Imbono YeBhayibhile
Indlela Yokukhetha Iqabane Lomtshato
ELINYE IBHINQA ELINGATSHATANGA LABUZWA, “NGABA UKHE UCINGE NGOKUTSHATA?” NGOKUKHAWULEZA LAPHENDULA LISITHI: “UTHI NDIYACINGA? NDIYAKHATHAZEKA.”
OKU kuthethwa leli bhinqa kuthetha lukhulu ngomnqweno wabanye abantu wokuthandwa nokufumana iqabane. Abaninzi bakubona ukufumana iqabane lomtshato kuyenye yezinto ezibalulekileyo ebomini. Ngenxa yoko, ehlabathini lonke zanda ngokukhawuleza iindawo ezenzelwe ukunceda abantu bafumane amaqabane omtshato. Sekunjalo, kwiindawo ezininzi emhlabeni, amanani emitshato eqhekekayo angaphezu kwephumelelayo.
Kumazwe aseNtshona kuqhelekile ukuba abantu bazikhethele iqabane labo lomtshato. Kwelinye icala, kwezinye iindawo zaseAsia naseAfrika, kuselisiko ukukhethelwa iqabane lomtshato. Kuyo nayiphi na imeko, le nkqubo ayifanele ithatyathwe lula. Zimbalwa ezinye izigqibo umntu azenzayo ebomini ezinokumbangela onwabe okanye adakumbe. Umtshato onothando ungaba ngowona uzuzisayo nowanelisayo. Kwelinye icala, umanyano olunengxabano lungaba ngumthombo wentlungu noxinezeleko.—IMizekeliso 21:19; 26:21.
Njengabanye, amaKristu okwenyaniso afuna umanyano lomtshato wabo luzise ulonwabo nokwaneliseka. Kodwa kwakhona anqwenela ukukholisa uThixo aze amzukise. (Kolose 3:23) Ekubeni enguMdali noMsunguli womtshato, uThixo uzazi kakuhle iimfuno zethu zokwenene noko kusilungeleyo. (Genesis 2:22-24; Isaya 48:17-19) Ngaphezu koko, uye wabona amawaka ngamawaka emitshato, emihle nemibi, ukutyhubela iinkulungwane umntu ephila. Uyakwazi oko kusebenzayo noko kungasebenziyo. (INdumiso 32:8) NgeLizwi lakhe, iBhayibhile, ubeka imigaqo ecacileyo nengqalileyo enokunceda nawuphi na umKristu enze isigqibo enolwazi. Yiyiphi eminye yale migaqo?
Jonga Ngaphaya Kwenkangeleko
Apho abantu bakhululekileyo ukukhetha umntu abaza kumtshata, basenokudibana nabo basenokuba ngamaqabane ngokuzenzekelayo okanye baziswe kubo ngabahlobo okanye yintsapho. Ngokufuthi, umdla wothando uqaliswa ngumtsalane wenkangeleko. Nangona ngokuqinisekileyo lo inguthunywashe ongokwemvelo nonamandla, iBhayibhile isikhuthaza ukuba sijonge ngaphaya kwenkangeleko xa sicinga ngokutshata.
IMizekeliso 31:30 ithi: “Bubuxoki ubuhle, ngamampunge ubunzwakazi; ngumfazi owoyika uYehova yedwa oya kudunyiswa.” Umpostile uPawulos wathetha ‘ngesivatho esingenakonakala somoya ozolileyo nowobulali, wexabiso elikhulu emehlweni kaThixo.’ (1 Petros 3:4) Ewe, iimpawu zokomoya zalowo uza kuba liqabane lakho—ukuzinikela kwaloo mntu kuThixo nothando ngoThixo okanye nobuntu bakhe bobuKristu—zibaluleke kakhulu kunobuhle bangaphandle. Kubalulekile ukuthabatha ixesha usenza ukhetho olufanelekileyo, ukhethe umntu onosukelo olufanayo lokomoya nozabalazela ukubonisa iziqhamo zomoya kaThixo. Oku kuya kukhokelela kumanyano lomtshato owonwabisayo.—IMizekeliso 19:2; Galati 5:22, 23.
