Ihlabathi Liyidolophana Kodwa Lahlulelene
NGUMBHALELI KAVUKANI! ENIGERIA
NGABA wawukhe weva ngamabali angohlanga lwabantu abangenamilomo yaye ngenxa yoko abangenakukwazi ukutya okanye ukusela? Kwakusithiwa ngokuyintloko babephila ngokusezela ama-apile. Ivumba elibi lalinokubabulala.
Kwakhona kwakukho neentsomi ezingabantu baseNtshona Afrika ababerhweba ngegolide. Umphathi wenqanawa yamaPhuthukezi welo xesha wanikela le ngxelo: “Kumgama ozii-league ezingama-200 [iikhilomitha ezili-1000] ngaphaya kobukumkani [baseMali], unokufumana ilizwe elinabemi abaneentloko namazinyo ezinja nemisila njengezinja. Le yimiDaka engavumiyo ukungenelela kwiingxoxo kuba ayinqweneli ukubona abanye abantu.” Ezo zezinye nje zeengcamango ezingaqhelekanga ekwakukholelwa kuzo kwiminyaka emininzi eyadlulayo, ngaphambi kwexesha lokuhambahamba nelokufunyanwa kwezinto ezintsha.
Abantu Bayahlangana
Amabali anjalo aye athatyathwa nzulu kangangeenkulungwane. Kodwa njengoko iintlola zazihlola isijikelezi-langa, azizange zifumane abantu abangenamilomo abasezela ama-apile, kungekho nabantu abaneentloko zezinja. Namhlanje zimbalwa gqitha izinto esingazaziyo ngabo bahlala kwezinye iindawo. Ihlabathi liye layidolophana. Umabonwakude uza namazwe nabantu basemzini kumagumbi esihlala kuwo. Ukuhamba ngenqwelo-moya kwenza ubenako ukutyelela loo mazwe ngeeyure nje; izigidi zabantu zenjenjalo minyaka le. Abanye bahambela izizathu zezoqoqosho okanye ezobupolitika. Ingxelo yeUnited Nations Population Fund ithi: “Ngomlinganiselo ongaziwayo embalini—nokhulayo—abantu ehlabathini lonke bayafuduka yaye bafuduka kuba befuna ubomi obubhetele.” Abantu abamalunga nezigidi ezili-100 bahlala ngaphandle kwelizwe labo lokuzalwa.
Ngokwandayo amazwe axhomekeka kwamanye ngokwezoqoqosho. Ubuxhakaxhaka bonxibelelwano behlabathi, obunjengenkqubo enkulu yemithambo-luvo, budibanisa onke amazwe ehlabathi. Njengoko kutshintshiselwana ngeengcamango, ngolwazi nangobugcisa, kudibana izithethe zize zivumelane nezinye. Ehlabathini lonke abantu banxiba ngokufanayo ngakumbi kunanini na ngaphambili. Izixeko zehlabathi zifana ngezinto ezininzi—amapolisa, iihotele ezitofotofo, izithuthi, iivenkile, iibhanki, ungcoliso. Ngenxa yoko, njengoko abantu behlabathi behlangana, sibona oko abanye bakuchaza njengokuvela kwesithethe sehlabathi.
Isizathu Sokuba Abantu Bahlale Bohlulelene
Kodwa ngoxa abantu nezithethe zidibana, ngokucacileyo asingabo bonke abajonga omnye njengomntakwabo. “Wonke umntu uyakhawuleza ukugxeka umntu welinye ilizwe,” wabhala watsho umbhali wemidlalo yeqonga ongumGrike kwiminyaka engama-2000 eyadlulayo. Okulusizi kukuba, kunjalo nanamhlanje. Obu bungqina buxhaphakile kwiingxelo zamaphephandaba ezingocalu-calulo, ukuthiywa kwabantu bamanye amazwe, “ukucocwa kohlanga,” iimbambano zobuhlanga, uqhushululu lonqulo, ukubulawa kwabantu nje abaqhelekileyo abaninzi, amathafa okubulala, iinkampu zokudlwengula, ukuthuthumbisa, okanye ukutshatyalaliswa kohlanga.
Kakade ke, uninzi lwethu kuncinane okanye akukho elinokukwenza ukuguqula indlela olwenzeka ngayo ungquzulwano lobuhlanga. Lusenokude lungasichaphazeli ngokuthe ngqo. Noko ke, kuninzi lwethu iingxaki zibangelwa kukunganxibelelani nabantu bamazwe asemzini esidibana nabo—abamelwane, abo sisebenza nabo, okanye esifunda nabo.
Ngaba akubonakali kuyinto engaqhelekanga ukuba abantu bamaqela eentlanga ezahlukeneyo ngokufuthi bakufumanise kunzima ukuthembana nokuqondana? Ngapha koko, isijikelezi-langa sethu sinentabalala yezinto ezahlukeneyo, eziziintlobo ngeentlobo. Uninzi lwethu luyazixabisa iintlobo ngeentlobo zokutya, zomculo nemibala kunye neentlobo ezininzi zezityalo, zeentaka nezezilwanyana. Kodwa ngandlel’ ithile uxabiso lwethu ngeentlobo zezinto alusoloko luquka abantu abacinga nabenza ngendlela eyahlukileyo kwesenza ngayo.
Kunokuba sijonge iinkalo ezifanelekileyo zomahluko okhoyo phakathi kwabantu, abaninzi batyekela ekunikeleni ingqalelo kwiiyantlukwano baze bazenze unobangela wembambano. Kutheni oku kunjalo? Yiyiphi ingenelo ekhoyo ngokunxibelelana nabantu abanesithethe esahlukileyo kwesethu? Sinokuyiphelisa njani imiqobo kunxibelelwano size siqalise ukunxibelelana? Amanqaku alandelayo aza kuzama ukuphendula loo mibuzo.