Ibali Lobomi

Ukunceda Abanye Kunciphisa Ukubandezeleka

NGOKUBALISWA NGUJULIÁN ARIAS

Ngowe-1988, xa ndandineminyaka engama-40 ubudala, izinto zazindihambela kakuhle emsebenzini. Ndandingumphathi wengingqi kwinkampani ekumazwe amaninzi. Ngenxa yalo msebenzi wam ndanikwa imoto engayiwayo, umvuzo oncumisayo, neofisi entle kumbindi waseMadrid, eSpeyin. Le nkampani yade yandithela thsuphe ukuba iza kundenza umphathi wenkampani kweli lizwe liphela. Ndandingayiqondi into yokuba kwakuza kubakho iinguqulelo ezinkulu kangaka ebomini bam.

NGENYE imini kwangaloo nyaka, ugqirha wam wandixelela ukuba ndinesifo sokuqinelwa yimithambo, isifo esinganyangekiyo. Kwakungathi mandife. Kamva, xa ndafunda ngento esi sifo esinokuyenza emntwini, ndoyika gqitha.a Kwakubonakala ngathi ndandiza kuba kule ntlungu ubomi bam bonke. Ndandiza kumondla njani umfazi wam, uMilagros, nonyana wam oneminyaka emithathu ubudala, uIsmael? Sasiza kumelana njani nale meko? Xa kanye ingqondo yam yayithath’ ibeka, ndahlelwa sesinye isihelegu.

Malunga nenyanga emva kokuba ugqirha wam endixelele ngesi sigulo sam, umphathi wam wandibizela eofisini yakhe waza wandixelela ukuba inkampani ifuna abantu “abakhangeleka kakuhle.” Yaye umntu onesifo esenza umzimba uwohloke ngokuthe ngcembe—kwanaxa sisaqala—akakhangeleki kakuhle. Wandula ke engaphozisanga maseko, umphathi wam wandigxotha. Ngesiquphe, ndaphelelwa ngumsebenzi!

Kwintsapho yam, ndandizama ukuziqinisa, kodwa ndilangazelela ukuba ndodwa, ukuze ndicinge ngale meko yam intsha nangekamva lam. Ndazama ukulwa nokudandatheka okwakuya kukhula. Eyona nto eyayibangel’ intliziyo yam ibe lihlwili kukuthi nje ngesiquphe ndibonakale ndingento yanto kwinkampani endandiyisebenzela.

Ukufumana Amandla Kubuthathaka

Okuvuyisayo kukuba, kweli xesha lobunzima, ndandinezinto ezininzi ezazinokundomeleza. Kwiminyaka enokuba ngama-20 ngaphambilana, ndaba ngomnye wamaNgqina kaYehova. Ngoko ke ndathandaza kuYehova ngokunyaniseka ndimchazela indlela endivakalelwa ngayo nokungaqiniseki kwam ngekamva. Umfazi wam, naye oneenkolelo ezifanayo, wandomeleza gqitha, yaye ndakhuthazwa nangabanye abahlobo abasenyongweni yaye ububele novelwano lwabo lwandinceda gqitha.—IMizekeliso 17:17.

Ukufuna ukunceda abanye nako kwandomeleza. Ndandifuna ukumkhulisa kakuhle unyana wam, ndimfundise, ndidlale naye, ndize ndimqeqeshe kumsebenzi wokushumayela. Ngoko ke ndandingenakunikezela. Ngaphezu koko, ndandingumdala kwelinye lamabandla amaNgqina kaYehova, yaye abazalwana bam noodade abangamaKristu babefuna inkxaso yam. Ukuba ndandivumela esi sigulo sam sindenze ndiphelelwe lukholo, ndandiza kumisela wuphi umzekelo kwabanye?

