‘Lishumayele Ilizwi LikaThixo Ngokupheleleyo’

¹ Xa unombulelo onzulu ngento entle oyiphiweyo, ngaba oko awukubonisi ngesimo sengqondo nangezenzo zakho? Kakade wenjenjalo! Ngokuphathelele ukulunga nobubele bothando uYehova abubonise uluntu, phawula indlela asabela ngayo umpostile uPawulos. Wadandaluka wathi: “Makubulelwe kuThixo ngenxa yesipho sakhe sesisa esingathethekiyo”! Siquka ntoni eso “sipho”? ‘Kubo bonke ububele obungasifanelanga bukaThixo obugqwesileyo’ asibonise bona, esona sipho sibalaseleyo seso soNyana wakhe owaba yintlawulelo yezono zethu.—2 Kor. 9:14, 15; Yoh. 3:16.

² Ngaba amazwi ombulelo kaPawulos ayeyinkonzo nje yokudlulisela usana kunina? Nakanye! Wabonisa uxabiso olunzulu ngeendlela ezininzi. Wayeyixhalabele gqitha impilo-ntle yokomoya yamanye amaKristu kunye naye kwaye wayefuna ukwenza oko wayenokukwenza ukuze abancede bangenelwe ngokupheleleyo kububele obungasifanelanga bukaThixo. Ngokuphathelele abo banjalo, uPawulos wathi: “Ngenxa yokuba sinomsa ngani, kuye kwakholeka kuthi ukuba sininike, kungekuphela nje iindaba ezilungileyo zikaThixo, kodwa kwanemiphefumlo yethu, ngenxa yokuba naba ziintanda kuthi.” (1 Tes. 2:8) Ukongezelela ekuncedeni abo babesele beyinxalenye yebandla ukuba basebenzele usindiso lwabo, uPawulos washumayela iindaba ezilungileyo engadinwa, ehamba amawaka eekhilomitha emhlabeni naselwandle ukuze afumane abo “babenotyekelo olufanelekileyo ngobomi obungunaphakade.” (IZe. 13:48) Uxabiso olunzulu lukaPawulos ngoko uYehova wayemenzele kona lwamshukumisela ukuba ‘alishumayele ngokupheleleyo ilizwi likaThixo.’—Kol. 1:25.

³ Ngaba uxabiso lwethu ngako konke oko asenzele kona uYehova alusishukumiseli ukuba sinikele uncedo lokomoya kwabo bafuna uncedo ebandleni lethu? (Gal. 6:10) Ngaba asishukunyiselwa ukuba sibe nesabelo esizeleyo kangangoko kunokwenzeka ekushumayeleni iindaba ezilungileyo zoBukumkani kuyo yonke intsimi yethu?—Mat. 24:14.

⁴ Ithuba Lokubonisa Uxabiso: Nyaka ngamnye iSikhumbuzo sokufa kukaKristu sisinika ithuba elikhethekileyo lokuba sibonise uxabiso ngoko uYehova noYesu basenzele kona. Le asiyontlanganiso nje okanye kuphela nje ukukhunjulwa kwesiganeko esithile. UYesu wathi: “Hlalani nisenza oku nindikhumbula.” (Luka 22:19) ISikhumbuzo sokufa kukaKristu lixesha lokucamngca ngohlobo lomntu alulo uYesu. Lixesha lokukhumbula ukuba uyaphila kwaye uyasebenza namhlanje, enozuko nobukumkani awabunikwayo ngenxa yekhondo lokuthembeka nedini lakhe. Esi sihlandlo sikwalixesha lokubonisa ukuzithoba kubuntloko bukaKristu njengokuba esalathisa imicimbi nemisebenzi yebandla lamaKristu. (Kol. 1:17-20) Bonke abantu bakaThixo bafanele babekho eSikhumbuzweni sokufa kukaKristu. Kulo nyaka siza kuba sekutshoneni kwelanga ngoLwesine, ngoMatshi 28, 2002.

⁵ Ngenxa yokuzibhokoxa ngaphambi kweSikhumbuzo sonyaka ophelileyo, siye saneyona ncopho iphakamileyo yababekho abangama-202 271 kumazwe angaphantsi kwesebe loMzantsi Afrika. Bangaphi abaza kubakho kulo nyaka? Ubukhulu becala kuxhomekeka ‘ekusebenzeni nzima nasekuzibhokoxeni kwethu,’ sincede abaninzi kangangoko kunokwenzeka ukuba babekho.—1 Tim. 4:10.