‘Tshata Kuphela ENkosini’
Kubaluleke kakhulu ukuba nosukelo neenkolelo ezifanayo nomntu ofuna ukutshata naye. Umtshato lucelomngeni, ufuna uhlengahlengiso olukhulu kwindlela yokuziphatha nakwisimo sengqondo kubo bobabini. Kusengqiqweni ke ukuba, okukhona ninezinto ezininzi ezifanayo nalowo uza kuba liqabane lakho, kokukhona kuya kuba lula ukwenza uhlengahlengiso.
Oku kusinceda sibone isizathu sokuba umpostile uPawulos wabongoza amaKristu ukuba akuphephe “ukubotshwa edyokhweni ngokungalinganiyo kunye nabangakholwayo.” (2 Korinte 6:14) UPawulos wayesazi ukuba ukutshata nomntu ongakholwa kunye naye nongayiqondi ngokufanayo imigaqo yeBhayibhile kunokubangela impikiswano nokungavisisani. Isibongozo sokuba ‘sitshate kuphela eNkosini’ sisengqiqweni. (1 Korinte 7:39) Sibonisa indlela uThixo acinga ngayo. Abo basilandela ngobulumko baphepha ubunzima neengxaki ezininzi.—IMizekeliso 2:1, 9.
Ukukhethelwa Iqabane
Kuthekani ngeendawo apho kuselisiko ukukhethelwa iqabane? Ngokomzekelo, emzantsi Indiya abanye baye baqikelela ukuba ama-80 ekhulwini kubo bonke abantu abatshatileyo bakhethelwa amaqabane ngabazali. Enoba abazali abangamaKristu balandela esi sithethe okanye akunjalo ngumbandela wobuqu. Phofu ke, ukukhethelwa iqabane lomtshato kunokuphumelela xa kubalaseliswa imilinganiselo yokomoya.
Abo bakhetha ukukhethelwa amaqabane bavakalelwa kukuba isigqibo sisezandleni zabantu abanamava nabaqolileyo. Omnye umdala ongumKristu eAfrika uthi: “Abanye abazali bavakalelwa kukuba ngenxa yeminyaka yabantwana babo nokungabi namava, akunakuthenjelwa kubo ukuba benze ugwebo oluhle ngokuqola kokomoya kwabo baza kutshata nabo.” Omnye umlungiseleli ohambahambayo waseIndiya wongezelela wathi: “Abaselula abanamava ebomini yaye banokwenza izigqibo ezisekelwe kwiimvakalelo.” Ekubeni abazali beyazi indlela abayiyo abantwana babo kunaye nabani na, bavakalelwa kukuba bakweyona meko ikhethekileyo yokubakhethela ngobulumko abantwana babo. Kwakhona baya kuba benza ngobulumko ukunikela ingqalelo kwiimbono zomfana nentombazana leyo.
Noko ke, xa abazali beyityeshela imigaqo yeBhayibhile, basenokuphela bezisola xa umtshato kamva uneengxaki. Kuba ngokufuthi amaqabane aza kutshata aba nexesha elincinane lokwazana kakuhle, kunokuvela iingxaki. Yaye ukuba ziyavela, omnye utata ongumKristu waseIndiya ucacisa esithi, “utyekelo lukukubek’ ityala kubazali.”
Abazali abangamaKristu abakhetha amaqabane, bafanele baqwalasele intshukumisa yoko. Xa kukhethwa iqabane lomtshato kucingwa ngosukelo lwezinto eziphathekayo okanye ukunqwenela udumo, kuvela iingxaki. (1 Timoti 6:9) Ngoko ke, abo bakhetha amaqabane bafanele bazibuze oku, ‘Ngaba olu khetho lwenziwe ukuze kuqinisekwe ukuba bobabini bonwabile yaye banempilo entle yokomoya? Okanye mhlawumbi kufunwa ukuphakamisa iwonga lentsapho okanye ubutyebi okanye ukungenelwa ngokwemali?’—IMizekeliso 20:21.
Isiluleko seBhayibhile sicacile yaye siyingenelo. Xa kucingwa ngeqabane lomtshato, kufanele kusoloko kuxhalatyelwa kakhulu indlela yokuziphatha nemeko yokomoya yalowo uza kuba liqabane, enoba lwenziwe njani na ukhetho. Xa oku kwenziwe, uYehova uThixo, uMsunguli welungiselelo lomtshato, uyazukiswa yaye abo batshatayo banokuqalisa benesiseko esiqinileyo sokomoya. (Mateyu 7:24, 25) Oku kuya kubangela umanyano olonwabisayo nolwanelisayo.