UKumkani Ongenatyala Ubethelelwa Esibondeni

UYesu usiwa kwenye indawo engekho kude apha esixekweni aza kubulawelwa kuyo kunye nezinye izaphuli-mthetho ezibini. Le ndawo ibizwa ngokuba yiGolgotha, okanye, iNdawo YoKakayi, ibe ibonakala nakwindawo ethe “qelele.”​—Marko 15:40.

Iimpahla zala madoda agwetyiweyo ziyathathwa. UYesu unikwa iwayini efakwe imore esisiyobisi kunye nenyongo ekrakra. Kuyabonakala ukuba ixutywe ngabafazi baseYerusalem, ibe amaRoma ayavuma ukuba inikwe abantu ababulawayo ukuze bangazivi kakhulu iintlungu. Kodwa uYesu uthi xa eyiva ukuba yintoni angavumi ukuyisela. Kutheni? Kaloku ufuna ukuba sezingqondweni kuyo yonke le nto yenzekayo, ibe ufuna ukuhlala ethe qwa kwaye ethembekile ade afe.

UYesu ubekwa esibondeni. (Marko 15:25) Usezintlungwini kuba amajoni abethelela izikhonkwane ezandleni nasezinyaweni zakhe, agqobhoze inyama kunye nemisipha. Uqaqanjelwa kakhulu xa isibonda siphakanyiswa kuba ubunzima bomzimba wakhe buyenza ivuleke kakhulu le mingxuma. Kodwa uYesu akawangxolisi la majoni. Uthandaza athi: “Tata baxolele, kuba abayazi le nto bayenzayo.”​—Luka 23:34.

Njengokuba eqhele ukwenza, amaYuda axhoma into ebhalwe le nto yenziwe sisaphuli-mthetho esigwetyiweyo. Apha kuYesu, uPilato uxhoma into ebhaliweyo ethi: “UYesu umNazarete uKumkani wamaYuda.” Ibhalwe ngesiHebhere, isiLatini kunye nesiGrike, ukuze abantu abaninzi bakwazi ukuyifunda. Le nto yenziwa nguPilato ibonisa indlela awacaphukela ngayo la maYuda ebemmele efuna abulale uYesu. Ababingeleli abaziintloko bayothuka baze bakhalaze bathi: “Lo mbhalo mawungathi ‘UKumkani wamaYuda,’ kodwa mawuthi, uthi ‘NdinguKumkani wamaYuda.’” Kodwa uPilato akafuni baphinde bamenzise into efunwa ngabo, uthi: “Into endiyibhalileyo ndiyibhalile ke.”​—Yohane 19:19-22.

Aba babingeleli bayacaphuka baze baphinde la nto bekuxokwe ngayo kwiNkundla Ephakamileyo YamaYuda. Ngokulindelekileyo nabantu abagqitha ngendlela banikina iintloko baze bathethe kakubi ngaye bathi: “Tshotsho! Wena wawuthe uza kuyidiliza itempile uze uphinde uyakhe ngeentsuku ezintathu, zisindise kaloku, yihla kweso sibonda sokungcungcutheka.” Nababingeleli abaziintloko nababhali bathetha ngaye besithi: “Makehle kaloku uKristu, uKumkani wakwaSirayeli, kwisibonda sokungcungcutheka, sibone, sizokutsho sikholwe.” (Marko 15:29-32) Ude agezelwe nangaba abethelelwe kunye nabo, omnye ngasekunene omnye ngasekhohlo, ngoku inguye yedwa umntu ongenatyala.

Namajoni amaRoma ayazixhwithela. Mhlawumbi ebesela iwayini emuncu ngoku ahlekisa ngaye, embawisa nangale wayini esenza ngathi ayamnika ngoku eyazi ukuba akazokukwazi ukufika kuyo aze ayithathe. AmaRoma amgezela ngale nto ibhalwe entla kwakhe aze athi: “Ukuba unguKumkani wamaYuda, zisindise.” (Luka 23:36, 37) Khawuyicinge le nto! Umntu obonakalisileyo ukuba uyindlela, inyaniso nobomi, ngoku uphethwe kakubi engenzanga nto ibe uyagezelwa. Kodwa uyanyamezela, akawangxolisi amaYuda abukeleyo, amajoni amaRoma ahlekisa ngaye, nezi zaphuli-mthetho zixhonywe ecaleni kwakhe.

La majoni mane, athathe impahla kaYesu aza ayohlula kane. Enza amaqashiso ukuze abone ukuba ijoni ngalinye liza ufumana eyiphi. Kodwa sona isambatho sakhe sangaphantsi sixabiseke kakhulu, ‘asinamthungo, siphothiwe nje sonke ukusuka phezulu ukuya kutsho ezantsi.’ La majoni athi: “Masingasikrazuli, kodwa masenzeni amaqashiso sizokubona ukuba simele sibe sesikabani.” Benza into eyathethwa ezibhalweni zisithi: “Bahlulelana ngezambatho zam, benza amaqashiso ngeempahla zam.”​—Yohane 19:23, 24; INdumiso 22:18.

Ekuhambeni kwexesha esinye sezi zaphuli-mthetho siyaqonda ukuba uYesu umele ukuba nguye nyhani ukumkani. Singxolisa esinye, sithi: “Akumoyiki na wena uThixo, ekubeni nawe ufumene isigwebo esifanayo? Sisifanele thina esi sigwebo, kuba sigwetyelwe amatyala ethu; kodwa yena lo mntu akenzanga nto.” Emva koko sicenga uYesu sithi: “Yesu uzundikhumbule xa useBukumkanini bakho.”​—Luka 23:40-42.

UYesu uyasiphendula athi: “Ndiyakuthembisa namhlanje, uza kuba nam, eParadesi.” Akathi siza kuba naye eBukumkanini. (Luka 23:43) Usithembisa into eyahlukileyo kule ebeyithembise abapostile bakhe, esithi baza kuhlala naye kwiitrone eBukumkanini. (Mateyu 19:28; Luka 22:29, 30) Mhlawumbi esi saphuli-mthetho singumYuda sikhe seva ngeParadesi esemhlabeni uYehova awayeyenzile ukuze ibe likhaya lika-Adam, uEva, kunye nenzala yabo. Ngoku sinokufa sineli themba.