ʼE Akoako e Sehova Te ʼu Tauhi Ōvi Ke Nātou Taupau Tana Faga Ōvi
“ ʼE foaki e Sehova totonu ia te poto; ʼe haʼu mai tona gutu te ʼatamai mālama pea mo te fakasiosio tonu.”—Tāʼaga Lea 2:6.
1, 2. He koʼe ʼe faiga e te ʼu tēhina ke tuku age he tahi ʼu gāue ʼi te kokelekasio?
ʼE ʼUI fēnei e Nick, ʼaē kua tagata ʼāfea talu mai taʼu e fitu: “Neʼe au fiafia ʼaupito ʼi toku hinoʼi ʼaē ke au tagata ʼāfea. Maʼa aku, ko te pilivilesio ʼaia neʼe ko he faigamālie ke lahi age taku tauhi ʼaē kiā Sehova. Neʼe au fia fakahā age toku loto fakafetaʼi ʼo ʼuhiga mo te ʼu meʼa fuli ʼaē neʼe ina fai maʼa aku. Neʼe au toe fia tokoni lahi pea mo lagolago kiā nātou ʼo te kokelekasio, ohage pe ko te lagolago ʼa te ʼu tagata ʼāfea kiā au.” Kae logola tana fiafia ʼaia neʼe toe tuʼania foki ia Nick. ʼE ina hoko atu fēnei: “Mai tona ʼaluʼaga ʼaē neʼe mole heʼeki kātoa toku taʼu 30 ʼi te temi ʼaē neʼe hinoʼi au, neʼe au tuʼania naʼa mole au maʼu te ʼu kalitātē ʼaē ʼe ʼaoga—te fakasiosio tonu pea mo te poto—moʼo taupau lelei ʼo te kokelekasio.”
2 Ko nātou ʼaē ʼe hinoʼi e Sehova ke nātou taupau tana faga ōvi ʼe lahi te ʼu tupuʼaga ke nātou fiafia ai. Neʼe fakamanatuʼi e te ʼapositolo ko Paulo ki te ʼu tagata ʼāfea ʼo Efeso te tahi tupuʼaga ke nātou fiafia, ʼo ina fakaʼaogaʼi ia te ʼu palalau ʼaē neʼe fai e Sesu. Neʼe ina ʼui fēnei: “ ʼE lahi age te fiafia ʼi takita foaki, ʼi takita tali.” (Gaue 20:35, MN ) Ko te gāue ohage ko he tagata faifekau faka minisitelio peʼe ko he tagata ʼāfea, ʼe ko te tahi ʼaia ʼu ʼaluʼaga ki te ʼu tēhina moʼo foaki ʼo nātou kiā Sehova pea mo te kokelekasio. Ohage la, ʼe lagolago te ʼu tagata faifekau faka minisitelio ki te ʼu tagata ʼāfea. Ko te ʼu tēhina ʼaia ʼe nātou toe fakaʼaogaʼi he temi loaloaga moʼo fakahoko he ʼu gāue ʼaoga neʼe tuku age ke nātou fai. ʼE maʼu e te ʼu tēhina ʼaia te ʼofa ki te ʼAtua pea mo te kāiga, moʼo fakahoko ia te ʼu gāue maʼuhiga ʼaia.—Maleko 12:30, 31.
