Ngaba Ilishwa Lifanele Libulawule Ubomi Bakho?

KULUDWE, ekuphela komntu ongazange akholelwe kwilishwa yayinguYesu Kristu. Yayiyintoni imbono yakhe ngoku?

Iingxelo zenkulungwane yokuqala ezingobomi bukaYesu (incwadi yeBhayibhile kaMateyu, kaMarko, kaLuka nekaYohane) ziyalatha inkolelo yakhe iyeyokuba abantu ngabanye banokuphembelela ikamva labo, oko kuthetha nje ukuthi banokuphembelela oko kwenzeka kubo.

Ngokomzekelo, uYesu wathi uThixo uya “kubapha okulungileyo abo bamcelayo” kwanokuba umntu “onyamezele kwada kwaba sekupheleni, lowo uya kusindiswa.” Ngokufanayo, xa abemi baseYerusalem bengazange bazikhathalele izilumkiso engezazisindise ubomi babo, uYesu akazange athi lilishwa elamisela indlela abasabela ngayo. Kunoko, wathi: ‘Anivumanga.’—Mateyu 7:7-11; 23:37, 38; 24:13.

Kwakhona sinokuyiqonda imbono kaYesu koko wakuthethayo ngengozi eyabulala abathile neyenzeka eYerusalem, esithi: “Hi, bona abo balishumi elinesibhozo, bawelwa yinqaba eseSilowa, yababulala; niba na babenetyala ngaphezu kwabo bonke abantu abemiyo eYerusalem? Ndithi kuni, Hayi.” (Luka 13:4, 5) Phawula ukuba uYesu akazange athi loo madoda ali-18 afa ngenxa yelishwa, engazange atsho nokuba afa ngenxa yokuba engendawo ukudlula abanye. Kunoko, ngokungafaniyo nabaFarisi bomhla wakhe ababezama ukuvisisanisa ukukholelwa kwilishwa nenkolelo yabantu yenkululeko yokuzikhethela, uYesu wafundisa ukuba umntu unokuliphembelela ngokwakhe ikamva lakhe.

Ngokufanayo abapostile bakaYesu bafundisa ukuba usindiso lulukhetho lomntu wonke. Umpostile uPawulos wabhala: “Uzaze kwasebuntwaneni izibhalo ezingcwele, ezinako ukukulumkisela elusindisweni.” Ibe umpostile uPetros wathi: “Walangazeleleni ngokweentsana ezisandula ukuzalwa, amasi angawelizwi, angenankohliso, ukuze ngawo nikhulele elusindisweni.” (2 Timoti 3:15; 1 Petros 2:2, NW; bona kwaneZenzo 10:34, 35; 17:26, 27.) IEncyclopœdia of Religion and Ethics kaHastings ibonisa ukuba ababhali benkulungwane yesibini neyesithathu, abanjengoJustin, uOrigen noIrenaeus, ‘babengazi nento le ngokumiselwa kwekamva kusengaphambili okungaxhomekekanga kwiimeko; bafundisa ngenkululeko yokuzikhethela.’

Kodwa ukuba abaninzi kangaka, kuquka amaYuda amaninzi awayekunye nabo, babekholelwa kwiintlobo ezithile zelishwa, kwakutheni ukuze uYesu namaKristu okuqala bangakholelwa ekubeni ikamva lomntu limiselwe? Esinye isizathu sikukuba le ngcamango izele ziinkathazo. Ukukhankanya nje ezimbini: Ukukholelwa kwilishwa kuyangqubana neempawu zikaYehova uThixo; kutyhilwa njengokungeyonyaniso zizibakala ezingqinelweyo. Ngapha koko, kusenokubonakalisa ubomi bakho bakalokunje nobekamva. Ukukuqwalasela ngokusondeleyo oku kuya kukubonisa indlela okuyinyaniso ngayo oku.

Okubandakanyekileyo Ekukholelweni Kwilishwa Neempawu ZikaThixo

Emva phayaa ngenkulungwane yesithathu Ngaphambi kweXesha Eliqhelekileyo, isithandi sobulumko uZeno waseCitium safundisa abafundi baso eAtene ukuba “bamkele ummiselo wokukholelwa kwiLishwa njengowona uncamisileyo ngandlel’ ithile efihlakeleyo.” Noko ke, ngenye imini, emva kokuba uZeno efumanise ukuba isicaka sakhe sasinetyala lokuba, kwafuneka ukuba uZeno lowo ajamelane nemiphumo yentanda-bulumko yakhe. Kwenzeka njani oko? Xa wathi walibetha isela, isicaka saziphendulela ngelithi: “Kodwa kwakumiselwe kwangaphambili ukuba ndibe.”

