Ngaba Wayethanda Uxolo Okanye Wayerhweba Ngezixhobo Zokubulala?

NGUMBHALI KAVUKANI! ESWEDEN

Minyaka le, kubakho abantu okanye imibutho ethiwa jize ngembasa kaNobel ngenxa yokufak’ igxalaba kwintlalontle yoluntu ngeendlela ezahlukahlukeneyo. Kwaqala nini oku, yaye kunagalelo lini kuxolo lwehlabathi?

IGAMA lakhe linxulunyaniswa nokuphucula intlalo-ntle yoluntu, ukanti wazuza ubutyebi obuninzi ngokuthengisa izixhobo zemfazwe. Ngubani loo mntu? NguAlfred Bernhard Nobel, usomashishini nengcali yemichiza yaseSweden. Nangona lo kaNobel enconywa ngegalelo aye wanalo ekuphuculeni intlalo-ntle yabantu, abanye bamgqala njengomntu ‘owayerhweba ngezixhobo zokubulala.’ Ngoba? Kaloku idamanethi le iveliswe ngulo kaNobel, yaye esadla amazimba wazuza ubutyebi ngokwenza nangokuthengisa iziqhushumbisi eziyingozi.

Noko ke, emva kokufa kukaNobel ngowe-1896, kwavela eny’ into eyashiya abantu bebamb’ ongezantsi. Kumyolelo wakhe wabhala ukuba kwimali yakhe, kubekelwe bucala izigidi zeedola ezisi-9 ukuze nyaka ngamnye inzala yazo inikwe abantu abaye bazibalula kwezenzululwazi, kwezamachiza, kwezamayeza, ekubhalweni koncwadi nabo baye bafak’ isandla ekubeni kubekho uxolo phakathi koluntu.

Ekuqaleni, abantu abaninzi babedidekile. Yintoni eyayinokubangela usomashishini weziqhushumbisi abe nomdla wokuwonga abantu abaye banegalelo kwintlalo-ntle yabantu nabafuna kubekho uxolo? Bambi babecinga ukuba uNobel uyakhathazeka xa ebona umonakalo obangelwa zizixhobo zakhe. Noko ke, bambi bade bacinga ukuba lo kaNobel ebezama uxolo ngalo lonke eli xesha. Eneneni, kubonakala ngathi wayecinga ukuba xa esenza izixhobo eziyingozi, abantu baza kuyeka ukulwa. Kuthiwa wakha wathi komnye umbhali: “Kusenokwenzeka ukuba yimizi-mveliso yam eya kuphelisa imfazwe ngokukhawuleza kunezo ngqungquthela zakho,” waza walek’ umsundulo ngelithi: “Mhlawumbi kuya kuze kuthi mhla imikhosi elwayo yabulalana ngephanyazo kuthi nya, athi naloo mazwe ebengalwi othuke aze achithachithe naloo imikhosi ebenayo.”

Ngaba wayenyanisile uNobel? Yintoni eye yafundwa kwinkulungwane emva kokufa kukaNobel?

[Amagama acatshulweyo akwiphepha 3]

“Ndifuna khe ndenze ingadla-ngadla yesiqhushumbisi okanye yomatshini onokubetha kungasali nempukane kutsho kuphele naloo mfazwe”—UALFRED BERNHARD NOBEL

[Inkcazelo Ngemifanekiso ekwiphepha 3]

Page 2: Missile: U.S. Navy photo; building rubble: UN PHOTO 158178/J. Isaac; page 3: Nobel: © Nobelstiftelsen