Ucwangciso Olutsha Lwendibano Ekhethekileyo Yosuku Olunye
1 “Yibani Ngabantu Abafundiswa NguYehova” lowo ngumxholo wocwangciso olutsha lwendibano ekhethekileyo yosuku olunye oluza kuqalisa ngoSeptemba. (Yoh. 6:45) Imfundiso yobuthixo evela kuYehova isinceda ngokwenene ukuze siphile ubomi obanelisayo. Isenza sibe noxabiso olungazenzisiyo ngelifa lokomoya esinalo. Imigudu yethu ekuncedeni abantu beve ngeendaba ezilungileyo isenza amalungu aluncedo kwibutho labantu. Le ndibano ikhethekileyo yosuku olunye iya kubalaselisa iintsikelelo ezinanditshwa ngabantu abafundiswa nguYehova.
2 Olu cwangciso luya kuthelekisa iingenelo zemfundiso yobuthixo neengozi zemfundo yehlabathi. Siya kuyibona ngokucacileyo indlela uYehova ayinikela ngayo eyona mfundo iphakamileyo—imfundo esekelwe kwiLizwi lakhe, iBhayibhile. Kuya kubalaseliswa iinkalo ezintathu zonqulo oluyinyaniso esinokuthi sifumane kuzo uyolo ngokufundiswa nguThixo. Ukongezelela koko, ulutsha luya kukhuthazwa ukuba luxelise imizekelo ebalaseleyo eseBhayibhileni enjengoDavide noTimoti luze lubusekele kwizinto zokomoya ubomi balo. Kwakhona luya komelezwa nokholo lwethu njengoko kuya kubalaseliswa ukholo lwabakhulileyo. Kuya kubhaptizwa nabantu abasandul’ ukuzahlulela abafanelekayo. Ngaphambi kwale ndibano yosuku olunye, bafanele bazise umveleli owongamelayo ngalo mnqweno wabo.
3 Intetho engumxholo yale ndibano ikhethekileyo yosuku olunye inomxholo othi “Ukufundiswa NguYehova Ukwenza Ukuthanda Kwakhe.” Iya kubalaselisa izizathu zokuba sonke kufuneke siqhubeke sifunda, ukuze sibe nokholo omeleleyo, size siqhubeke sisenza inkqubela. Siya kukhuthazwa ukuba sixelise uYehova ngokufundisa abanye inyaniso ekhokelela kubomi obungunaphakade. Kuya kubakho namava akhayo abonisa indlela iimpapasho zoMbutho eziye zabanceda ngayo abaninzi bafundiswa nguYehova. Kuya kubalaseliswa nezinto ezintle ezenziwe yinkqubo yemfundo kaYehova yehlabathi lonke.
4 Yenza izicwangciso eziqinisekileyo zokuba ubekho. Khuthaza bonke abanomdla babekho. Khangela phambili ekufundisweni izinto ezininzi ezintle nguMyaleli wethu Ozukileyo.—Isa. 30:20.