Isicaka sikaZeno sasiphakamisa ingongoma. Ukuba ukholelwa ekubeni ubomi bomntu ngamnye bumiselwe kwangaphambili, ngoko ukubek’ ityala umntu ngenxa yokuba elisela kufana nokubek’ ityala imbewu yeorenji ngokusuka ibe ngumthi weorenji. Ngapha koko, umntu nembewu zikhula nje ngokwendlela emiselweyo. Noko ke, ukuqiqa ngolo hlobo kuphumela entwenini?

Kaloku, ukuba izaphuli-mthetho zilandela nje oko zikumiselweyo, makube ke lowo wamisela ikamva lazo ubekek’ ityala ngezenzo zazo. Ebeya kuba ngubani lowo? Ngokutsho kwabantu abakholelwa kwilishwa, nguThixo ngokwakhe. Xa sihambela phambili nale ndlela yokuqiqa, uThixo umele ngoko abe yiMbangi Yokuqala yabo bonke ubungendawo, ugonyamelo nengcinezelo eyakhe yabangelwa ngumntu. Ngaba uyakukholelwa oko?

Inqaku elikwiNederlands Theologisch Tijdschrift (Ulindixesha WesiDatshi Wezakwalizwi) liphawula ukuba imbono enjalo yokukholelwa kwilishwa “ikukucingela uThixo enobuntu ubuncinane obungenakuthethelelwa ngamaKristu.” Ngoba? Ngenxa yokuba iyangqubana nobuntu bukaThixo obutyhilwe ngababhali abaphefumlelweyo beBhayibhile. Ngokomzekelo, phawula ezi zicatshulwa zencwadi ephefumlelweyo yeeNdumiso: “Ngokuba wena akunguThixo onanze okungendawo.” “Ke yena ongendawo nothanda ukugonyamela, umthiyile umphefumlo wakhe.” “[UKumkani kaThixo omiselweyo nonguMesiya] akhulule imiphefumlo yawo ekuxinezelweni nasekugonyamelweni.” (INdumiso 5:4; 11:5; 72:14) Ngokucacileyo, okubandakanyekileyo kwinkolelo yelishwa neempawu zikaThixo akudibani nje kwaphela.

Ilishwa Nezibakala

Kodwa kuthekani ngeentlekele ezingokwemvelo? Ngaba azimiselwanga kwangaphambili ukuba zenzeke ibe ke ngoko kungenakwenzeka ukuba zithintelwe?

Izibakala zibonisa ntoni? Phawula oko kuye kwafunyaniswa xa bekusenziwa uphando ngonobangela weentlekele ezingokwemvelo, njengoko kuye kwanikelwa ingxelo kwiphephandaba lesiDatshi iNRC Handelsblad: “Ukuza kuthi ga ngoku, iinyikima zomhlaba, izikhukula, ukuphihlika komhlaba neenkanyamba . . . bezisoloko zijongwa njengemimangaliso yendalo. Noko ke, uhlolisiso lubonisa ukuba ukungenelela komntu kwindalo ngendlela enogonyamelo kuye kwawachaphazela ngokunzulu amandla endalo okuzikhusela kwiintlekele. Ngenxa yoko, iintlekele ezingokwemvelo zisuba imiphefumlo emininzi ngakumbi kunangaphambili.”—Akekeliswe sithi.

