Abaphumelele Kwiklasi Ye-127 YaseGiliyadi
Abathunywa Bevangeli Bathunyelwa “Nakwezona Nxalenye Zikude Zomhlaba”
UYESU wathuma abafundi bakhe ukuba baye kushumayela “nakwezona nxalenye zikude zomhlaba.” (IZenzo 1:8) NamaNgqina kaYehova ayawuthobela loo myalelo.
Kule minyaka ingama-65 edluleyo, abathunywa bevangeli abaqeqeshwe kwisikolo seBhayibhile seWatchtower saseGiliyadi baye bancedisa ekushumayeleni kumazwe angaphezu kwama-200. NgoMgqibelo, kaSeptemba 12, 2009, abashumayeli abanamava abangama-56 baye baphumelela emva kokuqeqeshwa iinyanga ezintlanu kwisikolo sokuqeqesha abathunywa esisePatterson, eNew York, eUnited States.
Impembelelo Yezinto Ocinga Ngazo
UStephen Lett, weQumrhu Elilawulayo lamaNgqina kaYehova nowayengusihlalo wolo cwangciso, wathetha ngomxholo othi: “Cinga Ngezinto Ezakhayo.” Waqala ngokulumkisa abafundi ngezinto ezine ababengafanele bacinge ngazo. Waqala ngezi zintathu zilandelayo: (1) Musani ukucinga ukuba niya kukhuselwa zizinto eziphathekayo; (2) Musani ukucinga ngokuziphatha kakubi; (3) musani ukuxhalaba ngokugqithiseleyo ngekamva. (IMizekeliso 18:11; Mateyu 5:28; 6:34) Malunga nale ngongoma yesithathu, uMzalwan’ uLett wathi umntu oxhalaba ngokugqithiseleyo udibanisa iingxaki zayizolo, ezamhlanje kunye nezangomso ndawonye. Walek’ umsundulo ngelithi “Ngumthwalo onzima ke lowo.” Yayisithini eyesine ingongoma? Walumkisa elo qela nxamnye nokucinga ukuba laliphila ubomi obubhetele ngaphambi kokuba libe ngabathunywa bevangeli. Kaloku loo nto yayiza kubenza bangonwabi kwizabelo zabo.
Umzalwan’ uLett wakhuthaza loo klasi ukuba icinge ngezinto ezine ezakhayo. Wathi: (1) Ziboneni kusengaphambili izinto ezinokwenzakalisa ukholo lwenu nize niziphephe; (2) camngcani ngezinto ekubaliswa ngazo eBhayibhileni nize nani nizibone nilapho; (3) nabani na enidibana naye kwisabelo senu mjongeni njengomntu onokuba ngumnquli kaYehova; (4) yibani novelwano ngokuzibeka endaweni yabantu enishumayela kubo.—IMizekeliso 22:3.
Ukubaluleka Kokuqeqesha Abanye
UDavid Splane, elinye ilungu leQumrhu Elilawulayo wanikela intetho esekelwe kweyesi-2 kuTimoti 2:2 neyayinomxholo othi: ‘Ezi Zinto Zidluliseleni Kubantu Abathembekileyo.’ Xa umpostile uPawulos wayalela uTimoti ukuba aqeqeshe amadoda athembekileyo, wayefuna ukuba uTimoti angawafundisi nje iinyaniso awayesele ezazi nje kuphela kodwa kwakufuneka awakhuthaze ukuba aqeqeshe amanye. Umzalwan’ uSplane wachazela loo klasi ukuba kufuneka amadoda angakumbi okwenza imisebenzi yamaKristu. Afanele aqeqeshwe nini yaye njani? Umzalwan’ uSplane waxelela abathunywa bevangeli ukuba bafanele baqalise ukuwaqeqesha besakuqalisa ukufunda nawo iBhayibhile.
Abathunywa bevangeli banokubaqeqesha njani abafundi ukuba babengumzekelo wokuthembeka kwabanye? Lo kaSplane wachaza iindlela eziliqela. Kufuneka bafundiswe ukusilungiselela kakuhle isifundo sabo seBhayibhile. Kamva njengoko abafundi beqalisa ukuya ezintlanganisweni kufuneka bafunde ukuzilungiselela ngokwabo iintlanganiso. Umzalwan’ uSplane wathi: “Umntu ongakwaziyo ukuzifundela ngokwakhe iBhayibhile akasayi kuze akwazi ukuyifundisa abanye.” Kwakhona lo mzalwana wathi abathunywa banokunceda abanye ukuba babambe ixesha,baxhase umsebenzi wokushumayela ngemali baze bathobele abo bakhokelayo. Wathi eyona ndlela isemagqabini yokufundisa abanye kukumisela umzekelo omhle.
Inyhweba Yokuba LiNgqina
UGuy Pierce, naye okwalilungu leQumrhu Elilawulayo wathetha ngomxholo osekelwe kumazwi kaYesu akwiZenzo 1:8 athi: “Niya Kuba Ngamangqina am.” Wakhumbuza loo klasi ukuba ngenkulungwane yokuqala yeXesha Eliqhelekileyo uhlanga lwakwaSirayeli lwaphulukana nenyhweba yokuba ngamaNgqina kaYehova. Elo lungelo lanikwa uhlanga oluvelisa isiqhamo soBukumkani. (Mateyu 21:43) Olo hlanga libandla lamaKristu athanjisiweyo. Umzalwan’ uPierce wacaphula amazwi kampostile uPetros athi “uhlanga olungcwele” lwamaKristu athanjisiweyo ‘lwaluza kuvakalisa ngokubanzi’ iimbalasane zikaYehova. (1 Petros 2:6-9) Ngoko uYesu wayengathi amaKristu ayeza kuyeka ukuba ngamaNgqina kaYehova aze abe ngawakhe. Kaloku kwanoYesu ubizwa ngokuba ‘lingqina elithembekileyo.’ (ISityhilelo 1:5; 3:14) Ulelona Ngqina likaYehova libalaseleyo nomzekelo esimele siwuxelise.—1 Petros 2:21.
