼe mole feala ke haga ia Tavite ʼo fakatokatoka tana aga heʼeʼaoga peʼe ke ina toe fakatuʼuake Ulia mai te mate, ohage pe ko te temi nei ʼe mole feala ki he tagata ke ina fakatokatoka te taupoʼou ʼo he tahi neʼe ina kakaʼi peʼe mo fakatuʼuake he tahi mai te mate neʼe ina matehi. Koteā te meʼa ʼe mole tonu ke tou manatu ki ai mokā ʼe fakahalaʼi tatou? ʼE tonu pe ke tou leleiʼia te manavaʼofa ʼo Sehova ʼaē neʼe ina fakahā kia tatou ʼaki te faitotonu! Koia, ko te loto fakafetaʼi ʼe tonu ke ina uga anai tatou ke tou taki niʼihi ki te Matapuna ʼo te faitotonu pea mo te fakamolemole.

13. Ko te ʼaluʼaga fea ʼaē ʼe feala ai ki he tagata agahala ke ina avahi fakalelei tona ʼu laugutu ʼo fakavikiviki kia Sehova?

¹³ ʼE mole he tagata agahala ʼe feala ke ina avahi fakalelei tona ʼu laugutu moʼo fakavikiviki kia Sehova mo kapau neʼe mole tuku mai e te ʼAtua te fakamolemole kia te ia, ke palalau ki tana ʼu moʼoni. Koia ʼaē, neʼe hiva fēnei ai Tavite: “E Sehova, ke ke avahi ʼoku laugutu, ke fakahā ʼe toku gutu tou kolōlia!” (Pesalemo 51:15). ʼI tana maʼu te fakafimālie ʼo tona leʼo ʼo loto ʼuhi ko te fakamolemole ʼa te ʼAtua, ʼe faiga anai Tavite ke ina akoʼi te ʼu ala ʼo Sehova ki te kau talagataʼa, pea neʼe feala tana fakavikiviki ʼāteaina ia te ʼAtua. Ko nātou fuli ʼaē neʼe nātou maʼu te fakamolemole ʼo ʼanatou ʼu agahala ohage ko Tavite, ʼe tonu anai ke nātou leleiʼia te agalelei makehe ʼa Sehova kia nātou, pea ʼe tonu ke nātou faigaʼi te ʼu fealagia fuli ʼe nātou maʼu moʼo tala te moʼoni ʼo te ʼAtua pea ‘fagonogono tona kolōlia’. — Pesalemo 43:3.

Ko te ʼu sakilifisio ʼe leleiʼia e te ʼAtua

14. a) Ko te ʼu sakilifisio feafeaʼi ʼaē neʼe fakamaʼua ʼi te fuakava ʼo te Lao? b) He koʼe ʼe mole lelei anai te manatu ʼaē ʼe feala hatatou totogi he aga ʼe tou lolotoga fai ʼe kovi ʼaki he faʼahiga meʼa ʼe lelei?

¹⁴ Neʼe maʼu e Tavite te fakasiosio loloto ʼo feala ai ke ina fai te palalau ʼaenī kia Sehova: “ ʼUhi ko koe [Sehova] ʼe mole ke fiafia ʼi te sakilifisio — heʼe ʼau foaki atu anai; ko te holokoseta ʼe mole ke leleiʼia.” (Pesalemo 51:16). Neʼe fakamaʼua e te fuakava ʼo te Lao ke mōlaga te ʼu sakilifisio manu ki te ʼAtua. Kae ko te fai feʼauʼaki pea mo te fakapō ʼa Tavite, neʼe fakatūʼa ki te mate, ʼaē neʼe mole feala ke fakamolemole e te ʼu taʼi sakilifisio ʼaia. Ka na ʼaua la, neʼe mole ina lau ia tana puli ki te ʼu sakilifisio manu kia Sehova. Ka na ʼaua la tana fakahemala fakamalotoloto, ʼe mole he ʼuhiga ʼo te ʼu sakilifisio. Koia, ʼe mole lelei anai te manatu ʼaē ʼe feala hatatou totogi he aga ʼe tou lolotoga fai ʼe kovi ʼaki he faʼahiga meʼa ʼe lelei.