⁶ Ukongezelela ekuyeni kwiSidlo SeNkosi Sangokuhlwa, sinokwandisa umsebenzi wethu wenkonzo yasentsimini. Ngokungathandabuzekiyo, amashumi amawaka abazalwana noodade baza kuba ngoovulindlela abangabancedani inyanga enye okanye ezingakumbi. Nyaka ngamnye kule minyaka mihlanu idluleyo, ngexesha leSikhumbuzo siye sanomlinganiselo woovulindlela abangabancedani abali-17 788 ukususela ngoMatshi ukusa kuMeyi. Ngaba ungakwazi ukulungelelanisa ucwangciso lwakho ukuze ube nguvulindlela ongumncedani kulo nyaka? Iya kuba yindlela esemagqabini yokubonisa uxabiso lwakho olunzulu ngelungiselelo likaThixo lothando elilidini lentlawulelo likaKristu. Ungaqiniseka ngentsikelelo kaYehova, njengokuba la mava alandelayo ebonisa.

⁷ Udade owayesebenza ngokusisigxina wabhala ngamava akhe okuba nguvulindlela ongumncedani ngoMatshi wonyaka ophelileyo wenjenje: “UBulungiseleli Bethu BoBukumkani bukaFebruwari 2001 bakhuthaza wonke ubani ezimvumelayo iimeko zakhe ukuba abe nguvulindlela ongumncedani ngexesha leSikhumbuzo. Ekubeni uMatshi eneMigqibelo emihlanu, oku kwahambisana kakuhle gqitha nocwangciso lwam. Ndagqiba kwelokuba ndifake isicelo.” Njengokuba yayiqala inyanga, wazibekela usukelo lokuba aqalise isifundo seBhayibhile sekhaya. Ngaba waphumelela? Ewe, wasiqalisa xa wayesenza iyure yakhe yama-52 kuloo nyanga! Sisiphi isigqibo awafikelela kuso? Sesokuba “kukho iintsikelelo ezingathethekiyo xa sisenza umgudu ongakumbi.”

⁸ Ziziphi iingenelo ezinokufunyanwa yintsapho xa ingoovulindlela yonke? Intsapho enamalungu amane eyayingoovulindlela ngoAprili ophelileyo yafumanisa ukuba leyo yinyanga engenakuyilibala. Umama wathi: “Olunjani ulonwabo esasinalo suku ngalunye, ekubeni sasimanyene kubulungiseleli! Iingxubusho ngemisebenzi yethu yenkonzo yemihla ngemihla zazisenza ixesha lesidlo sangokuhlwa sinandipheke gqitha.” Unyana yena wathi: “Ndiyakunandipha ukusebenza notata kubulungiseleli basentsimini ebudeni beveki, ngoxa ngokuqhelekileyo esebenza.” Ubawo wongezelela ngelithi: “Njengentloko-ntsapho, ndaziva ndanelisekile kukwazi ukuba sisebenza kunye kowona msebenzi ubalulekileyo kwixesha esiphila kulo.” Ngaba intsapho yakho ingangenela inkonzo yobuvulindlela yonke? Kutheni ningakuxubushi njengentsapho oku nize nibone enoba kunokwenzeka kusini na ukuba intsapho yenu yonke ibe ngoovulindlela abangabancedani ebudeni bexesha leSikhumbuzo?

⁹ Ngaba UMatshi Singamenza Abe Yeyona Nyanga Yethu Isemagqabini? Ebutsheni bowama-2000, UBulungiseleli Bethu BoBukumkani babuza: “Ngaba Sinokwenza UAprili Wama-2000 Abe Yeyona Nyanga Isemagqabini Kuthi?” Yaba njani intsabelo? Kwafikelelwa incopho entsha. Eyona ncopho iphakamileyo yoovulindlela abangabancedani eMzantsi Afrika yabali-10 126. Ukongezelela, saba nencopho entsha yeeyure, eyamaphephancwadi ahanjiswayo, iincwadana/iincwadana ezinemifanekiso, amabuyelo nezifundo zeBhayibhile. Ngaba usalikhumbula ihlombe elalisebandleni lenu ngenxa yelo phulo lomsebenzi wokomoya ebudeni baloo nyanga ikhethekileyo? Ngaba singenza okufanayo okanye sithi kratya kulo nyaka? Ngenxa yokuzibhokoxa uMatshi 2002 angaba “Yeyona Nyanga Yethu Isemagqabini.” Kutheni imele ibe nguMatshi?

