Abavakalisi BoBukumkani Bayabalisa
Uncedo Ukuze Silondoloze Ubungcwele Begazi
EMHLABENI wonke abakhonzi bakaYehova baye babonakalisa ukunyaniseka kuThixo ngokuphathelele ubungcwele begazi. (IZenzo 15:28, 29) Abazalwana abangamaKristu baye bancedwa likhoboka elithembekileyo neliyingqondi. (Mateyu 24:45-47) Makhe sibone oko kwenzeka kwiiPhilippines ngenxa yoko.
Isebe lakwiiPhilippines linikela le ngxelo: “Ngowe-1990 saxelelwa ukuba abameli abavela kwiBheteli yaseBrooklyn baza kuba nengqungquthela apha kwiiPhilippines. Kwamenywa abazalwana abasuka kumasebe awahlukahlukeneyo eAsia, kuquka iKorea, iTaiwan neHong Kong. Injongo yayikukunceda ukuze kusekwe iSebe Lenkcazelo Yezibhedlele kumasebe abo kuze kwakhona kumiselwe iiKomiti Zokunxibelelana Nezibhedlele. KwiiPhilippines ezi komiti zaqala zamiselwa kwizixeko ezine ezikhulu.” Ezi komiti zaziza kufuna oogqirha ababeza kuvuma ukusebenzisana nathi ngokuphathelele inkolelo yamaKristu ngegazi. Kwakhona zaziza kunceda abazalwana xa kuvela iingxaki ngokuphathelele igazi.
URemegio wamiselwa njengelungu leKomiti Yokunxibelelana Nezibhedlele eBaguio. Ekuhambeni kwexesha, oogqirha baqalisa ukubona indlela eyayiluncedo ngayo le komiti. URemegio ukhumbula ngesinye isihlandlo xa iqela loogqirha ladibana nale Komiti Yokunxibelelana Nezibhedlele lifuna indlela yokunyanga amaNgqina angazange alamkele igazi. URemegio uthi: “Oogqirha baqalisa ukubuza imibuzo, kodwa ndandididekile kuba loo mibuzo yayinzima kakhulu.” Wathandaza kuYehova ecela uncedo ukuze akwazi ukusingatha le ngxaki. URemegio wahlabela mgama esithi: “Emva kombuzo ngamnye, abanye oogqirha babephakamisa izandla baze bachaze indlela abahlangabezana ngayo nemeko efanayo.” URemegio wakuvuyela ukufumana uncedo olunjalo, ingakumbi ekubeni le mibuzo neempendulo yathabatha iiyure ezimbini.
Ngoku kukho iikomiti ezingama-21 kweli lizwe, yaye zinabazalwana abangama-77. UDanilo, iNgqina elingugqirha, uthi: “Oogqirha bayaqonda ukuba amaNgqina agulayo axhaswa yintlangano ewanyamekela ngothando.” Omnye ugqirha wayemathidala ukwenza utyando komnye umzalwana ngaphandle kokumtofela igazi. Noko ke, lo mzalwana walumela ngokuqinileyo ukholo lwakhe. Olu tyando lwenziwa yaye lwaphumelela. ISebe Lenkcazelo Yezibhedlele linikela le ngxelo: “Lo gqirha wamangaliswa yindlela lo mzalwana awachacha ngayo. Wathi: ‘Ngenxa yoku kwenzekileyo apha, naliphi na ilungu lenu elifuna olu hlobo lotyando ngaphandle kwegazi, ndiya kukuvuyela ukulwenza.’”