Kotou Fai He ʼu Sākilifisio Maʼa Sehova ʼAki He Lotolelei

“Ko te u mea fuli e kotou fai, ke kotou fai natou i te lotolelei, o hage ki te Aliki.”—KOL. 3:23.

VAKAʼI PEʼE KOTOU LAVA TALI KI TE ʼU FEHUʼI ʼAENĪ:

․․․․․

ʼE feafeaʼi hatatou lava fakamaʼuhigaʼi ia Sehova ʼi tatatou ʼu gāue ʼo te ʼaho fuli?

․․․․․

Ko te ʼu sākilifisio fea ʼaē ʼe tou fai ʼi tatatou tauhi ki te ʼAtua?

․․․․․

ʼE feafeaʼi hatatou lava foaki totatou ʼu koloa fakamālama kiā Sehova?

1-3. (a) Ko te mate ʼa Sesu ʼi te pou fakamamahi neʼe fakaʼuhiga koa ʼe mole kei fakamaʼua e Sehova he ʼu sākilifisio? Kotou fakamahino. (b) Koteā te fehuʼi ʼaē ʼe lagaʼi ʼo ʼuhiga mo te ʼu sākilifisio iā ʼaho nei?

ʼI TE ʼuluaki sēkulō ʼo totatou temi, neʼe fakahā e Sehova ki tana hahaʼi ko te sākilifisio faitotogi ʼaē ʼa Sesu neʼe ina pulihi te Lao ʼa Moisese. (Kol. 2:13, 14) Ko te ʼu sākilifisio fuli ʼaē neʼe fai e te kau Sutea lolotoga te ʼu taʼu ʼe lauʼi teau, neʼe mole kei ʼaoga pea neʼe mole kei maʼuhiga. Neʼe fakahoko e te Lao ia tana gāue ohagē he “tagata faiako e ina taki tatou o kaku kia Kilisito.”—Kal. 3:24.

² ʼE mole fakaʼuhiga leva neʼe mole kei tokaga te kau Kilisitiano ki te ʼu sākilifisio. Kae neʼe talanoa te ʼapositolo ko Petelo ki te ʼaoga ʼaē “ke momoli . . . ni vikitima fakalaumalie, ae e matalelei ki te Atua ia Sesu-Kilisito.” (1 Pet. 2:5) ʼO hilifaki kiai, neʼe fakamahino lelei e te ʼapositolo ko Paulo ko te maʼuli ʼo he Kilisitiano—ʼi te ʼu faʼahi fuli—ʼe feala ke momoli ohagē ko “he sakilifisio” ki te ʼAtua.—Loma 12:1.

³ Koia, ko he Kilisitiano ʼe ina fai he ʼu sākilifisio maʼa Sehova koteʼuhi ke lelei tana tauhi kiā ia, ʼaki tana momoli he ʼu meʼa kiā te ia peʼe ko tana lītuʼa ki he ʼu meʼa. ʼAki te faʼahi ʼaē ʼe tou ʼiloʼi ʼo ʼuhiga mo te ʼu fakamaʼua ki te kau Iselaele, ʼe feafeaʼi hatatou ʼiloʼi papau ʼe tali anai e Sehova tatatou ʼu sākilifisio fuli iā ʼaho nei?

ʼI TE ʼAHO FULI ʼO TOKOTOU MAʼULI

4. Koteā ʼaē ʼe tonu ke tou manatuʼi ʼo ʼuhiga mo tatatou ʼu gāue ʼo te ʼaho fuli?

⁴ ʼI totatou maʼuli ʼaē ʼi te ʼaho fuli, ʼe lagi feala ke faigataʼa hatatou maʼu he pikipikiga ʼo tatatou ʼu gāue pea mo te ʼu sākilifisio ʼaē ʼe tou fai maʼa Sehova. Ohagē ko te ʼu gāue ʼo te loto fale, ʼi te faleako, te gāue fakamālama, te fai fakatau, pea mo ʼihi atu ʼu gāue ʼe hagē ia ʼe mole hona pikipikiga mo te faʼahi fakalaumālie. Koia, peʼe kua kotou foaki tokotou maʼuli kiā Sehova peʼe kotou fakatuʼutuʼu ke fakahoko te faʼahi ʼaia, kae ko takotou faʼahiga manatu ʼo ʼuhiga mo te ʼu gāue ʼo te ʼaho fuli ʼe maʼuhiga. ʼI te lakaga fuli pē ko tātou ko te kau Kilisitiano. Pea ʼe maʼua ke tou maʼuliʼi te ʼu pelesepeto Fakatohi-tapu ʼi te ʼu faʼahi fuli ʼo totatou maʼuli. Koia neʼe uga fēnei ai tātou e Paulo: “Ko te u mea fuli e kotou fai, ke kotou fai natou i te lotolelei, o hage ki te Aliki, kae mole ki ni tagata.”—Lau ia Kolose 3:18-24.

