4. Vula Amehlo Xa Uye Kutya Ezivenkileni

UJeff, isiquququ somfo osempilweni noneminyaka engama-38 ubudala, wakhupha intsapho yakhe baya kutya evenkileni kufutshane nasePittsburgh, ePennsylvania, eUnited States. Emva kwenyanga, wabulawa sisibindi. Wabulawa yintoni? Litswele eliluhlaza elalisekutyeni kwakhe—lalinesifo ihepatitis A.

PHANTSE isiqingatha sayo yonke imali echithwa ekutyeni kwelinye ilizwe laseNtshona ichithwa kwiivenkile zokutyela. Ukanti, kwakwelo lizwe, ukutya okufumaneka kwiivenkile zokutyela kutyholwa ngokubangela isiqingatha sezifo zokutya.

Yinyaniso ukuba, xa ukhetha ukuya kutya kwivenkile yokutya, ngomnye umntu othenga izinto zokupheka, ococa ikhitshi, aze apheke. Kodwa ke, nguwe onokukhetha apho uza kutya khona, into oza kuyitya nendlela okugcina ngayo ukutya oza kugoduka nako.

● Zijonge izinto ezikungqongileyo.

UDaiane ohlala eBrazil uthi: “Xa singena okokuqala kwivenkile yokutyela, ndiye ndijonge indlela ezicoceke ngayo iitafile, amalaphu azo, izitya nabantu abahambisa ukutya. Ukuba akunjalo, siyahamba sikhangele enye ivenkile.” Kwamanye amazwe, amagunya ezempilo ahlala ezihlola ukucoceka ezi venkile aze aziwonge ngamanqaku ococeko, elo khadi aluxhoma kwindawo eza kubonwa ngabantu.

● Zilumkele izinto ekufakwa kuzo ukutya.

IU.S. Food and Drug Administration icebisa oku: “Ukuba kuza kudlula iiyure ezimbini ungekafiki ekhaya emva kokuba uthenge ukutya, [ngakumbi ukuba ubushushu bungaphezu kwe-32 degrees Celsius], ungabi saya nako ekhaya.” Ukuba kukho ukutya okuseleyo, yiya ngqo ekhaya uze ukufake efrijini.

Ukuba uyawasebenzisa la macebiso mane eli nqaku, ungakwazi ukukhusela ukutya kwakho.

[Ibhokisi/Umfanekiso okwiphepha 7]

QEQESHA ABANTWANA BAKHO: “Abantwana bethu sibafundisa ukuba bakuphephe ukutya okubonakala kungakhuselekanga.”—UNoemi, kwiPhilippines