15. Koteā te aga ʼa he kaugana ʼa Sehova ʼe ʼatamai lavea?

¹⁵ Neʼe toe ʼui e Tavite: “Ko te ʼu sakilifisio ʼaē ki te ʼAtua, ʼe ko he ʼatamai lavea; ko he loto lavea mo taʼomia, ê ʼAtua, ʼe mole ke fehiʼa anai ki ai.” (Pesalemo 51:17). ʼO ʼuhiga mo he tahi ʼe fakahemala, “ko te ʼu sakilifisio ki te ʼAtua, ʼe ko he ʼatamai lavea” ʼe ina tali. Ko te faʼahiga tagata ʼaia ʼe mole ina maʼu he agamālohi. Ko te loto ʼo he tahi kua foaki tona maʼuli ki te ʼAtua ʼe ina maʼu te ʼatamai lavea ʼi hana lotomamahi ʼaupito ki tana agahala, kua lainoa ʼi te kua puli ia te ia te ʼofa ʼo Sehova, pea ʼe ina faiga anai ke ina fai he meʼa ke ina toe maʼu te ʼofa ʼo te ʼAtua. ʼE mole maʼuhiga he mōlaga ki te ʼAtua mo kapau ʼe mole tou fakahemala ki tatatou agahala pea ke tou pipiki ʼāteaina kia te ia. — Naomi 1:2.

16. Koteā te manatu ʼa te ʼAtua ʼo ʼuhiga mo he tahi ʼe lotomamahi ʼaupito ki hana agahala?

¹⁶ ʼE mole fakafisi te ʼAtua ki te taʼi sakilifisio ʼaia ohage ko he loto lavea pea mo taʼomia. Koia, logope la te ʼu faʼahiga fihifihia ʼe tau mo tatou ʼaē ko tana hahaʼi, ʼaua naʼa tou to ki te loto heʼeʼamanaki. Kapau neʼe tou tūkia ʼi te ʼu ala ʼo te maʼuli ʼo tou logoʼi ʼe fetapā totatou loto ki te fakamolemole ʼa te ʼAtua, ʼaua naʼa tou manatu ko tatatou nofo ʼe mole kei maʼu he falalaʼaga. Māʼia pe la neʼe tou fai he agahala mamafa kae neʼe tou fakahemala, ko Sehova ʼe mole ina liaki ʼo tatou loto lavea. ʼE ina fakamolemole anai tatou ʼaki te sakilifisio faitotogi ʼo Kilisito pea ʼe ina tuku mai anai kia tatou tona ʼofa (Isaia 57:15; Hepeleo 4:16; 1 Soane 2:1). Kae ohage ko Tavite, ʼe tonu anai ke tou kole ke tou maʼu te ʼofa ʼo te ʼAtua kae ʼe mole ko he ʼu kole ʼe tou hāo mai he fakatonutonu pea mo he tūʼa ʼe ʼaoga kia tatou. Neʼe fakamolemole e te ʼAtua ia Tavite, kae neʼe ina toe haga pe foki ʼo tauteaʼi ia ia. — 2 Samuele 12:11-14.

Ke tou tuʼaniaʼi te tauhi maʼa

17. ʼO mole gata ʼaki pe te kole ʼaē ʼo te fakamolemole ʼa te ʼAtua, koteā anai te meʼa ʼe tonu ke fai e te kau agahala?

¹⁷ Kapau neʼe tou fai he ʼu faʼahiga agahala mamafa, ʼe mahalo ia ʼe mamafa anai te faʼahi ʼaia ʼi totatou ʼatamai, pea ʼe ko he lotomamahi ʼe ina uga anai tatou ke tou kole te fakamolemole ʼa te ʼAtua. Kae, ke tou toe faikole maʼa ʼihi. ʼI tana fakaʼamu ʼaē ke ina toe foaki ki te ʼAtua te tauhi ʼaē ʼe ina leleiʼia, ko Tavite ʼi te tohi ʼo Pesalemo neʼe mole ina meʼa noaʼi ia nātou ʼaē. ʼI te pesalemo ʼaia ʼe talanoa ai ki te kole ʼaenī kia Sehova: “ ʼI tou lotoʼofa, fai he meʼa ʼe lelei kia Sione; ke ke laga te ʼu kaupā ʼo Selusalemi!” — Pesalemo 51:18.

18. He koʼe ʼi te fakahemala ʼa Tavite neʼe faikole ʼo ʼuhiga mo Sione?

¹⁸ ʼIo, ko Tavite neʼe fakatalitali ki hana toe maʼu te ʼofa ʼo te ʼAtua. Kae, neʼe ko he faikole agavaivai ʼa Tavite ʼi tana ʼui ʼaē ‘ ʼi tou lotoʼofa, fai he meʼa ʼe lelei kia Sione’, ko te kolo ʼaliki ʼo Iselaele, ko Selusalemi, ʼaē neʼe fakaʼamu Tavite ke ina laga ia te fale lotu ʼo te ʼAtua. Ko te ʼu agahala mamafa ʼa Tavite neʼe fakatupu tuʼutāmaki ki te fenua katoa, koteʼuhi ko te hahaʼi fuli neʼe nātou faigataʼaʼia ʼuhi ko te agakovi ʼa te hau (Vakaʼi ia 2 Samuele, kapite 24). Ko tona fua, ko tana ʼu agahala neʼe fakatupu kovi “ki te ʼu kaupā ʼo Selusalemi”, ʼaē kua tonu leva ʼi te temi ʼaē ke toe laga.

