Ngaba Ziluncedo Okanye Ziyingozi?

Umqhubi woyiswa kukulawula imoto yakhe ize iye kuntlitheka epalini, kwenzakale kakhulu umntu okhwele kuyo. Lo mqhubi ukhawuleza afowune ngeselfowuni yakhe efuna uncedo. Kodwa bekutheni ukuze angakwazi ukuyilawula? Ebekhe wayeka ukujonga endleleni kuba ebephendula ifowuni yakhe.

NJENGOKO sinokubona kulo mzekelo, izinto zobugcisa bale mihla zinokuba luncedo okanye zibe yingozi—kuxhomekeka kwindlela esizisebenzisa ngayo. Noko ke, bambalwa abantu abanokukhetha ukubuyela ekusebenziseni izinto zakudala. Ngokomzekelo, iikhompyutha zisiphungulela umsebenzi omninzi, kuba zisinceda sithenge okanye silungise izinto zethu zebhanki ngeInternet zize zisincede sinxibelelane nabanye abantu nge-email, ivoice mail, okanye ngeevidiyo.

Bekuyizolo oku, amalungu entsapho evuka aye kwiindawo ezahlukahlukeneyo aze angafumani thuba lakuncokola de kube ngokuhlwa. Kodwa ngoku, ngokutsho kweUSA Today, “izibini ezingama-70 ekhulwini ezineeselfowuni ziyafowunelana suku ngalunye ukuze zibulisane, ezingama-64 ekhulwini ziyafowunelana ukuze zicebe, yaye abazali abangama-42 ekhulwini bafowunela abantwana babo suku ngalunye ngeeselfowuni.”

Musa Ukuzibetha Ngoyaba Iingozi Zezinto Zobugcisa

Ngaba ukuzisebenzisa kakhulu okanye ngendlela engeyiyo izinto zobugcisa kunokuba yingozi engqondweni nasemzimbeni? Khawuve ngomzekelo wesibini esasisandul’ ukutshata kwelinye ilizwe laseNtshona. Ngokutsho kwenye ingxelo yeendaba, “sasihleli nje siyafowunelana—ezimotweni zaso, kwindawo yokwenza umthambo, side sifowunelane naxa sikumagumbi awahlukeneyo emzini waso.” Saside maxa wambi sithethe efowunini kangangemizuzu engama-4 000—ngaphezu kweeyure ezingama-66—ngenyanga, yaye sasisithi asinakukwazi ukuphila ngaphandle kweefowuni zaso. UGqr. Harris Stratyner, oyingcali ngezigulo zengqondo wathi “sineempawu zokuba ngamakhoboka. Kufana nokuba ulwalamano lwaso lubotshwa yinto engathethiyo.”

Indlela esenza ngayo izinto isenokubonakala ibaxekile, kodwa iyaxhalabisa. Kubantu abaninzi ukunganxibelelani nabanye, kwanokuba yiyure nje enye akunyamezeleki. Elinye ibhinqa elikwiminyaka engama-20 ubudala lithi: “Sisoloko sifuna ukujonga ii-email, sithanda ukujonga i-Internet nokubhalelana imiyalezo nabahlobo bethu.”

UGqr. Brian Yeo wathi kwiThe Business Times of Singapore, ukuba ezonxibelelwano “zitya ixesha lakho elininzi yaye zikuphela kwento ofuna ukuyenza ebomini bakho, loo nto ibonisa phandle ukuba ikho into engahambi kakuhle.” Ngaphezu koko, abantu abachitha iiyure ezininzi besebenzisa izinto zobugcisa badla ngokungabi naxesha lingako lokwenza umthambo, nto leyo ebabeka esichengeni sokuba nesifo sentliziyo, isifo seswekile okanye ezinye izigulo eziyingozi.

Ezinye iingozi zikhawuleza zibonakale. Ngokomzekelo, kuhlolisiso lwakutshanje kuye kwafunyaniswa ukuba abaqhubi abathetha kwiicellphone, enoba bazibambe ngesandla okanye akunjalo abakwazi kunikela ingqalelo endleleni kanye njengabaqhubi abanxilileyo. Ukubhala umyalezo kwiselfowuni ngoxa uqhuba kunokuba yingozi, yaye kolunye uhlolisiso kwafunyaniswa ukuba bamalunga nama-40 ekhulwini abaqhubi abaphakathi kweminyaka eli-16 nengama-27 ubudala abenza oko. Ngaphezu koko, ukuba unotyekelo lokuthetha kwiselfowuni okanye ukubhala imiyalezo ngoxa uqhuba, khumbula ukuba, xa unokufumana ingozi amapolisa nenkampani yeinshorensi yemoto yakho banokuhlola enoba ubungasebenzisi fowuni kusini na ngaphambi kwengozi leyo. Ukufowuna okanye ukubhala umyalezo kunokukubulala!a Uphando olwenziwa ngowama-2008 emva kwengozi kaloliwe eyasuba imiphefumlo yabantu abangama-25 eKhalifoniya, eUnited States, lwadiza ukuba umqhubi wayesandul’ ukuthumela umyalezo ngeselfowuni kwimizuzwana nje engaphambi kwaloo ngozi. Akazange afumane thuba lakusebenzisa iziqhoboshi.

Ekubeni bebaninzi abantwana abasebenzisa iiselfowuni neekhompyutha kwakunye namajelo okuzihlaziya, kufuneka bafunde ukuzisebenzisa ngobulumko ezi zinto. Banokuncedwa njani? Sicela ufunde inqaku elilandelayo.

[Umbhalo osemazantsi]

[Umfanekiso okwiphepha 5]

Ngaba ezonxibelelwano zitya ixesha lakho elininzi?