Imibuzo Evela Kubafundi

◼ Ngaba kuyavisisana nemigaqo yeBhayibhile ngesibini esingamaKristu esitshatileyo ukusebenzisa iipilisi zocwangciso-ntsapho?

IZibhalo azilitsolisi elokuba izibini ezingamaKristu zinyanzelekile ukuba nabantwana okanye, ukuba zinabo, bamele babe bangaphi na. Isibini ngasinye simele sizigqibele ngasese yaye ngokucingisisiweyo enoba simele sizame ukumisela ubungakanani bentsapho yaso. Ukuba sigqiba ekubeni siyicwangcise intsapho yaso, ukhetho lwaso lwezinto zokuthintela ukukhawula lukwangumcimbi wobuqu. Noko ke, simele siqwalasele—ngokuvisisana nolwazi lwaso lweBhayibhile nesazela saso—enoba ukusebenzisa inkqubo ethile bekuya kubonakalisa intlonelo ngobungcwele bobomi kusini na.

IBhayibhile ibonisa ukuba ubomi bomntu buqalisa kwasekukhawulweni kwakhe; uMniki-Bomi uyabubona ubomi bosakhawuliweyo, ‘kwanembumba, [“iembriyo,” NW]’ eya kuthi kamva ikhule esibelekweni. (INdumiso 139:16; Eksodus 21:22, 23a; Yeremiya 1:5) Ngenxa yoko, akumele kwenziwe nawuphi na umgudu wokuphelisa ubomi obusele bukhawuliwe. Ukwenza oko bekuya kuba kukuqhomfa.

Iipilisi zocwangciso-ntsapho zisetyenziswa ngokubanzi kwihlabathi lonke. Zikuthintela njani ukuzala? Kukho iintlobo ezimbini zeepilisi eziphambili—ipilisi engumxube (combination pill) neprogestin-only pill (iminipill). Uphando luye lwazenza zacaca iindlela ezisebenza ngayo ekuthinteleni ukuzala.

Ipilisi engumxube inencindi ye-estrogen neyeprogestin. Ngokutsho kweZiko Lolawulo Lokutya Neziyobisi laseUnited States, “umsebenzi oyintloko” wepilisi engumxube “kukuthintela ukuyileka nokukhutshwa kweqanda kwisingxobo salo.” Kubonakala ukuba xa lusetyenziswa rhoqo, olu hlobo lwepilisi phants’ ukuba soloko lukuthintela ukuyileka nokukhutshwa kweqanda kwisingxobo salo. Xa kungekho qanda likhutshiweyo, ukukhawula akunakwenzeka kwimibhobho yesibeleko (Fallopian tubes). Ngoxa olu hlobo lwepilisi lusenokubangela ukuguquka ‘kwinwebu yangaphakathi esibelekweni [iendometrium] (nto leyo enciphisa ukumila okunokwenzeka),’ oku kugqalwa njengomsebenzi wayo wesibini.

Ukuze kuncitshiswe imiphumo yokugula, kuye kwaveliswa iipilisi ezingumxube ezine-estrogen encinane. Ngokucacileyo, ezi pilisi zingumxube zine-estrogen encinane zivumela ukusebenza okongezelelekileyo kwizingxobo zokuyila amaqanda. UGqr. Gabriel Bialy, ongusomaqhuzu kwiZiko Lempilo Lesizwe Lesebe Lokuvelisa Izinto Zokuthintela Ukukhawula, uthi: “Ukuphononongwa kobungqina obungokwenzululwazi kubonisa ukuba kwanangepilisi ene-estrogen encinane, ukuyileka nokukhutshwa kwamaqanda kwizingxobo zawo kuyathintelwa, kungekhona ngokupheleleyo, kodwa phantse ngomlinganiselo wama-95 ekhulwini . Kodwa into yokuba nje iqanda liye lakhutshwa kwisingxobo salo akuthethi kuthi ubani umithi.”

