Kwenzeke Ntoni “Kumsebenzi Wobomi Bam Bonke?”

UGRAHAMa wayesebenzela inkampani enkulu yaseOstreliya kangangeminyaka engama-37. Xa wayengaphezu kwama-50 eminyaka ubudala, ngequbuliso wachazelwa ukuba kwisithuba nje seeveki ezimbalwa umsebenzi wawuza kumphelela. Sinokuyiqonda indlela awayebhideke ngayo, othukile kwaye ethe khamnqa ngempilontle yakhe yekamva. ‘Kwenzeke ntoni “kumsebenzi wobomi bam bonke,” ebendicinga ukuba ndiya kuwenza de ndifumane umhlala-phantsi?’ Wazibuza loo mbuzo uGraham.

Kambe ke, ukuphulukana nomsebenzi akuyonto intsha. Noko ke, ukuxhaphaka kokuphulukana nomsebenzi ehlabathini lonke kuyinto entsha kubaqeshwa bezi mini. Ngokungathandabuzekiyo, kukho izizathu ezininzi zokuphulukana nomsebenzi, kodwa esona sixhaphakileyo ludendo. Yintoni udendo, yaye lubekho njani?

Ukutshintsha Kwemeko Yomsebenzi

Imeko yezoqoqosho namhlanje ichaphazela ihlabathi lonke. Oku kwabonakala ingakumbi eUnited States ngasekupheleni kweminyaka yee-1970 xa iinkampani zafumanisa ukuba abathengi abaninzi babethenga iinqwelo-mafutha, izinto zombane, nezinye izinto eziveliswa ngaphesheya kolwandle.

Ngelokuzama ukukhuphisana nokunciphisa iindleko zemveliso, iinkampani zaseMerika zaqalisa ukunciphisa inani labasebenzi nokuphucula iindlela nezixhobo zokusebenza. Le ndlela yayisetyenziselwa ukunciphisa kwathiwa ludendo. Xa kuchazwa le ndlela kuthiwa “kukunciphisa inani labasebenzi bombutho othile, ngokuqhelekileyo ngokubayekisa ngezizathu ezahlukeneyo, ukubanika umhlala-phantsi ngaphambi kwexesha, ukubatshintsha nokuyeka ngenxa yokugula nokufa.”

Kangangeminyaka ibingabo basebenza ngezandla ababedendwa kakhulu. Kodwa ngasekupheleni kweminyaka yee-1980 nasekuqaleni kweminyaka yee-1990, nabo basebenza eziofisini bafakwa kule mbo ingakumbi abo bakwizikhundla eziphakathi zokulawula. Akuzange kube kudala le ngxaki yaquka onke amazwe ahambele phambili kwezoqoqosho. Yaye njengoko babuqhubeka ubunzima kwezoqoqosho, oorhulumente nabanye abaqeshi bafuna ukunciphisa iindleko ngokuqhubeka bedenda.

Abasebenzi abaninzi abasenamisebenzi ikhuselekileyo. Elinye igosa lombutho wabasebenzi lithi: “Abantu abaye basebenza ngokunyaniseka kangangeminyaka eli-10, eli-15, nengama-20 baye bazibona begxothwa emisebenzini.” Kwincwadi yakhe ethi Healing the Downsized Organization, uDelorese Ambrose uthi igama elithi “indoda enyanisekileyo embuthweni” ngowe-1956 lalichaza umqeshwa wokwenene. Wongezelela ngelithi: “Enoba wayesebenza njengomsebenzi ophantsi kuloo mbutho okanye wayengumphathi, wayephosa zonke iimali zakhe, ubomi bakhe, nengqibelelo yakhe kulo mbutho ukuze afumane ukhuseleko—umsebenzi wobomi bakhe bonke. Ngokucacileyo esi sivumelwano siye saphulwa kwimibutho yakutshanje.”

