Ngaba Igama Elithi “UmKristu” Lilahlekelwe Yintsingiselo Yalo?
KUTHETHA ntoni ukuba ngumKristu? Ubuya kuphendula njani? Abantu ababekhethwe kumazwe awahlukahlukeneyo babuzwa lo mbuzo, yaye nazi ezinye zeempendulo zabo:
“Kukulandela uYesu nokumxelisa.”
“Kukuba ngumntu olungileyo uze wabelane nabanye.”
“Kukwamkela uKristu njengeNkosi noMsindisi.”
“Kukuya kwidini leMisa, wenze isicengcelezo seRosari wamkele uMthendeleko Ongcwele.”
“Andikholelwa ukuba kufuneka uye ecaweni ukuze ube ngumKristu.”
Kwanezichazi-magama zineenkcazelo ezininzi ezididayo. Eneneni, esinye sineengcaciso ezilishumi phantsi kwegama elithi “umKristu,” enye ithi “kukukholelwa okanye kukuba lilungu lonqulo lukaYesu Kristu” kanti enye ithi “kukuba ngumntu onesidima okanye owamkelekileyo.” Akumangalisi ngoko ukuba abaninzi bekufumanisa kunzima ukuchaza ukuba kuthetha ntoni ukuba ngumKristu.
Utyekelo Lokuyekelela Imigaqo
Namhlanje, phakathi kwabo bazibanga bengamaKristu—kwanaphakathi kwabo bakwisikhundla esinye—ubani unokufumanisa ukuba kukho izimvo ezahlukahlukeneyo kwimibandela enjengokuphefumlelwa kweBhayibhile nguThixo, ingcamango yendaleko, ukubandakanyeka kwecawa kwezobupolitika nokwabelana kukabani nabanye ngokholo lwakhe. Imibandela engokuziphatha, ukuqhomfa, ubufana-sini neyezibini ezihlalisanayo, ngokufuthi iye yabangela impikiswano. Utyekelo oluphambili kukuyekelela imigaqo.
Ngokomzekelo, kutshanje, enye inkundla yecawa yamaProtestanti yavotela ukumisela ilungelo lecawa “lokunyula umdala olifana-sini elaziwayo ukuba abe lilungu lesigqeba esilawulayo,” kutsho ulindixesha iChristian Century. Abanye abafundi bezakwalizwi baye bade baveza imbono yokuba akunto ibalulekileyo ukuba nokholo kuYesu ukuze umntu asindiswe. Ngokutsho kwengxelo efumaneka kwiThe New York Times, bakholelwa ukuba amaYuda, amaSilamsi nabanye “basenokungena ezulwini [kanye njengoko kunjalo nangamaKristu].”
Khawube nomfanekiso-ngqondweni ukuba unganako, umlandeli kaMarx ethethelela ubukapitali okanye umntu okholelwa kwiingcamango zedemokhrasi ethethelela ubuzwilakhe okanye isazi ngemeko-bume sixhasa ukutshatyalaliswa kwamahlathi. “Loo mntu akanakuba ungumlandeli kaMarx ngokwenene okanye akakholelwa kwiingcamango zedemokhrasi okanye akasiso isazi ngemeko-bume,” utsho—yaye uchan’ ucwethe. Ukanti, xa uqwalasela ukwahluka kwezimvo zabo bazibanga bengamaKristu namhlanje, ubona iinkolelo ezahluke okwempuma kwintshona nezo ngokufuthi ziphikisanayo noko kwafundiswa nguMseki wobuKristu, uYesu Kristu. Kuthetha ntoni oko ngobuKristu babo?—1 Korinte 1:10.
Umnqweno wokuguqula iimfundiso zobuKristu ukuze zivisisane notyekelo olukhoyo kudala wabakho, njengoko siza kubona. UThixo noYesu Kristu bavakalelwa njani ngezo nguqulelo? Ngaba iicawa ezixhasa iimfundiso ezingasekelwanga kuKristu zinokutsho ngokufanelekileyo ukuba zingamaKristu? Le mibuzo iza kuhlalutywa kwinqaku elilandelayo.