Usuku Lokuthweswa Izidanga—Usuku Oluhle
“SISIKELELWE ngosuku oluhle. Ilanga ligqats’ ubhobhoyi. Ingca iluhlaza. Iintaka ziyantyiloza. Kubonakala ngathi izinto ziza kuhamba kakuhle ngolu suku lwanamhlanje, yaye asisayi kudana. UYehova akangoThixo obadanisayo abantu bakhe. UnguThixo weentsikelelo.”
UMzalwan’ uSamuel Herd, ilungu leQumrhu Elilawulayo lamaNgqina kaYehova, waqalisa ucwangciso lothweso zidanga lweklasi ye-117 yeSikolo seBhayibhile seWatchtower saseGiliyadi ngala mazwi akhuthazayo. KwakungoSeptemba 11, 2004. Olu cwangciso luhle lwaluquka isiluleko esikhuthazayo esisekelwe eBhayibhileni kwakunye namava asekuhlaleni nakwiindawo ezinabavangeli basemazweni. Ewe, yayilusuku oluhle kubo bonke abangama-6 974 ababeze kwiWatchtower Educational Center ePatterson, eNew York, nakwezinye izakhiwo eBrooklyn naseWallkill, ezazinxulunyaniswe ngevidiyo.
Amazwi Akhuthaza Abafundi
UJohn Kikot, olilungu leKomiti yeSebe laseUnited States, wathetha amazwi alukhuthazo kumxholo othi “Hlala Uvuya Njengomvangeli Wasemazweni.” Wabonisa ukuba abafundi baseGiliyadi baziwa ngovuyo lwabo, njengoko oko kwakubonakala kolu suku lokuthweswa izidanga. Umyalelo ovela kwiZibhalo ebudeni besi sikolo wabangela ukuba aba bafundi bavuye, yaye ngoku babekulungele ukunceda abanye nabo bavuye. Njani? Ngokuzinikela enkonzweni njengabavangeli basemazweni. UYesu wathi: “Kunoyolo ngakumbi ukupha kunokwamkela.” (IZenzo 20:35) Njengoko bexelisa uYehova uThixo, ‘uThixo onoyolo’ nonesisa nofundisa abanye inyaniso, abavangeli basemazweni abatsha baza kukwazi ukuhlala bevuya.—1 Timoti 1:11.
Kolu cwangciso kwalandela ilungu leQumrhu Elilawulayo, uDavid Splane, owayenentetho enomxholo othi “Ngaba Uza Kuba Nolwalamano Oluhle Nabanye?” Alithandabuzeki elokuba kulungile yaye kuyathandeka ukuhlala ndawonye ngomanyano, nangona oku kunokufuna ukuba sibe “zizinto zonke kubantu bazo zonke iintlobo.” (1 Korinte 9:22; INdumiso 133:1) UMzalwan’ uSplane wachaza ukuba aba bafundi baphumeleleyo baza kudibana nabantu abaninzi kumsebenzi wabo wobuvangeli—abantu entsimini, abanye abavangeli basemazweni, abazalwana noodade abakumabandla abo amatsha, nabo bakwiofisi yesebe abakhokela kumsebenzi wokushumayela nowokufundisa. Wanikela la macebiso asebenzisekayo ngendlela yokuba nolwalamano oluhle nabanye kangangoko kunokwenzeka: Lwazi ulwimi lwasekuhlaleni, ziqhelanise namasiko asekuhlaleni, bahlonele abanye abavangeli basemazweni, uze ubathobele abo bakhokelayo.—Hebhere 13:17.
Emva koko, umalathisi waseGiliyadi uLawrence Bowen wabuza, “Ucinga Ntoni?” Wakhumbuza aba bafundi ukuba abo ‘bagweba ngokwembonakalo yangaphandle’ abazange bamamkele uYesu njengoMesiya. (Yohane 7:24) Njengabantu abangafezekanga, sonke sifanele silumkele singabi ‘neengcamango zabantu’ kodwa sibe ‘neengcamango zikaThixo.’ (Mateyu 16:22, 23) Nabantu abomeleleyo ngokomoya bafanele baqhubeke belungisa indlela abacinga ngayo. Njengenqanawa elwandle, ukulungisa indlela esicinga ngayo ngoku kunokwenza silufikelele usukelo lwethu kunokuba sife ngokomoya. Ukuqhubeka sifundisisa umongo weBhayibhile kuya kusinceda sicinge “iingcamango zikaThixo.”
UWallace Liverance, omnye umqeqeshi kwiSikolo saseGiliyadi, wayiqukumbela le nxalenye yolu cwangciso. Intetho yakhe esekelwe kuIsaya 55:1 yayisithi “Uza Kuthenga Ntoni?” Wakhuthaza abafundi ukuba ‘bathenge’ into eza kubahlaziya, uvuyo nempilo evela kwisigidimi sikaThixo sesiprofeto semihla yethu. Isiprofeto sikaIsaya sifanisa eli lizwi likaThixo namanzi, iwayini nobisi. Linokuthengwa njani “ngaphandle kwemali nangaphandle kwexabiso”? UMzalwan’ uLiverance wachaza ukuba linokuthengwa ngokunikela ingqalelo kwisiprofeto seBhayibhile yaye siphelise iingcinga neendlela ezingezizo ezokomoya size sihlakulele iingcinga neendlela zikaThixo. (Isaya 55:2, 3, 6, 7) Ngokwenza oku, aba bavangeli basemazweni abatsha banokukwazi ukuhlala kwizabelo zabo ezikwamanye amazwe. Abantu abangafezekanga badla ngokucinga ukuba ulonwabo lukabani luxhomekeke ekuphileni ubomi obutofotofo. “Ungakukholelwa oko,” sabongoza sisitsho isithethi. “Ungayicingi nokuyicinga loo nto. Qiniseka ukuba uzibekela ixesha lokulifundisisa ngokucokisekileyo iLizwi likaThixo lesiprofeto. Linokukuhlaziya, likomeleze lize likwenze wonwabe kwisabelo sakho sobuvangeli basemazweni.”
