LESOŊ 6

Woneel bu baax njariñu aaya yi

Yowaana 10:33-36

Li NGA WAR A JÀPP: Bul yem rekk ci jàng benn aaya ba pare jàll ci leneen. Fexeel ba ñi lay déglu xam bu baax ni aaya bi nga jàng ànde ak li ngay wax.

NI NGA KO MËN A DEFE:

Woneel bu baax baat yi gën a am solo. Boo jàngee benn aaya ba pare, woneel bu baax baat yiy wone ponk bi nga bëgg a jàngale. Ni nga ko mën a defe mooy nga waxaat baat yooyu walla nga laaj ñi lay déglu laaj buy tax ñu jàpp baat yooyu.

Su dee sax danga bëgg a waxaat li aaya bi wax ak yeneen baat yu wuute, fexeel ba ñi lay déglu gis bu baax ne ponk bi nga bëgg a jàngale mu ngi jóge ci baat yi nekk ci aaya bi.
Feeñalal bu baax ponk bi nga bëgg a jàngale. Boo waxee li tax nga bëgg a jàng benn aaya, boo ko jàngee ba pare, leeralal ni baat yi gën a am solo ci aaya boobu wonee li tax nga jàng ko.

Booy leeral aaya boo jàng ba pare, bul tëj sa Biibël. Loolu dina tax ñi lay déglu gis ne li ngay wax mu ngi jóge ci aaya bi nga jàng.
Woneel ci lu leer njariñu aaya bi. Moytul a wax ci ay ponk yuy tax li gën a am solo du leer. Jaaral ci li nit ñi xam ba pare ci waxtaan bi ngir seet li nga mën a wax ba njariñu aaya bi leer bu baax ci seen xel.