Izikhukula zaseBangladesh ezikhankanywe kwinqaku elidluleyo zingumzekelo woku. Izazinzulu ngoku zithi “ukutshatyalaliswa kwemimandla emikhulu yamahlathi yaseNepal, kuMntla Indiya naseBangladesh kuye kwangunobangela ophambili wezikhukula eziye zantlitha iBangladesh kwiminyaka yakutshanje.” (Iphephancwadi iVoice) Enye ingxelo ithi ukutshatyalaliswa kwamahlathi kuye kwawunyusa umlinganiselo wezikhukula eBangladesh ukusuka kwisikhukula esinye kwiminyaka engama-50 ukusa kwesinye kuyo yonke iminyaka emine. Izenzo ezifanayo zokungenelela komntu kweminye imimandla yehlabathi ziye zakhokelela kwimiphumo eyintlekele ngokufanayo—iimbalela, ukutsha kwamahlathi nokuphihlika komhlaba. Ewe, zizenzo zomntu—kungekhona ilishwa eliyimfihlelo—ngokufuthi ezibangela iintlekele ezingokwemvelo okanye ukuzenza zibe mbi gqitha.

Ekubeni oko kunjalo, izenzo zomntu zifanele kwakhona zenze okuchaseneyo noko: ukunciphisa iintlekele. Ngaba oko kunjalo? Eneneni kunjalo. Qwalasela ezi zibakala: IUNICEF (United Nations Children’s Fund) inikela ingxelo yokuba kangangeminyaka amakhulu abantwana ngaphakathi kwelaseBangladesh baye baziimfama. Ngaba oku kwakubangelwa lilishwa elingenakuguqulwa? Nakanye. Emva kokuba abasebenzi beUNICEF beyisele oomama ukuba bondle iintsapho zabo kungekuphela nje ngerayisi kodwa kwanangeziqhamo nemifuno, isifo samehlo saphelelwa ngamandla. Kungokunje, le nguqulelo kuhlobo lokutya iye yasindisa amakhulu abantwana baseBangladesh ekubeni ziimfama.

Ngokufanayo, abangatshayiyo, ngokomlinganiselo, baphila ukususela kwiminyaka emithathu ukusa kwemine ngaphezu kwabo batshayayo. Abahambi ngezithuthi abazibophayo iibhanti zokhuseleko benzakala kwiingozi ezimbalwa ezibulalayo kunabo bangazibophiyo. Ngokucacileyo, zizenzo zakho—kungekhona ilishwa—eziphembelela ubomi bakho.

Imiphumo Ebulalayo Yokukholelwa Kwilishwa

Njengoko kuye kwakhankanywa, ukukholelwa kwilishwa kunokunciphisa ubomi bakho. Njani? Ekuxubusheni “imizekelo yokukholelwa kwilishwa yohlobo oloyikeka ngakumbi,” iThe Encyclopedia of Religion ithi: “Ukususela ngeMfazwe yeHlabathi II sazi ngohlaselo lokuzibulala labemi baseJapan nokuzibulala kwimimandla yama-SS (Schutzstaffel) ebudeni bolawulo lukaHitler ngenxa yengcamango yokumiselwa kwangaphambili (Schicksal) ecingelwa ixabiseke lee kunobomi babantu ngabanye.” Umthombo okwamnye uphawula ukuba, eyona nto yakutshanje kukuba, “uhlaselo lokuzibulala oluphenjelelwa lunqulo kumaxhoba athile nto leyo ecingelwa njengemanyumnyezi kumaSilamsi . . . iye yabalaseliswa ngokuthe rhoqo kumaphephandaba kwiMpuma Ekufuphi.” Ngokutsho kwezo ngxelo, amawaka amajoni aselula, aya edabini eyisekile kukuba “ukuba ayibhalwanga into yokuba ubani ufanele afe, akayi kwenzakala.”

Ukanti, kwanabafundisi abahlonelwayo bamaSilamsi bakuchasile ukungakhathali okunjalo. Ngokomzekelo, enye inkokeli yamaSilamsi yathi: “Lowo usemlilweni ufanele azinikele ekuthandeni kukaThixo; kodwa lowo ongekangeni emlilweni akuyomfuneko ukuba aziphosele kuwo.” Okulusizi kukuba, iqela elikhulu lamajoni alenzanga ngokuvisisana necebiso lenkokeli yamaSilamsi. Ebudeni beminyaka yemfazwe ephantse ibe sibhozo, eIran kwafa abantu abangama-400 000—abantu ababulawe emfazweni abangaphezu kwabo bafa kwelaseUnited States ebudeni beMfazwe yeHlabathi II! Ngokucacileyo, ukukholelwa kwilishwa kunokubunciphisa ubomi bakho. Kusenokude kubeke engozini ubomi bakho bekamva. Njani?

