Lisingise Phi Eli Hlababathi?

KWIMINYAKA eli-10, engama-20 okanye engama-30 ezayo kuya kube kunjani emhlabeni? Sithi nyokoxo luloyiko xa sicinga ngendlela abaxhaphake ngayo ngoku abagrogrisi. Ubugcisa buhambela phambili. Ukurhwebelana kwamazwe omhlaba kuye kwabangela amazwe amaninzi axhomekeka kwamanye. Ngaba iinkokeli zomhlaba ziya kuze zimanyane zize zibangele ukuba sibe nekamva elonwabisayo? Abanye abantu bathi iza kwenzeka loo nto, zinethemba lokuba ngonyaka wama-2015, iinkokeli ziza kuphelisa ubuhlwempu nendlala, ukusasazeka kwesifo sikaGawulayo, baze banciphe ngesiqingatha abantu abangenawo amanzi acocekileyo, izindlu zangasese nokuthuthwa kwenkunkuma.—Bona ibhokisi ethi: “Ukuba Nethemba Noko Kunokwenzeka Ngokwenene.”

Noko ke, amaxesha amaninzi abantu badla ngokuqatyw’ intshongo emehlweni xa kuthethwa ngoko kuza kwenzeka kwixesha elizayo. Ngokomzekelo, kumashumi eminyaka edluleyo enye ingcali yathi, ngowe-1984 amafama aza kube elima elwandle ngeetrekta ezihamba ngaphantsi kwamanzi; enye yathi, ngowe-1995 iimoto ziya kube zinekhompyutha ethintela iingozi; yaza enye yathi abantu abamalunga nama-50 000 baza kube behlala yaye besebenza esibhakabhakeni. Kambe ke, abo babesenza ezo zithembiso sekungathi ngoku ngebengazange bakhwaze bengekaphumi ehlathini. Enye intatheli yabhala: “Ukuhamba kwexesha kuye kwangqina ukuba abona bantu bakrelekrele basenokuba zizidenge.”

“Imaphu” Yokusikhokela

Abantu baqhubeka befunisela ngoko kuya kwenzeka kwixesha elizayo, kodwa maxa wambi basuka nje baphuphe kunocinga ngezinto zokwenene. Sinokuthembela kubani onokusichazela ngendlela echanileyo oko sikuphathelwe likamva?

Khawuqwalasele lo mzekelo. Khawuzibone uhamba ngebhasi usiya kwindawo ongazange uye kuyo ngaphambili. Ngenxa yokuba le ndawo ungayiqhelanga, uziva ungakhululekanga. Uyazibuza: ‘Ndiphi apha?’ ‘Ngaba le bhasi iya kule ndawo ndiya kuyo? Kukude kangakanani apho ndiya khona?’ Ngokujonga emaphini echanileyo uze ujonge nemiqondiso yendlela ngefestile, iyaphenduleka imibuzo onayo.

Namhlanje abantu abaninzi baxhalabe ngendlela efanayo kuba becinga ngekamva. Bayazibuza: ‘Sisingise phi?’ ‘Ngaba ngokwenene ihlabathi liya kuze libe seluxolweni? Ukuba kuya kuba njalo, kuza kwenzeka nini oko?’ IBhayibhile ifana nemaphu enokusinceda ukuphendula loo mibuzo. Ngokuyifunda ngokucokisekileyo—nokujonga “efestileni” yethu, okwenzekayo ehlabathini—sinokufunda okuninzi ngexesha esiphila kulo noko kuza kwenzeka kwixesha elizayo. Noko ke, kufuneka sazi indlela ezaqala ngayo iingxaki zethu.

Isiqalo Esibi

IBhayibhile isixelela ukuba xa uThixo wadala indoda nebhinqa lokuqala babefezekile, yaye wababeka kummandla oyiparadesi. UAdam noEva babedalelwe ukuba baphile ngonaphakade—kungekhona nje iminyaka engama-70 okanye engama-80. Wathi uThixo kubo: “Qhamani, nande, niwuzalise umhlaba nize niwoyise.” Injongo kaThixo yayikukuba uAdam noEva nenzala yabo bayandise iParadesi ukuya kutsho eziphelweni zomhlaba.—Genesis 1:28; 2:8, 15, 22.