¹⁰ Zibini izizathu ezenza uMatshi abe yinyanga ekhethekileyo yomsebenzi. Okokuqala, iSikhumbuzo siza kuqhutywa ekupheleni kukaMatshi, nto leyo esinika ithuba lokumema abantu abaninzi kangangoko kunokwenzeka kwasekuqaleni kwenyanga. Okwesibini, kulo nyaka uMatshi uneempela-veki ezintlanu, nto leyo eyenza kube lula ukuba nguvulindlela ongumncedani kwabo basebenzayo okanye abo bahamba isikolo. Kutheni ungahlali phantsi ngoku uze wenze ucwangciso olusebenzisekayo, usebenzisa ikhalenda ekwesi sihlomelo? Ukuba nguvulindlela ongumncedani kunokuba lula kunokuba ucinga. Ngokomzekelo, ukuba ungacwangcisa ukufumana iiyure ezisi-8 kwinkonzo yasentsimini ngempela-veki nganye yezi zintlanu, kuya kufuneka ucwangcise iiyure ezili-10 ezongezelelekileyo ngenyanga ukuze ufikelele isisikelo seeyure ezingama-50.

¹¹ Yintoni abanokuyenza abadala ukunceda bonke abasebandleni ‘ukuze balishumayele ngokupheleleyo ilizwi likaThixo’? Vuselelani ihlombe xa ninezabelo kwiintlanganiso naxa nincokola. Abaveleli beZifundo Zencwadi Zebandla nabancedisi babo mabaye kuye ngamnye oseqeleni labo baze bamncede. Amazwi ambalwa obubele nokhuthazo okanye amacebiso asebenzisekayo anokuba koko kufunekayo. (IMize. 25:11) Abaninzi baya kubona ukuba xa benokwenza uhlengahlengiso olungephi kucwangciso lwabo, banganandipha ilungelo lokukhonza njengoovulindlela abangabancedani. Kumabandla amaninzi, inkoliso, ukuba asingabo bonke, abadala nezicaka zolungiselelo nabafazi babo bamisela umzekelo omhle ngokuba ngoovulindlela abangabancedani ebudeni bexesha leSikhumbuzo. Oku kuye kwakhuthaza intlaninge yabavakalisi ukuba babathelele. Ngenxa yokusikelwa umda ziimeko okanye zezinye izinto, abanye abavakalisi basenokungakwazi ukuba ngoovulindlela, kodwa banokukhuthazwa ukuba babonise uxabiso lwabo ngokuba bazibhokoxe kangangoko kunokwenzeka kubulungiseleli kunye nebandla.

¹² Impumelelo ixhomekeke ekucebeni ngenyameko kwabadala. Kufanele kucwangciswe ixesha elifanelekileyo leentlanganiso. Ukuba kunokwenzeka, umveleli wenkonzo uya kwabela abazalwana abafanelekayo kwangaphambili ukuba baqhube zonke iintlanganiso zenkonzo yasentsimini. Kufuneka kulungiselelwe kakuhle ukuze ezi ntlanganiso zingedluli kwimizuzu eli-10 ukusa kweli-15, kuquka nokulungelelanisa amaqela, ukwaba umhlaba nokuthandaza. (Bona Isingxobo Semibuzo soBulungiseleli Bethu BoBukumkani sikaSeptemba 2001.) Ucwangciso lomsebenzi wenyanga lufanele luchazwe kakuhle ebandleni luze luxhonywe ebhodini yezaziso.

¹³ Kufanele kubekho umhlaba owaneleyo. Umveleli wenkonzo ufanele adibane nomzalwana onyamekela imihlaba ukuze enze amalungiselelo okusebenza loo mihlaba ingagutyungelwa rhoqo. Kufanele kusetyenzwe amakhaya awayengenabantu, kunikelwe ubungqina esitratweni nasezivenkileni yaye kunikelwe ubungqina ngamarhatya. Xa kufanelekile, abavakalisi banokuncedwa banikele ubungqina ngomnxeba.