Ukuba ibhinqa liphosile ukuthabatha ipilisi engumxube ngendlela ekucetywe ngayo, kunokwenzeka ngokungakumbi ukuba umsebenzi wesibini wale pilisi ube nenxaxheba ekuthinteleni ukuzala. Kuhlolisiso olwenziwa kumabhinqa aphose kwakabini ukuthabatha iipilisi ezinomxube omncinane kufunyaniswe ukuba kuma-36 ekhulwini awo aye “asinda” ekubeni amaqanda ayileke kuwo. Ulindixesha oyiContraception unikel’ ingxelo yokuba kwiimeko ezinjalo “ukusebenza kweepilisi kwinwebu engaphakathi esibelekweni nokolwelo oluphuma kwilungu lesini lebhinqa kusenokuqhubeka kuthintela. . . ukukhawula.”

Kuthekani ngolunye uhlobo lwepilisi—ipilisi eneprogestin kuphela (iminipill)? IDrug Evaluations (1986) inikela le ngxelo: “Ukuthintela ukuyileka nokukhutshwa kweqanda kwisingxobo salo akungomsebenzi uyintloko wokuthintela ukukhawula owenziwa ziiminipill ezineprogestin kuphela. Ezi pilisi zibangela ukuyileka kolwelo olungqindilili phakathi kwilungu lesini lebhinqa oluthi ngomlinganiselo othile lungabi nakugqojozwa lidlozi; zisenokulandisa ixesha lokuhamba kwedlozi phakathi kwemibhobho zize kwakhona zibangele ukuvaleka kwenwebu ephakathi esibelekweni [nto leyo ebiya kukuthintela ukukhula kwalo naliphi na iqanda elihlangene nedlozi].”

Bambi abaphengululi bathi ngokusebenzisa ipilisi eneprogestin kuphela, “ukuyileka nokukhutshwa kweqanda kwisingxobo salo okuqhelekileyo kuyenzeka kubantu abangaphezu kwama-40 ekhulwini abayisebenzisayo le pilisi.” Ngoko le pilisi isoloko ikuvumela ukuyileka nokukhutshwa kweqanda kwisingxobo salo. Ulwelo olungqindilili olukwilungu lesini lebhinqa lusenokuyivala indlela yedlozi yaye ngaloo ndlela lungakuvumeli ukukhawula; kungenjalo, imeko-bume engentle ebangelwa yile pilisi esibelekweni isenokuthintela iqanda elihlangene nedlozi ekubeni limile lize likhulele ekubeni ngumntwana.

Ngoko ke, kunokuqondwa ukuba, xa zisetyenziswa rhoqo kucwangciso-ntsapho, zombini ezi ntlobo ziphambili zeepilisi zibonakala zithintela ukukhawula phantse kwiimeko zonke yaye ngaloo ndlela aziqhomfisi. Noko ke, njengoko ipilisi eneprogestin kuphela (iminipill) isoloko ikuvumela ukuyileka nokukhutshwa kweqanda kwisingxobo salo, inokwenzeka kakhulu into yokuba maxa wambi ithintela ukuzala ngokuphazamisana nokumila kobomi obukhawuliweyo nobusebuqalile ukuyileka esibelekweni. Uhlolisiso lwenzululwazi lubonisa ukuba ngokuqhelekileyo (kwisibeleko esingachatshazelwanga kukusetyenziswa kweepilisi zocwangciso-ntsapho) “amashumi amathandathu ekhulwini amaqanda ahlangene namadlozi . . . ayalahleka ngaphambi kokuba okokuqala kudlule ithuba lokuba sexesheni.” Noko ke, into yokuba oku kusenzeka yahluke mpela kunokukhetha ukusebenzisa inkqubo yocwangciso-ntsapho ekunokwenzeka ngakumbi ukuba ithintele ukukhula kweqanda elihlangene nedlozi.”

Ngenxa yoko, kukho iinkalo ezingqalileyo ezingokokuziphatha ezimele ziqwalaselwe ukuba isibini sixubusha nogqirha ngomcimbi wokusebenzisa iipilisi zocwangciso-ntsapho. AmaKristu afanele enze izigqibo kwanangemibuzo yangasese neyeyobuqu ukuze akwazi ukulondoloza ‘isazela esilungileyo’ phambi koThixo noMniki-Bomi wethu.—IZenzo 23:1; Galati 6:5.

[Umbhalo osemazantsi]