3. He koʼe ʼe lagi lotolotolua ʼihi ʼo ʼuhiga mo he ʼu pilivilesio ʼi te kokelekasio?
3 E feafeaʼi mo kapau ʼe lotolotolua he tēhina ʼo manatu ʼe mole feala anai hana fai fakalelei ia te pilivilesio ʼo he tagata faifekau faka minisitelio peʼe tagata ʼāfea? Ohage ko Nick, ʼe lagi tuʼania naʼa mole ina maʼu te ʼu kalitātē ʼaē ʼe feʼauga ke liliu ai ko he tauhi ōvi ʼe gāue lelei. Kapau ko koutou ko he tēhina, pea ʼe koutou manatu feiā koa? ʼE feala ke matatonu te taʼi tuʼania ʼaia, heʼe sivisivi anai e Sehova pe neʼe feafeaʼi te aga ʼa te ʼu tauhi ōvi ki te faga ōvi. Neʼe ʼui fēnei e Sesu: “Ko ia ʼaē neʼe foaki lahi ki ai, ʼe fakamaʼua lahi anai kiā te ia; pea ko ia ʼaē neʼe lahi te ʼu meʼa ʼaē neʼe tuku age ki ai, ʼe lahi anai te fakamaʼua ʼaē ki ai ʼo laka age ʼi te fua māhani.”—Luka 12:48, MN.
4. ʼE tokoni feafeaʼi ia Sehova kiā nātou ʼaē ʼe ina hinoʼi ke nātou taupau tana ʼu ōvi?
4 ʼE tuku koa e Sehova kiā nātou ʼaē ʼe ina hinoʼi ke tagata faifekau faka minisitelio pea mo tagata ʼāfea, ke nātou fakahoko takitokotahi tonatou maʼua ʼaia? Kailoa ia, heʼe ina foaki he tokoni ke feala hanatou kātaki pea mo toe lavaʼi foki ia te ʼu maʼua ʼaia. Ohage ko tatatou vakaʼi ʼi te ʼuluaki alatike, ʼe foaki e Sehova kiā nātou tona laumālie maʼoniʼoni, pea ko te fua ʼo te laumālie ʼaia ʼaē ka tokoni kiā nātou moʼo taupau ia te faga ōvi ʼaki te ʼofa. (Gaue 20:28; Kalate 5:22, 23) Tahi ʼaē meʼa, ʼe foaki e Sehova kiā nātou te poto, te ʼatamai mālama pea mo te fakasiosio tonu. (Tāʼaga Lea 2:6) ʼO feafeaʼi? Tou vakaʼi faʼahi e tolu ʼe fakaʼaogaʼi e Sehova moʼo akoako ʼo te ʼu tēhina ʼaē ʼe ina hinoʼi ke nātou taupau tana ʼu ōvi.
ʼE Akoako Nātou e Te ʼu Tauhi Ōvi ʼAē Kua Māhani
5. He koʼe ko Petelo pea mo Soane neʼe ko he ʼu tauhi ōvi lelei?
5 ʼI te temi ʼaē neʼe tutuʼu ai te ʼu ʼapositolo ko Petelo pea mo Soane iā muʼa ʼo te Sanetualio, ko te kau tuʼi fakamāu ʼo te telepinale, ʼaē neʼe popoto iā mata ʼo te mālama, kiā nātou ko te ʼu tagata ʼaia e lua neʼe ko “te ʼu tagata neʼe mole ako pea ʼe ko te ʼu tagata ohage pe ko te hahaʼi fuli.” Neʼe nā popoto ʼi te lautohi pea mo te faitohi, kae neʼe mole ʼolo ki he faleako faka lapi moʼo ako ai ia te Tohi-Tapu. Logola te faʼahi ʼaia, kae ko Petelo mo Soane pea mo te tahi ʼu tisipulo neʼe ko he ʼu faiako popoto, he neʼe liliu te tokolahi ʼo te nofoʼaki ʼo tui. Neʼe liliu feafeaʼi te ʼu tagata ʼaia ʼaē neʼe mole ʼolo ki he ʼu faleako lalahi, ko he ʼu faiako makehe? ʼI tanatou ʼosi fakalogo kiā Petelo pea mo Soane, ko te telepinale neʼe “nātou ʼiloʼi ai ko nāua ʼaia ʼaē neʼe fakatahi mo Sesu.” (Gaue 4:1-4, 13, MN ) Tahi ʼaē meʼa, neʼe nā maʼu ia te laumālie maʼoniʼoni. (Gaue 1:8) Kae neʼe toe hā lelei foki ʼi te temi ʼaia—ki te kau tuʼi fakamāu ʼaia ʼaē neʼe kivi fakalaumālie—neʼe ko Sesu ʼaē neʼe ina akoʼi te ʼu tagata ʼaia. ʼI tana kei maʼuli mo tana kau ʼapositolo ʼi te kele, neʼe akoʼi age e Sesu peʼe feafeaʼi hanatou tānaki ia te hahaʼi ʼaē ʼe hage ni ōvi, pea mo feafeaʼi hanatou taupau mokā nātou kau mai anai ki te faga ōvi.—Mateo 11:29; 20:24-28; 1 Petelo 5:4.
