Abavakalisi BoBukumkani Bayabalisa
Oneminyaka Emihlanu Ubudala Uvusa Umdla
PHAKATHI kwamaNgqina kaYehova angaphezu kwama-40 000 aseVenezuela kukho inkwenkwana eneminyaka emihlanu ubudala eyathi yanamava achukumisayo. Yayiphulaphula ngenyameko kwiintetho zesidlangalala ezazinikelwa kwincwadi ethi Life—How Did It Get Here?—By Evolution or by Creation? nakwizihlandlo eyayithe intsapho kamva yaqwalasela le ncwadi. Lo uneminyaka emihlanu ubudala, owayezalwa kwintsapho eyayizixabisile izinto zobuthixo, ngenxa yoku wayazi into yokuba imfundiso yendaleko ithi umntu wabakho evela ‘kwisuphu.’ Esinye sezicatshulwa esikule ncwadi sixubusha ngemfundiso yendaleko ethi ubomi bavela ekudibaneni kwezinto ezingenabomi (organic soup).
Kangangeminyaka eli-14, intsapho eselumelwaneni (indoda, umfazi, noonyana ababini abakwishumi elivisayo, nentombazana eneminyaka esixhenxe ubudala) ibisoloko ingenamdla kwizibongozo zentsapho engamaNgqina zokuba ihlolisise iBhayibhile nakwizimemo zayo zokuba iye kwiHolo yoBukumkani.
Ngenye imini ngoxa umfazi oliNgqina wayehlamba izitya, weva incoko ebangel’ umdla phakathi konyana wakhe nentombazana yommelwane ngoxa babemi ngaselucingweni olwahlula amakhaya abo. Le nkwenkwana yathi: “Yintoni oyaziyo wena! Abantu behlabathi bathi umntu wavela kwisuphu!” Le ntombazana yaphendula, njengoko iqhele ukwenjenjalo: “Ngaba uyaphambana?” Le nkwenkwana yaphendula isithi: “Hayi, andiphambananga. Abantu behlabathi bathi umntu wavela kwisuphu; kodwa badalwa nguYehova.” Le nkwenkwana yayihleka le ngcamango; icinga ukuba inokuba yisuphu nje eqhelekileyo etyiwayo, eyayingayithandi. Yandula ke yahlabela mgama ixelela le ntombazana oku: “Kuza kufuneka ukuba utata anike utata wakho incwadi ethi Creation ukuze abone ukuba uThixo wamdala umntu.” Noko ke, intombazana yathi bona babengamaKatolika, ibe oko kwayiphelisa incoko.
Xa indoda yalo dade, engumdala, yathi yabuyela ekhaya ivela emsebenzini, wayibalisela le ncoko wayeyiphulaphule. Nangona esi siganeko siphakathi kwabantwana sabacubhula ngentsini, lo mzalwana wacinga ukuba mhlawumbi uYehova ufuna ukuba aphinde anikele ubungqina kwindoda engummelwane wakhe. Ngoko kwiintsuku ezimbalwa kamva, waya kummelwane wakhe waza wambalisela incoko yabantwana. Wathi ngenxa yonyana wakhe uye wathanda ukuba amnike umbhalo wencwadi ethi Creation. Eli Ngqina lancomela ukuba ummelwane walo ayifunde le ncwadi ngaphandle kokuqala ayigwebe, njengoko yayiza kumbonisa ngemvelaphi yobomi.
Okwamothusayo lo mzalwana kukuba, kwiintsuku ezimbalwa kamva esi sibini, esasisoloko singenamdla enyanisweni kangangeminyaka, seza kwikhaya lalo mzalwana sivakalisa udano lwaso ngesimo sengqondo esiye sasibonakalisa kubo yonke le minyaka. Sathi siyawuxabisa ngokwenene umgangatho omangalisayo wencwadi ethi Creation.
Umphumo waba kukuqaliswa kwesifundo seBhayibhile nale ntsapho. Yaqalisa ukuya rhoqo kwiintlanganiso ibe ngokukhawuleza baba ngabavakalisi beendaba ezilungileyo. Indoda, umfazi wayo, noonyana ababini abakwishumi elivisayo babhaptizwa kwindibano yesithili, ibe intombi yabo nayo ingumvakalisi woBukumkani. Umfazi waqalisa inkonzo yobuvulindlela babancedani obungenamda ngokukhawuleza emva kokuba ebhaptiziwe.
UYesu Kristu uyabazi abo baneentliziyo ezilungileyo, yaye unako ibe uyabasebenzisa nabantwana ukufikelela iintliziyo ezilunge ngolo hlobo.—Yohane 10:14.