5, 6. Koteā te ʼu meʼa ʼaē ʼe tonu ke tou fakakaukauʼi ʼo ʼuhiga mo tatatou aga mo tatatou faʼahiga teuteu ʼi te ʼaho fuli?

⁵ ʼE mole kau ia te ʼu gāue ʼo te ʼaho fuli ʼa he Kilisitiano ki tana tauhi taputapu. Kae ko te uga ʼaē ʼo tātou e Paulo ke tou gāue “i te lotolelei, o hage ki te Aliki,” ʼe tokoni mai ke tou fakakaukauʼi ia totatou maʼuli kātoa. ʼE feafeaʼi koa hatatou fakaʼaogaʼi te tokoni ʼaia? Ko tatatou aga mo tatatou faʼahiga teuteu ʼi te ʼaho fuli ʼe tāu koa mo totatou ʼuhiga Kilisitiano? Peʼe ʼi tatatou ʼu gāue ʼi te ʼaho fuli, ʼe lagi tou ufiufi ʼi te fakahā ko tātou ko he Fakamoʼoni ʼa Sehova ʼuhi ko tatatou aga peʼe ko tatatou faʼahiga teuteu? ʼAua naʼa hoko he meʼa fēia! ʼE mole fia fai anai e te hahaʼi ʼa Sehova he meʼa ʼe feala ke ʼulihi ai tona huafa.—Esa. 43:10; 2 Ko. 6:3, 4, 9.

⁶ Tou vakaʼi age muʼa peʼe malave feafeaʼi ki te ʼu faʼahi kehekehe ʼo totatou maʼuli ia tatatou fia gāue ʼaē “i te lotolelei, o hage ki te Aliki.” ʼI tatatou fai fēia, tou manatuʼi te kau Iselaele ʼaē neʼe natou momoli tanatou ʼu meʼa lelei tukupau ko ni sākilifisio kiā Sehova.—Eke. 23:19.

ʼE MALAVE FEAFEAʼI KI TOKOTOU MAʼULI?

7. Koteā ʼaē neʼe fakamaʼua ki he Kilisitiano ʼi tana foaki tona maʼuli ki te ʼAtua?

⁷ ʼI te temi ʼaē neʼe foaki kātoa ai tokotou maʼuli kiā Sehova, neʼe mole koa lā ko he tonu lelei? ʼE moʼoni, neʼe kotou ʼui ʼe kotou fakamuʼamuʼa anai ia Sehova ʼi te ʼu faʼahi fuli ʼo tokotou maʼuli. (Lau ia Hepeleo 10:7.) Neʼe lelei te tonu ʼaia. Neʼe lagi kotou tokagaʼi te ʼu lelei ʼe kotou maʼu mokā kotou kumi te finegalo ʼa Sehova ʼi he ʼaluʼaga maʼuhiga pea mo takotou faiga ke kotou mulimuli kiai. (Esa. 48:17, 18) Ko te hahaʼi ʼa te ʼAtua ʼe māʼoniʼoni pea mo fiafia heʼe hā iā nātou te ʼu kalitātē ʼa Sehova, ia tanatou Faiako.—Lev. 11:44; 1 Tim. 1:11.

