‘Ndinokukwazi Njani Ukushumayela?’

Ehlabathini lonke, sinemizekelo ebalaseleyo yabazalwana noodade abaye bashumayela ngokuthembeka nakuba benempilo enkenenkene. Ngokomzekelo, cinga nje ngoDalia, ohlala eVilnius, elikomkhulu laseLithuania.

UDalia ngudade oneminyaka engaphezu kwengama-30 ubudala. Kwasekuzalweni kwakhe, ebenesifo esibizwa ngokuba yicerebral apoplexy. Loo nto yamshiya engakwazi kuzenzela nto yaza yayiphazamisa gqitha indlela athetha ngayo. Ngenxa yoko, ngabantu bakowabo kuphela abakwaziyo ukuyiva into ayithethayo. UDalia uhlala nonina uGalina yaye uyamnyamekela. Nangona le meko ibangele ubomi bukaDalia banamahla-ndinyuka namaxhala, yena akazange ayeke ukonwaba. Yintoni ebangela loo nto?

UGalina uthi: “Ngowe-1999, satyelelwa ngumza wam uApolonija. Saphawula ukuba uApolonija, oliNgqina likaYehova, uyazi kakuhle iBhayibhile yaye uDalia wambuza imibuzo emininzi. Akuzange kube kudala, kwaqaliswa isifundo seBhayibhile noDalia. Ndandibakho kweso sifundo ngamaxesha athile ukuze ndichaze izinto ezithethwa nguDalia. Noko ke, ndaphawula ukuba zonke izinto azifundayo zimnceda ngokwenene. Nam ndakhawuleza ndacela ukuqhutyelwa isifundo seBhayibhile.”

Njengoko uDalia wayesiya eyiqonda inyaniso eseBhayibhileni, waba nombuzo awayesoloko ezibuza wona. Wada wambuza oku uApolonija: “Umntu ofana nam—ongakwazi kuzenzela nto—unokukwazi njani ukushumayela.” (Mat. 28:19, 20) Ezolile, uApolonija wamthob’ izibilini uDalia ngelithi: “Ungoyiki. UYehova uza kukunceda.” Nyhani ke, uYehova uyamnceda.

Ushumayela njani uDalia? Zininzi iindlela ashumayela ngazo. Oodade abangamaKristu bayamncedisa ukubhala iileta ezinesigidimi seBhayibhile. UDalia uqala ngokuchazela aba dade oko akucingayo. Bona ke, babhala ileta enezo ngcamango zakhe. Kanti uDalia uyashumayela nangokubhala imiyalezo kwiselfowuni yakhe. Yaye xa imozulu intle, abanye ebandleni bamsa ezipakini nasesitratweni ukuze athethe nabantu.

UDalia nomama wakhe baye baqhubeka besenza inkqubela enyanisweni. Bobabini baye bazahlulela kuYehova baza babhaptizwa ngoNovemba 2004. NgoSeptemba wama-2008 kwasekwa iqela labantu abathetha isiPolish eVilnius. Ekubeni eli qela lalifuna abavakalisi boBukumkani abangakumbi uDalia nomama wakhe baya kwelo qela. UDalia uthi: “Kangangeenyanga ezithile ndandikhathazeka xa ndingekaphumi ndiye entsimini. Kodwa emva kokuba ndithandaze kuYehova ngalo mba, kwakukhawuleza kubekho umntu ondicela ukuba ndiye naye entsimini.” Uvakalelwa njani uDalia ngemeko yakhe? Uthi: “Esi sifo sindenze ndaf’ umzimba kodwa asiyonakalisanga ingqondo yam. Ndiyavuya kuba ndikwazi ukuxelela abanye ngoYehova!”