Okwenzeka Ehlabathini

◼ “Iqela lezazi ngeenkwenkwezi lafumanisa umkrozo weminyele emikhulu ezikumgama ongama-200 ezigidi zeelight years, lisebenzisa itelescope iSubaru neKeck, ezazibekwe kwiMauna Kea [eHawaii].” Lo mkrozo weminyele ngowona wakha wamkhulu owafunyaniswayo.—ISUBARU TELESCOPE WEB SITE, EJAPAN.

◼ IUnited Kingdom’s Office for National Statistics ithi, “ngowama-2006 inani lemitshato [eNgilani naseWales] lalilelona liphantsi kwiminyaka eli-110. Ziyanda izibini ezifuna ukuhlalisana.”—ITHE GUARDIAN WEEKLY, EBRITANI.

◼ Ngokutsho kwePew Forum on Religion and Public Life, “ama-44 ekhulwini labantu abadala baye balutshintsha unqulo lwabo, abanye ababenganquli baqalisa ukunqula, okanye abanye baye bayeka nolo nqulo.”—EUNITED STATES

Iikholeji Neentlobano Zesini

“Ngaphandle kwezinye iikholeji zevangeli . . . , akukho mahluko ungakho phakathi kweekholeji neeyunivesithi zikarhulumente, ezabucala nezamaKatolika xa kufikelwa kumbandela wokuziphatha ngokwesini—apho abafundi baba neentlobano zesini nabantu abahlukahlukeneyo.” Watsho njalo uDonna Freitas umfundi ngonqulo lwamaKatolika nonjingalwazi oncedisa kwiyunivesithi, emva kokwenza uphando ngendlela abantu abaziphethe ngayo ngokwesini nonqulo kwiikholeji zaseMerika. INational Catholic Reporter ithi, lokaFreitas wathi ukusilela konqulo ekumiseleni imilinganiselo ngendlela yokuziphatha ngokwesini, akubonisi ukuba impembelelo “yokuba neentlobano zesini kwiikholeji” inamandla nje kuphela, kodwa kubonisa ukuba “unqulo alukwazi ukunqanda le ndlela yokuziphatha.”

Abazali Bahlawulelwa Ukukhulisa Amantombazana

Ingxelo yeBBC News ithi, urhulumente waseIndiya ufuna ukuhlawula abazali abangamahlwempu phantse ii-R 23 000 ukuze bakhulise amantombazana abo. Iintsapho ziza kufumana imali xa umntwana oyintombazana ezalwa, zize zifumane nenye imali njengoko ekhula de afikelele kwiminyaka eli-18 ubudala. Nangona ukukhethwa ngokobuni nokuqhomfa kwapheliswa ngokusemthethweni ngowe-1994, ezi ngxaki zisaxhaphakile. Enyanisweni, kuqikelelwa ukuba kwiminyaka engama-20 eyadlulayo, kwafa iimveku ezingamantombazana ezimalunga nezigidi ezili-10, nto leyo eyenza inani lamakhwenkwe lingalingani nelamantombazana kwezinye iindawo. Ngokobalo lowama-2001, ehlabathini ngokubanzi kwakukho amantombazana angaphantsi kweminyaka emithandathu ubudala angama-927 ngoxa amakhwenkwe eli-1 000, yaye lo mahluko uba mkhulu nakakhulu. Kwenye indawo kwakuzalwa amantombazana angama-793 ngoxa eli-1 000 amakhwenkwe azalwayo.

Indlela Iintaka Ezichaphazeleka Ngayo Yingxolo

Ezinye iintaka zenza umgudu omkhulu ukuze zikwazi ukuviwa kwizixeko ezinengxolo. Nangona ingxolo esezidolophini inokubacaphukisa abantu, iintaka zona zinokufa ngenxa yayo, litsho njalo iphephancwadi iNew Scientist, ekubeni iinkunzi zicula kuba “zitsala amaqabane yaye zibeka umda kwindawo yazo.” Ekubeni ininzi ingxolo edolophini, iintaka ezininzi zicula ngokuvakalayo ebusuku okanye zonyuse amazwi azo. Eli phephancwadi lithi, ngaphezu koko, oku akwenziwa ziintaka ezisedolophini kuphela. Iintaka ezikufuphi “neengxangxasi nemilambo nazo ziculela phezulu.”