6. ʼO ʼuhiga mo te akoako ʼo te tahi ʼu tēhina, koteā te faʼifaʼitaki ʼaē neʼe tuku mai e Sesu pea mo Paulo?
6 ʼI te ʼosi fakatuʼuake ʼo Sesu, neʼe ina akoako ia nātou ʼaē neʼe ina hinoʼi ko he ʼu tauhi ōvi. (Apokalipesi 1:1; 2:1–3:22) Ohage la, neʼe ina filifili totonu ia Paulo pea mo tokaga ki tona akoako. (Gaue 22:6-10) Neʼe maʼuhiga kiā Paulo tona akoako ʼaia pea neʼe ina toe akoʼi ki te tahi ʼu tagata ʼāfea ia te ʼu meʼa ʼaē neʼe ina ako. (Gaue 20:17-35) Ohage la, neʼe lahi tona temi pea mo tona mālohi neʼe ina fakaʼaogaʼi moʼo akoako ia Timoteo ke liliu “ko he tagata gāue” maʼa te ʼAtua, “ ʼe mole ufiufi ʼi he meʼa.” (2 Timoteo 2:15, MN ) Neʼe liliu te ʼu tagata ʼaia ʼo kaumeʼa lelei. Ki muʼa atu, neʼe tohi fēnei e Paulo ʼo ʼuhiga mo Timoteo: “Ohage pe he tamasiʼi mo hana tāmai, neʼe gāue mo au ohage he tagata kaugana ʼuhi pe ko te logo lelei.” (Filipe 2:22, MN ) Neʼe mole faiga e Paulo ke liliu ia Timoteo peʼe ko he tahi tēhina kehe age, ko hana tisipulo. Kailoa ia, kae neʼe ina fakaloto mālohiʼi te ʼu tēhina ke nātou ‘faʼifaʼitakiʼi ia ia ohage pe ko tana faʼifaʼitakiʼi ia Kilisito.’—1 Kolonito 11:1.
7, 8. (a) Ko te faʼifaʼitaki fea ʼaē ʼe fakahā ai te fua lelei mokā faʼifaʼitakiʼi e te ʼu tagata ʼāfea ia Sesu mo Paulo? (b) Ko te temi fea ʼaē ʼe tonu ke kamata akoako ai e te ʼu tagata ʼāfea ia te ʼu tēhina ʼaē ʼe feala ke liliu ko he ʼu tagata faifekau faka minisitelio pea mo tagata ʼāfea?
7 ʼI tanatou faʼifaʼitakiʼi ia Sesu pea mo Paulo, ko te ʼu tauhi ōvi ʼaē kua māhani neʼe nātou akoako te ʼu tēhina, pea nātou maʼu ai he ʼu fua lelei. Ohage ko Chad, ʼaē neʼe lahilahi ake ʼi he loto fale ʼe mole lotu tahi, kae mole heʼeki faʼa fualoa neʼe hinoʼi ke tagata ʼāfea. ʼE ina ʼui fēnei: “Lolotoga ni ʼu taʼu, ko te ʼu tagata ʼāfea tokolahi neʼe nātou tokoni mai ke au tuputupu ʼi te faʼahi fakalaumālie. ʼUhi ʼaē ko taku tāmai neʼe mole ko he Fakamoʼoni ʼa Sehova, neʼe tōkakaga lelei te ʼu tagata ʼāfea ʼaia kiā au pea neʼe nātou liliu ko haku ʼu tāmai fakalaumālie. Neʼe nātou fakaʼaogaʼi tonatou temi moʼo akoako au ʼi te minisitelio, pea ki muli age, ko te tagata ʼāfea neʼe ina akoako tāfito au ke au fakahoko te ʼu gāue ʼaē neʼe foaki mai ʼi te kokelekasio.”
