Ucwangciso Olutsha Losuku Olukhethekileyo Lwendibano
Kule mihla ininzi inkcazelo efumanekayo ephathelele ukugcina intliziyo yethu yokoqobo ikwimeko entle ukuze sinandiphe ubomi kwaye siphile ixesha elide. Eyona nto ibaluleke nangaphezulu yimeko yentliziyo yethu yokomfuziselo. Ngoko, hayi indlela ekufaneleke ngayo ukuba ucwangciso losuku olukhethekileyo lwendibano oluza kuqala ngoSeptemba 2003 lube nomxholo othi: “Ukukhonza UYehova Ngentliziyo Epheleleyo.” (1 Kron. 28:9) Yintoni esinokulindela ukuyizuza?
Umveleli wesiphaluka uya kuxubusha umxholo othi “Ukunceda Abanye Bakhonze UYehova Ngomphefumlo Onoyolo.” Udliwano-ndlebe luya kubalaselisa uvuyo olubangelwa kukuhlakulela umdla nokuqhuba izifundo zeBhayibhile nabantu abafuna ukukhonza uYehova. Ngokuqinisekileyo bonke abezileyo baya kuthuthuzeleka baze bakhuthazeke yintetho yokuqala yesithethi esityeleleyo, enomxholo othi, “Ukulondoloza Iintliziyo Zethu Kwihlabathi Elineengxaki.” Ucwangciso lwakusasa luya kuqukunjelwa ngentetho yobhaptizo.
Emva kwemini, intetho ethi “Ukunikela Uncedo” iya kuxubusha indlela esinokubanceda ngayo abanye. Yintoni enokwenziwa ngabazali ukukhusela iintliziyo zabantwana babo kwiimpembelelo ezimbi nokubanceda basondele kuYehova? Intetho ethi “Nceda Abantwana Bakho Bayoliswe NguYehova” iya kunikela amacebiso aluncedo ize ibonise indlela okunokwenziwa ngayo oku.
Ngaba siyawasebenzisa onke amalungiselelo uYehova awenzele ukugcina intliziyo yethu yokomfuziselo iphilile yaye yomelele? Intetho yokuqukumbela yesithethi esityeleleyo ethi, “Ukugcina Intliziyo Epheleleyo Ekukhonzeni UYehova,” iya kuxubusha iinkalo ezine ezibalulekileyo zokulungisa ubumoya bethu. Lingakanani ixesha kunye nomgudu esiwenzayo ukuze sizinikele emthandazweni, ekufundisiseni iLizwi likaThixo, ekushumayeleni ngenkuthalo, nasekunxulumaneni namanye amaKristu? Ngaba ikho inkalo ekufuneka siphucule kuyo?
UYehova uyakumema esithi: “Yinikele intliziyo yakho kwingqeqesho nendlebe kumazwi okwazi.” (IMize. 23:12) Ceba kwangoku ukubakho kolu suku luza kube luzaliswe yimfundiso eyingenelo yeZibhalo. Ukwenjenjalo kuya kukomeleza ukuze uqhubeke ukhonza uYehova ngentliziyo epheleleyo nangomphefumlo onoyolo.