Iminyaka Ephawulekayo Kumbutho Wokumanyanisa Iicawa
Ngowe-1844: Ukuqalisa kokusekwa kombutho weemvaba ngeemvaba owathi kamva wavelisa umbutho owaziwa ngokuba yiYoung Men’s noyiYoung Women’s Christian Association.
Ngowe-1846: Inkomfa yokuqala yehlabathi lonke yeemvaba ngeemvaba zoManyano LwamaProtestanti, eyaqhutywa eLondon, eNgilani.
Ngowe-1908: Kwasekwa iBhunga Lomanyano Lweecawa ZikaKristu eMerika. Ngowe-1950 laba liBhunga Lesizwe Leecawa ZikaKristu eUnited States.
Ngowe-1910: INkomfa Yokuqala Yoonyawontle Yehlabathi eyaqhutywa e-Edinburgh, eScotland, “apho kwaqalisa ngokwenene umbutho wezi mini wokumanyanisa iicawa.”—Encyclopœdia Britannica.
Ngowe-1919: UPopu Benedict XV akazange asamkele isimemo sokuba iCawa yamaKatolika ibe nenxaxheba kunye neCawa YamaProtestanti Elawulwa Ngoobhishophu kwintlanganiso engokholo nenkqubo yecawa (ukwahlukahlukana kweemfundiso ezisisiseko nobulungiseleli beecawa ngeecawa).
Ngowe-1921: Kwasekwa iBhunga Loonyawontle Bezizwe Ngezizwe.
Ngowe-1925: Inkomfa yokuqala yezizwe ngezizwe yeBhunga LamaKristu Lehlabathi Lonke Ngobomi Nomsebenzi (yokufundisisa inkqubo eqhelekileyo yecawa ngemibandela yoqoqosho, yobupolitika neyasekuhlaleni), eyayiseStockholm, eSweden.
Ngowe-1927: Inkomfa yokuqala yehlabathi yeecawa ngeecawa ekwakuchotshelwe kuyo umbandela “woKholo Nenkqubo Yecawa”, eyaqhutywa eLausanne, eSwitzerland.
Ngowe-1928: UPopu Pius XI wakhupha ileta yakhe eya koobhishophu ethi Mortalium animos, esalela amaKatolika ekuxhaseni inkqubo yokumanyanisa iicawa.
Ngowe-1937: Ingqungquthela “Engobomi noMsebenzi” eyaqhutywa eOxford, eNgilani, nengqungquthela “engoKholo Nenkqubo Yecawa” eyaqhutywa e-Edinburgh, eScotland, zavuma ukuyila ikomiti ebambeleyo yokumisa ibhunga leetyalike zehlabathi. Eli phulo lahlehliswa ngenxa yokuqhambuka kweMfazwe Yehlabathi II.
Ngowe-1948: Kwasekwa iWCC (World Council of Churches [iBhunga Leetyalike Zehlabathi]) kwindibano yokumisela eyayiseAmsterdam, eNetherlands. Amalungu ayo aquka iicawa zamaProtestanti nezinye zobuOthodoki baseMpuma eziphantse zibe li-150. IWCC ibisoloko ukususela ngoko iqhuba rhoqo iingqungquthela (ngowe-1954: e-Evanston, eIllinois, eUnited States; ngowe-1961: eNew Delhi, eIndiya; ngowe-1968: eUppsala, eSweden; ngowe-1975: eNairobi, eKenya; ngowe-1983: eVancouver, eKhanada).
Ngowe-1960: UPopu John XXIII wamisa eVatican ooSosiba Bokukhuthaza Umanyano LobuKristu. Oku “kwakukokokuqala ngqa iCawa yamaRoma Katolika ibamkela ngokusemthethweni ubukho bombutho wokumanyanisa iicawa.”—Encyclopœdia Britannica.
Ngowe-1961: IBhunga Loonyawontle Bezizwe Ngezizwe lamanyana neWCC. IVatican yaqalisa ukuthumela ababoneli abangabasemthethweni abangamaKatolika kwiingqungquthela zeWCC.
Ngowe-1964: UPopu Paul VI wavakalisa “Ukuwiswa Komgaqo-siseko Ongokumanyaniswa Kweecawa” liBhunga Lesibini leVatican, okwabalula ukuba nenxaxheba kwamaKatolika okusikelwe umda kumbutho wokumanyanisa iicawa.
Ngowe-1965: Upopu nobhishophu omkhulu wamaOthodoki bobabini bakutshitshisa ukunganxibelelani kwabo okwakuvakaliswe ngabanduleli babo ngowe-1054.
Ngowe-1968: IVatican neWCC zamisela iSODEPAX (iKomiti Emanyeneyo Ejongene Nebutho, Inkqubela Noxolo.
Ngowe-1969: UPopu Paul VI watyelela ikomkhulu lehlabathi leWCC, eGeneva, eSwitzerland. Noko ke, wagxininisa ukuba wayelilandela lompostile uPetros nokuba elo yayingekabililo ixesha lokuthetha ngokungenelela kwecawa yamaKatolika kwiWCC.
Ngowe-1980: ISODEPAX yapheliswa.
Ngowe-1986: UPopu John Paul II walungiselela “Usuku Lwehlabathi Lokuthandazela Uxolo” lokumanyanisa iicawa eAssisi, eItali, apho iinkokeli zonqulo ezazimela iinkonzo ezinkulu zehlabathi zahlanganisana ukuthandazela uxolo ngeendlela zazo ezahlukahlukeneyo zesithethe.