Imbono YeBhayibhile

Kutheni Ufanele Uwulawule Umsindo Wakho?

WAGUNGQA zisuka nje lo mtshato. “Uyabona, indim nje ngoku intloko kweli khaya, andibe ndiphinde ndihlazeke ngenxa yokufika kwakho emva kwexesha,” wadanduluka watsho uJohn engxolisa umfazi wakhe awayesandul’ ukutshata naye, uGinger.a Wamngxolisa kangangemizuzu engama-45 ngoxa wayemnyanzela ukuba ahlale esofeni. Ukunyhukutyhana kwaba yinto yomhla nezolo emtshatweni wabo. Okulusizi kukuba, umsindo kaJohn waya uthabath’ unyawo. Wayesele egadlel’ iingcango, angombe itafile yasekhitshini, aze aqhube unothanda ngoxa wayebetha ivili lokuqhuba, ngaloo ndlela ebek’ esichengeni ubomi babanye.

Ngelishwa, njengokuba ngokungathandabuzekiyo usazi kakuhle, iziganeko ezinjalo zixhaphakile. Ngaba umsindo wale ndoda wawuthetheleleka, okanye yayingakwazi nje ukuwulawula? Ngaba kuphosakele kwanto ingumsindo? Umsindo uba ngongalawulekiyo xa kutheni? Ugqith’ emgceni xa kutheni?

Umsindo olawulwayo usenokuthetheleleka. Ngokomzekelo, umsindo kaThixo wavutha ngenxa yezixeko zamandulo, ezaziziphethe kakubi zaseSodom naseGomora. (Genesis 19:24) Ngoba? Ngenxa yokuba abemi bezo zixeko babandakanyeka kwizenzo zesini ezinogonyamelo nezithob’ isidima, njengokuba zazisaziwa kakuhle kuwo wonke loo mmandla. Ngokomzekelo, xa izithunywa zezulu zatyelela indoda elilungisa uLote, ugxudululu lwabafana namadoda amakhulu lwazama ukudlwengula njengeqela iindwendwe zikaLote. Kwakuthetheleleka ukuba uYehova uThixo abe nomsindo ngenxa yokuziphatha kwabo kakubi ngokunzulu.—Genesis 18:20; 19:4, 5, 9.

NjengoYise, indoda efezekileyo uYesu Kristu yakha yanomsindo. Itempile yaseYerusalem yayifanele ukuba ibe sisazulu sonqulo kubantu abanyulwe nguThixo. Yayiza kuba “yindlu yomthandazo,” apho abantu babeza kwenza amadini obuqu neminikelo kuThixo baze bafundiswe ngeendlela zakhe kuze kuxolelwe izono zabo. Etempileni, ngokungathi kunjalo, babenokunxibelelana noYehova. Kunoko, iinkokeli zonqulo zomhla kaYesu zaguqulela itempile ekubeni ‘yindlu yokurhweba’ ‘nomqolomba wabaphangi.’ (Mateyu 21:12, 13; Yohane 2:14-17) Zazifumana ingeniso ngokuthengisa izilwanyana ezaziza kusetyenziselwa ukwenza amadini. Ngokwenene, zaziwuxhaphaza umhlambi. Ngenxa yoko, uNyana kaThixo wayethetheleleka ngokupheleleyo xa wabagxoth’ okomshologu abo baphangi endlwini kaYise. UYesu wayenesizathu esifanelekileyo sokuba nomsindo!

Xa Abantu Abangafezekanga Besiba Nomsindo

Maxa wambi nabantu abangafezekanga banako ukucaphuka ngokufanelekileyo. Khawucinge ngoko kwenzeka kuMoses. Uhlanga lwakwaSirayeli lwalusandul’ ukuhlangulwa ngokungummangaliso eYiputa. UYehova wayewabonakalise ngokuphawulekayo amandla akhe ngaphezu koothixo bobuxoki baseYiputa ngokuthwaxa amaYiputa ngezibetho ezilishumi. Wandula ke wavula indlela yokuba amaSirayeli asinde ngokwahlula kubini uLwandle Olubomvu. Kamva, bakhokelelwa emazantsi eNtaba yeSinayi, apho bathi balungelelaniswa njengohlanga. Esebenza njengomlamleli, uMoses wenyuka le ntaba ukuze afumane imithetho kaThixo. Kunye nayo yonke eminye imithetho, uYehova wanika uMoses iMithetho Elishumi, ebhalwe “ngomnwe kaThixo” kumacwecwe amatye uThixo awayewakrole entabeni. Noko ke, xa uMoses wehlayo, wafumanisa ntoni? Abantu babeguqukele ekunquleni umfanekiselo wethole legolide! Hayi indlela ababelibala msinya ngayo! Kwakudlule iiveki nje ezimbalwa. Ngokufanelekileyo, “wavutha umsindo kaMoses.” Wawaqhekeza la macwecwe amatye waza wawutshabalalisa umfanekiselo wethole.—Eksodus 31:18; 32:16, 19, 20.

