Ingxaki Ngokuba Nomsindo
Indoda eyayithenga isandwich kwivenkile yokutya yasuka yavutha ngumsindo kuba isithi abantu balapho bayalibazisa. Yajikela ngaphayaa kwekhawuntara, yadlakazelisa umsebenzi, yamntlitha ngentloko yaba seyilandelisa ngempama. Emva koko yathatha isandwich yayo yaphuma.
SONKE sikhe sicaphuke maxa wambi. Ngapha koko, ukucaphuka yenye yeemvakalelo esinazo, njengothando, ithemba, ixhala, udano, noloyiko. Xa sikwazi ukuzibamba, ukucaphuka kunokusinceda siphumeze injongo ethile. Ngokomzekelo, ukucaphuka kunokusinceda ukuba kusenza sizimisele ukulwa nemiqobo okanye iingxaki ezithile.
Njengokuba kubonisiwe ngasentla, umsindo unokuphinda ube yingozi. Abanye abantu bayakhawuleza ukuba nomsindo, abanye bahlala benawo ngoxa abanye bevutha ngaphezu kwabanye. Xa becatshukisiwe, bayathukisa okanye babethe. Enyanisweni, iba ngumsindo olawula bona kunokuba ibe ngabo abawulawulayo. Umsindo onjalo uyingozi, yiloo nto kusithiwa “kukufutheka.”a
Abantu abathanda ukufutheka ababangeli nje bona bodwa iintlungu kodwa babangela nabanye. Umntu othanda ukufutheka, unokusuka acatshukiswe nazizinto nje ezincinane, kuze oko kube nemiphumo emibi. Cinga ngale mizekelo ilandelayo:
Indoda eyayihamba neqela labahlobo kwisitrato esiphithizelayo yadutyulwa entanyeni kuba ibhegi yomhlobo wayo yasuka yakhuhla umntu owaphendula ngokubadubula.
Umfana oneminyaka eli-19 ubudala wabetha wabulala usana lwentombazana awayeza kutshata nayo nolwaluneenyanga ezili-11 ubudala. Lo mfana wayedlala umdlalo wevidiyo onogonyamelo olugqithiseleyo waza wagqajukelwa ngumsindo xa olo sana lwabamba iqhosha elabangela ukuba oyiswe kuloo mdlalo.
Iingxelo ezivela ehlabathini zibonisa ukuba ziya zisanda iingxaki ezifana nezi. Kutheni besanda kangaka abantu ababa nomsindo?
[Umbhalo osemazantsi]
a Incwadana ethi Boiling Point—Problem Anger and What We Can Do About It ichaza “ukufutheka” “njengento engamkelekanga nesoloko ibangela iingxaki kubomi bomntu kuquka indlela acinga ngayo, avakalelwa ngayo aziphatha ngayo yena nabanye.”
[Ibhokisi ekwiphepha 3]
Ukucaphuka yenye yeemvakalelo esinazo. Ngoko, akho amaxesha esinokuba nesizathu sokucaphuka ngawo logama sikwazi ukuzibamba. Kodwa ke, wona la manqaku aza kuxubusha ngokuba nomsindo oyingozi, onokufaka engxakini thina nabanye, ngokwemvakalelo, emzimbeni nangokomoya.