Ngokungathandabuzekiyo, ubomi bam batshintsha ngokwasemzimbeni nakwezoqoqosho—kwezinye iimeko izinto zazingahambi kakuhle kodwa kwezinye izinto zazibhetele. Ndakha ndeva omnye ugqirha esithi: “Isifo asimtshabalalisi umntu; kunoko, siyamtshintsha.” Yaye ndiye ndafunda ukuba iinguqulelo azibi mbi zonke.

Okokuqala, “iliva enyameni” yam landinceda ndaziqonda ngakumbi iingxaki zempilo zabanye abantu ndize ndivelane nabo. (2 Korinte 12:7) Ndiwaqonda ngakumbi amazwi akwiMizekeliso 3:5 athi: “Kholosa ngoYehova ngayo yonke intliziyo yakho, ungayami ngokwakho ukuqonda.” Ngaphezu kwako konke, iimeko zam ezintsha zindifundisa ukuziqonda ezona zinto zibalulekileyo neyona nto enika ulwaneliseko lokwenene nokuzixabisa. Bekusekho izinto ezininzi endinokuzenza kwintlangano kaYehova. Ndiye ndafumana intsingiselo yokwenene yamazwi kaYesu athi: “Kunoyolo ngakumbi ukupha kunokwamkela.”—IZenzo 20:35.

Ukuphila Ubomi Obutsha

Kungekudala emva kokufunyaniswa kwesi sigulo sam, ndamenyelwa kwingqungquthela eyayiseMadrid apho amaKristu angamatsha-ntliziyo ayefundiswa indlela oogqirha abanokusebenzisana ngayo namaNgqina agulayo. Kamva, loo matsha-ntliziyo amiselwa njengeeKomiti Zokunxibelelana Nezibhedlele. Kum, loo ngqungquthela yayifike kanye ngexesha elifanelekileyo. Ndafumana umsebenzi ophucukileyo, owawuza kundenza ndibe nolwaneliseko olungaphezu kwalo naluphi na olufumaneka kumsebenzi wengqesho.

Kule ngqungquthela seva ukuba ezi Komiti Zokunxibelelana Nezibhedlele ezisandul’ ukusekwa zazifanele zityelele izibhedlele, zenze udliwano-ndlebe noogqirha, zize zithethe nabezonyango, konke oku zikwenza ngenjongo yokuba kubekho intsebenziswano kuze kuphetshwe ungquzulwano. Ezi komiti zinceda amanye amaNgqina afumane oogqirha abakulungeleyo ukwenza utyando ngaphandle kokusebenzisa igazi. Kakade ke, njengomntu ongenabuchule kwezonyango, kwafuneka ndifunde amagama nemigaqo-siseko yezonyango, nendlela ezisebenza ngayo izibhedlele. Sekunjalo, emva kwaloo ngqungquthela ndagoduka ndikulungele ukujamelana nolu celomngeni lutsha olwandenza ndanemincili.

Ukutyelela Izibhedlele—Into Endizisela Ulwaneliseko

Nangona esi sifo sasisiya sindongamela, umsebenzi wam njengelungu leKomiti Yokunxibelelana Nezibhedlele nawo wawusiya usanda. Ngenxa yemali yendodla yokugula endiyifumanayo, ndinexesha lokutyelela izibhedlele. Phezu kwako nje ukuphoxeka ngamanye amaxesha, lo msebenzi wokutyelela izibhedlele ulula yaye uvuyisa ngakumbi kunokuba ndandicinga. Nangona ngoku ndihamba ngesitulo esinamavili, oku akukhange kube ngumqobo omkhulu. Ndisoloko ndiphelekwa lelinye ilungu lekomiti. Ngaphezu koko, oogqirha baqhelene nokuthetha nabantu abahamba ngesitulo esinamavili, yaye maxa wambi baphulaphula ngentlonelo engakumbi xa babebona umgudu endiwenzayo xa ndibatyelela.