UAdam noEva bamvukela uThixo. Oko kwaphumela ekubeni baphulukane nekhaya labo eliyiParadesi. Ukongezelela, ngokuthe ngcembe baqalisa ukuwohloka emzimbeni nasengqondweni. Suku ngalunye, uAdam noEva baya besondela ngokusondela ekufeni. Yintoni eyabangela loo nto? Ngokuvukela kwabo uMdali wabo, benza isono, yaye “umvuzo isono esiwuhlawulayo kukufa.”—Roma 6:23.

Ekugqibeleni uAdam noEva bafa kodwa ngaphambi koko baba noonyana neentombi. Ngaba abo bantwana babeza kuyizalisekisa injongo kaThixo? Akunjalo, kuba nabo bakuzuza njengelifa ukungafezeki kwabazali babo. Kaloku, ukususela kwesinye isizukulwana ukusa kwesinye, yonke inzala ka-Adam iye yazuza isono nokufa njengelifa. Nathi sinesono. IBhayibhile ithi: “Kanye njengokuba isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”—Roma 3:23; 5:12.

Ukwazi Ixesha Esiphila Kulo

Ukuvukela kuka-Adam noEva kwaba sisiqalo sobomi obunzima obuye baqhubeka bunjalo ukuza kuthi ga kumhla wethu. Omnye umbhali weBhayibhile uthi, uluntu luye ‘lwalulanyiselwa kokuphuthileyo.’ (Roma 8:20) Oku kuyichaza kakuhle indlela abantu abaye batsala nzima ngayo! Inzala ka-Adam iquka izazinzulu ezikrelekrele, oogqirha abaziingcaphephe, neengcungela zobugcisa. Sekunjalo, akukho namnye kubo onokuzisa uxolo ehlabathini nonokubangela abantu babe sempilweni entle, nto ezo uThixo azithembisa uluntu.

Imvukelo ka-Adam noEva ichaphazela umntu ngamnye. Ngokomzekelo, sonke sikhe siphathwe ngokungekho sikweni, soyika ulwaphulo-mthetho, sikhe sibe sentlungwini yokuba nesifo esinganyangekiyo, okanye sikhe sikhathazeke ngenxa yokuba sifelwe lilungu lentsapho okanye umhlobo. Sithi sonwabile, kubekho nje into ephelisa olo lonwabo. Nangamaxesha olonwabo, ubomi bethu bufana noko osolusapho wamandulo uYobhi awakuchazayo xa wathi: “Umntu . . . unobomi obufutshane obuzele kukuphazamiseka.”—Yobhi 14:1.

Xa sicinga apho sisuka khona nemeko ebubugxwayiba esikuyo ngoku, ikamva linokukhangeleka limfiliba. Kodwa iBhayibhile iyasiqinisekisa ukuba uThixo akasoze ayivumele le meko iqhubeke ngonaphakade. Injongo yakhe yokuqala ngoluntu iza kuphumelela. (Isaya 55:10, 11) Sinokuqiniseka njani ukuba oku kuza kwenzeka kungekudala?

Ngokutsho kweBhayibhile, ngoku sikumaxesha anzima abizwa ngokuba ‘yimihla yokugqibela.’ (2 Timoti 3:1) Eli binzana alithethi kuthi kuza kutshatyalaliswa uMhlaba nayo yonke into ephilayo kuwo. Kunoko, lithetha ‘ukupheliswa kwenkqubo yezinto’ nokupheliswa kweemeko ezisibangela singonwabi. (Mateyu 24:3) IBhayibhile isichazela ngeziganeko nohlobo lwabantu abaza kube bexhaphakile ebudeni bemihla yokugqibela. Phawula ezinye zazo kwibhokisi ekwiphepha 8, uze ujonge “efestileni” imeko yehlabathi. Imaphu yethu, iBhayibhile, isinceda silazi ixesha esiphila kulo njengokuba sikufuphi ekuphelisweni kwale nkqubo yezinto. Kodwa yintoni eza kwenzeka kungekudala?