8. Koteā te fakaʼuhiga kiā tātou te māʼoniʼoni ʼo te ʼu sākilifisio ʼo te temi muʼa kiā Sehova?

⁸ Neʼe māʼoniʼoni te ʼu sākilifisio ʼaē neʼe fai e te kau Iselaele maʼa Sehova. (Lev. 6:18 [Lev. 6:25, MN]; Lev. 7:1) Ko te kupu Fakahepeleo ʼaē neʼe fakaliliu ʼaki te kupu “māʼoniʼoni” ʼe maʼu ai te manatu ʼaē ʼo he meʼa neʼe tuku keheʼi, pe neʼe fakaʼaoga ʼāteaina pē, peʼe neʼe fakatapuhā maʼa te ʼAtua. Ke tali tatatou ʼu sākilifisio e Sehova, ʼe tonu ke tou fakamamaʼo mai te ʼu meʼa fuli ʼo te mālama ʼaē ʼe heʼemaʼa. ʼE mole feala ke tou manako ki te ʼu meʼa ʼaē ʼe fehiʼa kiai ia Sehova. (Lau ia 1 Soane 2:15-17.) ʼE hā lelei mai, ʼe tonu ke tou fakamamaʼo mai te ʼu fakakaugā peʼe ko te ʼu meʼa ʼaē ʼe feala ke tou heʼemaʼa ai kiā mata ʼo te ʼAtua. (Esa. 2:4; Apk. 18:4) ʼE toe fakaʼuhiga foki ʼe mole tou tuku anai totatou ʼu mata ki he ʼu meʼa ʼe heʼemaʼa peʼe heʼe ʼaoga, peʼe ko totatou ʼatamai ke fakaʼamuʼamu ki te ʼu faʼahiga meʼa ʼaia.—Kol. 3:5, 6.

9. He koʼē ʼe maʼuhiga ke lelei te aga ʼa te kau Kilisitiano ki te hahaʼi, pea koteā tona tupuʼaga?

⁹ Neʼe uga fēnei e Paulo tona ʼu tehina: “Aua naa koutou galoi te fai o te mea e lelei pea mo te mauli vaevae, koteuhi ko te u faahiga sakilifisio aia e leleiia e te Atua.” (Hep. 13:16) Koia ko te fai ʼo te meʼa ʼaē ʼe lelei ki te hahaʼi ʼe ko he sākilifisio ʼe leleiʼia e Sehova. Ko te ʼofa ʼaē ki te hahaʼi ʼe ina fakaʼiloga kehe te kau Kilisitiano moʼoni.—Soa. 13:34, 35; Kol. 1:10.

TE ʼU SĀKILIFISIO ʼI TE TAUHI

10, 11. Koteā te manatu ʼa Sehova ʼo ʼuhiga mo tatatou minisitelio, mo tatatou tauhi, pea ʼe malave feafeaʼi te faʼahi ʼaia kiā tātou?

¹⁰ Ko te faʼahiga fai ʼo te meʼa ʼaē ʼe lelei ki ʼihi ʼi totatou ʼuhiga Kilisitiano, ʼe ko “te fakaha o tatatou amanaki lelei.” ʼE kotou fakaʼaogaʼi koa te ʼu faigamālie fuli moʼo fai fakamafola? Neʼe higoaʼi e Paulo te gāue Fakakilisitiano maʼuhiga ʼaia ko “he sakilifisio o te fakavikiviki ki te Atua, ko tona uhiga, te fua o te laugutu e natou fakafetai ki [te] huafa [o te Atua].” (Hep. 10:23; 13:15; Oseo 14:2) ʼE lelei ke tou talanoa ki te lahi mo te lelei ʼo te temi ʼaē ʼe tou fakaʼaogaʼi ki te fakamafola ʼo te logo lelei ʼo te Puleʼaga, pea mo te ʼu koga kehekehe ʼo te Fono Gāue ʼaē neʼe fakatuʼutuʼu moʼo uga tātou ke tou fakakaukauʼi te faʼahi ʼaia. Kae moʼo fakanounou, mai tona ʼaluʼaga ʼaē ko tatatou gāue fai fakamafola ʼe ko “he sakilifisio o te fakavikiviki,” ʼe kau ki tatatou tauhi, pea ʼe tonu ke tou foaki te meʼa ʼaē ʼe lelei tukupau ko he sākilifisio. ʼE kehekehe totatou ʼu ʼaluʼaga, kae ʼe hā ʼi te lahi ʼo te temi ʼaē ʼe tou fakaʼaogaʼi moʼo fakamafola te logo lelei, ia tatatou leleiʼia te ʼu meʼa fakalaumālie.