Ngasihlandlo sithile kamva, uMoses akazange awubambe umsindo wakhe xa abantu bakhalazela ukungabikho kwamanzi. Eligqabi ngumsindo, okwethutyana walahlekelwa kukululama awayesaziwa ngako, okanye ubulali. Oku kwakhokelela kwimpazamo enzulu. Kunokuba aphakamise uYehova njengoMlungiseleli kaSirayeli, uMoses wathetha rhabaxa nabantu waza watsalela ingqalelo kuye nomntakwabo uAron. Ngenxa yoko, uThixo wakubona kufanelekile ukuba amohlwaye uMoses. Akazange avunyelwe ukuba angene kwilizwe ledinga. Emva kwesi siganeko saseMeribha, akuphindi kukhankanywe ukuba uMoses woyiswa kukuwubamba umsindo wakhe. Kuyabonakala ukuba wafunda isifundo.—Numeri 20:1-12; Duteronomi 34:4; INdumiso 106:32, 33.

Ngaloo ndlela, kukho umahluko phakathi kukaThixo nabantu. UYehova uyakwazi ‘ukuwubamba umsindo wakhe’ ibe uchazwa kakuhle ‘njengozeka kade umsindo’ ngenxa yokuba uthando kungekhona umsindo, luphawu lwakhe olubalaseleyo. Umsindo wakhe usoloko ungowobulungisa, usoloko ufanelekile, usoloko ewulawula. (Eksodus 34:6; Isaya 48:9, NW; 1 Yohane 4:8) Indoda efezekileyo uYesu Kristu yayisoloko ikwazi ukulawula umsindo wayo; yachazwa ‘njengenomoya wobulali.’ (Mateyu 11:29) Kwelinye icala, amadoda angafezekanga, kwanamadoda okholo njengoMoses, aye aba nobunzima ekulawuleni umsindo wawo.

Kwakhona, abantu ngokuqhelekileyo abacingi ngemiphumo. Kunokuba yingozi ukungakwazi ukulawula umsindo. Ngokomzekelo, ngokuqhelekileyo unokuba yintoni umphumo ukuba indoda icatshukiswa ngumfazi wayo ukusa kwinqanaba lokuba igqobhoze udonga ngenqindi? Yonakalisa indlu. Isandla sayo sinokwenzakala. Kodwa ngaphezu koko, umsindo wayo uya kuluchaphazela njani uthando nentlonelo umfazi wayo anayo ngayo? Olu donga lusenokulungiswa kwiintsuku nje ezimbalwa, ibe isandla sayo sisenokuphila kwiiveki nje ezimbalwa; kodwa kuya kuthabatha ithuba elingakanani ukuba iphinde ithenjwe ize ihlonelwe ngumfazi wayo?

Eneneni, iBhayibhile izaliswe yimizekelo yamadoda awasilelayo ukulawula imisindo yawo ibe afumana imiphumo yoko. Khawucinge nje ngembalwa. UKayin wagxothwa emva kokuba ebulele umntakwabo uAbheli. USimon noLevi baqalekiswa nguyise ngenxa yokubulala amadoda akwaShekem. UYehova wabetha u-Uziya ngeqhenqa emva kokuba u-Uziya ebe nomsindo xa ababingeleli babezama ukumlungisa. Xa uYona “wavutha ngumsindo,” uYehova wamohlwaya. Onke kwafuneka aphendule ngokuba nomsindo kwawo.—Genesis 4:5, 8-16; 34:25-30; 49:5-7; 2 Kronike 26:19; Yona 4:1-11.

AmaKristu Afanele Aphendule

Ngokufanayo, amaKristu namhlanje amele aphendule ngezenzo zawo kuThixo, ibe ukusa kumlinganiselo othile, kwabo akholwa kunye nabo. Oku kunokubonwa ngokulula kwindlela iBhayibhile ewasebenzisa ngayo amagama esiGrike achaza umsindo. Elinye lamagama amabini asetyenziswa ngokuthe rhoqo lelithi or·geʹ. Ngokuqhelekileyo liguqulelwa ngokuthi “ingqumbo” ibe linayo ingcamango yokwenza into oyaziyo kwanokwenza ngabom, ngokuqhelekileyo ngenjongo yokubuyisa isixhiba. Ngenxa yoko, uPawulos wabongoza amaKristu angamaRoma esithi: “Musani ukuziphindezelela, zintanda, kodwa yikhweleleni ingqumbo [or·geʹ]; kuba kubhaliwe kwathiwa: ‘Impindezelo yeyam; kuya kubuyekeza mna, utsho uYehova.’” Kunokuba abe ziintshaba zabazalwana bawo, akhuthazwa ukuba “[oyise] ububi ngokulungileyo.”—Roma 12:19, 21.