Izigidi zabasebenzi ehlabathini lonke ziye zaphulukana nemisebenzi yazo ngenxa yodendo, yaye oku kuchaphazele zonke iindidi zabaqeshwa. EUnited States nje kuphela, kuye kwachaphazeleka inani elivakalayo labaqeshwa, yaye izigidi ngezigidi ziye zaphulukana nemisebenzi yazo esisigxina. Kuye kwakho udendo olufanayo nakwamanye amazwe. Kodwa ezi nkcukacha zizodwa aziyichazi intlungu ebehlelayo.

Imiphumo Ebuhlungu

UGraham, okhankanywe ekuqaleni kweli nqaku, wathi: “Ingqondo ichaphazeleka ngokwenene.” Wakuthelekisa ukugxothwa kwakhe “nokugula okanye ukonzakala emzimbeni.”

Xa ukunyaniseka kungavuzwa, abantu baziva bengcatshiwe kukuba ukuzincama kwabo besebenzela inkampani kubonakala kungaxabisekanga. Baphelelwa lithemba, ingakumbi xa amagosa aphezulu ehlawulwa imali eninzi ngokudenda abasebenzi benkampani. Ukongezelela, ukuphela ngequbuliso kwengeniso ethe rhoqo kubangela lo mntu ungaphangeliyo abe nobunzima bokuhlawula indlu, amanye nje amatyala, ukunyamekela impilo yamalungu entsapho yakhe neemali zesikolo nokuzinyamekela, ukuzonwabisa nokunyamekela izinto zakhe. Oku kubangela ukuba azive ephelelwe lithemba yaye engaxabisekanga.

Ekubeni umsebenzi osisigxina nonentsingiselo unegalelo kakhulu ekuziveni uxabisekile, khawucinge nje ngemiphumo ebuhlungu yokungaphangeli kwabo baneziphene, abangengomagcisa okanye abasele bekhulile. Uhlolisiso olwenziwa eOstreliya lwatyhila ukuba abantu abaphakathi kweminyaka engama-45 nengama-59 phantse babengamaxhoba okuba zizisulu zokugxothwa. Kodwa, abantu abakobu budala bakufumanisa kunzima ukulwamkela olu tshintsho.

Ngaba ikho enye indlela ekunokwenziwa ngayo? Umsebenzi ongesosigxina okanye umsebenzi ohlawula imalana engephi ngokuqinisekileyo unokuba luncedo kubantu abangaphangeliyo. Noko ke, oko kunokubangela umntu ukuba aphile kumgangatho ophantsi. Yaye kuye kwafunyaniswa ukuba kuphela bamalunga nesithathu abasebenzi abadendiweyo abathi ekugqibeleni bafumane umsebenzi ohlawula umvuzo oncumisayo njengomsebenzi wabo wokuqala. Oku kubangela ubunzima kwindlela intsapho ephila ngayo.

Nemisebenzi ekhoyo ayisabangeli uxolo lwengqondo. Kuba ukwazi ukuba ngenye imini usenokuphelelwa ngumsebenzi kubangela intlungu. Incwadi ethi Parting Company ithi: “Ukucinga ngokuphulukana nomsebenzi kufana nokukhetha eyona ndlela ibhetele yokuzinyathelisa ngelori. Akukwazi ukuvavanya nezona ngcamango zobuchule, kuba ngokuqhelekileyo akuyiboni le lori—okanye oku kugecwa—de kube kwenzekile.”

Ukungaphangeli kuluchaphazela njani ulutsha? Emva kokuba isebe lezemfundo nenzululwazi lenze uhlolisiso, lafumanisa oku: “Eyona nto ibonisa ukuba kukhuliwe kukufumana umsebenzi osisigxina, nto leyo ephawula ukuqalisa kobuntu obukhulu ‘bokwenene,’ kwihlabathi labantu abakhulu, ngokwendlela yabantu abakhulu, nto leyo ehambisana nokuzimela geqe ngokwezimali.” Ngoko ukuba abantu bavakalelwa kukuba ukuqeshwa kubonisa ukuqalisa kobuntu obukhulu, ukungaphangeli kunokulukhathaza ulutsha.