¹¹ ʼE fakatuʼutuʼu tuʼumaʼu e te kau Kilisitiano he temi ki te tauhi fakafāmili pea mo fakakōkelekāsio. ʼE fakamaʼua mai e Sehova ke tou fai te faʼahi ʼaia. ʼE moʼoni, ʼe mole kei tou mulimuli ki he mālōlō Fakasāpato peʼe tou ʼolo tuʼumaʼu ki he ʼu lafeti ʼi Selusalemi. Kae ko te ʼu toʼotoʼoga ʼaia ʼe ʼi ai tonatou tatau mo te maʼuli Fakakilisitiano. Ohagē lā, ʼe kei loto e te ʼAtua ke tou tuku tatatou ʼu gāue mate pea ke tou ako tana Folafola, mo faikole, pea mo tou kau ki te ʼu fono. Pea ko te ʼu pule fāmili Kilisitiano ʼe natou fakatuʼutuʼu ke natou fai he tauhi fakafāmili mo tonatou kiʼi fāmili. (1 Tes. 5:17; Hep. 10:24, 25) ʼO ʼuhiga mo tatatou ʼu gāue fakalaumālie, ʼe lelei ke tou fai te fehuʼi ʼaenī: ‘ ʼE feala koa ke lelei age taku tauhi?’

12. (a) Ko te momoli ʼo te ʼisēsō ʼi te tauhi ʼo te temi muʼa ʼe feala ke fakatatau ki teā iā ʼaho nei? (b) ʼE malave feafeaʼi te fakatatau ʼaia ki tatatou ʼu faikole?

¹² Neʼe hiva fēnei te Hau ko Tavite kiā Sehova: “Ke hage taku kole i ou mua ko te iseso.” (Pes. 141:2) Kotou fakakaukauʼi age muʼa ia takotou ʼu faikole—ia tona fai tuʼumaʼu pea mo tona lelei. ʼE fakatatau ʼi te tohi ʼo Apokalipisi “te u faikole a te kau sagato” ki te ʼisēsō ʼo te ʼu faikole ʼaē ʼe tali e Sehova pea ʼe hake kiā te ia ohagē he ʼaele magoni mo lelei. (Apk. 5:8) ʼI te temi ʼo te kau Iselaele, ko te ʼisēsō ʼaē neʼe foaki tuʼumaʼu ʼi te ʼaletale ʼa Sehova, neʼe tonu ke teuteuʼi mo fakafuafua lelei. Neʼe tali pē e Sehova te ʼisēsō ʼaē neʼe foaki ʼo mulimuli ki te ʼu fakatotonu ʼaē neʼe ina fai. (Eke. 30:34-37; Lev. 10:1, 2) Koia, kapau ko tatatou ʼu faikole ʼe fai fēia, pea ʼe feala ke tou tui papau ʼe tali anai e Sehova tatatou ʼu faikole.

TOU FOAKI PEA MO TOU TALI

13, 14. (a) Koteā ʼaē neʼe fai e Epafolotito mo te kōkelekāsio ʼo Filipe maʼa Paulo, pea neʼe koteā te manatu ʼa Paulo ʼo ʼuhiga mo te faʼahi ʼaia? (b) ʼE feafeaʼi hatatou lava faʼifaʼitakiʼi ia Epafolotito mo te kau Filipe?

¹³ Peʼe lahi peʼe veliveli, kae ko te ʼu meʼa ʼofa ʼaē moʼo lagolago ki te gāue fakamālamanei ʼe feala ke fakatatau ki he sākilifisio. (Mko. 12:41-44) ʼI te ʼuluaki sēkulō ʼo totatou temi, neʼe fekauʼi e te kōkelekāsio ʼo Filipe ia Epafolotito ki Loma ke tokaga ki te maʼuli fakasino ʼo Paulo. Neʼe ʼalu Epafolotito mo te tokoni fakapaʼaga ko he meʼa ʼofa ʼo te kōkelekāsio. Neʼe mole ko te tuʼa tahi ʼaē ʼo te fakahā e te kau Filipe tanatou manavaʼofa kiā Paulo. ʼAki tanatou agalelei ʼaia, neʼe natou loto ke ʼāteaina ia Paulo mai te ʼu tuʼania fakapaʼaga ke lahi age tona temi ʼaē ʼe ina fakaʼaogaʼi ki te minisitelio. Neʼe koteā te manatu ʼa Paulo ki te meʼa ʼofa ʼaia? Neʼe ina fakahigoaʼi te meʼa ʼofa ʼaia ko “he kaloni magoni lelei, o hage ko he sakilifisio ae e tali e te Atua, pea e matalelei kia ia.” (Lau ia Filipe 4:15-19.) Neʼe maʼuhiga moʼoni kiā Paulo te manavaʼofa ʼa te kau Filipe, ʼo toe fēia kiā Sehova.

