Bancede Uze Ubakhusele Abantwana Bakho
KUBUHLUNGU ukubona intombazana—esengumntwana ngokwayo—ikhulelwe ingatshatanga. Sekunjalo, iyanda into yokukhulelwa kwabakwishumi elivisayo, yaye ngandlel’ ithile ichaphazela wonk’ umntu. Intlungu yokukhulelwa kwabakwishumi elivisayo ibonisa ukuchana komyalelo kaThixo othi: “Sabani kulo uhenyuzo.”—1 Korinte 6:18.
Sekunjalo, ngamathub’ athile intombazana efundiswe imithetho kaThixo isenokukhetha ukuyityeshela okanye ukwenza izinto ezichasene naloo mfundiso. Ibandakanyeka kuhenyuzo ize ikhulelwe. AmaKristu okwenyaniso asabela njani kule meko? Xa lo usemtsha unxaxhayo ebonisa iimpawu zokuguquka, abazali bakhe namanye amalungu ebandla lamaKristu afanele ngothando amncede aze amxhase.
Kwakhona cinga ngoNicole. Abazali bakhe bamkhulisa ukuze abe liNgqina likaYehova. Ukukhulelwa kwakhe engatshatanga kwababangela banxunguphala. Kodwa uNicole uthi, “Amanye amaKristu ayedla ngokundityelela ekhaya aze andikhuthaze ukuba ndifundisise iBhayibhile ukuze ndizame ukusondela kuYehova.”
AmaNgqina kaYehova akakwamkeli ukuziphatha okubi ngokwesini. Kodwa ayaqonda ukuba ngokusebenzisa imigaqo yeBhayibhile, abenzi bobubi ‘banokutshintsha.’ (Roma 12:2) Eyisekile ukuba uThixo uyabaxolela abenzi bobubi abaguqukayo. (Efese 1:7) Ukanti ayaqonda ukuba umntwana ozalwe ngaphandle kweqhina lomtshato akanatyala. Ngoko kunokuba amphathe ngolunya, amalungu ebandla lamaKristu abonisa uthando, uvelwano nobubele kuye kanye njengoko ebeya kwenjenjalo kuye nawuphi na umntwana okhoyo ebandleni.—Kolose 3:12.
Omnye umama ongenaqabane lomtshato waqalisa ukufundisisa iBhayibhile namaNgqina kaYehova. Wakhawuleza wayamkela inyaniso yeBhayibhile waza wenza iinguqu eziphawulekayo ebomini bakhe. Wathi ngamaNgqina: “Onke ayenomdla ongazenzisiyo kum nakubantwana bam. Ayendipha ukutya, iimpahla zokunxiba nemali xa kuyimfuneko. Ndathi ndakufaneleka ukuya entsimini namaNgqina kaYehova, andinceda ngokunyamekela umntwana wam. Enza konke okusemandleni ukundinceda ndimthande ngokwenene uYehova.”
Ukubakhusela
Sekunjalo, kubhetele ukunceda abaselula baziphephe ezo ngxaki. AmaNgqina kaYehova azabalazela ukubonisa uthando kubantwana bawo. Kunokuba oyikise abantu ngoGawulayo okanye agxininise kwiingozi zokukhulelwa—amaNgqina azama ukubethelela ezingqondweni zabaselula ukuba bamthande ngokwenene uYehova uThixo nemithetho yakhe. (INdumiso 119:97) Akholelwa ukuba abantwana bafanele bafundiswe ngendlela echanileyo ngesini. Okubaluleke nangakumbi kukuba, akholelwa ukuba kwasebusaneni abantwana bafanele bafundiswe imilinganiselo yokuziphatha efumaneka eBhayibhileni. (2 Timoti 3:15) Ezi zinto ziyafundiswa kwiiHolo zoBukumkani zamaNgqina kaYehova. Noko ke, abazali abangamaNgqina bakhuthazwa ukuba bafundisise iBhayibhile nabantwana babo emakhayeni abo. Ukuze abazali nabantwana bafumane ulwalathiso, kuye kwalungiselelwa iincwadi ezifana nethi Imibuzo Yabantu Abaselula—Iimpendulo Eziluncedo.a
Ukuphila ngemilinganiselo yokuziphatha ephakamileyo efumaneka eBhayibhileni kuchasene nokuziphatha okubi okuthandwa ngabantu abaninzi namhlanje ehlabathini. Kodwa yindlela yokuphila enokusindisa izigidi zamantombazana aselula kwintlungu yokukhulelwa esekwishumi elivisayo.
[Umbhalo osemazantsi]
a Ipapashwe ngamaNgqina kaYehova.
[Umfanekiso okwiphepha 12]
AmaKristu okwenyaniso abonakalisa ububele novelwano koomama abangenamaqabane