Ngaphezu kweminyaka elishumi edluleyo, ndiye ndatyelela oogqirha abaninzi. Abanye babekuvuyela ukusinceda zisuka nje. UGqr. Juan Duarte—wotyando lwentliziyo eMadrid okuvuyelayo ukuhlonela isazela somguli—ngoko nangoko wavuma ukusinceda. Ukususela ngoko, uye wenza utyando kumaNgqina angaphezu kwama-200 ngaphandle kwegazi kwindawo ezininzi zaseSpeyin. Ekuhambeni kweminyaka oogqirha abaninzi baye baqalisa ukwenza utyando ngaphandle kwegazi. Ukubatyelela kwethu rhoqo kuye kwanegalelo elithile, kodwa inkqubela nayo yayixhomekeke ekuhambeleni phambili kwezonyango nakwimiphumo emihle kutyando olwenziwa ngaphandle kwegazi. Yaye siqinisekile ukuba uYehova uye wayisikelela imigudu yethu.

Ngokukhethekileyo ndiye ndakhuthazwa yindlela abasabela ngayo oogqirha abenza utyando lwentliziyo abanobuchule bokunyanga abantwana. Kangangeminyaka emibini satyelela elinye iqela elinoogqirha ababini neengcali zokudambisa iintlungu. Sabanika iincwadi zonyango ezichaza izinto ezenziwa ngabanye oogqirha ngokuphathelele olu nyango. Imigudu yethu yavuzwa ngowe-1999 ebudeni beMedical Conference on Infantile Cardiovascular Surgery. Aba gqirha babini—besalathiswa ngomnye woogqirha bethu ovela eNgilani—benza utyando olwalunzima ngokwenene kusana lweNgqina ekwakufuneka lulungiswe unothumela.b Ndavuyisana nabazali balo xa omnye woogqirha waphuma kwigumbi lotyando eze kuchaza ukuba olu tyando luye lwaba yimpumelelo yaye siye sahlonelwa isazela sale ntsapho. Ngoku aba gqirha babini banceda amaNgqina afuna unyango kulo lonke elaseSpeyin.

Eyona nto endiye ndayifumanisa ivuyisa ngokwenene ngeemeko ezinjalo kukuqonda ukuba ndinako ukubanceda abazalwana bam abangamaKristu. Ngokuqhelekileyo, xa beqhagamshelana neKomiti Yokunxibelelana Nezibhedlele, kuxa iimeko zimbi kakhulu. Kufuneka benze utyando, yaye oogqirha kwizibhedlele zasekuhlaleni abafuni okanye abakwazi ukubanyanga ngaphandle kwegazi. Noko ke, xa abazalwana besiva ukuba kukho oogqirha abanobuchule obahlukahlukeneyo abanokubanceda apha eMadrid, ziye zithi xibilili izibilini. Ndiye ndabona abazalwana ababenxunguphele besithi thimbilili, ngokubakho nje kwethu esibhedlele.

Iijaji Nemigaqo-siseko Yezonyango

Kwiminyaka yakutshanje, amalungu eeKomiti Zokunxibelelana Nezibhedlele aye atyelela neejaji. Ebudeni bolo tyelelo, sazinika incwadi ethi Family Care and Medical Management for Jehovah’s Witnesses, eyayilungiselelwe ngokukhethekileyo ukwazisa amagosa ezonyango ngokungalamkeli kwethu igazi nezinto ezinokusetyenziswa endaweni yalo. Olu tyelelo lwaluyimfuneko, ekubeni ngaphambili kwakuyinto eqhelekileyo eSpeyin ukuba iijaji zinike oogqirha igunya lokutofel’ igazi kulowo ugulayo enoba akafuni.

Iiofisi zeejaji zintle gqitha, yaye kutyelelo lwam lokuqala, ndaziva ndimncinane xa ndandihamba kwezo paseji ngesitulo sam esinamavili. Eyona nto eyenza izinto zaba mbi nangakumbi kukuba, ngengozi ndawa ndaza ndabetheka ngamadolo. Iijaji namagqwetha athile awayibonayo le ngozi ngobubele eza kundinceda, kodwa ndaziva ndineentloni.