¹⁴ ʼE toe fēia iā ʼaho nei, ʼe leleiʼia ʼaupitō e Sehova tatatou ʼu meʼa ʼofa ʼaē ki te gāue fakamālamanei. Tahi ʼaē, ʼe ina fakapapau mai kapau ʼe tou haga fakamuʼamuʼa te ʼu gāue ʼo te Puleʼaga ʼi totatou maʼuli, pea ʼe tokaga anai ia ki te ʼu meʼa fuli ʼaē ʼe ʼaoga kiā tātou ʼi te faʼahi fakalaumālie mo fakasino.—Mat. 6:33; Luka 6:38.

KOTOU FAKAHĀ TAKOTOU LOTO FAKAFETAʼI

15. Koteā te ʼu faʼahi ʼaē ʼe kotou loto fakafetaʼi ai kiā Sehova?

¹⁵ Kapau ʼe tou lau te ʼu tupuʼaga fuli ʼaē ʼe tonu ai ke tou loto fakafetaʼi kiā Sehova pea ʼe fakamaʼua anai kiai he toe temi loaloaga. ʼE mole tonu koa lā ke tou fakafetaʼi kiā te ia ʼi te ʼaho fuli ʼo ʼuhiga mo te meʼa ʼofa ʼaē ko te maʼuli? ʼE ina foaki mai te ʼu meʼa ʼaē ʼe ʼaoga kiā tātou fuli—te meʼa kai, te mutuʼi meʼa, mo te nofoʼaga pea mo te ʼaele ʼaē ʼe tou mānava kiai. Tahi ʼaē, ko tatatou tui, ʼaē ʼe fakatafito ki te ʼatamai mālama totonu, ʼe ina foaki mai he ʼamanaki. Koia ʼe tuha ai ke tou tauhi mo tou foaki ni sākilifisio fakavikiviki kiā Sehova, ʼuhi heʼe ko totatou Tupuʼaga pea mo te ʼu meʼa ʼaē neʼe ina fai maʼa tātou.—Lau ia Apokalipisi 4:11.

16. ʼE tou fakahā feafeaʼi tatatou loto fakafetaʼi ki te sākilifisio faitotogi ʼa Kilisito?

¹⁶ Ohagē ko te meʼa ʼaē neʼe tou vakaʼi ʼi te ʼalatike ʼaenī kua ʼosi, ko te meʼa ʼofa makehe maʼuhiga ʼa te ʼAtua ki te mālamanei ʼe ko te sākilifisio faitotogi ʼa Kilisito. ʼE hā ʼi te meʼa ʼofa ʼaia te lahi ʼo te ʼofa ʼo te ʼAtua kiā tātou. (1 Soa. 4:10) ʼE tou lava fakahā feafeaʼi tatatou fakafetaʼi ki te meʼa ʼofa ʼaia? Neʼe ʼui fēnei e Paulo: “E ekenaki maua e te ofa o Kilisito, he ma iloi kapau nee mate he toko tahi o uhiga mo te tagata fuli, . . . pea nee mate ia o uhiga mo te tagata fuli, koteuhi ko natou ae e mauli ke aua naa natou mauli kia natou totonu, kae kia ia ae nee mate pea nee toe tuuake o uhiga mo natou.” (2 Ko. 5:14, 15) ʼI tona fakahagatonu, neʼe fai e Paulo te ʼu palalau ʼaia heʼe kapau ʼe tou loto fakafetaʼi ki te ʼofa makehe ʼo te ʼAtua, pea ʼe tou fakaʼaogaʼi anai totatou maʼuli moʼo fakamaʼuhigaʼi ia Ia pea mo tona ʼAlo. ʼE ʼiloga totatou ʼofa mo tatatou loto fakafetaʼi ki te ʼAtua pea mo Kilisito ʼi tatatou fakalogo mo tatatou fia fai fakamafola mo fai ni tisipulo.—1 Tim. 2:3, 4; 1 Soa. 5:3.

17, 18. Ko te ʼu ʼaluʼaga fea ʼaē neʼe hikihiki ai e ʼihi tanatou sākilifisio fakavikiviki ʼaē kiā Sehova? Kotou tuku mai he faʼifaʼitaki.