8 Ohage ko tona fakahā ʼi te faʼifaʼitaki ʼo Chad, ko te ʼu tauhi ōvi ʼaē ʼe fakasiosio poto, ʼe nātou kamata akoako te ʼu tēhina ʼaē ʼe feala ke liliu ko he ʼu tagata faifekau faka minisitelio pea mo tagata ʼāfea, fualoa ʼi muʼa ʼo he foaki age ia te ʼu pilivilesio ʼaia. Koteā tona tupuʼaga? Heʼe fakamaʼua ʼi te Tohi-Tapu ki te kau tagata faifekau faka minisitelio pea mo tagata ʼāfea ke lelei ʼaupito tanatou ʼu aga pea mo lelei tonatou maʼuli fakalaumālie ʼi muʼa ʼo hanatou hinoʼi ki te ʼu pilivilesio ʼaia. ʼE tonu ke “ ʼahiʼahiʼi ia nātou ʼaia ʼo ʼuhiga mo tonatou ʼu fealagia.”—1 Timoteo 3:1-10, MN.
9. Koteā te maʼua ʼaē ʼe maʼu e te ʼu tauhi ōvi ʼaē kua māhani, pea koteā tona tupuʼaga?
9 Kapau ʼe tonu ke ʼahiʼahiʼi te ʼu tēhina ʼaē kua papitema, pea ʼe tonu ke ʼuluaki akoako muʼa nātou. Ohage la ko te fakatātā ʼaenī: Kapau ʼe kole ki he tamasiʼi ʼi te faleako ke ina fai he sivi ʼe faigataʼa kae neʼe mole akoako ia ia e tana kau faiako, ʼe ina lava fai anai koa ia te sivi ʼaia? ʼE mahino ia ʼe mole ina lavaʼi anai. Koia ʼaē ʼe maʼuhiga ke akoako. Kae ko te kau faiako ʼaē ʼe tōkakaga lelei ki tanatou kau ako, ʼe mole nātou akoako pe te kau ako ke nātou lavaʼi te sivi, kae ke nātou toe fakaʼaogaʼi foki mo te ʼu meʼa ʼaē kua nātou mālama kiai. ʼO toe feiā pe, ko te kau tagata ʼāfea faʼa gāue ʼe nātou tokoni ki te ʼu tēhina ke nātou maʼu te ʼu kalitātē ʼaē ʼe tonu ke maʼu e te ʼu tagata ʼaē ʼe hinoʼi, ʼo nātou akoako lelei te ʼu tēhina ʼaia. ʼE mole nātou fai pe te faʼahi ʼaia moʼo tokoni ki te ʼu tēhina ʼaia ke nātou maʼu te ʼu pilivilesio, kae ʼe nātou toe fai foki ia te faʼahi ʼaia moʼo tokoni kiā nātou ke feala hanatou taupau fakalelei te faga ōvi. (2 Timoteo 2:2) ʼE mahino ia, ʼe tonu ke faiga mālohi te ʼu tēhina pea mo gāue kinakina ke feala hanatou liliu ʼo tagata faifekau faka minisitelio peʼe tagata ʼāfea. (Tito 1:5-9) Kae ʼi te lotolelei ʼa te ʼu tauhi ōvi ʼaē kua māhani ke nātou akoako ia nātou ʼaē ʼe faiga fakamalotoloto ki te ʼu gāue ʼo te kokelekasio, ʼe feala ai ke nātou tokoni kiā nātou ke nātou tuputupu vave.