Nangona iijaji zazingaqinisekanga ngento esasiyizele, inkoliso yazo yayisiphatha ngobubele. Ijaji yokuqala endayityelelayo yayisele icinga ngendlela esiwujonga ngayo lo mbandela, yaye yathi ingathanda ukuthetha nathi ngokubhekele phaya. Kutyelelo lwethu olulandelayo, yandiqhuba yandingenisa kwiofisi yayo yaza yaphulaphula ngenyameko. Impumelelo esaba nayo kolu tyelelo lokuqala yandikhuthaza mna nalowo ndandihamba naye ukuba singoyiki, yaye kungekudala sabona imiphumo emihle engakumbi.

Ebudeni baloo nyaka, sashiyela enye ijaji incwadi ethi Family Care, eyasamkela ngobubele yaza yathembisa ukuba iza kuyifunda le nkcazelo. Ndayinika inombolo yam yefowuni ukuba kunokwenzeka ifune ukuqhagamshelana nathi xa kuvela ingxaki. Kwiiveki ezimbini kamva yanditsalela umnxeba indixelela ukuba ugqirha wasekuhlaleni owenza utyando uye wamcela ukuba agunyazise ukuba iNgqina ekufuneka lenziwe utyando litofelwe igazi. Le jaji yasixelela ukuba ifuna ukumnceda lo gqirha afumane enye indlela anokuyisebenzisa eza kuhlonela umnqweno weli Ngqina wokungalamkeli igazi. Akuzange kube nzima ukufumana esinye isibhedlele, apho oogqirha abalwenza ngokuphumelelayo olu tyando ngaphandle kwegazi. Le jaji yavuya gqitha xa yeva iziphumo, yaye yasiqinisekisa ukuba iya kukhangela iindlela ezifanayo nakwixesha elizayo.

Ebudeni bokutyelela kwam izibhedlele, bekusoloko kubakho imbambano ephathelele imigaqo-siseko yezonyango, ekubeni sasifuna ukuba oogqirha banikel’ ingqalelo kumalungelo nakwisazela somguli. Esinye isibhedlele esisebenzisana nathi eMadrid sandimemela kwizifundo eziphathelele imigaqo-siseko. Ezi zifundo zandenza ndakwazi ukuthetha neengcali zezonyango ngembono yethu esekelwe eBhayibhileni. Kwakhona zandinceda ndaziqonda izigqibo ezininzi nezinzima oogqirha abafanele bazenze.

Omnye wabahlohli kwezi zifundo, uNjingalwazi uDiego Gracia, udla ngokulungiselela oogqirha abaziingcaphephe baseSpeyin izifundo ezingemigaqo-siseko yaye uye walixhasa ngokuqinileyo ilungelo lethu lokwamkela unyango emva kokuba sikuqonda oko kubandakanyekileyo kumbandela wotofelo gazi.c Ukumtyelela kwethu ngokuthe rhoqo kuye kwakhokelela ekubeni abanye abameli beofisi yesebe lamaNgqina kaYehova laseSpeyin bamenywe ukuze baye kuchaza indlela esikujonga ngayo ukutofelwa igazi koogqirha abafundiswa nguNjingalwazi Gracia abasele benezidanga, bambi abagqalwa njengabona gqirha banobuchule kweli lizwe.

Ukujamelana Nobomi

Kakade ke, lo msebenzi wanelisayo endiwenzela amanye amakholwa awukhange uziphelise zonke iingxaki zam. Isifo endinaso siya sithabath’ unyawo. Noko ke, ngethamsanqa ingqondo yam isasebenza. Ngenxa yokuba umfazi nonyana wam bengakhalazi, ndisakwazi ukufeza iimbopheleko zam. Ngaphandle koncedo nenkxaso yabo, bendingasoze ndikwazi ukukwenza oku. Andikwazi nokuziqhobosha ibhulukhwe okanye ukunxiba idyasi. Ndikuvuyela ngokukhethekileyo ukushumayela nonyana wam, uIsmael, ngeMigqibelo, ondiqhubayo ukuze ndithethe nabantu abahlukahlukeneyo. Yaye ndisakwazi ukwenza imisebenzi yam njengomdala webandla.

