Unyango Olukhethayo

KWINCWADI yakhe ethetha ngonyango olulolunye, uGqr. Isadore Rosenfeld wabethelela le ngongoma: “Nawuphi na umqathango okanye uncedo lwezempilo olunikelwa kudidi oluthile lwabantu abaqinisekisiweyo ukuba luya ‘kubanceda’ lusenokuyiphucula imeko kangangamashumi amahlanu ekhulwini.”

Oku kubizwa ngokuba yiplacebo effect, nto leyo ethetha ukuba kwanepilisi yeswekile inokuba luncedo ukuba umntu lowo uyakholelwa ukuba inokumnceda. Iplacebo effect inokuthomalalisa naziphi na iimpawu, kuquka iintlungu, ukuba nesicaphucaphu, ukudinwa, ukuba nesiyezi, ukuxhalaba noxinezeleko. Sityhila ntoni esi sibakala?

Phakathi kwezinye izinto, ibonisa ukuba ukuthembela kulo naluphi na unyango olufumanayo, kwiimeko ezininzi, kubalulekile ukuze uphile. Kwangaxeshanye, kunokuba likhondo lobulumko ukukhangela uze ubone ukuba uhlobo oluthile lonyango lunyanga oyena nobangela wesigulo kungekuphela nje iimpawu zaso. Oku kunokwenziwa ngokukhangela imiphumo yonyango, kusetyenziswa iindlela ezinjengovavanyo lwelebhu neX reyi.

Kodwa, kukho okungakumbi umntu anokukwenza xa ekhetha uhlobo oluthile lonyango lwezamayeza.

Amanyathelo Abalulekileyo Onokuwathabatha

Kububulumko ukwenza uphando ngaphambi kokwenza isigqibo. Zibuze le mibuzo. Yiyiphi imiphumo endimele ndiyilindele? Ziyintoni iingenelo, iingozi, neendleko endimele ndizilindele nexesha eliya kuthatyathwa lolo nyango? Thetha nabantu ababekhe banyangwa ngale ndlela ufuna ukunyangwa ngayo. Babuze enoba lwabanceda kusini na. Noko ke, khumbula ukuba, into oyibaliselweyo ingakulahlekisa.

Uhlobo lonyango olungaqhelekanga lusenokungacebiseki ukuba lubangela umntu abekele ecaleni unyango olunembali yokunceda, kwanokuba umkhamo wokuphumelela konyango oluqhelekileyo usenokuba nganeno. Ubungqina bomonakalo onokubangelwa koko bubonakala kwingxelo ekwiThe New England Journal of Medicine. Eli phephancwadi lichaza ukunwenwa komhlaza kubaguli ababini abaselula abalayo ukusebenzisa unyango oluqhelekileyo ngoxa besebenzisa unyango olulolunye. Omnye waba baguli wafa.

Abantu abayimilwelwe okanye abanezigulo ezibabeka ekhukweni lokufa bamele ngobulumko bahlale bethe qwa kwisibakala sokuba basenokuba ngamaxhoba amabhedengu awenza amayeza ngobuqhetseba. Lumkela nayiphi into ekuthenjiswa ukuba iya kunyanga izigulo eziliqela. Umzekelo wakutshanje wawuquka ivithamini entsha ekwakusithiwa “iye yanceda ekupheliseni yonke into ukususela kwiingxaki zokuphefumla nokuphelelwa ngamandla nakwizigulo ezibulalayo.” Xa yayihlolisiswa le “vithamini” kwafunyaniswa ukuba ngamanzi nje anetyuwa.

Alithandabuzeki elokuba ezinye iindlela zonyango olulolunye zinokuba luncedo ekuphuculeni impilo. Noko ke, yiba nolindelo olusengqiqweni. Kububulumko ukuzimisela ukutya izidlo ezisempilweni, ulale ngokwaneleyo, wenze umthambo ngokwaneleyo, uze ulumke xa ukhetha unyango lwezamayeza.

Okuye Kwafunyaniswa

Lizicacele elokuba, alukho unyango olwenziwe ngumntu olunokuphelisa ukugula nokufa ekugqibeleni. Oku kubangelwa kukuba ezi zinto sizizuze ilifa kumzali wethu wokuqala uAdam. (Yobhi 14:4; INdumiso 51:5; Roma 5:12) Uninzi lonyango lwezamayeza—enoba lunjani—mhlawumbi lusenokuba luncedo, kodwa lusisithomalalisi nje esinokwandisa ubomi kuze ke kube mnandi kangangethuba elithile. Noko ke, kukho unyango oluqinisekileyo kwiingxaki zempilo engekho buthathaka yaye izigidi sele zilufumanisile.

Olo nyango luvela kuMdali wethu uYehova uThixo, oyena Gqirha Mkhulu. Ngokuba nokholo kuye nakwidini lentlawulelo loNyana wakhe, uYesu Kristu lokuxolela izono, uya kunandipha impilo efezekileyo nobomi obungunaphakade kwihlabathi elingenazifo! (Mateyu 20:28) IBhayibhile ithembisa ukuba kwelo hlabathi litsha, “akakho ummi wakhona oya kuthi: ‘Ndiyagula.’”—Isaya 33:24.

[Amagama acatshulweyo akwiphepha 12]

Izigidi ziye zafumanisa ekuphela kwethemba eliqinisekileyo lempilo efezekileyo