Ihlabathi Elingenalo Ulwaphulo-mthetho—Linokubakho Njani?
EHLABATHINI lonke kuliwa idabi nxamnye nolwaphulo-mthetho olulungelelanisiweyo. IU.S.News & World Report yavakalisa oku: “Bekukho inkqubela ephawulekayo kwidabi nxamnye neMafiya ngethutyana nje elingephi, ibangelwa ngokuyintloko ngumthetho omnye, iRacketeer Influenced and Corrupt Organizations Act, okanye iRICO.” Ivumela ukubanjwa kwemibutho yezaphuli-mthetho ngenxa yenkqubo yokuhlawulisa abantu imali ukuze ibakhusele, kungekhona ngesenzo ngasinye. Oku kunye nenkcazelo efunyanwa ngezixhobo zokuqokelela inkcazelo nangamalungu eqela loontamnani afuna ukuhlawulwa kuye kwanegalelo ekuphumeleleni kwedabi nxamnye neMafiya eUnited States.
KwanaseItali amagunya awaphethel’ imbengwane la maqumrhu. Kwimimandla efana neSicily, iSardinia neCalabria, apho ulwaphulo-mthetho olulungelelanisiweyo lwaphul’ izikeyi, kuye kwathunyelwa imikhosi ukuba ilinde izakhiwo zikawonke-wonke nemimandla ebalulekileyo ukunqanda ukuhlaselwa kwazo ngamaqumrhu ezaphuli-mthetho. Urhulumente ukujonga oku njengokufana twatse nemfazwe yamakhaya. Emva kokuba kuvalelwe entolongweni iinkokeli zamaqumrhu ezaphuli-mthetho ezidume kakubi kwaza kwagwetywa owayesakuba yinkulumbuso ngezityholo zokusebenzisana neMafiya, imeko iya isiba bhetele eItali.
EJapan urhulumente wayibekela imiqathango iyakuza xa wamisa iAnti-Organized Crime Law ngoMatshi 1, 1992. Phantsi kwalo mthetho, ukuba umbutho ujongwa njengequmrhu lezaphuli-mthetho, uyathintelwa ekwenzeni izenzo ezili-11 zokunyanzelisa, kuquka ukufuna ngenkani imali yesicengo, ukufuna imali ebantwini ukuze ubakhusele, nokungenelela ekuzinziseni ukungavisisani ukuze ufumane imali. Ngokunyanzelisa lo mthetho, urhulumente ufuna ukuphelisa yonke imithombo yengeniso yeli qumrhu. Umthetho uye wayitsalisa nzima imibutho yezaphuli-mthetho. Amanye amaqela aye aphela, yaye enye inkokeli yezaphuli-mthetho yazibulala—kubonakala ukuba oku kubangelwa kukuba ngqongqo komthetho.
Eneneni, oorhulumente namagosa asemthethweni alwa umlo onzima nxamnye nolwaphulo-mthetho olulungelelanisiweyo. Sekunjalo, xa yayinikela ingxelo ngenkomfa yeejaji nabakwantsasana abasuka ehlabathini lonke eyayiqhutywa ngowe-1994, iMainichi Daily News yathi: “Ulwaphulo-mthetho olulungelelanisiweyo lwanda ngamandla nangobutyebi phantse mbombo zone zomhlaba, luqokelela imali engangezigidi zezigidi zeedola [iirandi ezingama-4,67 zamawaka ezigidi] ngonyaka njengengeniso.” Okulusizi kukuba, imigudu yabantu yokutshayela amaqumrhu ezaphuli-mthetho emhlabeni ilinganiselwe. Esinye isizathu esingunobangela woku kukuba kwiimeko ezininzi okusesikweni akukho. Kubantu abaninzi, ngokufuthi imithetho ibonakala ithethelela isaphuli-mthetho, kungekhona ixhoba. Kwiminyaka engama-3000 eyadlulayo iBhayibhile yathi: “Ekubeni isigwebo singawiswa kamsinyane emsebenzini ombi, ngenxa yoko intliziyo yoonyana babantu izele ngaphakathi kwabo kukwenza okubi.”—INtshumayeli 8:11.
Ukuphuma Kwimibutho Yezaphuli-mthetho
Ukongezelela ekulweni nolwaphulo-mthetho olulungelelanisiweyo bemele mgama, oorhulumente baye benza unako-nako wokunceda abo sele bekulo ukuba baphume kumaqumrhu ezaphuli-mthetho. Elo nyathelo aliyondlwan’ iyanetha. Ngokutsho kwesaci samandulo, “ekuphela kwendlela yokuphuma kwiMafiya lingcwaba.” Ukuze ilungu lombutho iyakuza liphume kuwo, kufuneka lihlawule intywenka yemali okanye liqhawulwe ucikicane okanye inxalenye yakhe. Ukongezelela kuloyiko olubandakanyekileyo ekuqhawuleni unxibelelwano nezaphuli-mthetho, obesakuba kwiqumrhu lezaphuli-mthetho ufanele abil’ esoma ezama ukuphila ubomi obufanelekileyo. Ngokufuthi izicelo zakhe zokufuna umsebenzi azamkelwa. Noko ke, kwamanye amazwe, kukho amaziko abakwantsasana anikela uncedo kumalungu amaqumrhu ezaphuli-mthetho azama ukuphuma kuwo nanobunzima ekufumaneni imisebenzi efanelekileyo.
