Ibhokisi Yemibuzo

◼ Yintoni esimele siyikhumbule xa sisebenzisa iifowuni zecellular neepager?

Ezi zixhobo zisenza sikwazi ukuthetha nabantu enoba siphi na. Nangona ziluncedo, simele sikulumkele ukuzisebenzisa ngamaxesha angafanelekanga nto leyo enokusiphazamisa entsimini nakwiintlanganiso zamaKristu. Kunokwenzeka njani oko?

Khawucinge ngoko bekuya kwenzeka ukuba bezinokukhala sisentsimini sishumayela. Ebeya kuthini umninimzi? Ebeya kusijonga njani xa siyeka ukuthetha naye size siphendule ifowuni? Ngokuqinisekileyo asifuni kwenza nantoni enokuphazamisa abanye ekuphulaphuleni isigidimi soBukumkani. (2 Kor. 6:3) Ngoko ke, xa siphethe iifowuni zecellular okanye iipager, sifanele sizenze zingaphazamisi entsimini.

Kuthekani xa silindile ngoxa abanye beshumayela? Xa siye sabekela bucala ixesha ukuze silisebenzise entsimini, ngaba asifanele sinikel’ ingqalelo ngokupheleleyo kulo msebenzi? Nceda uyihlonele inkonzo engcwele ngokuzisingatha ngelinye ixesha izinto zakho okanye ezasekuhlaleni. (Roma 12:7) Kakade ke, oku akuthethi kuthi asimele kuyisebenzisa ifowuni ukuze sishumayele okanye sishiye imiyalezo kubantu esiza kubatyelela emakhayeni abo.

Simele sikulumkele nangakumbi ukusebenzisa iifowuni zecellular xa siqhuba, ekubeni uphando lubonisa ukuba kulula ukwenza ingozi xa usenjenjalo. EMzantsi Afrika kukwaphula umthetho ukuyisebenzisa xa uqhuba ngaphandle kokuba unesixhobo sokuyisebenzisa ungayibambanga (hands-free kit). Sifanele siqiniseke ukuba siyawuthobela lo mthetho.

Xa sisiya kwiintlanganiso zamaKristu nakwiindibano ezinkulu nezincinane, injongo kukunqula uYehova nokufundiswa nguye. Ngaba asimele sibonise uxabiso ngobungcwele bezi zihlandlo ngokuzenza zingaphazamisi iifowuni neepager? Ukuba kukho into engxamisekileyo sifanele siye kuyiphendula ngaphandle. Kungenjalo, izinto zethu nezinto ezingenanto yokwenza nonqulo sifanele sizenze ngelinye ixesha.—1 Kor. 10:24.

Ngamana singabacingela abanye size sibonise ukuba siyazixabisa izinto zokomoya xa sisebenzisa iifowuni zecellular.