Kwazi Ukuncokola!
1 Simele sidlulisele inkcazelo kwabanye ukuze siphumeze uthumo esilunikiweyo lokushumayela nokwenza abafundi. (Mat. 24:14; 28:19, 20) Ukuncokola kusenokuba nzima kwanaphakathi kwabahlobo. Yintoni enokusinceda sikwazi ukufikelela abantu esingabaziyo ngeendaba ezilungileyo?
2 Yiba Nobuhlobo: Zama ukuzibeka kwimeko yabo uthetha nabo entsimini. Kweli hlabathi siphila kulo, siyaqondakala isizathu sokuba abantu bangathembani okanye boyike abantu abangabaziyo. Loo nto inokuba ngumqobo wokuncokolisana. Unokukoyisa njani ukungatyhileki kwabo udibana nabo? Kwanangaphambi kokuba siwuvule umlomo, indlela esinxibelelana ngayo nabanye yimbonakalo yethu endilisekileyo. Xa sinxibe kakuhle yaye sisenza izinto ngendlela endilisekileyo siya kubenza bakhululeke.—1 Tim. 2:9, 10.
3 Enye into eluncedo kukukhululeka nokuba nobuhlobo. Kubenza bakhululeke abantu baze batyekele ekuphulaphuleni. Le nkalo ifuna ukuba ulungiselele kakuhle. Xa sikwazi kakuhle oko siza kukuthetha, asibi navalo. Yaye olu xolo lwengqondo lunokutsalela abanye kwisigidimi sethu. Elinye ibhinqa lathetha lenjenje ngotyelelo lweNgqina elithile: “Into endiyikhumbulayo ngalo yayiluxolo lwengqondo olwalubonakala kobo buso balo buncumileyo. Yandichukumisa loo nto.” Oku kwabangela ukuba eli bhinqa liziphulaphule iindaba ezilungileyo.
4 Iimpawu Ezidla Ngokutsala Abantu: Kufuneka sibe nomdla onyanisekileyo kwabanye. (Fil. 2:4) Enye indlela esinokukwenza ngayo oku kukungayilawuli incoko. Ngapha koko, ukuphulaphula kuyinxalenye ebalulekileyo yencoko. Xa sifuna izimvo zabo basiphulaphuleyo size sibe nomdla wokwenene kuloo nto bayithethayo, baye bayiqonde into yokuba sibakhathalele. Ngoko xa abo uncokola nabo bethetha, musa ukungxamela ukungena kwintshumayelo yakho osele uyilungiselele kwangaphambili. Bancome ukuba unako ukwenjenjalo ngokunyanisekileyo, uze uzame ukongeza koko bakuthethileyo. Ukuba amagqabaza abo avakalisa inkxalabo abanayo, tshintsha intshumayelo yakho ukuze uthethe ngezo zinto zibaxhalabisayo.
5 Ukuthozama nokuthobeka kwengqondo kwenza kube lula ukunxibelelana. (IMize. 11:2; IZenzo 20:19) Abantu batsaleleka kuYesu ngenxa yokuba ‘ngenxa yokuba wayenobulali yaye ethobekile ngentliziyo.’ (Mat. 11:29) Kwelinye icala, impakamo iyabagxotha abantu. Ngaloo ndlela, nangona siqinisekile ukuba siyifumane inyaniso, siyakuphepha ukubanyanzela ngezimvo zethu abanye.
6 Kuthekani ukuba amagqabaza aloo mntu abonisa ukuba uneenkolelo ezichaseneyo neBhayibhile? Ngaba kunyanzelekile ukuba simlungise? Ewe sinokumlungisa, kodwa kungekhona kutyelelo lokuqala. Kudla ngokunceda ukunamathela kwiingcamango esivumelana ngazo ngaphambi kokuba singene kwiimfundiso zeBhayibhile asenokukufumanisa kunzima ukuzamkela. Oku kufuna umonde nobuchule. UPawulos wasimisela umzekelo omhle kule nkalo xa wayeshumayela kubagwebi beAreyopago.—IZenzo 17:18, 22-31.
7 Okona kubaluleke nangakumbi, uthando olungaqhutywa kukuzingca luya kusinceda sikwazi ukuncokola ngokuphumelelayo. NjengoYesu, simele sibasizele abantu ‘abahlinzekileyo nabalahlwe njengezimvu ezingenamalusi.’ (Mat. 9:36) Oko kusenza sibashumayeze iindaba ezilungileyo size sibancede bangene kwindlela esa ebomini. Siphethe isigidimi sothando, ngoko masisidlulisele ngothando. Xa sisenjenjalo, sixelisa uYehova uThixo noYesu Kristu—abona bantu bakwaziyo ukunxibelelana kwindalo iphela.