Ko Te Tohi-Tapu Ko Te Tohi ʼe Mole Hona Fakatatau

ʼE ʼui ko te Tohi-Tapu ʼe ko te tohi ʼaē ʼe lahi tokotahi tona tufa ʼi te malamanei, pea ʼe tonu te faʼahi ʼaia. ʼE lahi age te hahaʼi ʼaē ʼe nātou lau pea mo nātou leleiʼia te Tohi-Tapu ʼi te tahi ʼu tohi. ʼI te ʼaho nei, ʼe ʼui kua tufa te ʼu Tohi-Tapu (ko te tohi katoa peʼe ko hona ʼu koga tohi) e fā miliale ʼi te ʼu lea e 2 000 tupu.

Kae ko te meʼa ʼaē ʼe fakaofoofo tāfito ʼi te tufa ʼo te Tohi-Tapu, he ko te Tohi-Tapu ʼe ʼui ʼe haʼu mai te ʼAtua. Neʼe tohi fēnei e te ʼapositolo Kilisitiano ko Paulo, “ko te tohi katoa ʼe haʼu mai te ʼAtua.” (2 Timoteo 3:​16) Koteā tona faka ʼuhiga? Ko te kupuʼi palalau “ ʼe haʼu mai te ʼAtua” (ʼi te lea faka Keleka, the·oʹpneu·stos) ko tona faka ʼuhiga moʼoni ʼaenī “neʼe puhiʼi e te ʼAtua.” Ko te kupu faka Keleka pneuʹma, ʼaē ʼe pipiki ki te kupu ʼaia, ʼe faka ʼuhiga ki te “laumālie.” Koia, ko tona faka ʼuhiga ko te laumālie maʼoniʼoni ʼo te ʼAtua neʼe ina uga he ʼu tagata faitohi, ʼo ina ‘puhiʼi’ kia nātou ʼi hona ʼaluʼaga fakatā, koia ʼaē ʼe feala ai hatatou fakahigoaʼi moʼoni te tohi ʼaia ko te Folafola ʼa te ʼAtua, ka mole ʼa te tagata. ʼE moʼoni, ko te tokolahi ia nātou ʼaē neʼe nātou ako te Tohi-Tapu ʼe nātou punamaʼuli ʼi te felogoi tahi ʼo tana ʼu koga tohi fuli, mo te totonu ʼo tana talanoa ki te ʼu meʼa fakapoto lalahi, mo te agatonu pea mo te fakahagatonu ʼo tana kau tagata faitohi, pea ko te meʼa ʼaē ʼe maʼuhiga tāfito, ʼe ko tana ʼu lea faka polofeta ʼaē kua hoko​—pea ko te ʼu meʼa fuli ʼaia neʼe nātou fakamoʼoni ai ki te toko lauʼi miliona hahaʼi lautohi fakamalotoloto, ko te tohi ʼaia ʼe haʼu mai he tahi ʼe lahi ake ʼi te tagata.a

Kae neʼe takitaki feafeaʼi e te ʼAtua te tohi ʼo te Tohi-Tapu? ʼE ʼui e ʼihi ko te ʼu kupu fuli ʼaē ʼe tohi ʼi te Tohi-Tapu, ʼe ko te ʼu kupu tonu ʼaē neʼe ʼui e te ʼAtua ke tohi. Ko ʼihi ʼe nātou ʼui neʼe ina fakahā pe te ʼu manatu ʼaē ʼe maʼu ʼi te Tohi-Tapu, kae neʼe mole ina fakahā te ʼu kupu tonu ʼaē neʼe tonu ke tohi ai. Kae ʼi tona fakahagatonu, ʼe mole feala ke tou ʼui ko te takitaki e te ʼAtua te tohi ʼo te Tohi-Tapu, neʼe fai ʼaki te faʼahiga fai e tahi, he neʼe palalau te ʼAtua “ ʼi he ʼu agaaga kehekehe ki ʼatatou ʼu kui ʼaki te kau polofeta.” (Hepeleo 1:1; vakaʼi ia 1 Kolonito 12:6.) ʼI te alatike ʼaē ka hoa mai, ʼe tou vakaʼi ai anai te ʼu faʼahiga agaaga ʼaē neʼe palalau ai te ʼAtua ki te kau tagata faitohi e toko 40 ʼaē neʼe nātou tohi te Tohi-Tapu.

[Nota ʼi te lalo pasina]