¹⁷ ʼE feala koa hakotou hikihiki te lelei ʼo te sākilifisio fakavikiviki ʼaē ʼe kotou momoli ki te ʼAtua? ʼI tanatou ʼosi fakakaukau ki te ʼu lelei fuli ʼaē neʼe fai e Sehova maʼa nātou, tokolahi neʼe natou fai he ʼu fetogi ke lahi age tonatou temi ki te fakamafola ʼo te Puleʼaga pea mo ʼihi atu gāue fakateokalatike. Neʼe feala ki ʼihi ke pioniē vaeluaʼi temi ʼi he māhina e tahi peʼe laka atu ʼi te taʼu fuli, pea ko ʼihi neʼe feala ke pioniē kātoa. Ko ʼihi leva neʼe tokoni ki te laga ʼo te ʼu fale ʼaē kā fakaʼaogaʼi ki te tauhi kiā Sehova. ʼE mole ko he ʼu faʼahi lelei koa lā ʼaia ke fakahā ai ʼe he tahi ia tana loto fakafetaʼi? Kapau ʼe tou tauhi ki te ʼAtua ʼaki te faʼahiga manatu ʼaē ʼe lelei moʼo fakahā tatatou loto fakafetaʼi, pea ʼe tali anai e te ʼAtua te ʼu gāue ʼaia ʼo te tauhi taputapu.

¹⁸ Tokolahi te kau Kilisitiano neʼe natou loto fakafetaʼi kiā Sehova mo lotomālohi ai. Ohagē la ko Morena. Neʼe ina kumi te ʼu tali ki tana ʼu fehuʼi ʼo ʼuhiga mo te ʼAtua ʼi te lotu Katolika, te lotu ʼaē neʼe lahi ake ai, pea mo te filosofia Asia. Kae neʼe mole ina maʼu he ʼu tali ki tana ʼu fehuʼi. Neʼe hoki ina maʼu leva he ʼu tali ʼi tana kamata ako te Tohi-Tapu mo te kau Fakamoʼoni ʼa Sehova. ʼI te lahi ʼaē ʼo te loto fakafetaʼi ʼa Morena kiā Sehova ʼo ʼuhiga mo te ʼu tali Fakatohi-tapu fuli ʼe mahino lelei ki tana ʼu fehuʼi, pea mo te fīmālie ʼaē neʼe ina maʼu mai ai ki tona maʼuli, neʼe ina fakatuʼutuʼu leva ke ina fakaʼaogaʼi kātoa tona mālohi ki tana tauhi ʼaē kiā Sehova. ʼI te hili pē ʼaē ʼo tona papitema, neʼe pioniē vaeluaʼi temi pea mole tuai kiai neʼe feala ke liliu ʼo pioniē kātoa. Kua hili nei kiai taʼu e 30, pea ʼe kei kau pē ia Morena ʼi te selevisi temi kātoa.

19. ʼE kotou lava hikihiki feafeaʼi takotou ʼu sākilifisio ʼaē kiā Sehova?

¹⁹ ʼE moʼoni, ʼe tokolahi te ʼu kaugana agatonu ʼa Sehova ʼe mole feala ke natou pioniē ʼuhi ko ni ʼaluʼaga. Tatau aipē peʼe koteā te faʼahi ʼe tou lava fai ʼi te tauhi ʼa Sehova, kae ʼe feala pē kiā tātou fuli ke tou foaki he ʼu sākilifisio fakalaumālie ʼe ina leleiʼia. ʼI tatatou aga, ʼe tonu ke tou maʼuliʼi fakalelei te ʼu pelesepeto faitotonu, ʼo tou manatuʼi tuʼumaʼu ʼe tou fakafofoga ia Sehova ʼi te temi fuli pē. ʼI te tui, ʼe tou falala kātoa ko Sehova ʼe ina fakahoko anai tana ʼu fakatuʼutuʼu. ʼI te ʼu gāue lelei, ʼe tou lagolago ki te fakamafola ʼo te logo lelei. ʼI te mahu ʼo totatou loto pea mo totatou loto fakafetaʼi ʼaē ki te ʼu meʼa fuli neʼe fai e Sehova maʼa tātou, tou hoko atu te fai ʼo te ʼu sākilifisio kiā Sehova ʼaki he loto ʼe lelei.

[Fakamatala ʼo te pāsina 27]

Ko te agalelei ʼa Sehova ʼe ina uga koa koutou ke lelei age takotou sākilifisio fakavikiviki?

[Paki ʼo te pāsina 25]

ʼE kotou fakaʼaogaʼi koa te ʼu faigamālie fuli moʼo fai fakamafola?