19. Kapau neʼe tou agahala kae neʼe tou maʼu te fakamolemole, koteā te tahi age meʼa ʼe lelei anai ke tou faikole ki ai?

¹⁹ Kapau neʼe tou agahala mamafa kae neʼe tou maʼu te fakamolemole ʼa te ʼAtua, ʼe lelei anai hatatou kole kia ia ke ina fakatokatoka he faʼahiga tuʼutāmaki neʼe feala ke tou fai. Lagi neʼe tou palalau kovi ki tona huafa taputapu, peʼe lagi neʼe tou fakatupu kovi ki te kokelekasio, pea mo fakatupu he lotomamahi ki totatou famili. Ko tatatou Tāmai ʼofa ʼe ʼi selo ʼe feala ke ina toʼo he ʼu fakaʼuli fuli ʼi tona huafa, ʼe feala ke ina toe laga te kokelekasio ʼaki tona laumālie maʼoniʼoni, pea ʼe feala ke ina fakafimālieʼi te ʼu loto ʼo ʼotatou ʼu kāiga ʼaē ʼe ʼoʼofa pea mo tauhi kia te ia. ʼIo, pe neʼe hoko he agahala peʼe kailoa, ko te tāpuhā ʼo te huafa ʼo Sehova pea mo te fīmālie ʼo tana hahaʼi ʼe tonu anai ke tou manatuʼi tuʼumaʼu ko totatou maʼua. — Mateo 6:9.

20. Ko te ʼu ʼaluʼaga fea ʼaē ʼe leleiʼia ai anai e Sehova te ʼu failaulau pea mo te ʼu mōlaga ʼa Iselaele?

²⁰ Kapau ʼe toe laga e Sehova te ʼu kaupā ʼo Sione, koteā te tahi meʼa ʼe hoko anai? ʼE fēnei te hiva ʼa Tavite: “Koia ʼe ke [Sehova] leleiʼia anai he ʼu sakilifisio ʼo te faitotonu, ko te holokoseta pea mo te mōlaga katoa; koia ʼe mātou mōlaga anai te ʼu vitulo ʼi tou ʼaletale.” (Pesalemo 51:19). Neʼe loto moʼoni e Tavite ko ia pea mo te hahaʼi ke nātou fakafiafia ʼi te ʼofa ʼo Sehova koteʼuhi ke feala tanatou tauhi fakalelei kia te Ia. Pea ʼe leleiʼia anai e te ʼAtua tanatou ʼu holokoseta pea mo ʼanatou mōlaga katoa. ʼE hoko moʼoni te faʼahi ʼaia, koteʼuhi ko te ʼu kaugana fakamalotoloto pea mo fakahemala ʼa te ʼAtua ʼaē ka nātou maʼu anai te ʼofa fakaʼatua, ʼe nātou mōlagaʼi anai te ʼu sakilifisio faitotonu. ʼI tanatou fakafetaʼi ki te manavaʼofa ʼa Sehova, ʼe nātou mōlaga anai ʼi tona ʼaletale te ʼu vitulo: ko te ʼu sakilifisio lelei ʼaupito pea mo totogi kovi. ʼI te temi nei, ʼe tou fakaʼapaʼapa kia Sehova ʼi tatatou foaki kia ia te meʼa lelei ʼaē ʼe tou maʼu. Pea ʼi ʼatatou ʼu mōlaga, ʼe kau ai te “ ʼu ʼuhiʼi vitulo ʼo ʼotatou ʼu laugutu”, ko te ʼu sakilifisio fakavikiviki ki totatou ʼAtua loto manavaʼofa ko Sehova. — Osea 14:2; Hepeleo 13:15.

ʼE logoʼi e Sehova ʼatatou ʼu tagi

21, 22. Koteā te ʼu ako ʼe lelei kia tatou ʼi te Pesalemo 51?