¹⁴ Bancede Bakhonze Kwakhona: Ngaba bakho nabaphi na kwintsimi yebandla lenu abangasakhuthelanga kumsebenzi wokushumayela iindaba ezilungileyo? Abo bantu baseyinxalenye yebandla kwaye bafuna uncedo. (INdu. 119:176) Ekubeni isiphelo seli hlabathi lidala sisondele kangaka yaye ihlabathi elitsha lisemnyango, sinesizathu esivakalayo sokwenza unako nako ukuze sincede abo bapholileyo. (Roma 13:11, 12) Kule minyaka mihlanu idluleyo, nyaka ngamnye kuye kwancedwa abantu abangaphezu kwe-1 400. Yintoni esinokuyenza ukuze sincede abaninzi bavuselele uthando nentembelo ababenayo ekuqaleni?—Heb. 3:12-14.

¹⁵ Iqumrhu labadala liya kuxubusha indlela elinokubanceda ngayo abo baye baphola kule minyaka imbalwa idluleyo. (Mat. 18:12-14) Unobhala ufanele ahlole iNgxelo Yomvakalisi Yebandla aze aphawule bonke abapholileyo. Kufanele kwenziwe umgudu okhethekileyo wokunceda kusetyenziswa amatyelelo okwalusa. Umdala usenokutyelela umvakalisi othile ebeqhelene naye nabenonxulumano oluhle naye ngaphambili, okanye kunokucelwa abanye abavakalisi ukuba bancede. Mhlawumbi wayemfundela loo mvakalisi upholileyo yaye uya kukuvuyela ukuncedwa ngeli xesha likhethekileyo. Sinethemba lokuba, abo bapholileyo baya kushukunyiselwa ukuba bashumayele ilizwi likaThixo kwakhona. Ukuba bayafaneleka, alikho elinye ixesha elilungileyo lokuba baqalise ngaphandle kwexesha leSikhumbuzo!—Bona Isingxobo Semibuzo soBulungiseleli Bethu BoBukumkani bukaNovemba 2000 ngokuphathelele iinkcukacha ezingakumbi.

¹⁶ Ngaba Abanye Bayakufanelekela Ukushumayela? UYehova uyaqhubeka esikelela abantu bakhe ngokungenisa “izinto ezinqwenelekayo zazo zonke iintlanga.” (Hag. 2:7) Nyaka ngamnye amawaka aye afaneleke njengabavakalisi abangabhaptizwanga. Ngoobani abo? Abantwana bamaNgqina kaYehova nezifundo zeBhayibhile ezenza inkqubela. Sazi njani ukuba bayakufanelekela ukuba ngabavakalisi beendaba ezilungileyo?

¹⁷ Abantwana BamaNgqina KaYehova: Abantwana abaninzi bebepheleka abazali babo kwindlu ngendlu kangangeminyaka, nangona bengekabi ngabavakalisi abangabhaptizwanga. UMatshi usenokuba lixesha elihle lokuba baqalise. Wazi njani ukuba umntwana wakho uyafaneleka? Incwadi ethi Ukulungelelaniselwa Ukufeza Ubulungiseleli Bethu kwiphepha 100 ithi, “Xa umntwana engumzekelo kwihambo yakhe yaye ekwazi ukuluvakalisa ngokobuqu ukholo lwakhe ngokuthetha nabanye ngeendaba ezilungileyo, eshukunyiswa ngokusuka entliziyweni ukwenjenjalo.” Ukuba ucinga ukuba umntwana wakho uyafaneleka, thetha nomnye wabadala abakwiKomiti Yenkonzo Yebandla.

¹⁸ Izifundo ZeBhayibhile Ezifanelekayo: Emva kokuba isifundo seBhayibhile siye sangenisa ulwazi saza saya ezintlanganisweni kangangexesha elithile, sisenokufuna ukuba ngumvakalisi woBukumkani. Ukuba uqhuba isifundo esinjalo, hlolisisa le mibuzo ilandelayo: Ngaba senza inkqubela ngokuvisisana nobudala nobuchule baso? Ngaba sele siqalile ukwabelana nabanye ngokholo lwaso ngokungacwangciswanga? Ngaba sambatha “ubuntu obutsha”? (Kol. 3:10) Ngaba siyazifikelela iimfaneleko zabavakalisi abangabhaptizwanga ezandlalwe kwiphepha 97-9 lencwadi ethi Ubulungiseleli Bethu? Ukuba kunjalo, ungathetha neKomiti Yenkonzo Yebandla ukuze kwenziwe amalungiselelo okuba abadala ababini badibane nesifundo eso. Ukuba siyafaneleka, abo badala baya kusixelela ukuba singaya kwinkonzo yasentsimini.

