LESOŊ 18

Defal waxtaan buy yokk xam-xam

1 Korent 9:19-23

LI NGA WAR A JÀPP: Dimbalil ñi lay déglu ñu xalaat bu baax ci li ngay wax. Noonu, bu waxtaan bi jeexee dinañu xam ne jàng nañu lu am njariñ.

Xalaatal ci li nit ñi xam ba pare. Bul waxaat rekk li nit ñi xam ba pare, waaye dimbali leen ñu jàng ci waxtaan bi lu bees.

Booy wax ci li nit ñi xam ba pare, bu ci yàgg, waaye boo leen di jàngal lu bees, gën cee yàgg.
Gëstul te xalaat bu baax ci li nga nar a waxtaane. Bu mënee nekk, waxal ci xew-xew yu ñu bare yëgul walla yu xew tey ngir leeral ponk yi gën a am solo. Te it, seetal bu baax ni loolu ànde ak li nga bëgg a waxtaane.

Booy gëstu ci li nga bëgg a waxtaane laajal sa bopp ay laaj yu mel ni ‘Lan, Lu tax, Kañ, Fan, Kan, ak Naka’. Te booy def waxtaan bi, laajal yenn ci laaj yooyu te tontu ci ngir sa njàngale gën a neex a déglu.
Woneel njariñ bi sa waxtaan mën a amal ñi lay déglu. Woneel njariñ bi nekk ci topp bés bu nekk li Biibël bi wax. Woneel njariñ boobu ci ay fànn, doxalin walla jëf yu nit ñi xam.