10, 11. ʼE lava akoako feafeaʼi e te ʼu tauhi ōvi ia te tahi ʼu tēhina ke nātou maʼu he ʼu pilivilesio?
10 ʼE lava akoako feafeaʼi e te ʼu tagata tauhi ōvi ʼaē kua māhani, te tahi ʼu tēhina moʼo fakahoko te ʼu maʼua ʼo te kokelekasio? ʼUluaki, ʼe tonu ki te ʼu tauhi ōvi ke nātou ʼoʼofa ki te ʼu tēhina ʼi te kokelekasio—ʼo nātou gāue tuʼumaʼu mo nātou ʼi te fai faka mafola pea mo tokoni kiā nātou ke hikihiki tanatou poto ʼi te fakaʼaogaʼi “lelei [ia] te folafola ʼo te moʼoni.” (2 Timoteo 2:15, MN ) Ko te ʼu tauhi ōvi ʼaē kua fotufotuʼa, ʼe nātou palalau mo te ʼu tēhina ʼaia ʼo ʼuhiga mo te ʼu fiafia ʼo te tauhi ki te ʼu tēhina mo tuagaʼane, pea mo tanatou fiafia ʼi te fai ʼo he ʼu fakatuʼutuʼu pea mo nātou fakahoko. ʼAki he agalelei, ʼe nātou foaki foki mo he ʼu tokoni ʼo ʼuhiga mo te ʼu meʼa ʼaē ʼe tonu ke fai e he tēhina ke liliu ko he ‘faʼifaʼitakiʼaga ʼo te faga ōvi.’—1 Petelo 5:3, 5.
11 Ka hinoʼi he tēhina ke tagata faifekau faka minisitelio, ko te ʼu tauhi ōvi ʼaē ʼe aga fakapotopoto ʼe nātou hoko atu tanatou akoako ia te tēhina ʼaia. Ko Bruce, ʼaē kua tagata ʼāfea talu mai teitei taʼu e 50, ʼe ina ʼui fēnei: “ ʼE au leleiʼia taku heka mo he tagata faifekau faka minisitelio foʼou pea mā toe vakaʼi fakatahi te ʼu fakatotonu ʼaē neʼe tā e te tagata kaugana agatonu mo poto. ʼE mā toe lau foki mo te ʼu fai tokoni fuli ʼo ʼuhiga mo te gāue ʼaē ʼe tonu ke ina fai, pea ʼe au leleiʼia taku gāue mo ia ʼo aʼu ki tana māhani ki tana ʼu gāue.” Ka fakahaʼuhaʼu te māhani ʼa te tagata faifekau faka minisitelio, ʼe feala anai ke akoako age kiā ia te gāue ʼo te ʼu tauhi ōvi. ʼE toe ʼui fēnei e Bruce: “Ka mā kaugā ʼolo mo he tagata faifekau faka minisitelio ʼo fai he ʼaʼahi faka tauhi ōvi, ʼe au tokoni kiā ia ke ina filifili te ʼu vaega Tohi-Tapu ʼaē ka ina fakaloto mālohiʼi anai he tahi peʼe ko te famili ʼaē ʼe mā ʼaʼahi. Ko te akoako ʼo te fakaʼaogaʼi ʼo te Tohi-Tapu ke malave ki te loto, ʼe ko he faʼahi maʼuhiga mo kapau ʼe fia liliu he tagata faifekau faka minisitelio ko he tauhi ōvi ʼe gāue lelei.”—Hepeleo 4:12; 5:14.
12. ʼE lava akoako feafeaʼi e te ʼu tauhi ōvi kua māhani he ʼu tagata ʼāfea foʼou?