Elinye ibinzana elisetyenziswa ngokufuthi nguthy·mosʹ. Eli gama “ngokusisiseko lichaza ukuvuthuza komoya, ukulatyuza kwamanzi, ukunyikima komhlaba, nokuyaluzela kwezilwanyana, okanye ukunyakazela kwabantu.” Ngenxa yoko, eli gama lichazwa ngeendlela ezahlukeneyo “njengokuba lugcalagcala ngumsindo,” “ukudubula komsindo,” okanye “ukubhabhazela ngumsindo okwenza ingqondo ingasebenzi, nto leyo esisizekabani seengxabano ekhaya naphakathi kwabantu nokuphazamiseka.” Njengentaba-mlilo enokugqabhuka ngaphandle kwesilumkiso ize ikhuphe uthuthu olushushu, amatye nodaka olushushu, olusenokwenzakalisa, lungxwelerhe luze lubulale, injalo kanye indoda okanye ibhinqa elingakwaziyo ukuwulawula umsindo walo. Isininzi sikathy·mosʹ sisetyenziswe kweyabaseGalati 5:20, apho uPawulos adwelisa “ukugqabhuka yimisindo” kwakunye neminye “imisebenzi yenyama” (indinyana 19), njengohenyuzo, ihambo evakalala, noselelwano. Ngokuqinisekileyo, indlela yokwenza izinto kaJohn—okhankanywe ekuqaleni—ingumzekelo ofanelekileyo ‘wokugqabhuka yimisindo.’

Ngoko ke, ibandla lamaKristu lifanele libajonge njani abathile abanxulumene nalo ababandakanyeka kwizenzo eziphindaphindiweyo zogonyamelo nxamnye nomntu okanye izinto zabanye abantu? Umsindo ongalawulwayo uyingozi ibe ngokulula ukhokelela kugonyamelo. Kungeso sizathu uYesu wathi: “Ndithi kuni wonk’ ubani oqhubeka equmbele umzalwana wakhe uya kuphenduliswa kwinkundla yokusesikweni.” (Mateyu 5:21, 22) Amadoda anikwa eli cebiso: “Hlalani nibathanda abafazi benu yaye ningavuthi ngumsindo ngakubo.” Ubani ‘othanda ukuqumba’ akakufanelekeli ukuba ngumveleli ebandleni. Ngenxa yoko, abo bangakwaziyo ukuwulawula umsindo wabo abafanele bagqalwe njengomzekelo ebandleni. (Kolose 3:19; Tito 1:7; 1 Timoti 2:8) Enyanisweni, emva kokuba kuqwalaselwe isimo sengqondo esinjalo, uhlobo lwesimilo, nobukhulu bomonakalo kubomi babanye, umntu ongakwaziyo ukukulawula ukugqabhuka komsindo wakhe unokugxothwa ebandleni—eneneni, ngumphumo obuhlungu lowo.

Ngaba uJohn, ekuthethwe ngaye ngaphambilana, wada wazilawula iimvakalelo zakhe? Ngaba wada wakwazi ukuyeka ukwenza phambi konyawo? Okulusizi kukuba, wayengasapheleli nje ekungxoliseni, wayesele etyhiliza. Engasatyityimbisi nje umnwe kodwa wayesele ephos’ inqindi ngokoqobo atsho ngeziva ezicacileyo. UJohn wayekulumkele ukubetha kwiindawo ezinokubonwa lula, ngaloo ndlela ezama ukufihla ihambo yakhe. Noko ke, ekugqibeleni, wabhenela ekukhabeni, ekubetheni ngamanqindi, ekutsaleni ngeenwele nakwezinye iindlela ezigabadeleyo. Sithetha nje uGinger wahlukene noJohn.

Oku ngekwakungazange kwenzeke. Abaninzi abakwimeko efanayo baye bakwazi ukuwulawula umsindo wabo. Noko ke, hayi indlela ekubaluleke ngayo ukulinganisa umzekelo ogqibeleleyo kaYesu Kristu. Akazange abe netyala elabangelwa kukungakwazi ukulawula umsindo nangesihlandlo esinye. Umsindo wakhe wawusoloko ungowobulungisa; akazange angakwazi ukuwubamba. Ngobulumko uPawulos wanikela eli cebiso kuthi sonke: “Qumbani, ukanti ningoni; malingatshoni ilanga nikwimo yokucaphuka.” (Efese 4:26) Ngaloo ndlela, ekubeni sikuqonda ngokuthobeka ukusikelwa kwethu umda njengabantu nokuba siya kuvuna oko sikuhlwayeleyo, sinesizathu esihle sokuwubamba umsindo wethu.

[Umbhalo osemazantsi]

[Inkcazelo Ngomfanekiso okwiphepha 11]

Saul Attempts the Life of David/The Doré Bible Illustrations/Dover Publications, Inc.