Isizathu Sokuba Besebenzisa Izinto Zabangasekhoyo Elunqulweni

ENAPLES, eItali. Khawuzithelekelele ulapho kwiminyaka yokuqala yenkulungwane ye-18 yeXesha lethu Eliqhelekileyo. Kwindlu yalapho yecawa kabhishophu, isithandi sobulumko esingumIrish uGeorge Berkeley simi phambi kwerelic (into ethile yomntu ongasekhoyo) edumileyo yonqulo. Engakukholelwa oko akubonayo ubukele igazi lika-“San Gennaro,” “ingcwele” uJanuarius eyayingumKatolika, linyibilika lize libe lulwelo.

INaples ayiguqukanga kuyaphi kulo mbandela. Ngokomzekelo, phezu kwayo nje imozulu embi ngesinye isihlandlo kwiminyaka yakutshanje, kwakhona loo cawa yayinyakazela ngabantu, ibe kwakwenzeke okubonakala kungummangaliso. Into ethile eyashiywa ngumntu ongasekhoyo nomngcelele owawukhokelwa yikhadinali engubhishophu omkhulu wamkelwa ngentswahla yezandla. Ewe, esi yayisesinye sezihlandlo ezininzi ekwathi ngaso igazi lika-“San Gennaro” labonakala lisiba lulwelo. Kuthiwa imimangaliso ebandakanya le nto yonqulo yongasekhoyo iye yenzeka ukususela ngenkulungwane ye-14.

Ngokwesithethe samaKatolika, irelic (igama elisuka kwelesiLatini elithi relinquere, elithetha “ukushiya ngasemva”) yinto eshiywe ngumntu owayegqalwa njengengcwele. Njengokuba iDizionario Ecclesiastico ibonisa, izinto ezashiywa ziingcwele “zichazwa ngokuchanileyo njengomzimba okanye inxalenye yomzimba nothuthu lweNgcwele, ngokungakumbi zichazwa njengento eyadibana nomzimba wengcwele ibe ngoko ke ifanelwe kukuhlonelwa.”

Ukwamkelwa Kwazo Ngoopopu

Mhlawumbi, abaninzi bayazinqula izinto ezasalayo zabangasekhoyo ngenxa yemimangaliso ebayibonayo enxulumene nazo. Kuyabonakala ukuba ukwamkelwa kwazo ngoopopu kuyenye into ebangela ukuthandwa kwazo ngabantu.

Ubuncinane oopopu abane kwiminyaka engama-70 edlulileyo baye banikela ingqalelo ekhethekileyo kwizinto ezashiywa ngabangasekhoyo. Iphephancwadi lamaKatolika lityhila ukuba ngokufanayo nomanduleli wakhe onguPius XI, uPopu Pius XII “wazigcina kuye izinto ezashiywa yingcwelekazi yaseLisieux.” UPaul VI “wagcina umnwe wompostle [uTomas] kwidesika ekwigumbi lakhe lokufundela,” yaye uJohn Paul II “egumbini lakhe, ugcine amalungu . . . angaphiliyo aseleyo” “eNgcwele uBenedict” “naweNgcwele uAndrew.”—I-30 giorni kaMatshi 1990, iphepha 50.

Ngenxa yokwamkelwa okunjalo ngoopopu, akumangalisi ukuba ukufunwa kwezinto ezashiywa ngabangasekhoyo ukuze zinqulwe ngasese nasekuhleni kusanda. Kodwa ngaba ukuhlonela izinto zabangasekhoyo ezisetyenziswa elunqulweni kuyamkholisa uThixo?

[Umfanekiso okwiphepha 3]

I-“reliquary,” into ekugcinwa kuyo izinto zabangasekhoyo ezise- tyenziswa elunqulweni

[Inkcazelo]

Courtesy of The British Museum