12 Ko te ʼu tauhi ōvi foʼou ʼe toe ʼaoga lahi foki ke akoako mo nātou. ʼE ʼui fēnei e Nick, ʼaē neʼe tou talanoa ki ai: “Neʼe ʼaoga ʼaupito kiā au toku akoako e te ʼu taupau e lua kua mātutuʼa. Neʼe kua mahino te ʼu tēhina ʼaia ki te fai ʼo ʼihi gāue. Tuʼumaʼu pe neʼe nā fakalogo mokā au palalau pea nā tokagaʼi taku manatu—tatau aipe pe neʼe mole nā manatu tahi mo au. Neʼe lahi te ʼu faʼahi ʼaē neʼe au ako ʼi taku sio ki tanā agavaivai pea mo tanā fakaʼapaʼapa ki te ʼu tēhina mo tuagaʼane ʼo te kokelekasio. ʼAki te faʼifaʼitaki ʼo te ʼu tagata ʼāfea ʼaia, neʼe au mahino ai ki te maʼua ʼaē ke kita poto ʼi te fakaʼaogaʼi ʼo te Tohi-Tapu moʼo fakatokatoka ia te ʼu fihifihia peʼe moʼo fakaloto mālohiʼi.”
ʼE Akoako Nātou ʼAki Te Folafola ʼa Te ʼAtua
13. (a) Koteā ʼaē ʼe ʼaoga ki he tēhina ke liliu ai ko he tauhi ōvi lelei? (b) He koʼe neʼe ʼui fēnei e Sesu: “Ko taku akonaki e mole a aku”?
13 ʼE moʼoni, ʼe maʼu ʼi te Folafola ʼa te ʼAtua, ia te Tohi-Tapu, te ʼu lao, mo te ʼu pelesepeto, pea mo te ʼu faʼifaʼitaki ʼe ʼaoga ki he tauhi ōvi ke liliu ai ʼo “katoa . . . [ke] teuteu o uhiga mo te gaue lelei fuape.” (2 Timoteo 3:16, 17) Neʼe lagi ako lelei he tēhina ʼi te faleako, kae ʼe liliu anai ko he tauhi ōvi lelei mo kapau ʼe ina maʼu te ʼatamai mālama ʼo ʼuhiga mo te Tohi-Tapu pea mo ina maʼuliʼi. Tou vakaʼi te faʼifaʼitaki ʼa Sesu. Neʼe ko ia te tauhi ōvi ʼaē neʼe lahi tokotahi ia tana ʼatamai mālama, mo tana fakasiosio tonu, pea mo tona poto; kae neʼe mole falala ia ki tona poto tokotahi ʼi te temi ʼaē neʼe ina akoʼi ai te ʼu ōvi ʼa Sehova. Neʼe ina ʼui fēnei: “Ko taku akonaki e mole a aku kae a ia ae nee ina fekaui mai au.” He koʼe neʼe faka kolōliaʼi e Sesu tana Tāmai ʼaē ʼe ʼi selo? Neʼe ina fakamahino fēnei: “Ko ae e lea maia te ia’pe, e ina kumi tona kololia.”—Soane 7:16, 18.