²¹ Ko te faikole fakamalotoloto ʼa Tavite ʼi te tohi ʼo Pesalemo 51 ʼe fakahā mai kia tatou ʼe tonu anai ke tou tokaga ki tatatou agahala ʼaki he ʼatamai fakahemala moʼoni. ʼE tou toe maʼu ʼi te pesalemo ʼaia te ʼu ako ke tou fīmālie ai. Ohage la, kapau ʼe tou agahala kae ʼe tou fakahemala, ʼe feala ke tou falala ki te fakamolemole ʼa te ʼAtua. Kae, ke tou tuʼaniaʼi muʼa te meʼa fakaʼuli fuli neʼe feala ke tou fai ki te huafa ʼo Sehova (ʼu vaega 1 ki te 4). Ohage ko Tavite, ʼe feala ke tou fetapā ki tatatou Tāmai ʼe ʼi selo ke ina fakamolemole ki totatou ʼuhiga agahala (vaega 5). ʼE tonu anai ke tou tala te moʼoni, pea ʼe ʼaoga ke tou kumi te poto ʼaē mai te ʼAtua (vaega 6). Kapau neʼe tou agahala, ʼe tonu anai ke tou kole kia Sehova ke ina fakamaʼa tatou, ke tou maʼu he loto maʼa, pea mo he laumālie mālohi. — ʼU vaega 7 ki te 10.

²² ʼE feala ke tou maʼu ʼi te ʼu talanoa ʼaē ʼi te Pesalemo 51, ʼe mole tonu anai ke tou fakagafua ʼi he temi ke tou liliu ʼo loto fefeka ʼi te agahala. Kapau ʼe tou aga feiā, ʼe toʼo anai e Sehova tona laumālie maʼoniʼoni ia tatou, peʼe ko tona mālohi gāue. Kae, ʼaki te nofo ʼo te laumālie ʼo te ʼAtua ia tatou, ʼe feala ke fua lelei tatatou akoʼi niʼihi ki tana ʼu ala (ʼu vaega 11 ki te 13). Kapau ʼe tou hēhē kae ʼe tou fakahemala, ko Sehova ʼe ina fakagafua anai ke hoko atu pe tatatou fakavikiviki ia ia koteʼuhi ʼe mole fehiʼa ia ʼi he lakaga ki he loto ʼe lavea pea mo taʼomia (ʼu vaega 14 ki te 17). Ki muli age ʼe toe fakahā e te pesalemo ʼaia ko ʼatatou ʼu faikole ʼe mole tonu anai ke talanoa pe kia tatou ʼāteaina pe. Kae, ʼe tonu ke tou faikole ki te tapuakina pea mo te fīmālie fakalaumālie ʼo nātou fuli ʼaē ʼe kau ʼi te tauhi maʼa kia Sehova. — ʼU vaega 18, 19.

23. He koʼe koa ʼe tonu anai ke uga tatou e te Pesalemo 51 ke tou lototoʼa pea mo loto falala?

²³ Ko te pesalemo lave loto ʼaia ʼa Tavite ʼe tonu ke ina uga tatou ke tou lototoʼa pea mo loto falala. ʼE ina tokoniʼi tatou ke tou mahino ʼe ʼaoga ke ʼaua naʼa tou manatu ʼe mole kei maʼu he falala mo kapau neʼe tou tūkia ʼi he agahala. Koteā tona tupuʼaga? Koteʼuhi, kapau ʼe tou fakahemala, ko te fakamolemole ʼa Sehova ʼe feala ke ina hāofaki tatou mai te heʼeʼamanaki. Kapau ʼe tou lotomamahi pea ʼe tou pipiki ʼāteaina ki totatou Tāmai ʼofa ʼe ʼi selo, ʼe ina logoʼi ʼatatou ʼu tagi ʼo ʼuhiga mo te fakamolemole. Pea ʼe ko he meʼa fakafimālie he ʼiloʼi ko Sehova ʼe mole fehiʼa ki he loto ʼe lavea!

ʼE feafeaʼi anai hakotou tali?

◻ He koʼe koa ʼe ʼaoga ke maʼu e te kau kilisitiano he loto maʼa pea mo te laumālie maʼoniʼoni ʼo te ʼAtua?

◻ Koteā te meʼa ʼe feala ke akoʼi ʼe he tahi ʼe fakahemala ki te kau talagataʼa ʼo te lao ʼa Sehova?

◻ Koteā te manatu ʼa Sehova ʼo ʼuhiga mo he loto lavea pea mo taʼomia?

◻ Koteā te ʼu ako ʼe tou maʼu ʼi te Pesalemo 51?

[Paki ʼo te pasina 15]

ʼE koutou kole koa te laumālie maʼoniʼoni pea mo tou tokaga ke ʼaua naʼa tou faka lotomamahiʼi?

[Paki ʼo te pasina 17]

ʼE tonu ke tou fakahā tatatou leleiʼia tana agalelei makehe ʼi hatatou tala tona moʼoni.