Oko Sikuphathelwe Likamva

Emva nje kokuba uAdam noEva bevukele, uThixo waqalisa ukutyhila injongo yakhe ngelungiselelo lokumisela uBukumkani “obungenakuze bonakaliswe.” (Daniyeli 2:44) Obo Bukumkani, abaye abantu abaninzi bafundiswa ukuba babuthandazele, kumthandazo ngokuqhelekileyo obizwa ngokuba nguMthandazo weNkosi, buya kuzisela uluntu iintsikelelo ezingathethekiyo.—Mateyu 6:9, 10.

UBukumkani bukaThixo abuyongcamango nje, into nje esentliziyweni. Ngurhulumente wokwenene, olawula esezulwini noza kulawula emhlabeni. Khawucinge nje ngoko uThixo athembisa ukukwenzela uluntu esebenzisa uBukumkani bakhe. IBhayibhile ithi uThixo uya kuqala ‘onakalise abo bonakalisa umhlaba.’ (ISityhilelo 11:18) Uya kubenzela ntoni abo bamthobelayo? Amazwi akhe abhaliweyo athi, uya “kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona.” (ISityhilelo 21:4) Ngaba ukho umntu onokwenza ezi zinto? Kuphela nguThixo onokusibuyisela kwimeko awayefuna sibe kuyo kwasekuqaleni.

Unokuzuza njani kwiintsikelelo eziza kuziswa buBukumkani bukaThixo? KuYohane 17:3 kuthiwa: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” AmaNgqina kaYehova anenxaxheba kwinkqubo yokufundisa eyenziwa emhlabeni wonke enceda abantu ukuba bafumane ulwazi. Ashumayela kumazwe anokuba ngama-230, yaye iincwadi zawo zipapashwa ngeelwimi ezingaphezu kwezingama-400. Ukuba ufuna ukwazi okungakumbi, qhagamshelana namaNgqina kaYehova asekuhlaleni okanye ubhalele kwiadresi efanelekileyo kwezidweliswe kwiphepha 5.

[Amagama acatshulweyo akwiphepha 6]

“Yizani kaloku, nina bathi: ‘Namhlanje okanye ngomso siza kuya kwisixeko esithile, sihlale unyaka wonke, size sishishine sizuze ingeniso.’ Kanti anikwazi oko ubomi benu buya kuba kuko ngomso!”—Yakobi 4:13, 14

[Amagama acatshulweyo akwiphepha 6]

IBhayibhile iyasichazela imvelaphi yethu ukususela kwindoda nebhinqa lokuqala. Ngaloo ndlela, isixelela apho sisuka khona. Kwakhona isithela thsuphe nangalapho sisingise khona. Kodwa ukuze sikuqonde oko iBhayibhile isixelela kona, kufuneka siyicokise ukuyifunda, njengokuba besiya kwenza emaphini

[Amagama acatshulweyo akwiphepha 7]

“Ukwenza isono” kukwenza into ephosakeleyo okanye kukutyekela ekwenzeni ububi. Sizalwe sinesono, oko kuchaphazela indlela izinto esizenza ngayo. “Kuba akukho mntu ulilungisa emhlabeni oqhubeka esenza okulungileyo angoni.”—INtshumayeli 7:20

[Amagama acatshulweyo akwiphepha 8]

Ukuba bekufuneka ukhuphele umbhalo othile ephepheni libe linebala elimdaka, elo bala linokuvela kuwo onke amanye amaphepha akhutshelweyo. Njengenzala ka-Adam—siyintsobi yakhe—ngoko ke sinechaphaza lesono. Lichaphaza uAdam awayenalo “kwantlandlolo”

[Amagama acatshulweyo akwiphepha 8]

IBhayibhile ithi: “Asikokomntu ohambayo ukwalathisa inyathelo lakhe.” (Yeremiya 10:23) Oku kusenza sisibone isizathu sokuba abantu basilele ukuzisa uxolo emhlabeni. Babengadalelwanga ukuba ‘balathise amanyathelo abo,’ bazimele geqe kuThixo

[Amagama acatshulweyo akwiphepha 9]

Umdumisi wathi kuThixo: “Ilizwi lakho lisisibane elunyaweni lwam, nokukhanya endleleni yam.” (INdumiso 119:105) Njengesibane, iBhayibhile isinceda ukuba sisebenzise ubulumko xa kufuneka senze izigqibo. ‘Njengokukhanya endleleni yethu’ ikhanyisa indlela phambi kwethu ukuze sikwazi oko kuza kwenzeka kuluntu kwixesha elizayo

[Ibhokisi ekwiphepha 7]

UKUBA NETHEMBA NOKO KUNOKWENZEKA NGOKWENENE

NgoSeptemba 2000, amazwe angamalungu eZizwe Ezimanyeneyo aye ngamxhel’ omnye azibekela usukelo awayeza kulufikelela ngowama-2015. Olu sukelo lwaluquka ezi zinto zilandelayo:

◼ Liza kuhla ngama-50 ekhulwini inani labantu abaphila ngemali engaphantsi kwedola ngosuku kuquka nabo bathwaxwa yindlala.