Ekubeni umntu okholelwa kwilishwa ekholelwa ekubeni ikamva alinakuphepheka yaye limiselwe njengexesha elidluleyo, usenokuthi ngokulula avelise isimo sengqondo esiyingozi. Sisiphi esi simo sengqondo? IEncyclopedia of Theology iyaphendula: “Ubani . . . uziva engenakuzinceda, engabalulekanga, eyinto engeloncedo kwiinkqubo zentlalo ezibonakala zingenakuphepheka. Oku kuphembelela ukuyekelela okuthethelelwa ngenkcazelo engokwenkolelo yokuba yonke into ixhomekeke kwilishwa elintsonkothileyo kodwa elongamileyo.”

Yintoni eyenza ukuyekelela kube yingozi kangaka? Ngokufuthi kukhokelela kwisimo sengqondo esiphoxayo sokuziva woyisiwe. Oku kusenokumthintela umntu okholelwa kwilishwa ekubeni athabathe inyathelo lokuqala okanye kwanokusabela kwisimemo esimangalisayo sikaThixo esithi: “Wenani! Nonke nina ninxaniweyo, yizani emanzini . . . Thobani iindlebe zenu, nize kum; yivani, uphile umphefumlo wenu.” (Isaya 55:1-3) Ukuba ukukholelwa kwilishwa kubangela ukuba ‘ungezi’ ngaphambili nokuze ‘uve,’ kuya kuphumela ekubeni uphulukane nethuba lokuba ‘uphile’ ngonaphakade kwiParadisi ezayo ebuyiselwe emhlabeni. Enjani yona ilahleko esiya kujamelana nayo!

Ngoko umi phi wena? Ukuba wakhulela kwibutho apho iingcamango zokukholelwa kwilishwa ziyila isiseko sendlela abantu abacinga ngayo, usenokuba wayamkela le nkolo ngaphandle kwamathandabuzo. Kambe ke, iingongoma ezahlukileyo koko ezixutyushwe kweli nqaku zisenokuba zikuncedile ubone ukuba ubukhulu becala ubomi bakho bakalokunje nobexesha elizayo bumiselwa zizenzo zakho.

Njengoko uye wabona, ingqiqo, izibakala, ibe ngaphezu kwako konke, iZibhalo Ezingcwele zibonisa ukuba awumele unikezele kwisimo sengqondo sokoyiswa yinkolelo yelishwa. Endaweni yoko, kunjengokuba uYesu wabongozayo: “Zamani ngamandla . . . ukungena ngesango elimxinwa.” (Luka 13:24, The Emphatic Diaglott, ufundo lwenguqulelo ethe ngqo ephakathi kwemigca.) Wayethetha ukuthini? Omnye umhlalutyi weBhayibhile uyacacisa: “Igama elithi [zamani ngamandla] lithatyathwe kwimidlalo yamaGrike. Kugqatso lwawo . . . ayezabalaza, okanye ezama ngamandla, okanye esenza ngako konke anako ukuze oyise.” Endaweni yokuba uzinikele ekoyisakaleni ebomini, uYesu wabongoza ukuba ungazabalazeli nayiphi na into ngaphandle koloyiso!

Ngenxa yoko, kuphose kude nakuphi na ukungakhathali okubangelwa kukukholelwa kwilishwa. Ngenela ugqatso lobomi njengoko iLizwi likaThixo libongoza, yaye ungavumeli inkolelo kwilishwa ikuthothise. (Bona eyoku-1 kwabaseKorinte 9:24-27.) Sandise isantya sakho ngokuthi usabele ngokukhawuleza kwisimemo esiphefumlelweyo esithi: “Nyula ke ubomi, ukuze uphile, wena nembewu yakho.” Unokulwenza njani olo khetho? ‘Ngokuthi umthande uYehova uThixo wakho, uliphulaphule ilizwi lakhe, unamathele kuye.’ Ukwenza oko kuya kukukhokelela ekubeni woyise, kuba uYehova uya kuzingqina ‘ebubomi bakho nokolulwa kweemini zakho.’—Duteronomi 30:19, 20.

[Umfanekiso okwiphepha 7]

UMoses akazange ashumayele inkolelo kwilishwa kodwa wabongoza wathi: “Nyula ke ubomi, ukuze uphile.”