¹⁹ Kuthekani NgoAprili NangoMeyi? Ezi nazo iza kuba ziinyanga ezikhethekileyo zomsebenzi owandisiweyo kwinkonzo yasentsimini. Uninzi lwabo bebengoovulindlela abangabancedani ngoMatshi bangakwazi ukuphinda babengabo ngoAprili okanye ngoMeyi. Ebudeni buka-Aprili noMeyi, siza kuhambisa iphephancwadi IMboniselo noVukani! kubulungiseleli. Hayi indlela abangenelwa ngayo abo bawafundayo! La maphephancwadi aye anendima enkulu kulwando oluye lwakho ehlabathini lonke. Kuza kwenziwa umgudu okhethekileyo ngoAprili nangoMeyi wokuba kuhanjiswe amaphephancwadi kubantu abaninzi kangangoko kunokwenzeka. Ceba kwangoku ukuze ube nesabelo ngokuzeleyo.

²⁰ Ekubeni umsebenzi wokushumayela uza kwanda, ngaba ufuna ukwandisa inani lamaphephancwadi owafumana ebandleni? Kuwo wonke unyaka wenkonzo, siza kuhambisa iphephancwadi IMboniselo noVukani! ngoMgqibelo ngamnye, uSuku lwethu Lwamaphephancwadi. Noko ke, ekubeni uninzi luza kube lukwinkonzo yobuvulindlela bobuncedani yaye sonke siza kube sihambisa amaphephancwadi iinyanga ezimbini ezizeleyo, kusenokufuneka ukuba wandise iodolo yakho yamaphephancwadi ebandleni. Ukuba kunjalo, nceda uthethe nesicaka samaphephancwadi ebandleni lakho ngokukhawuleza. Kwangaxeshanye, isicaka soncwadi kufuneka siqinisekise ukuba kukho isixa esaneleyo sephecana elithi Ngaba Ungathanda Ukwazi Ngakumbi NgeBhayibhile?

²¹ Abaninzi baye bayibulela inxalenye yoBulungiseleli Bethu BoBukumkani enomxholo othi “Oko Unokukuthetha Ngamaphephancwadi.” Ngaba uye walixhakamfula eli thuba ngokufunda iintshumayelo zamaphephancwadi ezingumzekelo? Kutheni ungasebenzisi inxalenye yesifundo senu seBhayibhile sentsapho veki nganye ukuze niqhelisele ezi ntshumayelo?

²² Lisebenzise Kakuhle Eli Xesha LeSikhumbuzo: Njengompostile uPawulos, masibonise uYehova indlela esisixabisa ngayo ‘isipho sakhe sesisa esingathethekiyo’ ngokuba nenxaxheba ngokuzeleyo kwimisebenzi yokomoya ecetyelwe ixesha leSikhumbuzo. Ezi ndlela ziquka (1) ukuba nesabelo ngokuzeleyo ngoSuku Lwamaphephancwadi olukhethekileyo ngoMatshi 2, 2002; (2) ukubakho kwesona siganeko sibalulekileyo sonyaka, ukukhunjulwa kweSidlo seNkosi Sangokuhlwa ngoLwesine, ngoMatshi 28, 2002; (3) ukunceda abo baye baphola bavuselele ‘uthando ababenalo ekuqaleni’ (ISityhi. 2:4; Roma 12:11); (4) ukunceda abantwana bethu nazo naziphi na izifundo zeBhayibhile zifanelekele ukuba ngabavakalisi abangabhaptizwanga; (5) nokubandakanyeka ngokupheleleyo kumsebenzi wokushumayela kangangoko kunokwenzeka, nokuba ngoovulindlela abangabancedani ngoMatshi nasemva koko.—2 Tim. 4:5.

²³ Sithandaza ngokunyanisekileyo ukuba sonke sibe nesabelo ngokuzeleyo ekushumayeleni iindaba ezilungileyo zoBukumkani ngexesha leSikhumbuzo, ngaloo ndlela sibonisa uxabiso lwethu olunzulu ngako konke asenzele kona uYehova.

[Ibhokisi ekwiphepha 6]

Ucwangciso Lwam Lwenkonzo Yasentsimini LukaMatshi 2002

1 2

3 4 5 6 7 8 9

10 11 12 13 14 15 16

17 18 19 20 21 22 23

24 25 26 27 28 29 30

ISIKHUMBUZO

EMVA KOKUTSHONA

31 KWELANGA

Ngaba ungakwazi ukucwangcisa isimbuku seeyure ezingama-50 zokuba nguvulindlela ongumncedani ngoMatshi?