Umzalwan’ uPierce waxelela loo klasi ukuba amazwi kaYesu akwiZenzo 1:8 anenzaliseko engakumbi namhlanje. Ngoba? Kuye kwazaliseka isiprofeto esibalaseleyo esikwiSityhilelo 11:15. UBukumkani bukaThixo obulawulwa nguMesiya bumiselwe. Ngoku kushunyayelwa ngokoqobo “nakwezona nxalanye zikude zomhlaba.” (IZenzo 1:8) Umzalwan’ uPierce wagxininisa ukuba abathunywa bevangeli banikela ubungqina ngoYehova noBukumkani bakhe, kungekhona ngeziqu zabo okanye indlela ababekade bephila ngayo ngaphambili, inkcubeko nelizwe labo. Wakhuthaza loo klasi ukuba ifundise “abantu abaninzi kangangoko kunokwenzeka kweli xesha liseleyo.”
Ezinye Iimbalasane Zocwangciso
UAlex Reinmueller oncedisa iKomiti yokuPapasha, wathetha ngomxholo othi “UYehova Uza Kunenza Nikhaliphe.” Wathi, ukuba abathunywa bevangeli bakholosa ngoYehova, uza kuba nceda bazazi izinto abazenza kakuhle, abuthathaka kuzo nabazoyikayo, baze banike uThixo inkonzo esemagqabini.
Abahlohli ababini beSebe leZikolo Zobuthixo, uSam Roberson noWilliam Samuelson, nabo bathetha nabafundi. Umzalwan’ uRoberson wathetha ngomxholo othi “Ndinawe,” osekelwe kuIsaya 41:10. Wathi zininzi izinto eziza kubavuyisa abathunywa bevangeli. Kwakhona baza kuba nazo neengxaki. Baya kuphumelela ukuba baxelisa uKumkani uDavide owathandaza kuBawo onothando. (INdumiso 34:4, 6, 17, 19)
Umzalwan’ uSamuelson wabethelela ukubaluleka kokuba baqhubeke bekhulisa amandla abo okucinga. Abathunywa bevangeli abanaloo mandla bayakwazi ukuzibamba xa benyeliswa yaye abakhubeki msinya.—IMizekeliso 2:10, 11.
UJim Mantz, oncedisa iKomiti Yokubhala, wadlan’ indlebe nelungu leKomiti yeSebe leRiphabliki yaseGeorgia, elaseHonduras, kunye nelungu leKomiti yeLizwe leRiphabliki yaseTajikistan. Aba bazalwana banamava bacebisa aba bathunywa bevangeli ngendlela yokuthambisa abantu abachasayo ‘ngokoyisa ububi ngokulungileyo.’ (Roma 12:21) UMark Noumair, omnye umhlohli wale klasi, wadlan’ indlebe nabafundi ngamava ababewafumene ngoxa babe sesikolweni. Le nxalenye yayinomxholo othi “Ndingakunceda Ngantoni?”
Usihlalo waqukumbela ucwangciso ngokucaphula amazwi engoma ethi “Zibone Ukwihlabathi Elitsha” ekumaculo amatsha. Abantu abangama-6 509 ababelapho bemka bezimisele nangakumbi kunanini na ngaphambili ukunikela ubungqina ngoYehova noNyana wakhe “nakwezona nxalanye zikude zomhlaba.”
[Isicangca/Imaphu ekwiphepha 31]
INKCAZELO NGABAFUNDI
8 inani lamazwe abavela kuwo
56 inani labafundi
28 izibini ezitshatileyo
33.6 umlinganiselo wobudala
18.3 umlinganiselo weminyaka bebhaptiziwe
13.6 umlinganiselo weminyaka bekwinkonzo yexesha elizeleyo
[Imaphu]
(Ukuba ufuna inkcazelo ehlahlelwe kakuhle, yiya kwimpapasho)
Abafundi bathunyelwe kumazwe angama-22 aboniswe ngezantsi
AMAZWE ABATHUNYELWE KUWO
EALBANIA
EBOLIVIA
EBURUNDI
ECAMBODIA
ECHILE
ECONGO, DEM. REP.
ECOSTA RICA
ECÔTE D’IVOIRE
ECURAÇAO
EGUYANA
EHAITI
JAMAICA
EMOLDOVA
EMOZAMBIQUE
ENEPAL
ENICARAGUA
EPANAMA
EPARAGUAY
EPERU
ESERBIA
ETANZANIA
EUGANDA
[Umfanekiso okwiphepha 31]
Abafundi Abaphumelele Kwiklasi Ye-127 YeSikolo SeBhayibhile SeWatchtower SaseGiliyadi
Kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ekhohlo ukuya ekunene kuluhlu ngalunye.
(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.
(2) Grooms, K.; Miura, S.; Camacho, M.; Rozas, S.; Burch, M.; Meza, I; Young, G.; Geraghty, S.
(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.
(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.
(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.
(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.
(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.