Ihlabathi Elingenazifo
Ingcali yokuthintelwa kwezifo uGqr. Dan Gordon ithi: “Isifo seengcongconi sinobuqili kakhulu kunokuba ubani esenokuthelekelela. Sisazama ukufumana isicombululo saso.”
UBARRY BLOOM weZiko Lonyango likaHoward Hughes uthi: “Asikabi nalwazi lwaneleyo ngemetabolism [yentsholongwane yesifo sephepha]. Akukho yeza liluncedo esilazi ngokupheleleyo. Ngokwenene asilazi.”
Isithethi seZiko Lokuthintela Izifo, sibona ukusilela kwemigudu “yesini esikhuselekileyo” ukuze kuthintelwe igcushuwa sikhalaza ngelithi: “Ulwazi aluyiguquli ihambo.” Njengokuba le nkcazelo ingasentla ibonisa, umlo nxamnye nesifo seengcongconi, isifo sephepha negcushuwa ubuzisa ukatyo lodwa. Ngaba kwikamva kuya kubakho amachiza aphucukileyo okunyanga ezi zifo?
Mhlawumbi. Kodwa nangona umntu enako ukoyisa izifo ezithile aze ezinye enze kube lula ukuphila nazo, kukho isizathu esisisiseko esibangela angabi nako ukuphumelela ngokupheleleyo kumlo nxamnye nezifo.
Imvelaphi Yezifo
Umlo nxamnye nezifo ungaphezulu kunokulwa nje nezifunxi-gazi neentsholongwane. IBhayibhile ichaza ukuba izifo zabakho ngenxa yesono esasizuz’ ilifa kubawo wethu ongumntu wokuqala. (Roma 5:12) Isono asizange sanele nje ukonakalisa ulwalamano lomntu noMdali wakhe kodwa sakwakhokelela kubuthathaka bengqondo, iimvakalelo nomzimba wakhe. Ngaloo ndlela, kunokuba luhlale lufezekile kwiparadisi esemhlabeni, uluntu lwaye alwafezeka lwaza lwabuthathaka lwada lwafa.—Genesis 3:17-19.
Nokuba angasebenzisa awona mayeza asemgangathweni, umntu akanakuyiguqula imeko akuyo yesono okanye imiphumo yaso. Le ngxaki ilushiya uhlanga loluntu ‘lululanyiselwe kokungelutho [“lusikelwe umda,” Phillips].’ (Roma 8:20) Yaye oku kuyinyaniso kumba wokoyisa izifo. Inkqubela yokusindisa ubomi kwezonyango ngokufuthi iphazanyiswa kukonakala koluntu okusongel’ ubomi.
UJerold M. Lowenstein ubhala athi kwiphephancwadi eliyiDiscover: “Sisengxakini. Okukhona siphumelela ekulweni nezifo nasekwandiseni ubomi bomntu, kokukhona kuya kubakho amathuba okuphela kobomi bethu ngokukhawuleza” ngenxa yokwanda kwenani labemi nokonakaliswa kwemeko-bume.
Unyango Lokwenene
Unyango lokwenene lwezifo aluveli mntwini kodwa luvela kuMdali. Kungenxa yoko umdumisi wavakalisa oku: “Musani ukukholosa ngamanene, ngonyana womntu, yena ungenalo usindiso.” IBhayibhile ihlabela mgama yenjenje: “Hayi, uyolo lwalowo . . . ulinde kuYehova uThixo wakhe: kuMenzi wezulu nomhlaba.” (INdumiso 146:3, 5, 6) NguThixo kuphela onamandla okukuncothula neengcambu zako ukugula. Yaye ngokutsho kweBhayibhile, unenjongo yokwenjenjalo. Elo xesha alifikanga ligalelekile.
UYesu Kristu waxela kwangaphambili ukuba ‘iindyikitya zokufa’ zaziya kuba bobunye ubungqina bokuba siphila ekuqoshelisweni kwale nkqubo ikhoyo yezinto nokuba sisemgubasini wehlabathi elitsha. Kwakhona waxela kwangaphambili ngokwanda kweemeko ezandisa izifo, njengemfazwe, indlala nolwaphulo-mthetho.—Luka 21:11; Mateyu 24:3, 7, 12; 2 Timoti 3:1-5, 13.
Xa wayesemhlabeni, uYesu waphilisa ngokungummangaliso abantu abagulayo, ngaloo ndlela eqalisa ukuzalisekisa esi siprofeto: “Uzithabathele phezu kwakhe izifo zethu, wathwala umvandedwa wethu.” (Isaya 53:4; Mateyu 8:17) Ngaloo ndlela wayebonisa ngomlinganiselo omncinane oko uThixo anenjongo yokukufeza kungekudala ehlabathini lonke. IBhayibhile ithi ngoYesu: “Kweza kuye izihlwele ezininzi, zinazo iziqhwala, iimfama, izidenge, izilima, nabanye abaninzi, zababeka phantsi ezinyaweni zikaYesu; wabaphilisa; zada zamangaliswa izihlwele ezo, zakubona izidenge zithetha, izilima ziphilile, iziqhwala zihamba, neemfama zibona.”—Mateyu 15:30, 31.
Abantu ababebukele loo mimangaliso bamzukisa uThixo kuba babeqonda ukuba nguye owayenika uYesu amandla okwenza loo mimangaliso. Amandla uYesu awawafumanayo ayefana nalawo ayesetyenziswe ekudaleni indalo eyoyikekayo iphela. Yayingumoya oyingcwele kaThixo, amandla akhe asebenzayo.—Genesis 1:1, 2; ISityhilelo 4:11.
Umprofeti uIsaya wabhala ngexesha apho ‘engasayi kuthi ummi wakhona, Ndiyafa.’ (Isaya 33:24) Yaye ISityhilelo 21:4, 5 sivakalisa oku: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile. Waza lowo uhleli phezu kwetrone wathi, Uyabona, izinto zonke ndizenza ntsha.”
IBhayibhile ibonisa ukuba siphila kwixesha leenguqulelo. (1 Yohane 2:15-17) Kungekudala eli hlabathi, nokugula, iintlungu, ulwaphulo-mthetho, ugonyamelo nokufa okukulo zonke ezo zinto ziya kuphoswa kwelokulibala. UThixo uya kulishenxisa nazo zonke iintlekele zalo, livulel’ umtyhi ihlabathi elitsha kulo mhlaba, apho “kumi ubulungisa.” (2 Petros 3:11-13) UYesu walibiza elo hlabathi litsha lizayo ngokuthi ‘yiParadisi,’ ekubeni liya kufana neParadisi yamandulo eyayisemyezweni wase-Eden, kodwa le yona iza kuba sehlabathini lonke.—Luka 23:43; Genesis 2:7, 8.
Ngaloo ndlela amaKristu anethemba, kungekhona elonyango lokomzuzwana, kodwa elokukhululwa ngokusisigxina kukungafezeki, kwizifo nasekufeni. Akhangele phambili kwinzaliseko epheleleyo yeli dinga likaThixo: “NdinguYehova, igqirha lakho [“okuphilisayo,” NW].” “Ndisisuse isifo phakathi kwakho.”—Eksodus 15:26; 23:25.
[Imifanekiso ekwiphepha 9]
UThixo wanika uYesu amandla okuvusa abafileyo nawokuphilisa abagulayo