Ukuphumelela Nangona Ungasebenzi

Ukuhlangabezana nokuphelelwa ngumsebenzi kuye kwafaniswa nokuhamba kwindawo ekutyalwe kuyo izigcayiseli. Incwadi ethi Parting Company ichaza iimvakalelo ezixhaphakileyo ezinjengomsindo, usizi, uloyiko, udano nokuzisizela. Kunzima ukujamelana nezi mvakalelo. Umbhali wayo uthi: “Unikwe isabelo esinzima—sokugqiba ngekamva lakho. Akuzicelelanga esi sabelo, mhlawumbi awazi ukuba mawusisingathe njani, yaye ngequbuliso uzibona kungekho mntu ukuncedisayo kuso.” Yaye eyona nto inzima bajamelene nayo abantu abangaphangeliyo kukuchaza kwiintsapho zabo ukugxothwa kwabo ngequbuliso.

Noko ke, kukho iindlela ezisebenzisekayo zokuhlangabezana nengxaki yokudendwa. Inyathelo lokuqala kukuhlisa indlela ophila ngayo ngokukhawuleza ngokuceba uze uphile ubomi obulula kunobo obubuqhelile ngaphambili.

Nanga amanye amacebiso anokukunceda uhlangabezane nale meko, enoba akayincedi kwaphela. Okokuqala, yazi into yokuba ukuphulukana nomsebenzi ungalindelanga yinto eyenzekayo kule mihla. Ngoko enoba umdala okanye unamava kangakanani, ceba kusengaphambili ukuba kusenokwenzeka loo nto ebomini bakho.

Okwesibini, kulumkele ukwenza amatyala amakhulu ngezinto ezingenakuthanani kangako nento edliwayo neyambathwayo. Phila ngokuvisisana nemali onayo, yaye musa ukucinga ukuba ungahlawula amatyala ngemali oqikelela ukuba ungayifumana xa unyuselwe okanye xa kukho uchatha kumvuzo wakho. Isaci esikhoyo namhlanje sithi kusenokungabikho nto yokuthembela kwikamva.

Okwesithathu, cinga ngendlela onokubenza bube lula ngayo ubomi bakho uze unciphise izinto obuza kuzenza ngemali. Oku kuquka ukwahlukana namatyala ezinto eziza kuphazamisana nokuphila ubomi obulula, nobufanelekileyo.

Okwesine, cinga ngosukelo lobomi bakho, lokomoya nolokuziphilisa, uze uluhlaziye. Unokwandula uhluze zonke izigqibo ezinxamnye nosukelo lwakho uze ujonge ukuba zinokubuchaphazela njani ubomi bakho.

Okokugqibela, musa ukulangazelela indlela abaphila ngayo abantu abangakukhathalelanga ukuba noqoqosho, kuba usenokuqalisa ukufuna izinto abanazo uze utsalelwe kwindlela yabo yokuphila.

La ngamacebiso ambalwa asenokunceda wena nentsapho yakho ningabi namaxhala amaninzi abangelwa yindlela yokuphila ekhoyo nesibatha sokuthembela ngobutyebi obungaqinisekanga kwihlabathi elingaqinisekanga.

Owayesakuphangela kwibhanki yotyalo-mali uFelix Rohatyn, ucatshulwa esithi: “Kukho into ephosakeleyo kwibutho lethu le yokuba ukungaphangeli komnye umntu kube bubutyebi bomnye umntu.” Kunjalo ke nokuphosakala kwale nkqubo eza kuthi kungekudala ithatyathelwe indawo lihlabathi apho ibinzana elithi “umsebenzi wobomi bam bonke” liya kuba nentsingiselo ngaphezulu lee kokuba kunjalo ngoku.—Isaya 65:17-24; 2 Petros 3:13.

[Umbhalo osemazantsi]