Ukuze lijamelane neengcinezelo ezisuka kwiqumrhu lezaphuli-mthetho nokuthiywa libutho labantu, eli lungu kufuneka libe nentshukumisa enamandla yokuphila ubomi obufanelekileyo. Yiyiphi loo ntshukumisa? Inokuba luthando ngentsapho yalo, umnqweno onzulu wokufuna ukuphila ubomi obunoxolo, okanye umnqweno wokwenza okulungileyo. Noko ke, eyona ntshukumisa inamandla, ibonakala kakuhle kwibali likaYasuo Kataoka kwinqaku elilandelayo.
UYasuo Kataoka uyafana namakhulu aye abuguqula ngokupheleleyo ubomi bawo. Iimpawu zobulwanyana awayezibonakalisa ngaphambili ziye zathatyathelw’ indawo bubuntu obutsha “obadalwa ngokokuthanda kukaThixo ngobulungisa bokwenyaniso nokunyaniseka.” (Efese 4:24) Ngoku, abantu ababefana neengcuka bahlala ngoxolo phakathi kwabemi abanobulali, nabafana nezimvu, ibe bakwanceda nabanye!—Isaya 11:6.
Ukuphuncula Kumoya Wehlabathi
Njengoko kukhankanywe kwinqaku elandulelayo, asingomaqumrhu ezaphuli-mthetho kuphela aphantsi kwegunya elinye elingabonakaliyo likaSathana uMtyholi kodwa lihlabathi liphela. Abantu abakuqondi oko, kodwa uSathana uye walungelelanisa ihlabathi ukuze lifeze iminqweno yakhe yokwaphula umthetho. Kanye njengokuba amaqumrhu ezaphuli-mthetho ebonelela abanye ngobutyebi nenkqubo yoosinga-ntsapho, naye uzenza umphathi onesisa ngokubonelela abantu ngobutyebi, iziyolo nokuziva bemanyene. Nangona ungenakukuqonda oko, usenokuba uye wakhohliswa ngamaqhinga akhe. (Roma 1:28-32) IBhayibhile isixelela ukuba “ubuhlobo kunye nehlabathi bubutshaba kunye noThixo.” (Yakobi 4:4) Kuyingozi ukunxulumana neli hlabathi liphantsi kwempembelelo kaSathana. UMdali wendalo iphela unomkhosi weengelosi okhokelwa nguYesu Kristu olungele ukutshabalalisa uSathana needemon zakhe ukuze ucoce ihlabathi kwimpembelelo yakhe engendawo.—ISityhilelo 11:18; 16:14, 16; 20:1-3.
Ngoko unokuphuma njani kwimpembelelo yehlabathi likaSathana? Kungekhona ngokuzenza ikheswa kodwa ngokuzikhulula kwizimo zengqondo nakwiindlela zokucinga ezikhoyo ehlabathini namhlanje. Ukuze wenze oko, kuya kufuneka ulwe nxamnye namacebo kaSathana okoyikisa uze umelane namaqhinga awasebenzisayo ekubambiseni abantu. (Efese 6:11, 12) Oku kuya kufuna ukuzincama, kodwa unokukhululeka kanye njengabanye ukuba uzimisele yaye uyalwamkela uncedo olunikelwa ngamaNgqina kaYehova.
Yintoni eya kulandela isenzo sikaThixo sokucoca eli hlabathi linesiphithiphithi nolwaphulo-mthetho? IBhayibhile ithi: “Ke yona imbewu yongendawo iyanqanyulwa,” yaye ihlabela mgama isithi: “Amalungisa aya kulidla ilifa ilizwe, ahlale kulo ngonaphakade.” (INdumiso 37:28, 29) Emva koko, akusayi kubakho sizathu sakoyika abo baneempawu zobulwanyana, kuba baya kuba betshintshwe ‘kukwazi uYehova,’ okuya kuzalisa ihlabathi.—Isaya 11:9; Hezekile 34:28.
Namhlanje utshintsho olunjalo sele luyinto yokwenene, njengoko ibali elilandelayo lobomi bowayesakuba lilungu leyakuza eJapan libonisa.
[Umfanekiso okwiphepha 10]
Kwihlabathi elitsha likaThixo, bonke baya kunandipha umsebenzi wezandla zabo