യുവജനങ്ങൾ ചോദിക്കുന്നു
ഞാൻ എന്തിനു പ്രാർഥിക്കണം?
ഒരു പഠനറിപ്പോർട്ട്‌ അനുസരിച്ച്‌ അമേരിക്കയിൽ 80% യുവജനങ്ങളും പ്രാർഥിക്കാറുണ്ട്‌. പക്ഷേ അതിൽ പകുതി പേരേ ദിവസവും പ്രാർഥിക്കാറുള്ളൂ. അതുകൊണ്ട്‌ അവരിൽ ചിലർ ഇങ്ങനെ സ്വയം ചോദിക്കുന്നതിൽ അതിശയിക്കാനില്ല: ‘പ്രാർഥിക്കുമ്പോൾ നമുക്ക്‌ ഒരു മനസ്സമാധാനം കിട്ടുമെന്നേ ഉള്ളോ? അതോ അതിൽ കവിഞ്ഞ എന്തെങ്കിലും ആണോ പ്രാർഥന?’
എന്താണ്‌ പ്രാർഥന?
സകലത്തിന്റെയും സ്രഷ്ടാവിനോട്‌ ഭക്തിപൂർവം സംസാരിക്കുന്നതാണ്‌ പ്രാർഥന. അത്‌ എത്ര വലിയ പദവിയാണ്‌! യഹോവ മനുഷ്യരെക്കാൾ എല്ലാ വിധത്തിലും ഉന്നതനാണെങ്കിലും “നമ്മിൽ ആരിൽനിന്നും അകന്നിരിക്കുന്നില്ല.” (പ്രവൃത്തികൾ 17:27) അതെ, ബൈബിൾ മനോഹരമായ ഒരു ക്ഷണം വെച്ചുനീട്ടുന്നു: “ദൈവത്തോട്‌ അടുത്ത്‌ ചെല്ലുക; അപ്പോൾ ദൈവം നിങ്ങളോട്‌ അടുത്ത്‌ വരും.”—യാക്കോബ്‌ 4:8.
നിങ്ങൾക്ക്‌ എങ്ങനെ ദൈവത്തോട്‌ അടുത്ത്‌ ചെല്ലാനാകും?
ഒരു വിധം പ്രാർഥനയിലൂടെയാണ്‌. നിങ്ങൾക്ക്‌ ദൈവത്തോട്‌ സംസാരിക്കാനാകുന്നത്‌ അങ്ങനെയാണ്‌.
മറ്റൊരു വിധം ബൈബിൾ പഠിക്കുന്നതിലൂടെയാണ്‌. ദൈവം നിങ്ങളോടു “സംസാരിക്കുന്നത്‌” ഈ വിധത്തിലാണ്‌.
ഇങ്ങനെ അങ്ങോട്ടും ഇങ്ങോട്ടും ഉള്ള ആശയവിനിമയം, അതായത്‌ പ്രാർഥനയും ബൈബിൾപഠനവും, ദൈവവുമായി ശക്തമായ ഒരു സുഹൃദ്‌ബന്ധം കെട്ടിപ്പടുക്കാൻ നിങ്ങളെ സഹായിക്കുന്നു.
“ദൈവവുമായി സംസാരിക്കുന്നത്‌, അതായത്‌ ഏറ്റവും ഉന്നതനായ വ്യക്തിയുമായി ആശയവിനിമയം ചെയ്യുന്നത്‌, ഒരു മനുഷ്യന്‌ ആസ്വദിക്കാനാകുന്ന ഏറ്റവും വലിയ ഒരു പദവിയാണ്‌.”—ജെറമി.
“എന്റെ ഉള്ളിന്റെ ഉള്ളിലെ വികാരങ്ങൾ യഹോവയോടു പ്രാർഥനയിലൂടെ പറയുന്നത്‌ എന്നെ യഹോവയുമായി അടുപ്പിക്കുന്നു.”—മിറാൻഡ.
ദൈവം പ്രാർഥന കേൾക്കുന്നുണ്ടോ?
ദൈവത്തോടു പ്രാർഥിക്കുകയും ദൈവത്തിൽ വിശ്വസിക്കുകയും ചെയ്യുന്ന ഒരു വ്യക്തിക്കുപോലും, ദൈവം നമ്മുടെ പ്രാർഥനകൾ ശരിക്കും കേൾക്കുന്നുണ്ട്‌ എന്ന കാര്യം ഉൾക്കൊള്ളാൻ ബുദ്ധിമുട്ട്‌ തോന്നിയേക്കാം. എന്നാൽ ബൈബിൾ യഹോവയെ “പ്രാർഥന കേൾക്കുന്നവനേ” എന്നു വിളിക്കുന്നു. (സങ്കീർത്തനം 65:2) “എല്ലാ ഉത്‌കണ്‌ഠകളും ദൈവത്തിന്റെ മേൽ ഇടുക“ എന്നു ബൈബിൾ പറയുന്നു. എന്തുകൊണ്ട്‌? കാരണം ‘ദൈവം നിങ്ങളെക്കുറിച്ച്‌ ചിന്തയുള്ളവനാണ്‌.’—1 പത്രോസ്‌ 5:7.