Ndiye ndajamelana neemeko ezibuhlungu isithuba esimalunga neminyaka eli-12 edluleyo. Maxa wambi ukubona indlela ukuba ngumlwelwe kwam okuyichaphazela ngayo intsapho yam kundenza ndibe buhlungu nangaphezu kokuba kunjalo ngesigulo sam. Ndiyazi ukuba batsala nzima, nangona bengatsho. Kutshanje, kwithuba elingangonyaka, ndiye ndafelwa ngumkhwekazi wam notata. Ebudeni baloo nyaka, ndiye andakwazi ukuzihambela ngaphandle kokusebenzisa isitulo esinamavili. Utata, owayehlala nathi, wabulawa sesinye isifo esinganyangekiyo. UMilagros, owayemnyamekela, wayevakalelwa kukuba wayebona oko kwakuza kwenzeka kum kungekudala.

Noko ke, kwelinye icala, intsapho yethu imanyene njengoko sijamelene neengxaki kunye. Kunokuba ngumphathi wenkampani, ndihleli kwisitulo esinamavili, kodwa ubomi bam bubhetele ngoku kuba ndibunikele ekuncedeni abanye. Ukunceda abanye kunokunciphisa ukubandezeleka, yaye uYehova uyasigcina isithembiso sakhe sokusomeleza ngamaxesha anzima. NjengoPawulos, ngokwenene ndinokuthi: “Ezintweni zonke ndinamandla ngenxa yalowo undomelezayo.”—Filipi 4:13.

[Imibhalo esemazantsi]

[Ibhokisi ekwiphepha 24]

Indlela Umfazi Wakhe Azijonga Ngayo Izinto

Ukuba ngumfazi ohlala neqabane elinesifo sokuqinelwa yimithambo kunzima—engqondweni, kwiimvakalelo nasemzimbeni. Ndifanele ndisebenzise ingqiqo xa ndiceba ukwenza izinto ndize ndingazixhalabisi ngokungeyomfuneko ngekamva. (Mateyu 6:34) Sekunjalo, ukubandezeleka kusenokuvelisa ezona mpawu zintle zomntu. Umtshato wethu womelele ngakumbi kunangaphambili, yaye ndinolwalamano olusondeleyo noYehova. Amabali obomi abo bakwiimeko ezinzima ezifanayo nawo aye andomeleza gqitha. Nam ndinolwaneliseko olufana nolukaJulián ngenxa yomsebenzi wakhe oxabisekileyo awenzela abazalwana, yaye ndiye ndafumanisa ukuba uYehova akasayi kuze asilahle, nangona usuku ngalunye luneengxaki zalo.

[Ibhokisi ekwiphepha 24]

Indlela Unyana Wakhe Azijonga Ngayo Izinto

Ukunyamezela kukatata nokungaphelelwa kwakhe lithemba, kungumzekelo omhle kum, yaye xa ndimqhuba ndiziva ndiluncedo. Ndiyazi ukuba andinakusoloko ndisenza oko bendingathanda ukukwenza. Ngoku ndikwishumi elivisayo, kodwa xa ndikhulile, ndingathanda ukuba lilungu leKomiti Yokunxibelelana Nezibhedlele. Ndiyazi ngokutsho kwezithembiso zeBhayibhile ukuba ukubandezeleka kokwexeshana nokuba abazalwana noodade abaninzi babandezeleka ngaphezu kwethu.

[Umfanekiso okwiphepha 22]

Umfazi wam undomeleza gqitha

[Umfanekiso okwiphepha 23]

Ndincokola nogqirha owenza utyando lwentliziyo uGqr. Juan Duarte

[Umfanekiso okwiphepha 25]

Mna nonyana wam siyakuvuyela ukusebenza kunye entsimini