◼ Kuza kuqinisekiswa ukuba abantwana bayayifumana imfundo esisiseko.

◼ Aza kwenza ukuba amadoda namabhinqa ahlawulwe imali elinganayo ukuba anemfundo efanayo.

◼ Uza kuncipha ngama-66 ekhulwini umlinganiselo wokufa kwabantwana abangaphantsi kweminyaka emihlanu ubudala.

◼ Uza kuncipha ngama-75 ekhulwini umlinganiselo wokufa kwabantwana besazalwa.

◼ Aza kuphelisa aze anciphise ukusasazeka kukaGawulayo nentsholongwane eyiHIV kuquka nezinye izifo ezibulala abantu abaninzi, njengesifo seengcongconi.

◼ Baza kuhla ngama-50 ekhulwini abantu abangafumani manzi acocekileyo.

Ngaba olu sukelo luza kufikelelwa? Emva kokuba kujongwe iimeko ngowama-2004, iqela labezempilo elisuka ehlabathini lonke lagqiba kwelokuba kufuneka kuthenjiswe ngezinto ezinokwenzeka, yaye indlela izinto ezenzeka ngayo ayibonisi ukuba lungaze lufikelelwe olo sukelo. Intshayelelo yencwadi ethi State of the World 2005 ithi: “Ubuhlwempu bubangela ukuba iindawo ezininzi zingahambeli phambili. Izifo ezinjengoGawulayo ziyanda, nto leyo esenokubangela ukuba kubekho ingxaki enkulu yempilo kumazwe amaninzi. Kwiminyaka emihlanu edluleyo, abantwana abamalunga nezigidi ezingama-20 baye bafa ngenxa yezifo ebezinokuthintelwa ezibangelwa ngamanzi, yaye abantu abaninzi imihla ngemihla basentlungwini yokungafumani amanzi acocekileyo nokungathuthwa kwenkunkuma.”

[Ibhokisi/Imifanekiso ekwiphepha 8, 9]

EZINYE ZEENKALO ‘ZEMIHLA YOKUGQIBELA’

Imfazwe engazange ibonwe.—Mateyu 24:7; ISityhilelo 6:4.

Indlala.—Mateyu 24:7; ISityhilelo 6:5, 6, 8.

Izifo.—Luka 21:11; ISityhilelo 6:8.

Ukwanda kolwaphulo-mthetho.—Mateyu 24:12.

Ukonakaliswa komhlaba.—ISityhilelo 11:18.

Iinyikima.—Luka 21:11.

Amaxesha amanqam ekunzima ukujamelana nawo.—2 Timoti 3:1.

Ukuthandwa ngokugqithiseleyo kwemali.—2 Timoti 3:2.

Abantwana abangathobeli bazali.—2 Timoti 3:2.

Abangenawo umsa wemvelo.—2 Timoti 3:3.

Abathandi beziyolo kunokuba bathande uThixo.—2 Timoti 3:4.

Ukungabikho kokuzeyisa.—2 Timoti 3:3.

Abangathandi kulunga.—2 Timoti 3:3.

Ukungazikhathazi ngengozi ezayo.—Mateyu 24:39.

Abagxeki bekhanyela ubungqina bemihla yokugqibela.—2 Petros 3:3, 4.

Ukushunyayelwa koBukumkani bukaThixo emhlabeni wonke.—Mateyu 24:14.

[Inkcazelo]

© G.M.B. Akash/Panos Pictures

© Paul Lowe/Panos Pictures

[Umfanekiso okwiphepha 9]

AmaNgqina kaYehova aziwa ngokushumayela iindaba ezilungileyo zoBukumkani bukaThixo