14. Koteā ʼaē ʼe tonu ke fai e te ʼu tauhi ōvi ke ʼaua naʼa faka kolōliaʼi nātou?
14 Ko te ʼu tauhi ōvi agatonu ʼe mole nātou loto ke faka kolōliaʼi nātou. ʼE nātou fakatafito tanatou ʼu fai tokoni pea mo tanatou ʼu fakaloto mālohi ki te Folafola ʼa te ʼAtua, kae mole ki tonatou poto ʼo nātou. ʼE nātou mahino ko te gāue ʼa te tauhi ōvi ʼe ko te tokoni ki te ʼu ōvi ke nātou maʼu “te manatu a Kilisito,” kae mole ko te manatu ʼa te ʼu tagata ʼāfea. (1 Kolonito 2:14-16, MN ) Ohage la, e feafeaʼi mo kapau ʼe fai tokoni he tagata ʼāfea ki he taumātuʼa ke nā fakatokatoka tona ʼu fihifihia, pea ina foaki he ʼu tokoni ʼe mole fakatafito ki te ʼu pelesepeto faka Tohi-Tapu pea mo te ʼu manatu ʼaē neʼe tā e “te tagata kaugana agatonu mo poto,” kae fakatafito ia ki tona ia poto ʼo ʼona? (Mateo 24:45, MN ) Ko te tokoni ʼaē ʼe ina foaki, ʼe feala ke mulimuli ki te ʼu agaʼi fenua pea ʼe faka tuʼakoi heʼe mole mālama kātoa kiā meʼa fuli. ʼE moʼoni, ko ʼihi agaʼi fenua ʼe mole kovi, pea ʼe kua maʼu e te tagata ʼāfea he faʼahiga poto ʼuhi ko te ʼu meʼa ʼaē neʼe hoko ʼi tona maʼuli. Kae ʼe fua lelei age ki te ʼu ōvi mokā fakaloto mālohiʼi nātou e te ʼu tauhi ōvi ke nātou fakalogo ki te leʼo ʼo Sesu pea mo te ʼu folafola ʼa Sehova, kae mole ko te ʼu manatu ʼa te tagata peʼe ko te ʼu lao ʼa he agaʼi fenua.—Pesalemo 12:6; Tāʼaga Lea 3:5, 6.
ʼE Akoako Nātou e “Te Tagata Kaugana Agatonu Mo Poto”
15. Koteā te gāue ʼaē neʼe foaki e Sesu ki “te tagata kaugana agatonu mo poto,” pea he koʼe ʼe lava lelei te gāue ʼa te kalasi ʼo te tagata kaugana?
15 Ko te ʼu tauhi ōvi ohage ko te ʼapositolo ko Petelo, mo Soane, pea mo Paulo, neʼe nātou kau fuli ki te kūtuga ʼaē neʼe ʼui e Sesu ʼe ko “te tagata kaugana agatonu mo poto.” Ko te kalasi ʼaia ʼo te kaugana, ʼe faʼufaʼu e te ʼu tēhina ʼo Sesu ʼi te kele ʼaē neʼe fakanofo ʼaki te laumālie, ʼaē ʼe nātou ʼamanaki kaugā hau mo Kilisito ʼi selo. (Apokalipesi 5:9, 10) ʼI te ʼu ʼaho fakaʼosi ʼo te tuʼu ʼaenī, mole kei kaugamālie te ʼu tēhina ʼa Kilisito ʼaē kei māʼuʼuli ʼi te kele. Kae ko te gāue ʼaē neʼe tuku age e Sesu ke nātou fai—te faka mafola ʼo te logo lelei ʼo te Puleʼaga ʼi muʼa ʼo te fakaʼosi—kua tuputupu ʼaupito age ʼi te temi nei. Neʼe lava lelei te gāue ʼa te kalasi ʼo te kaugana. Koteā tona tupuʼaga? He neʼe nātou akoako te ʼu tēhina ʼe kau ʼi te “tahi ʼu ōvi” ke nātou tokoni kiā nātou ʼi te gāue faka mafola pea mo te fai ʼo te ʼu ako Tohi-Tapu. (Soane 10:16, MN; Mateo 24:14; 25:40) Iā ʼaho nei, ʼe lahi tāfito te gāue ʼaē ʼe fai e te kūtuga agatonu ʼaia.
16. ʼE akoako feafeaʼi e te kalasi ʼa te kaugana te ʼu tēhina ʼaē neʼe hinoʼi ki te ʼu pilivilesio?
