“Abazange Banikele Ngqalelo”
UKUZIBETHA ngoyaba izilumkiso kunokuphumela engozini.
IDarwin, eseOstreliya yayixakekile ngamalungiselelo emibhiyozo yeeholide zowe-1974 xa kwakhala amaxilongo echaza ngenkanyamba ezayo. Kodwa kwakusele kuyiminyaka engama-30 iDarwin ingazange yahlaselwa yinkanyamba. Yayiza kubangelwa yintoni ke ngoku? Uninzi lwabantu balapho aluzange luyise so intlekele olwalujamelene nayo de isivuthuvuthu somoya saqalisa ukumka namaphahla saza sadiliza neendonga zezindlu. Ngentsasa elandelayo eso sixeko sasisele siyingqushu.
NgoNovemba 1985 kwaqhambuka intaba-mlilo eKholombiya. Ukunyibilika kwekhephu kwabangela udaka olwangcwaba abemi abangaphezu kwama-20 000 kwidolophu yaseArmero. Ngaba babengazange balunyukiswe kusengaphambili? Kwakusele kuziinyanga le ntaba ishukuma. Noko ke, ngenxa yokuqhela ukuhlala ecaleni kwentaba-mlilo, abantu abaninzi baseArmero abazange bakuhoye oko. Amagosa aseburhulumenteni afumana isilumkiso sokuba kukho intlekele ezayo kungekudala kwelo, kodwa akazange abalumkise abantu. Kwenziwa izibhengezo kunomathotholo ngelokuzama ukuthoba izibilini zabantu. Ecaweni kwasetyenziswa imiboko kuxelelwa abantu ukuba bathob’ umxhelo. Ngenye ingokuhlwa, kwatsho izithonga ezibini ezinamandla zokudubula kwale ntaba. Ngaba ngewawuzishiyile izinto zakho uze ubaleke? Abantu abambalwa bawenza umgudu onjalo, abanye ke bashiywa lixesha.
Izazi ngokuma komhlaba zidla ngokuyichaza ngokuchanileyo indawo eza kuba nenyikima. Kodwa akufane kwenzeke ukuba zilichaze ngokuchanileyo elona xesha iza kuqhambuka ngalo. Ngowe-1999, ehlabathini lonke iinyikima zasuba imiphefumlo emalunga nama-20 000. Abaninzi kwabo bafayo babengayicingi into yokuba kunokwenzeka oko kubo.
Usabela Njani Kwizilumkiso Ezivela KuThixo?
IBhayibhile yazichaza ngokucacileyo kusengaphambili iziganeko eziphawula imihla yokugqibela. Ngokuphathelele oko isibongoza ukuba siqwalasele “imihla kaNowa.” “Ngaloo mihla yangaphambi komkhukula,” abantu babexakeke zizinto eziqhelekileyo zobomi, nakuba singenakulithandabuza elokuba babexhalatyisiwe kukugquba kogonyamelo. Ngokuphathelele isilumkiso uThixo awasikhupha ngomkhonzi wakhe uNowa, “abazange banikele ngqalelo de wafika umkhukula waza wabatshayela bonke.” (Mateyu 24:37-39) Ngaba ngewawusithobele eso silumkiso? Ngaba ngoku uyasithobela?
Kuthekani ukuba wawuphila eSodom, kufuphi noLwandle Olufileyo, ngemihla yendoda egama linguLote, engumtshana ka-Abraham? Elo lizwe lalifana neparadesi. Isixeko salapho sasimi kakuhle ngokwezinto eziphathekayo. Abantu balapho babezonwabele. Ngemihla kaLote, “babesidla, babesela, babethenga, babethengisa, babetyala, babesakha.” Ibutho labantu elaliphila ngelo xesha laliziphethe kakubi ngokugqithiseleyo. Ngaba ngewawusamkele isilumkiso sikaLote nxamnye nezenzo ezingendawo? Ngaba ngewawumphulaphule xa ekuxelela ukuba uThixo uzimisele ukusitshabalalisa isixeko saseSodom? Okanye ngaba wawuya kucinga ukuba uyaqhula njengoko benzayo abo babeza kuba ngabakhwenyana bakaLote? Ngaba wawunokubaleka uze ujonge ngasemva, njengoko wenzayo umfazi kaLote? Nakuba abanye bengazange basikhathalele eso silumkiso, ngomhla awaphuma ngawo uLote eSodom, “kwana umlilo nesalfure ezulwini waza wabatshabalalisa bonke.”—Luka 17:28, 29.
Abantu abaninzi kumhla wethu abanikeli ngqalelo. Kodwa le mizekelo yabhalwa eLizwini likaThixo ukuze isilumkise ize isikhuthazele ukuba SIHLALE SILINDILE!
[Ibhokisi/Umfanekiso okwiphepha 22]
Ngaba Wawukho Ngokwenene Umkhukula Wehlabathi Lonke?
Abahlalutyi abaninzi bayakuphika oko. Kodwa iBhayibhile iyavuma ukuba wawukho.
UYesu Kristu wathetha ngawo, yaye wayekho ukwenzeka kwawo, ewubukele esezulwini.
[Ibhokisi/Umfanekiso okwiphepha 23]
Ngaba ISodom NeGomora Zatshatyalaliswa Ngokwenene?
Ukwembiwa kwezinto zakudala kuyangqinelana nesi siganeko.
Imbali yehlabathi iyathetha ngaso.
UYesu Kristu wabhekisela kwesi siganeko, yaye kuyathethwa ngaso kwiincwadi ezahlukahlukeneyo ezili-14 zeBhayibhile.