Amava Nodliwano-ndlebe Olumnandi Lwabafundi
Abafundi baba nesabelo esithe rhoqo kumsebenzi wokushumayela. Besalathiswa nguMark Noumair, omnye umqeqeshi waseGiliyadi, abanye ababekule klasi benza umboniso ngamava abo kwintetho ethi “Asinazintloni Ngeendaba Ezilungileyo.” (Roma 1:16) Abaphulaphuli baye bakuvuyela ukuphulaphula indlela aba balungiseleli abanamava abashumayela ngayo kwindlu ngendlu, esitratweni nakwiindawo zoshishino. Abafundi ababezazi ezinye iilwimi bathabatha inyathelo lokuqala lokuthetha nabantu abathetha ezo lwimi. Abanye bazisebenzisa kakuhle iimpapasho ezisekelwe eBhayibhileni ezipapashwe ngamaNgqina kaYehova, bezisebenzisa xa besenza amabuyelo naxa beqalisa izifundo zeBhayibhile zasekhaya. ‘Babengenazintloni’ zokushumayela iindaba ezilungileyo.
UMzalwan’ uWilliam Nonkes, osebenza kwiSebe Lenkonzo, waba nodliwano-ndlebe nabavangeli basemazweni abanamava abavela eBurkina Faso, eLatvia naseRashiya. Banikela amacebiso phantsi komxholo othi “UYehova Ubavuza Ngothando Abo Bathembekileyo.” Omnye wabazalwana ekwadliwan’ indlebe naye wakhuthaza aba bafundi ukuba bakhumbule umkhosi kaGidiyon wamajoni angama-300. Joni ngalinye lalinesabelo esabangela iphulo likaGidiyon laphumelela. (ABagwebi 7:19-21) Ngokufanayo, abavangeli basemazweni abahlala kwizabelo zabo bayavuzwa.
Wandula ke uSamuel Roberson, umqeqeshi ePatterson waba nolunye udliwano-ndlebe kwintetho ethi “Yiba Zizinto Zonke Kubantu Bazo Zonke Iintlobo.” Waba nodliwano-ndlebe namalungu amane eKomiti yeSebe, avela eSenegal, eGuam, eLiberia naseMadagascar. Kukho abavangeli basemazweni abali-170 kula mazwe. Abafundi abaphumeleleyo bafunda ngendlela iiKomiti zeSebe ezinceda ngayo abavangeli basemazweni ukuze bakwazi ukuziqhelanisa nezabelo zabo ezitsha. Ngokufuthi oko kuthetha ukufunda iindlela zokuphila ezinokubonakala zingaqhelekanga ngokwendlela yaseNtshona. Ngokomzekelo, kwezinye iindawo kuyinto eqhelekileyo ukubona amadoda, kuquka nabo bakwibandla lamaKristu, bebambene ngezandla njengabahlobo ngoxa behamba kunye. Kwezinye iindawo phantsi kwesebe laseGuam, kutyiwa ukutya okungaqhelekanga. Kodwa abanye baye bakwazi ukuziqhelanisa nezo meko, yaye nabavangeli basemazweni banako.
UGuy Pierce, ilungu leQumrhu Elilawulayo, wanikela intetho enomxholo othi “Hlala Unyanisekile ‘KuBukumkani BeNkosi Yethu.’” Wakhumbuza abaphulaphuli esithi: “UYehova wadala enenjongo. Wayefuna okuthile ngendalo yakhe. Injongo yakhe ngomhlaba ayikaguquki. Ngokuqinisekileyo iza kuzaliseka. Ayikho into enokuguqula oko.” (Genesis 1:28) UMzalwan’ uPierce wakhuthaza bonke ukuba baluthobele ngokunyanisekileyo ulongamo lukaThixo phezu kwazo nje iingxaki eziye zakho ngenxa yesono somntu wokuqala, uAdam. “Siphila kwiyure yomgwebo. Ixesha esinalo lincinane lokuba sifikelele abantliziyo zinyanisekileyo size sibancede bayazi inyaniso. Lisebenzise kakuhle eli xesha ukuze ufikelele abanye ngeendaba ezilungileyo zoBukumkani,” wababongoza esitsho uMzalwan’ uPierce. Abo baxhasa uBukumkani bukaThixo ngokunyaniseka banokuqiniseka ukuba uza kuba xhasa.—INdumiso 18:25.
Ekuqukumbeleni, usihlalo wafunda imibuliso neminqweno emihle evela kumasebe ehlabathini lonke. Wandula wabanika iidiploma abafundi abaphumeleleyo, yaye omnye wabo wafunda ileta evela kule klasi, evakalisa umbulelo ngemfundo abayifumeneyo. Lwaqukunjelwa kakuhle olu suku luhle abaya kuhlala belukhumbula abo bebelapho.
[Ibhokisi ekwiphepha 23]
INKCAZELO ENGABAFUNDI
Inani lamazwe abavela kuwo: 11
Inani lamazwe ababelwe kuwo: 22
Inani labafundi: 48
Umlinganiselo weminyaka: 34,8
Umlinganiselo weminyaka besenyanisweni: 18,3
Umlinganiselo weminyaka bekwinkonzo yexesha elizeleyo: 13,4
[Umfanekiso okwiphepha 24]
Iklasi Ye-117 Yabaphumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.