16 ʼE foaki feafeaʼi e te kalasi ʼa te tagata kaugana te akoako ʼaia? ʼI te ʼuluaki sēkulō, neʼe fakagafua ki ʼihi ʼo te kalasi ʼa te tagata kaugana ke nātou akoako pea mo hinoʼi he ʼu tagata taupau ʼi te ʼu kokelekasio, pea ko te ʼu tagata taupau ʼaia neʼe nātou toe akoako te ʼu ōvi. (1 Kolonito 4:17) ʼE toe feiā iā ʼaho nei. Ko te Kolesi Pule—te kiʼi kūtuga ʼo te ʼu tagata ʼāfea ʼaē neʼe fakanofo, te fakafofoga ʼo te kalasi ʼo te tagata kaugana—ʼe nātou fakagafua ki te ʼu tēhina ke nātou akoako pea mo hinoʼi he ʼu tagata faifekau faka minisitelio pea mo he ʼu tagata ʼāfea ʼi te ʼu kokelekasio e lauʼi hogofulu afe tupu ʼi te malamanei kātoa. Tahi ʼaē meʼa, ʼe fakatuʼutuʼu e te Kolesi Pule he ʼu ako moʼo akoako te ʼu tēhina ʼi te ʼu Komite ʼo Te Filiale, mo te ʼu taupau feʼoloʼaki, mo te ʼu tagata ʼāfea pea mo te ʼu tagata faifekau faka minisitelio ke nātou taupau fakalelei te ʼu ōvi. Pea ʼe ʼi ai mo te ʼu tonu ʼe fakahā ʼi te ʼu tohi ʼaē ʼe momoli ki te ʼu kokelekasio, ʼi te ʼu alatike ʼaē ʼe tā ʼi Te Tule Leʼo, pea mo te tahi age ʼu tohi, ohage ko te tohi Organisés pour faire la volonté de Jéhovah.a
17. (a) Neʼe fakahā feafeaʼi e Sesu tana falala ki te kalasi ʼo te tagata kaugana? (b) ʼE fakahā feafeaʼi e te ʼu tauhi ōvi fakalaumālie tanatou falala ki te kalasi ʼo te tagata kaugana?
17 ʼE ʼiloga te falala mālohi ʼa Sesu ki te kalasi ʼo te tagata kaugana, he neʼe ina fakanofo ia ia ki “ona koloa fuape”—tana ʼu gāue fakalaumālie fuli ʼaē ʼe fai ʼi te kele. (Mateo 24:47) ʼE fakahā e te ʼu tauhi ōvi ʼe nātou falala mo nātou ki te kalasi ʼo te tagata kaugana, ʼo nātou mulimuli ki te ʼu fakatotonu mai te Kolesi Pule. ʼE moʼoni, ka akoako e te ʼu tauhi ōvi te tahi ʼu tēhina, ka nātou tali ke akoako nātou e te Folafola ʼa te ʼAtua, pea mo nātou mulimuli ki te ako ʼaē ʼe fai age e te kalasi ʼo te tagata kaugana, pea ʼe nātou fakatuputupu ia te logo tahi ʼo te faga ōvi. ʼE tou loto fakafetaʼi ʼaupito kiā Sehova ʼi tana akoako ia te ʼu tagata ʼaē ʼe nātou taupau fakamalotoloto ia nātou takitokotahi ʼo te kokelekasio faka Kilisitiano.
[Kiʼi nota]
a Neʼe tā e te kau Fakamoʼoni ʼa Sehova
ʼE Koutou Tali Feafeaʼi Anai?
• ʼE akoako feafeaʼi e te ʼu tauhi ōvi fakalaumālie ʼaē kua fotufotuʼa ia te tahi ʼu tēhina?
• He koʼe ʼe mole akoʼi e te ʼu tauhi ōvi tanatou ʼu manatu?
• Neʼe fakahā feafeaʼi e te ʼu tauhi ōvi tanatou falala ʼaē ki te kalasi ʼo te tagata kaugana, pea koteā tona tupuʼaga?
[Paki ʼo te pasina 25]
ʼE akoako e te ʼu tagata ʼāfea te ʼu tēhina tūpulaga ʼi te kokelekasio
[Paki ʼo te pasina 26]
ʼE foaki e “te tagata kaugana agatonu mo poto” he akoako lahi maʼa te ʼu tagata ʼāfea