ചിന്തിക്കാൻ: നിങ്ങൾ നിങ്ങളുടെ സുഹൃത്തുക്കളോടു മിക്കപ്പോഴുംതന്നെ സംസാരിക്കാറുണ്ടോ? ദൈവത്തോടും നിങ്ങൾക്ക്‌ അങ്ങനെ സംസാരിക്കാം. പ്രാർഥനയിൽ യഹോവയുടെ പേര്‌ ഉപയോഗിച്ച്‌ വിളിച്ചപേക്ഷിക്കുക. (സങ്കീർത്തനം 86:5-7; 88:9) “ഇടവിടാതെ പ്രാർഥിക്കുക” എന്ന്‌ ബൈബിൾ പറയുന്നു.—1 തെസ്സലോനിക്യർ 5:17.
“ഞാനും എന്റെ സ്വർഗീയപിതാവും ആയിട്ടുള്ള സംസാരമാണ്‌ പ്രാർഥന. അപ്പോൾ എന്റെ ഹൃദയം മുഴുവൻ ഞാൻ ദൈവമുമ്പാകെ പകരും.”—മോയിസസ്‌.
“എന്റെ മമ്മിയോടോ അടുത്ത കൂട്ടുകാരനോടോ ഒരു കാര്യത്തെക്കുറിച്ച്‌ വിശദമായി സംസാരിക്കുന്നതുപോലെ ഞാൻ യഹോവയോട്‌ കാര്യങ്ങളൊക്കെ വളരെ വിശദമായിത്തന്നെ സംസാരിക്കും.”—കാരെൻ
എനിക്ക്‌ എന്തിനെക്കുറിച്ച്‌ പ്രാർഥിക്കാൻ കഴിയും?
ബൈബിൾ പറയുന്നു: “ഒന്നിനെക്കുറിച്ചും ഉത്‌കണ്‌ഠപ്പെടേണ്ടാ. കാര്യം എന്തായാലും പ്രാർഥനയിലൂടെയും ഉള്ളുരുകിയുള്ള യാചനയിലൂടെയും നിങ്ങളുടെ അപേക്ഷകൾ നന്ദിവാക്കുകളോടെ ദൈവത്തെ അറിയിക്കുക.” (ഫിലിപ്പിയർ 4:6)
അതിനർഥം നിങ്ങളുടെ പ്രശ്‌നങ്ങളെക്കുറിച്ച്‌ പ്രാർഥിക്കുന്നതിൽ കുഴപ്പമില്ലെന്നാണോ? അതെ. ബൈബിൾ പറയുന്നു: “നിന്റെ ഭാരം യഹോവയുടെ മേൽ ഇടുക. ദൈവം നിന്നെ പുലർത്തും.” (സങ്കീർത്തനം 55:22)
എന്നാൽ, ദൈവത്തോടുള്ള പ്രാർഥനയിൽ നിങ്ങളുടെ പ്രശ്‌നങ്ങളെക്കുറിച്ച്‌ മാത്രമല്ല മറ്റു ചില കാര്യങ്ങളെക്കുറിച്ചും സംസാരിക്കേണ്ടതുണ്ട്‌. “എന്നെ സഹായിക്കേണമേ എന്നു മാത്രം യഹോവയോട്‌ പറയുന്ന സുഹൃദ്‌ബന്ധം ഒരു നല്ല സുഹൃദ്‌ബന്ധമായിരിക്കില്ല,” ചാൻറ്റിലി എന്ന യുവപ്രായക്കാരി പറയുന്നു. “നമ്മൾ ആദ്യം ദൈവത്തോടു നന്ദി പറയണമെന്നാണ്‌ എനിക്കു തോന്നുന്നത്‌. ദൈവത്തിന്‌ നന്ദി കൊടുക്കാനുള്ള കാര്യങ്ങളുടെ നമ്മുടെ പട്ടിക വളരെ നീണ്ടതായിരിക്കണം.”
ചിന്തിക്കാൻ: നിങ്ങളുടെ ജീവിതത്തിലെ ഏതൊക്കെ കാര്യങ്ങൾക്ക്‌ നിങ്ങൾ നന്ദി പറയും? ഇന്ന്‌ യഹോവയ്‌ക്കു നന്ദി കൊടുക്കാൻ കഴിയുന്ന മൂന്നു കാര്യങ്ങൾ എന്തൊക്കെ?
“വളരെ ചെറിയ കാര്യത്തിൽപ്പോലും, ഒരു മനോഹരമായ പൂവ്‌ കാണുമ്പോൾപ്പോലും, യഹോവയ്‌ക്ക്‌ നിറഞ്ഞ ഹൃദയത്തോടെ നന്ദി നൽകാൻ നമ്മൾ പ്രേരിതരാകും.”—അനിത.
“ദൈവത്തിന്റെ സൃഷ്ടികളിൽ നിങ്ങൾക്കു മതിപ്പു തോന്നിയ കാര്യങ്ങളെക്കുറിച്ച്‌ ആഴത്തിൽ ചിന്തിക്കാൻ കഴിഞ്ഞതുകൊണ്ടോ അല്ലെങ്കിൽ നിങ്ങളെ വളരെയധികം സ്‌പർശിച്ച ഒരു ബൈബിൾവാക്യത്തിനു വേണ്ടിയോ യഹോവയ്‌ക്കു നന്ദി പറയാൻ കഴിയും—ബ്രയാൻ.